Левит выжыысь пиосмуртъёс, кудъёсыз священникъёс ӧй вал, трос ужъёсты быдэсъязы. Куд-огъёсыз соос пӧлысь храмез возьмасьёс луыса ужазы-тыршизы но чаклазы, мукетъёсыз катэз медаз тӥялэ шуыса. Возьмасьёсын кивалтӥз храмлэн кузёйырыз. Иудей философ, Филон Александрийский, храмез чакласьёслэн ужзы сярысь тазьы вера: «Куд-огъёсыз соос [левитъёс] пӧлысь пырон дорын ик сыло. Куд-огъёсыз сыло пушказ [храмын], вӧсяськон инты азьын, но чаклало, мукет адямиос, валаса яке асьсэос но валатэк, отчы медаз пыре шуыса. Куд-огъёсыз, ог-огзэс вошъяса, уй но, нунал но храмез котыръяло».

Сӥнедрион быгатэ вал храмез возьмасьёслы кыӵе ке уж сётыны. Та иудейёслы гинэ рим кивалтэт лэзиз ожмаськон тӥрлык нуллыны.

Библиез эскерисьлэн, Иоахим Иеремиаслэн, верамезъя, «Иисусэз ӵапак храмез возьмасьёс кутыны лыктӥзы ке, соку валамон луэ Иисуслэн юанэз со сярысь, малы сое ӧз кутэ Храмын, со нуналысь нуналэ отын дышетӥз ке но» (Матф. 26:55). Иоахим Иеремиас лыдъяз, соос но, кинъёсты азьвыл Иисусэз кутыны ыстылӥзы, озьы ик храмез возьмасьёс вал шуыса (Иоанн 7:32, 45, 46). Берлогес храмез возьмасьёсты но храмлэсь кузёйырзэ косӥзы Иисуслэсь дышетскисьёссэ Сӥнедрионэ вайыны. Но соос ик Павелэз храмын кутӥзы, дыр (Ап. уж. 4:1—3; 5:17—27; 21:27—30).