Jack bo Marie-Line ba yé basañal ntôñ ibôdôl i nwii 1988. Babiina bana, ba ba nyiba kiki bôt ba ntjelel bé ngéda mam ma nhéñha, ba bi neebe ngandak minson i Gwadelup ni i Guyana i Pulasi (Guyane française). Munu minkoñ mini nwoma, hikuu hi loñ i Pulasi hion hi éga nson likalô. Di bat le Jack bo Marie-Line ngim mambadga.

Kii i bi tinde bé i yoñ bôlô nsañal?

Marie-Line: Me bi néñél i Gwadelup, ngéda me bé mañge, me bé béna téé likalô ngim kel yosôna ni mama yem, nu a bé gwés likalô ngandak. Kiki me ngwés bôt, Jon ngéda me bi mal ndik suklu i nwii 1985, me yoñ bôlô nsañal.

Jack: Ngéda me bé mañge wanda, me bé béna sal ni basañal ba ba bé gwés likalô. Me bé béna yoñ bôlô nsañal i ngéda binoi. Mamélél ma sonde, di bé di yoñ matôa makeñi inyu ke sal ni basañal i libôga jap. Di bé di sal ni bo ngim kel yosô, mbus di ke ngwañ tuye. Dilo di di bé ngand yomede!

Ndék ngéda mbus me bi biiba ni Marie-Line i nwii 1988, me bi hoñol le: ‘Di gwé bé bañga jam i boñ, kii i nkéñ bés i kéñbaha nson wés?’ Yak me me yoñ bôlô nsañal. I mbus nwii wada, ba sébél bés i suklu basañal, di yila ki basañal ba tôbôtôbô. Di bi kôs ngandak minson minlam i Gwadelup ilole ba ñom bés i Guyana i Pulasi.

Ba bi héñha bé minson ngandak ngélé, kiki nwii mi bé tagbe. Kii i bi hôla bé i meya minson mi mondo?

Marie-Line: Lôk kéé i Bétel i Guyana i Pulasi i bé yi le nlôñ Bibel di ngwés ngandak u yé Yésaya 6:8. Jon ngéda ba bé ba sébél bés, ba bé ba jôha bés le “baa ni ngi honlak nlôñ Bibel nan?” Ha ngéda i di bé di nok le, ba nsômbôl om bés homa numpe. Jon di bé di timbhe le: “Bés bana, oma bés!”

 Di bé hégha bé minson mi mondo di bé kôs ni mi ba bi bôk ba ti bés, inyule hala a bé le a tômbôs bés. Di bé boñ yak biliya i meina ni lôk kéé yés i bôda ni i bôlôm.

Jack: Bibôdle, lôk kéé ihogi i bé sômbôl bé le di yék bo, ba bi nai ndik le di yégle ni bo. Ndi ngéda di bé nyodi i Gwadelup, mankéé wada a bi hôñlaha bés bibuk bi Yésu bi bi yé i kaat Matéô 13:38: “Wom u yé nkon ’isi”. Jon ngéda di bé di kôs nson mondo, di bé bigda le to hee di yé, di nsal nlélém wom. Jam li yé nseñ li yé le, di hôla bôt!

Ngéda di mbol ngim homa, di nléba le i bôt ba yé nyoo ba ntjelel bé. Jon di mboñ biliya i niñ kiki bo. I nla pam le di bana bé minlélém mi bijek, ndi to hala, bijek ba nje gwon yak bés di nje, di nyok malép ba nyo, di nyoñ ndigi bitelbene le bi ba mapubi. Ngeñ di nkwel ni bôt, di mboñ biliya i pôdôl bisai di nkôs.

Marie-Line: Lôk kéé i bôda ni bôlôm i niiga ki bés ngandak mam. Me ngi bigdaga ngeñ di bi tip bol i Guyana i Pulasi. Nop a bé no bañga linok, jon bés di bi hoñol le d’a bem le a en ilole di mpam likalô. Ha nyen sita yada i bi bat me le: “Di nla kee?” Hala a bi hélés me, me bat nye le: “Ni nop?” A kal me le: “Yoñ ngañgô yoñ, di nke yak ni baskô.” A bi niiga me i luk baskô ni ngañgô i woo. Ibale me nigil bé likeñge li, ki me bi téé bé likalô i ngéda mbéñ!

Ni ma bôô 15 ngélé. Mambe maéba ni nla ti bôt bape inyu mabôô?

