Bamwi maLevi bakatali bapayizi bakali kupegwa imwi milimu. Milimu eeyo ilikozyenie ayichitwa amapulisa. Bakali kuzulwidwa amupati wabalindi bakutempele. Umwi sikulemba muJuda uutegwa Philo wakapandulula milimu yakali kuchitwa abalindi aaba. Wakati: “Bamwi babo bakali kulinda aamilyango yatempele ayabusena busalala kuchitila kuti muntu uuteeleli atanjili pe kufumbwa kazi naakuti katazi. Alubo bamwi bakali kweendeenda kutempele sikati amansiku kabalikulinda.”

Balindi aaba bakali kubelesegwa aNkuta Mpati YamaJuda. Alubo mbabo luzutu bakali kuzumizigwa amaRoma kuti babelesye zilwanisyo.

Sikulanga-langa makani aamuBbayibbele uutegwa Joachim Jeremias wakati, “teezyakali kunoochita pe kuti Jesu aambe kuti wakali kuyiisya mutempele buzuba abuzuba pesi teebakamujata pe (Mt. 26:55) kaansinga teekwakali balindi aaba bamutempele.” Alubo sikulanga-langa ooyu wakali kusyoma kuti balindi aaba mbabo bakatumidwe kuti bakajate Jesu aali chimwi chiindi. (Joh. 7:32, 45, 46) Kuyungizya waawo, balindi aaba amupati wabo mbabo bakazootumwa kuti bakajate basikwiiya baJesu akubeeta kuNkuta Mpati YamaJuda. Alubo kweelede kuti mbabo bakakwelela mwaapostolo Pawulu kunze aatempele.—Mil. 4:1-3; 5:17-27; 21:27-30.