Ba Levi bamwi ibatali bapaizi bakajisi milimo iimbi, mbuli kubeleka kabali bapulisa. Bakali kusololelwa asilutwe wabalindizi baatempele. Mulembi umwi mu Juda wazina lya Philo wakapandulula milimo yabapulisa aaba naakaamba kuti: “Ba Levi bamwi bakali kugatela milyango yatempele nkobakali kunjilila bantu. Ibamwi bakali balindizi kumbele aabusena busalala. Bakali kuba masimpe kuti kunyina uunjila mubusena busalala, nokuba kuti tanaacita oobo acaali. Bamwi bakali kuzinguluka busena bwatempele kabagatela. Bakali kugatela syikati amasiku kabacincana buyo malizyi.”

Ba Nkuta Mpati Yaba Juda bakali kubalomba bapulisa aaba kutegwa babagwasye. Eeyi nenkamu ilikke yaba Juda iyakazumizyidwe amfwulumende yabana Roma kunyamuna zilwanyo.

Sikwiiya zyamu Bbaibbele wazina lya Joachim Jeremias wakapandulula kuti, ciindi bakapaso nobakamwaanga Jesu, wakababuzya ncobatakamwaangila ciindi naakali kuyiisya mutempele. (Mt. 26.55) Jesu naatakababuzya boobo ikuti nobatakali cibeela cabapulisa baatempele. Mulembi nguwenya ooyu uyeeya kuti aabo ibakali kuyanda kumwaanga Jesu aciindi cimwi musyule abalo bakali bapulisa baatempele. (Joh. 7:32, 45, 46) Kumbele, Nkuta Mpati Yaba Juda yakatuma silutwe wabalindizi baatempele alimwi abapulisa bambi kuyooleta baapostolo. Alimwi kulangilwa kuti bapulisa aaba mbobakamukwelela aanze aatempele Paulo.—Mil. 4:1-3; 5:17-27; 21:27-30.