Jupanakajj 1988 marat jichhakamaw precursorat servisipki, kawkjansa yatinoqtapjjakiwa. Guadalupe markansa, Guayana Francesa markansa kunayman asignacionanakwa katoqawayapjje. Uka markanakajj Francia markankir sucursalamp uñjatäjjewa. Jichhajj uka jilatampir kullakampir mä qhawqha jisktʼañäni.

¿Kunatsa Diosar sapürunjam serviñ amtawayapjjta?

Marie-Line: Guadalupe markanwa jilsuwayta. Mamitajampejj uru jornalaw predicapjjerïta, jupajja taqe chuymaw Diosar serviwayi. Jaqenakamp parlañajj wal gustitu, ukatwa 1985 maran colegio tukuyasajj precursorat serviñ qalltayäta.

Jack: Waynäsajj predicañ munirinakampi precursoranakampiw jilapart chikachasiyäta. Colegionkkasajj vacacionan precursor auxiliaratwa servirïta. Semana tukuyanakajja, awisajj precursoranakampi jornal predicañatakiw autobusat sarapjjerïta. Predicañ tukuyasajj playaruw sarapjjerïta. Ukham lurañajj wal gustitäna.

1988 maranwa casarasipjjta. Uka qhepatjja, “jukʼamp predicañatakiw chʼamachasiñasa, uk lurañatakejj janiw kunas jarkʼkistuti” sasaw sayäta. Ukatwa precursor regularat serviñ qalltayäta, esposajajj precursorapunïnwa. Mä mara qhepat precursoranakatak escuelar sarasajja, precursor especialat serviñatakiw mä asignación churapjjetäna. Guadalupe markan walja cheqanakanwa wali kusisit servipjjayäta. Qhepatjja, Guayana Francesa markaruw khitapjjetäna.

Precursorat serviñ qalltapkta ukhat jichhakamajja, walja asignacionanakwa katoqapjjtajja. ¿Kunas ukanakan yatiñoqtañatak yanaptʼapjjtam?

Marie-Line: Isaías 6:8 textojj wal gustapjjetu, Guayana Francesa markan betelankir jilatanakajj uk yatipjjewa. Ukhamajj telefonot jawsapkitäna ukhajja, awisajj akhamwa jisktʼapjjerïtu: “¿Kawkïr textos wal gustapjjtam uk amtapjjtati?” sasa. Uk sapkitäna ukhajja, yaqha cheqaru khitañ amtapjjatapwa yatipjjayäta. Ukatwa, “¡Akankasipktwa! ¡Nanakar khitapjjeta!” sapjjerïta.

Mä asignación katoqasajja, janiw nayra asignacionanakamp igualayañajj gustapkituti, ukham  lurasajj janiw kusisit sirvjjapjjeristti. Ukatsti uka markankir jilat kullakanakar uñtʼañatakejj nanakaw nayraqat chʼamachasipjjta.

Jack: Nayrajja, yaqhep amigonakajajj suma amtampiw pachpan jupanakampi quedasipjjañajatak wal chʼamañchapjjetäna. Ukampis Guadalupe markat sarjjapjjayäta ukhajja, mä jilatajj kuntï Jesusajj Mateo 13:38 texton siskäna ukwa amtayapjjetäna, “trigo yapusti akapachawa” sasa. Ukatwa, yaqha cheqar asignapkitu ukhajj pachpa trigo yapunkasipkataj amtapjjta. Kawkjansay Diosar sirvchiñänejja, predicañaw jukʼamp wakiskirejja.

Mä cheqar purisajja, jilaparte jaqenakajj kusisit jakasipjjatapwa amuyapjjta. Ukatwa jupanakjam jakañatak chʼamachasipjjta. Mayjäkchisa, kuntï manqʼapki umapkaraki ukanakwa manqʼapjjta umapjjarakta. Ukampis jan usuntañatakejj cuidasipjjtwa. Kawkjantï servipkayäta uka cheqanakat kunatï sumäki ukak parlañatakiw chʼamachasipjjta.

