Ema Levi sira neʼebé laʼós amlulik halaʼo knaar seluk, hanesan serbí nuʼudar polísia. Sira-nia komandante mak xefe templu nian. Hakerek-naʼin Judeu naran Filo esplika kona-ba knaar neʼebé polísia sira-neʼe halo: “[Ema Levi] balu hamriik iha portaun hotu nuʼudar guarda. Sira balu hamriik iha [área templu nian] iha fatin santu nia oin atu hanetik ema sira neʼebé tuir lei labele tama ba fatin santu, maski ema sira-neʼe tama la ho neon ka ho neon. Ema Levi sira-neʼe balu laʼo haleʼu área templu nian atu halo seguransa. Sira troka malu atu halo serbisu loron no kalan.”

Sinédriu bele husu polísia sira-neʼe atu ajuda sira. Grupu Judeu neʼebé hetan lisensa husi governu Roma atu kaer armas mak polísia sira-neʼe deʼit.

Matenek-naʼin naran Joachim Jeremias esplika katak bainhira guarda sira mai atu kaer Jesus, nia husu sira tanbasá sira la kaer nia bainhira nia hanorin iha templu. Jesus sei la husu hanesan neʼe se guarda sira-neʼe laʼós parte ba polísia templu nian. (Mt 26:55) Antes tempu neʼe, iha mós guarda sira neʼebé hakarak kaer Jesus no matenek-naʼin neʼe hanoin katak guarda sira-neʼe mós parte ba polísia templu nian. (João 7:32, 45, 46) Liutiha tempu balu, Sinédriu haruka xefe templu nian no mós guarda balu atu lori apóstolu sira mai. Karik guarda sira-neʼe mós parte ba polísia templu nian no sira rasta sai apóstolu Paulo husi templu.—Após 4:1-3; 5:17-27; 21:27-30.