Marie-Line: Mabôô ma ta bé bun. Ndi i yé loñge i yéñ loñge ndap, i het u nla noi loñge i ngeñ u mal likalô.

Jack: Me bé béna hoo pén ikété ndap. Ngéda lôk kéé i hikuu hi loñ i bé yi le di ga nom bé homa, ba bé kal me le: “A Jack, u tééñga bañ nyuu i hoo pén lini lisañ!”

Marie-Line a nyi lôñôl gwom ngandak! A nlôñôl gwom gwobisôna ikété minkuu, a tila ki môl ma gwom bi i mapep, a éde mo ngii minkuu, kiki bo “bi ndap jogop,” “bi tun,” “bi kishin,” hala ni hala. Kayéle ngéda di mpam i mbai yés i mondo, di gwé bé  ndutu yo ki yo i léba i yom di nyéñ. A gwé ngim kaat i het a ntila i gwom bi yé ikété hiki nkuu inyu boñ le di pala léba gwo.

Marie-Line: Kiki di bi nigil i bok gwom, hala a mboñ le di nhoo bôdôl téé likalô.

Lelaa ni ntjek ngéda nan inyu ‘gwel nson nan i nya i yôni’?​—2 Timôtéô 4:5.

Marie-Line: I ngwa njangumba, di noi, di kôôba ki makoda momasô. Di mbôdôl likalô i ngwa um.

Jack: To hala kiki di gwé nsoñgi ngeñ di nlama ti, di mbok bé mis mu. Likalô li yé bôlô yés. Ibôdôl ngeñ di nyodi ndap bikekela, letee ni kôkôa ngeñ di nhuu, di nkwélés bôt bobasôna di mboma mu njel.

Marie-Line: Ngeñ di nke tégbaha loñge ngéda ngim homa, bikaat bi nhañ bé me mu bot. Ngim bôt i ntiige bés bebee inyu bat bés bikaat ki le di nkal bé bo le di yé Mbôgi Yéhôva. Ndik inyule di nliya i haba loñge, ni i bana bihiumul bilam. Bôt ba nyimbe mam ma.

Jack: Di ntééne yak bôt bés ba libôk likalô ni njel maboñok més malam. Kiki hihéga, me yé me mbada bipéba ni binan mu mbédgé, me bôñglak wom u mbônji. Ngéda bôt bés ba libôk ba ntehe me me nsal, ba yé ba mbat me le: “Baa u yé le u ti me Bibel?”

Ni ma sal bahoma ba yé haa, i het batéé likalô ba ta bé bañga, baa ni mbigda jam li tôbôtôbô mu?

Jack: I Guyana, i yé ndutu ngandak i bol ngim bahoma. Di bé béna ke yom kiki bo 600 kilôméta, sonde yada, ni minloñ mimbe. D’a hôya bé i kel di bi ke i Saint Élie, i lipan li Amazôn. Di bi ke mbôñgô liké inyu bol nyoo ni matôa ma ma gwé ngui, ni môñgô. Ngandak bôt mu mbai i, i yé bayéñ gôl. Bahogi ikété yap ba bi kon maséé ni bikaat gwés, jon ba bé ba ti ndék ngôl kiki makébla! Di bé unda bividéô kôkôa. Ngandak bôt i bé lo i béñge.

Marie-Line: Masañ mana ba bi om Jack i ti nkwel u Bilôp bi nwet i Camopi. Inyu bol nyoo, di bi yoñ môñgô di lôô i lom ba nsébél le Oyapock. Liké li li bi yoñ bés ngeñ ina. Li bé lilam le!

Jack: I homa malép ma bé ngandak, mapôô ma bé kônha woñi. I pot mbale, ngéda u ntehe mapôô ma, ma nhélés ndik we. Nluk môñgô a nlama bana likeñge. Ndi liké li li bi lémél bés ngandak. To hala kii di bé ndigi Mbôgi Yéhôva 6 yokel, bebee le 50 bôt ba bé i Mbigda nyemb Yésu!

Marie-Line: Boñge ba wanda ba ba nkit le ba nti niñ yap sesema i nson u Yéhôva ba ga tégbaha mangéda malam kiki ma. Mu mangéda ma, u mbôdôl Yéhôva ñem, u nledés ki hémle yoñ. Ñ, di mbéna tehe woo u Yéhôva mu nson wés.

Ni mpot ngandak dilémb. Baa ni mpala nigil dilémb?