Marie-Line: Uka cheqan jakasiri jilat kullakanakatsa wal yateqapjjta. Ak amtasipuntwa, Guayana Francesa markar puripkayäta ukhajja, walpun jallojj purintäna. Ukatwa, “pasarjjani ukhaw predikir mistuñäni” sasin amuyapjjerïta. Ukampis mä kullakajj “predikir sarañäni” sitänwa. Nayajj sustjataw ¿kunjamarak jallunpach sarañänisti? sayäta. Jupasti “paraguam aptasinim bicicletatwa sarañäni” sarakitänwa. Ukhamatwa paraguas kattʼasita biciclet apnaqañ yateqayäta. Ukham predicañ jan yateqkiriskayäta ukhajja, jallupachan janiw predicañ puedkiriskayätti.

Mä 15 kutiw yaqha cheqar jakiri sarapjjtajja. ¿Uka toqet kuna suma ewjjtʼanaksa churapjjetasma?

Marie-Line: Yaqha cheqar jakir sarjjañajj chʼamakïspawa. Ukampis predicacionat kuttʼasin samartʼañataki mä lugaranïñajj wali wakiskiriwa.

Jack: Yaqha cheqar jakir sarapkta ukhajja, yaqha colorampiw uta manqha pintapjjerïta. Sucursalankir jilatanakajja, jukʼa tiempoki mä cheqan servipjjañaj yatisajj akham sapjjerïtuwa: “Jack, janiw uta pintañamajj wakiskaniti” sasa.

Esposajajj ratukiw cosasanak cajonanakar apthapiri. Sapa cajonarojj kunanaksa uchi ukarjamaw “Baño”, “Dormitorio” jan ukajj “Cocina” sas qellqjjatiri. Ukhamatwa jakapkä ukar purisajj cajonanak lugarapar uchapjjta. Kunanaktï munapkta uk ratuk katuñatakejja, esposajajj mä listaruw kunas sapa cajonan utji uk qellqtʼasiri.

 Marie-Line: Niyakejjay yaqha cheqar sarañatak sum wakichtʼasiñ yatjjapjjstjja, purisajj jankʼakiw predikañ qalltapjjta.

Asignacionanakam sum phoqañatakejja, ¿kunjamsa horarionakam wakichtʼasipjjta? (2 Tim. 4:5).

Marie-Line: Lunesanakaw samartʼapjjta, tantachäwinakatakis wakichtʼasipjjta. Ukatsti sapüruw predikir mistupjjta.

Jack: Precursorat servisajj sapa phajjsiw horanak phoqapjjañaja, ukampis janiw ukat llakisipkti. Nanakatakejj predicañaw jukʼamp wakiskiri. Utat mistusin utar kuttʼañkamajj taqenir predicañatakiw chʼamachasipjjta.

Marie-Line: Samartʼañataki manqtʼasiñataki mä suma chʼojjña lugarar sarasajja, mä qhawqha tratadonak apasipuntwa. Awisajja, janis “Jehová Diosan Testigopäpjjtwa” sapkstjja, yaqhepajj qellqatanak mayipjjetuwa. Ukatwa sum isthaptʼasiñataki, suma jaqëñataki chʼamachasipjjta. Jaqenakajj ukanak wal uñchʼukistu.

Jack: Vecinonakarojj suma jaqësaw Jehová Diosar uñtʼapjjañapatak yanaptʼapjjarakta. Uta jakʼanakan jaqoski uka papelanak apthapipuntwa, basuranaksa apsupuntwa, uta jakʼankir jardinsa qʼomachapuntwa. Vecinonakajj uk uñjasin akham sasaw awisajj jisktʼapjjerïtu: “¿Janit mä Bibliajj utjkiristamjja?” sasa.

Niya sapa kutiw jaya cheqanakar predikir viajipjjtajja. ¿Kawkïr viajsa jukʼamp amtapjjta?

