Tasi o tiute mai te fia o tiute ne tausi atu ki ei a tino o te matakāiga o Levi kolā e se ne faitaulaga, ko te fai o latou e pelā me ne ofisa leoleo. Ne takitakigina ne te takitaki o te faletapu. E fakamatala mai ne te tino tusitala Iutaia ko Philo a tiute o ofisa konei: “Nisi o latou konei [te kau Levi] ne ‵tu i mataloa pelā me ne tino leoleo mataloa, nisi i loto [i te koga ateatea o te faletapu] mai mua o te faleie tapu ke leoleo ke mo a ma ulu ‵se so se tino solitulafono ki loto i ei, e aunoa mo se taliaga. Nisi e fakasolosolo o sa‵sale fakatamilo ne latou a te koga tenā i po mo ao.”

A leoleo konei e fesoasoani atu ki te kau o te Sanetulini. Tenei fua te potukau Iutaia ne talia ne Loma ke aveave ne latou a meatau.

E pelā mo fakamatalaga a te tino sukesuke ko Joachim Jeremias, “a pati a Iesu ne fai e uiga ki tena pukega, me i aso takitasi ne nofo faeloa a ia i te Faletapu o akoako kae ne seki puke eiloa a ia (Mata. 26.55), se fakamaoniga manino me ko tino leoleo eiloa o te faletapu kolā ne olo atu o puke a ia.” Ne talitonu foki te tino tusitala tenā me i tino kolā ne uga atu ke puke a Iesu i te taimi muamua ne tino leoleo. (Ioa. 7:32, 45, 46) Ne fakatonu atu foki ki ofisa konei fakatasi mo te lotou takitaki ke puke a soko o Iesu ke avatu ki te kau o te Sanetulini, kae e mautinoa eiloa me ne aofia foki latou i te taimi ne toso ei te apositolo ko Paulo ki tua mo te faletapu.—Galu. 4:1-3; 5:17-27; 21:27-30.