Gu bete aRevi naangianga aboromotumo ya anaamanga kura asunge, wagu nga mangasunge ni aborisi. Bangerekurii yekaru nanaafu arugapai fu yo. Gu ga aYudo bakeapai nangia Philo asakipa agu asunge agu aboro re anaamangaha ki ya: “Bete agu aRevi re anaabanda agu angbadimo aboro anaarimo ti ni ku yekaru yo. Agu akurayo anaabanda ga Mbori kparakpara ba. I anaabanda ga Mbori kparakpara ba tipa gupai nga ka gu boro arẽnga tipa rimoko yo ya rimingo koyo ya, ka si vura du vurũ nga ni naida ka rimo koyo ka ni ainongo aino ya. Agu akurayo anaata kirikiri pati yekaru tipa kaa bandaha. I anaasaka tiyo asaka na akurayo na kini mangisunge uru na yuru.”

Abororondo anaasana agu aborisi re tipa i undo yo. I nangia gu yangara abanzengere ni aYudo aRomo ambugene fuyo i naatinda aũvura.

Gu wene bawirikipai nangia Joachim Jeremias asaki gupai nga, “Ho abanzengere azi Yesu ni, ko asana yo nga tipagine i aaziongo ko ti ni ho ko aayugopai ni yekaru yo ya. (Mt. 26:55) Ka si adu nga agu abanzengere re aangianga papara agu aborisi nangia ga yekaru yo te, ka Yesu asananga gi sanahe re te.” Kina gu bangisa wene bawirikipai re idi kuti gupai nga agu abanzengere naaida ka zio Yesu mbata fu gure angia kina agu aborisi nangia ga yekaru yo a. (Yo. 7:32, 45, 46) Kusa, abororondo akedi gu boro nanaangera kurii yekaru na bete gu kura abanzengere tipa i ye na ga Yesu abawiriki fu yo. Si nawira gupai nga kina agu aborisi nangia ga yekaru yo a nagbe gu mokedi nangia Pauro yekaru yo kusayo.—Amo. 4:1-3; 5:17-27; 21:27-30