Miṅwe mishumo i ngaho ya u vha mapholisa yo vha i tshi itwa nga vhaṅwe Vhalevi vha si vhotshifhe. Mulangi wa vhalindi vha thembele o vha a tshi vha vhudza uri vha ite mini. Muṅwali wa Muyuda ane a pfi Philo o amba zwi tevhelaho nga ha zwe eneo mapholisa a vha a tshi shuma zwone, o ri: “Vhaṅwe vha vhenevho [Vhalevi] vho vha vha tshi linda miṋango ine vhathu vha dzhena ngayo [thembeleni]. Vhaṅwe vho vha vha tshi linda nnḓu khethwa. Vho vha vha tshi ita vhungoho ha uri hu si vhe na muthu na muthihi ane a khakha a dzhena nḓuni khethwa arali a songo tea u dzhena. Vhaṅwe vho vha vha tshi mona na thembele u itela u i linda, vha tshi zwi ita nga zwifhinga zwi sa fani, vhaṅwe nga masiari, vhaṅwe nga madekwana.”

Miraḓo ya Sanihedrini yo vha i tshi ita i tshi humbela thuso kha eneo mapholisa. Enea mapholisa ndi one e oṱhe e muvhuso wa Vharoma wa vha u tshi a tendela u fara zwihali.

Muṅwe mugudi wa Bivhili ane a pfi Joachim Jeremias o amba uri musi mapholisa a tshi fara Yesu, Yesu o vhudzisa uri ndi ngani vha songo mu fara musi a tshi khou funza thembeleni. O vha a sa ḓo vha vhudzisa yeneyo mbudziso arali vho vha vhe si mapholisa a thembeleni. (Mat. 26:55) Onoyo mugudi u humbula uri mapholisa e a vha a tshi khou ṱoḓa u fara Yesu hu sa athu u itea zwe ra zwi amba afho nṱha na one o vha e mapholisa a thembeleni. (Yoh. 7:32, 45, 46) Nga murahu, miraḓo ya Sanihedrini yo rumela mulangi wa vhalindi vha thembele na maṅwe mapholisa uri vha ḓise vhaapostola khayo. Khamusi vhathu vho kokodzelaho muapostola Paulo nnḓa ha thembele vho vha vhe mapholisa a thembeleni.—Mish. 4:1-3; 5:17-27; 21:27-30.