Ku Tempelo kuba bisalu biwombo bio zi Levita bakhambu ba zinganga nzambi baba salanga. Bawu, baba sadilanga mu dingumba di masodi baba kengidilanga Tempelo. Nsoniki musi Yuda bantedilanga Philo wusudikisa biyeku baba vanganga. Nandi wutuba: “Bawombo mu bawu baba kengidilanga mielo mi khotolo ku Tempelo. Bankaka baba ku khati muingi kukengidilanga nzo yinlongo ayi kukakidila woso kua mutu khambulu nsua wu kukuenda kuna. Mvandi bankaka baba zungalalanga ku nganda yi Tempelo ayi baba sadilanga mu zikhumbu builu yi muinya.”

Masodi ma Tempelo mvandi baba kengidilanga nzo yi lufundusu yi basi Yuda, ayi diawu to dingumba ntinu wu Loma kavana nsua wu kusadila binuanunu.

Nsoniki wunkaka bantedilanga Joachim Jeremias, wutuba ti mambu amomo madi nguizani na mvutu Yesu kavana kuidi batu bayiza kunkanga. Nandi wuba kamba: “Benu muma kuiza khanga banga muivi na mata ayi zimbondo zi minti, kibila mbi lukhambu vangila mawu bo yiba longanga kadika kilumbu ku Tempelo? (Matai 26:55). Mawu mammonisa bivisa ti masodi makanga Yesu maba masodi ma Tempelo. (Yoane 7:32, 45, 46) Buviokila thangu, zimfumu zi nzo yi lufundusu batuma mfumu masodi kakangisa minlandikini mi Yesu. Ayi ḿba masodi beni, bawu babasisa mvuala Polo ku nganda Tempelo.—Mavanga 4:1-3; 5:17-27; 21:27-30.