Jack: To bebee. Me bi nigil dilémb tini inyu nson Yéhôva. Kiki hihéga, ba bi kal me le me éga yigil i Nkum Ntat ni hop u Sranantongo, * bo ngi ti me to lisoñgol li Bibel. Me bi bat mankéé wada lelaa a ntehe yigil. A timbhe le: Di nok bé ngim bibuk, ndi mam ma ntagbe loñge. Boñge ba bé hôla me ngandak. Ngéda me bé boñ hihôha, ba bé ba kodol me, ki le minhôôlak mi bôt mi bé boñ bé hala. I boñge ba ba bi niiga me ngandak mam.

Marie-Line: Kel yada, me bé lama tégbaha gwigil ni Pulasi, Potoki ni Sranantongo. Sita yada i ti me maéba le me bôdôl ni hilémb hi nlédél me ngandak, ndi m’a mélés ni hi hi ntomb. Me bi pala nok inyuki a bi ti me maéba ma.

 Kel ipe, me bééna yigil yada ni hop u Sranantongo, ini ipe ni hop u Potoki. Ngéda me bi bôdôl yigil i nyônôs iba, i sita i bé ni me i kal me le: “A Marie-Line, le u nyoba bé?” Ha nyen yi i bi lôl me le, ngo me yé bisu bi muda loñ i Brésil, me nlama pôdôs nye Potoki, he Sranantongo bé!

I bôt bé ni bo ni nsal, ba ngwés bé ngandak. Lelaa ni bi boñ inyu bot mawanda ni bo?

Jack: Bingéngén 11:25 a nkal le: “Mut likap a’ nuuha.” Di nti bôt ngéda yés, di mbôñôl ki bo loñge. Ngim lôk kéé i bé i kal me le: “Nwas le batéé likalô ba pubus ndap Ane.” Me bé me timbhe bo le: “Ngo yak me yé ntéé likalô. Jon, hiki ngéda bôlô i yé, me nlama ba ha.” To hala kii di gwé més mam i boñ, di nwas bé le ma kéñ bés i bôñôl bôt bape loñge.

Marie-Line: Di mboñ biliya i kôôge bebee ni lôk kéé yés i bôda ni i bôlôm. Ngéda di mboñ hala, di nla yi ngeñ mankéé a nsômbôl le mut a yégla man wé, tole a kee i yoñ nye i suklu. Di ntjek ngéda yés inyu hôla bo. Hala a mboñ le di yila mawanda.

Bimbe bisai ni bi kôs mu kii ni bé sal i het ngôñ i batéé likalô i yé ikeñi?

Jack: Di bi kôs ngandak bisai mu nson wés nsañal. Kiki hihéga, u nhôla bés i yuuga bahoma balam, di yé di memle bihégél bi Yéhôva. Tolakii di bi boma mandutu, di bé tôñ bé inyule di bé yi le Yéhôva a nit bés to hee homa di yé.

Ngéda me bé mañge wanda, ba bi ha me i mok i Guyana i Pulasi inyule me bi tjél yoñ ngaba i mam ma m’bô. Me bé emel bé le m’a témb nyoo kel yada kiki nsañal, ni le ba bé le ba ti me kunde i tééne bôt ba mok likalô. Ntiik, Yéhôva a nkôp bés bisai nkôbôk!

Marie-Line: Jam li nlôôha kônha me maséé, li yé i ti memede nkikip inyu bôt bape. Di yé maséé i gwélél Yéhôva. Hala a bi lédés libii jés. Ngim mangéda, Jack a bé a ti mahoñol le di naña ngim babiina i i mboma mandutu inyu boñ le di je ntôñ. Ha nyen me bé timbhe le: “Yak me me hoñlak nga hala!” Di bé di naña ki bo.

Jack: Nano a yé ndék ngéda le ba bi léba me kon u pos. To hala kiki Marie-Line a bi gwés bé nok hala, me bi kal nye le: “A yem, i yé mbale le ibale me nwo nano, wee me nhoo wo, ndi me ntam bé. Me yé maséé inyule me ntégbaha niñ yem yosôna i nson u Yéhôva.”​—Bibôdle 25:8.

Marie-Line: Yéhôva a bi ti bés minson mi di bé bé le di hégda le di ga sal. A yible ki bés manwemel di bé emel bé. Ñ niñ yés i yé toi nyonok ni mam malam. Di mbôdôl Yéhôva ñem ni ñem wés wonsôna, jon to hee ntôñ u ñom bés, di nke ndigi!