Ɔkɛndɛ ɔmɔtshi l’atei w’ɛkɛndɛ efula waki l’ase Lɛwi waki komonga ɛlɔmbɛdi aki nkamba oko apulushi. Olimu ɔsɔ wakasalemaka lo ɛlɔmbwɛlɔ ka ɔnɔmbɔdi w’alami wa lo tɛmpɛlɔ. Philo ofundji ɔmɔtshi w’ose Juda akate ate: “Amɔtshi l’atei awɔ [ase Lɛwi] wakalamaka asoko wakɔtɔka anto lo sɛkɛ dia tɛmpɛlɔ, alami akina wakemalaka la ntondo ka dihole di’ekila, ndo wakasalaka diaha onto laki kombetawɔmaka mbɔtɔ lɛkɔ kaanga aha la mbeya. Amɔtshi wakatshimbaka sɛkɛ dia tɛmpɛlɔ mbala la mbala, wakengɔnyaka ndo wakakambaka otsho la yanyi.”

Apulushi asɔ wakakimanyiyaka ase tominadi ta laadiko t’ase Juda. Paka olui w’ase Juda asɔ ato mbaketawɔmaka oma le lowandji l’ase Rɔmɔ dia monga la dihomɔ dia ta.

Nomb’ewo Joachim Jeremias akate ate: “Etena kakande apulushi Yeso, nde akawatɛ ɔnɛ lushi la lushi, dimi laki lo tɛmpɛlɔ letsha, ko lande na kakinyu komindami, (Mat. 26:55) Yeso totondombola apulushi asɔ dimbola sɔ otondonga vɔ kokambaka lo tɛmpɛlɔ.” Ofundji akɔ waamɛ mbutaka dia wanɛ wakawatome lo diaaso dia ntondo dia tonda Yeso waki vɔ lawɔ apulushi wakakambaka lo tɛmpɛlɔ. (Jni. 7:32, 45, 46) L’ɔkɔngɔ diko wakatome ɔnɔmbɔdi wa lo tɛmpɛlɔ nde l’apulushi amɔtshi dia tela ambeki wa Yeso la ntondo ka tominadi ta laadiko ndo ondo apulushi wa lo tɛmpɛlɔ asɔ mbakatondja ɔpɔstɔlɔ Pɔɔlɔ l’andja wa tɛmpɛlɔ.​—Ets. 4:1-3; 5:17-27; 21:27-30.