O levitija kola so na sine sveštenikija sine len razna javera zadače. Jekh tari zadača sine te služinen sar stražarija ko hrami. Len nadgledinela len sine o hramsko zapovedniko. O evrejsko pisateli o Filon objasninela kola sine o zadače akale stražarengere: „Nesave lendar služinena sine sar stražarija anglo udara, a nesave anglo svetilište te šaj te na khuven manuša so nane len pravo ko adava, bizi razlika dali namerno ili nenamerno. Javera phirena sine okolu o hrami te šaj te arakhen le. Ola meninena pe sine ko smene hem diveskoro hem rakjate“

O sudsko sovet šaj sine ko bilo kova vreme te rodel pomoš taro akala stražarija. O stražarija sine o edinstvena Evreija kolenge so o Rimjanja dozvolinena sine te ovel len oružje.

Sprema o izučuvači Joakim Jeremias, keda o stražarija astargje e Isuse, ov pučlja len soske na kergje adava džikote sikavela sine e manušen ko hrami. O Isus na bi pučela sine adava, ako adala manuša na sine stražarija ko hrami (Mat. 26:55). O isto pisateli mislinela kaj okola da so angleder sine bičhalde te astaren e Isuse, isto agjaar sine hramska stražarija (Jovan 7:32, 45, 46). Pokasno o sudsko sovet bičhalgja e stražaren hem lengere zapovedniko te astaren e apostolen. Verojatno o hramska stražarija sine adala so astargje e apostol Pavle hem vlečingje le avrijal taro hrami (Dela 4:1-3; 5:17-27; 21:27-30).