Jack: Guayana Francesa markanjja, yaqhep lugaranakar puriñajj wali chʼamawa. Mä semananjja, 600 kilometronakwa niya sapa kuti jan wali thaknam viajipjjta. Amazonia selvan Saint Élie cheqar viajipkayäta uk amtapuntwa. Ukar puriñatakejja, walja horanakwa taqe cheqar mantir autot viajipjjta, ukatjja piragua sat jiskʼa botetwa viajipjjarakta. Uka cheqan jakasiri jaqenakat jilapartejja, qori thaqasaw trabajipjje. Predicasin qellqatanak churapkayäta ukhajja, jupanakajj wal yuspärapjjetäna, ukatwa jiskʼa qorinak churapjjetäna. Arumthapirojja, Diosan markapan utjki uka videonakat may uñtayapjjayäta, walja jaqenakaw uka arumajj jutapjjäna.

Marie-Line: Mä qhawqha maranak nayrajja, Camopi markan Jesusan jiwatap amtañataki mä discurso arstʼañapwa esposojar mayipjjäna. Ukar puriñatakejja, piragua sat jiskʼa botetwa Oyapock jawirnam pusi horanak viajipjjayäta. Uk amtapuntwa.

Jack: Jawirajj jan manqhäki, umajj ratuk jalkaraki uka cheqanakajj wali peligrosowa. Uknam pasañajj sustjasiñjamawa. Piragua sat jiskʼa bote apirejja sum apnaqañwa yatiñapa. Uka viajejj jan armkañapunïnwa. Testigonakajj sojjtanikïpjjchïnsa mä phesqa tunkaniw Jesusan jiwatap amtañatakejj tantachasipjjäna, yaqhepajj yaqha aru parlirïpjjänwa (amerindias).

Marie-Line: Jehová Diosar jukʼamp serviñ muniri wayn tawaqonakajja, ukham chʼamañchkir experiencianakanïpjjarakispawa. Ukhaman uñjasisajja, Diosaruw confiyañasa, ukhamatwa Jupar confiyatasajj jukʼamp jiltani. Cheqas sapa kutiw kunjamsa Jehová Diosajj yanaptʼistu uk uñjtanjja.

Walja arunakwa yateqawayapjjtajja. ¿Jumanakatak yaqha arunak yateqañajj facilakiti?

Jack: Janiwa, wakisitap laykuw uka arunak yateqayäta. Amuytʼañataki, mä kutejja sranangtongo * arutwa Yatiyañataki revistat sarayañajäna. Ukampis janïraw chika semanan apaski uka tantachäwin “Biblia liyiñataki” utjki ukansa Biblia liytʼkayätti. Ukatwa mä jilatarojj “yatichatajajj amuyasïnti” sasin jisktʼayäta, jupasti akham sarakitänwa: “Yaqhep arunak janiw amuyapkayätti, ukampis sum lurtajja” sasa. Wawanakaw wal yanaptʼapjjetäna. Jilïrinakat sipansa, kunansa pantjasiyäta ukanak qhanwa sapjjetäna. Wawanakampiw wali sum yateqawaytjja.

Marie-Line: Mä zonanjja francés, portugués, sranangtongo arunakatwa estudio churayäta. Mä kullakajj akham sitänwa: “Chʼamäkis uka arut nayraqat yaticham, ukjjaruw faciläkis uka arumpi tukuyjjäta” sasa. Ukham lurañajj wal yanaptʼitäna.

Mä urojja pä estudioruw sarta. Nayraqatajja sranangtongo arut yatichiriw sarta, ukjjarusti  portugués arutaraki. Uka payïr estudion yatichkayäta ukhajja, nayamp sarkäna uka kullakajj akham sitänwa: “Marie-Line, janjamakiw entiendkistuti” sasa. Ukhakiw portuguesat yatichañat sipansa sranangtongo arut mä brasileña warmir parlaskataj amuyasiyäta.

