Kʼáatchiʼob ku beetaʼal
¿Máaxoʼob ku meyajoʼob kaʼach bey policíaʼob teʼ templooʼ yéetel baʼax meyajil ku beetkoʼob?
Le levitaʼob maʼatech u beetik u sacerdoteiloʼoboʼ ku kanáantkoʼob kaʼach le templooʼ wa ku beetkoʼob u policíailoʼob. Ku nuʼuktaʼaloʼob kaʼach tumen u nojchil le máaxoʼob kanáantik le templooʼ. Filón, juntúul judío ku tsʼíibtik baʼaxoʼob uchaʼaneʼ, tu yaʼalaj baʼax táakaʼan ichil le meyaj ku beetkoʼoboʼ: «U waʼataloʼob tu tséel u joonajiloʼob le templo utiaʼal u kanáantkoʼoboʼ, uláakʼoʼobeʼ ichil le templo ku kananoʼoboʼ, beyoʼ maʼ tu chaʼikoʼob u yokol le máax maʼ unaj u yookloʼ, uláakʼoʼobeʼ utiaʼal u kananoʼobeʼ ku tsʼáaik u vueltaʼob bul kʼiin yéetel bul áakʼab ichil le templooʼ, tsʼoʼoleʼ utiaʼal u yojéeltaʼal máax kun beetkeʼ ku buuloʼob».
Wa ka kʼaʼabéetchajkeʼ le Sanedrínoʼ jeʼel u páajtal kaʼach u yaʼaliktiʼob baʼax meyajil ken u beetoʼobeʼ. Tsʼoʼoleʼ chéen letiʼob ku chaʼabal kaʼach u yantal u espadaʼob.
Joachim Jeremias, juntúul máak tsolik u tʼaaniloʼob le Bibliaoʼ, ku yaʼalikeʼ le ka bin machbil Jesús tumen le máakoʼobaʼ, tu kʼáatajtiʼob baʼaxten maʼ maʼach le táan u kaʼansaj teʼ templooʼ. Wa Jesús maʼ u yojel letiʼob kanáantik kaʼach le templooʼ, bejlaʼa maʼ tu kʼáatiktiʼobeʼ (Mat. 26:55). Tu yaʼalaj xaneʼ uláakʼ juntéeneʼ láayliʼ letiʼe máakoʼob túuxtaʼaboʼob utiaʼal ka u machoʼob Jesúsoʼ (Juan 7:32, 45, 46). Ka máan kʼiineʼ aʼalaʼab tiʼ u nojchil le máaxoʼob kanáantik le templo yéetel tiʼ le máaxoʼob ku kananoʼoboʼ ka u bisoʼob u discípuloʼob Jesús tu táan le Sanedrínoʼ. Ku tuklaʼal xaneʼ letiʼob jíilt apóstol Pablo tu táankabil le templooʼ (Hech. 4:1-3; 5:17-27; 21:27-30).