Some Levites no be priest but they get many work wey them de do, and part of this work na to serve as police officer. The person wey them de get direction from na the captain of the temple. One Jewish writer wey e name na Philo describe the work wey this officers de do. E say some of this officers de guard the door wey people de pass enter the compound of the temple. Other officers de guard front of the holy place. Them de make sure say nobody enter the holy place if the person no get right to enter, whether e know or e no know. E still talk say some of them de waka round the compound of the temple to protect-am, and other officers de replace them and de do shift day and night.

The people for Sanhedrin fit tell this officers to help them do something. This temple police na the only group wey government for Rome allow to carry things like sword.

One professor wey e name na Joachim Jeremias talk say when the officers arrest Jesus, e ask them why they no arrest am when e dey for temple. Jesus no for ask this question if this officers no dey among the temple police. This professor still believe say the people wey they send to arrest Jesus before this time na still temple policemen. (John 7:32, 45, 46) After, the Sanhedrin send the temple captain and temple police them make they bring the apostles of Jesus to them. And maybe na the temple police drag apostle Paul comot for the temple.—Acts 4:1-3; 5:17-27; 21:27-30.