Kawkïr congregacionanakantï serviwayapkta ukankir jilat kullakanakajj wal munasipjjtamjja. ¿Jupanakan suma amigopäñatakejj kunsa lurapjjta?

Jack: Proverbios 11:25 textojj akham siwa: “Khititï churañ yatki ukaw jukʼamp katoqe” sasa. Yanaptʼa munirinakarojj jan pächasisaw yanaptʼapjjta. Kunapachatï Tantachasiñ Uta askichapjjerïkta ukhajja, yaqhep jilatanakajj akham sapjjerïtuwa: “Publicadoranak uk lurapjjpan” sasa. Ukhajj akham sirïtwa: “Nayajj publicadorarakïtwa. Trabajiñajj utjchi ukhajja, nayajj yanaptʼañ munaraktwa” sasa. Cheqas taqeniw jiwasatak tiempo apstʼasiñ muntanjja, ukhamäkchisa yanaptʼañajj wakiski ukhajj esposajamp yanaptʼapjjapuntwa.

Marie-Line: Sapa mayni jilat kullakanakatwa llakisipjjta. Ukhamatwa wawanakapar utan uñjañati jan ukajj escuelat irptaniñach wakisi uk amuyapjjta. Yanaptʼañajj wakiski ukhajja tiempwa apstʼasipjjta. Ukham yanaptʼasajja, jupanakampejj suma amigoruw tukupjjta, yanaptʼa munapki ukhas jankʼakiw yanaptʼapjjta.

Kawkjantï yatiyirinakajj munaski ukan yanaptʼasajj ¿kuna bendicionanaksa katoqapjjta?

Jack: Jehová Diosar sapüru servisajj wali kusisitäpjjtwa. Diosan luratanakap jakʼanakan predicañajj wal kusisiyapjjarakitu. Kunapachatï jan walinakan uñjasipkayäta ukhas janiw sint llakisipkayätti. Kawkjansay Diosar sirvchiñänejja, markapajj yanaptʼapunistaniwa sasaw sapjjayäta.

Waynäkayäta ukhajja, cuartelar jan sarañ munatajat carcelaruw Guayana Francesa markan jistʼantapjjetäna. Janipuniw misionerjam uka cheqar kuttʼañsa, ni uka carcelan predicañatak permiso katoqañsa pienskayätti. Jehová Diosajj walpun servirinakapar bendisi.

Marie-Line: Yaqhanakar yanaptʼañajj walpun nayarojj kusisiyitu. Esposojampiru nayampirojj Jehová Diosar serviñajj wal gustapjjetu. Ukham serviñajj chacha warmjam jakasiñatakis wal yanaptʼapjjetu. Awisajj akham sasaw esposojajj jisktʼirïtu: “Uka jilat kullakar chʼamañchtʼañaw wakisi, ¿manqtʼasir jutapjjañapatak invittʼsnati?” sasa. “Nayajj uk sañwa munaskarakiyäsma” sasaw sirïta. Cheqas walja kutiw ukajj pasapjjetu.

Jack: Jichhakiw doctoranakajj cáncer de próstata usunïtawa sasin yatiyapjjetu. Esposajarojj janis ukat parlañajj gustkchejja, jupar akham sistwa: “Esposita, janïraw sinti jilïrïkti, ukampis qharür jiwañajj waktʼitaspa ukhajja, kunanaktï Jehová Diosatakejj lurawaykta ukanak yatisajj kusisitaw jiwjjerista” sasa (Gén. 25:8).

Marie-Line: Jehová Diosajja kuntï jan suyapkayäta uka asignacionanakwa churawayapjjetu, kuntï jan piensapkayäta ukanakwa lurawayapjjta. Walja bendicionanakwa katoqapjjarakta. Nanakajj taqe chuymaw Jehová Diosar confiyapjjta, ukatwa markapajj kawkiruy sarapjjam sapjjchitani ukar sarapjjäjja.