Lamanye emaLevi lebekangasiwo baphristi, bekenta leminye imisebenti lefana nekuba bogadzi, futsi bekacondziswa yindvuna yelithempeli. Lomunye umJuda lokutsiwa nguPhilo wachaza imisebenti lebeyentiwa nguletindvuna, watsi: “Lamanye alamaLevi bekabomahlalesangweni futsi atfolakala kuwo onkhe emagede, kantsi lamanye bekahlala ngekhatsi emagcekeni elithempeli ngembikwendzawo lengcwele kuze avimbe bantfu lebebangakavumeleki kungena. Letinye tindvuna betihambahamba ngaphandle titungeleta lithempeli, tiligadzile futsi tishintjana busuku nemini.”

Inkantolo Lephakeme YemaJuda beyicela labogadzi kutsi bayisite. Bekungibo kuphela lebebavunyelwe nguhulumende wemaRoma kutsi baphatse tikhali.

Joachim Jeremias utsi, “Jesu wababuta labogadzi nabambopha kutsi bebangambophi ngani ngesikhatsi afundzisa ethempelini (Mat. 26:55), Jesu bekangeke ababute lombuto kube labogadzi bekungasibo lebebagadze lithempeli.” Joachim Jeremias ukholelwa kutsi letindvuna lebetifuna kubopha Jesu, nguleti lebetigadze lithempeli. (Joh. 7:32, 45, 46) Labogadzi kanye nendvuna yabo, ngekuhamba kwesikhatsi baletsa bafundzi baJesu kulenkantolo lephakeme futsi kungenteka ngulabogadzi labahudvulela Pawula ngephandle kwelithempeli.—Imis. 4:1-3; 5:17-27; 21:27-30.