Дэсавэ мануша анда племя Левия, савэ на сас рашая, служынас андо храмо стражниконэнца. Кадэла стражникоря диқэнас пала порядко, ай пала лэндэ диқэлас о барэдэр андо храмо. О иудейско учоно о Филоно Александрийско пистрояс пала кода, со трэбуй сас тэ терэн кодэла стражникоря: «Дэсавэ анда левиторя тердёнас паша лэ храмостирэ вороты. Вонэ ԥэрнавэнас и ԥандавэнас лэн. Дэсавэ тердёнас андэ лэ храмостири града, англа Свынто май анда свынти, кай тэ на домэкэн кодэлэн, касти нащи сас тэ зажан кордэ, и кодэлэн, ко зажыля дэзначай. Дэсавэ стражникоря, важ кода кай вонэ парувэнас ек еқэс, обжанас о храмо дес и рят».

И мануша, савэ сас андо Синедрионо (када само баро иудейско сындо) моӷли тэ мангэн кадэлэ стражниконэн, кай тэ поможын лэнди. Кати кай кадэла еврейски стражникоря сас оружыя (мечоря). Васо? Кай када лэнди розришысардя о римско правительство.

О библеисто о Иоахимо Иеремиасо ԥэнэнас: «если тэ залэн лэ Иисусос авелэ и стражникоря, савэ служын андо храмо, тоди мэ полав, состэ о Иисусо пушля, васо лэс на залинэ тоди, кала во дес и рят росԥэнэнас андо Храмо (Матфея 26:55)». О Иоахимо Иеремиасо пистрояс, кай кодэла, кас май англал бишалэнас тэ залэн лэ Иисусос, кадяжэ служынас стражниконэнца андо храмо (Иоанна 7:32, 45, 46). Прожыля время и лэ храмостирэ барэдэрэсти и лэ стражниконэнди, приԥэндэ тэ анэн лэ Иисусостирэ учениконэн андо Синедрионо. Кодэла жэ стражникоря, файма, и сас машкар кодэла, ко заля лэ Павлос анда храмо (Деяния 4:1—3; 5:17—27; 21:27—30).