Ay chaʼoxtul levitaetik te maba yichʼoj yaʼtelik ta saserdote-ae ya spasik yantik aʼteliletik ta templo, jich bitʼil te aʼtelil ta polisia. Jaʼ wentainbilik yuʼun-a te kapitan ta templo. Te escritor judío Filón ya yal bin yaʼtelik-a: «Ay chaʼoxtul ya skanantayik te puertaetik ta yochibal te yamakʼul te temploe, ay yantik te ayik ta mero stiʼil te templo yuʼun maba ya yakʼik ochel te machʼatik ma snujpʼ ya x-ochike, jaʼnix jich ay yantik te ya sjel sbaik ta skanantayel ta kʼajkʼal ajkʼabal te yamakʼul te temploe».

Te polisiaetik-abi ya xjuʼ ya skoltayik te machʼatik ya x-aʼtejik ta Sanedrín. Ta spisil te judioetike, jaʼiknax te polisiaetik yuʼun templo akʼbilik permiso yuʼun te ajwalil ta Roma ta yichʼel yespadaik.

Te especialista Joachim Jeremias ya yal te kʼalal te polisiaetik la stsakik te Jesús, la sjojkʼoy bin yuʼun ma jaʼuk tsakot bael-a te kʼalal nojpteswan ta yamakʼul te temploe. Maniwan jich la sjojkʼoy te manchuk jaʼuk tsakot bael yuʼun te polisiaetik ya x-aʼtejik ta temploe (Mat. 26:55). Te Joachim Jeremias jaʼnix jich la yal te jaʼiknix te polisiaetik ta templo te machʼatik ay kʼan stsakikix-a te Jesuse (Juan 7:32, 45, 46). Cheʼoxeb u ta patil, te kapitan ta templo sok te polisiaetik albotik ta mantal te yakuk yikʼik bael te jnopojeletik yuʼun Jesús ta stojol te Sanedrín. Jaʼiknixniwan te machʼatik la sjochik lokʼel ta templo te Pabloe (Hech. 4:1-3; 5:17-27; 21:27-30).