Usa han damu nga trabaho han diri saserdote nga mga membro han tribo ni Levi amo an pagserbi sugad nga mga pulis. Ginpapangunahan hira han kapitan han templo. Ginhuhulagway han Judio nga parasurat nga hi Philo an ginbubuhat hini nga mga pulis: “An pipira hini [nga mga Levita] nakapwesto ha mga purtahan sugad nga mga parabantay han ganghaan ha mga entrada, an iba nakapwesto ha sulod [han templo] ha atubangan han santuaryo basi waray makasulod nga bisan hin-o nga diri awtorisado, tinuyo man o diri tinuyo. An iba nagsusurosaliwan ha pagpatrol ha palibot hito gab-i ngan adlaw.”

An Sanhedrin mahimo makaaro hin bulig hini nga mga pulis. Ito la nga Judio nga grupo an gintugotan han Romano nga gobyerno nga magdara-dara hin armas.

An eskolar ha Biblia nga hi Joachim Jeremias nagsaysay nga han gin-aresto hi Jesus han mga gwardya, ginpakianhan niya hira kon kay ano nga waray nira hiya arestoha han nagtitinutdo hiya ha templo. Diri ini ipapakiana ni Jesus kon ito nga mga gwardya diri membro han mga pulis han templo. (Mat. 26:55) Ito liwat nga eskolar natoo nga an mga ginsugo ha pag-aresto kan Jesus ha usa nga naglabay nga higayon mga pulis liwat han templo. (Juan 7:32, 45, 46) An mga gwardya upod an ira kapitan ginsugo ha urhi han Sanhedrin nga dad-on ha ira an mga disipulo ni Jesus. Ngan posible nga an mga pulis han templo liwat an nagdanas kan apostol Pablo tipagawas ha templo.​—Buh. 4:1-3; 5:17-27; 21:27-30.