Ba Jack na ba Marie-Line balibombela pamo umulimo wa nshita yonse ukufuma mu 1988. Balaiteulula kabili balasumina ukubomba imilimo yalekanalekana pa cishi ca Guadeloupe na mu French Guiana. Iofeshi lya musambo ilya ku France e lyangalila ishi ncende pali ino nshita. Lekeni twipusheko Ba Jack na ba Marie-Line amepusho yamo.

Cinshi calengele mutendeke ukubomba umulimo wa nshita yonse?

Ba Marie-Line: Nakulile ku Guadeloupe, kabili ilyo nali umwaice naleya sana na bamayo mu kubila imbila nsuma muli uyu musumba. Bamayo bali ni Nte ya kwa Yehova iyacincila. Nalitemwa abantu, kanshi ilyo fye napwishishe isukulu mu 1985 nalitendeke bupainiya.

Ba Jack: Ilyo nali umwaice nalesangwa sana na balebomba umulimo wa nshita yonse abatemenwe sana umulimo wa kwa Lesa. Nalebombako bupainiya bwa kwafwilisha nga twalaalika amasukulu. Limo pa mpela ya mulungu twalenina basi na bamayo nelyo no wa bwananyina pa kuti tuyebombela pamo na bapainiya mu cifulo balebila imbila nsuma. Twalebila imbila nsuma akasuba konse e lyo twaya ku lulamba lwa bemba mu kwangala. Ala shilya inshiku shalewama!

Ilyo twaupene fye na Marie-Line mu 1988, natile, ‘tatukwete ifya kutupumfyanya, kanshi tulingile ukubombesha mu mulimo wa kwa Lesa.’ Nalitendeke ukubomba bupainiya pamo na Marie-Line. Ilyo papitile umwaka umo, balitusontele ukuba bapainiya baibela pa numa ya kusangwa kwi sukulu lya bapainiya. Twalibombele imilimo iingi ku Guadeloupe ilyo bashilatweba ukuya mu kubombela ku French Guiana.

Pa myaka iingi balimupeela imilimo iyalekanalekana. Finshi fimwafwa ukuiteulula ilyo bamupeela umulimo umbi?

Ba Marie-Line: Bamunyinefwe aba ku musambo wa French Guiana, balishibe ukuti twalitemenwe sana ilembo lya kwa Esaya 6:8. Kanshi ilingi line nga batutumina foni baletwipusha kwati balesekesha fye abati, “Bushe muleibukisha ifyaba pe lembo mwatemwa sana?” Twaleishiba ukuti nga batweba ifyo ninshi bali mu kutupeela umulimo umbi. Kanshi twaleasuka fye atuti, “E po Tuli! Tutumeni!”

Tatufwaya ukulinganya umulimo tulebomba ku milimo imbi iyo twalebomba kale pantu kuti twatendeka ukumona kwati umulimo twalebomba waliweme ukucila  uo tulebomba. Kabili tulesha na maka ukupanga ifibusa na bamunyinefwe na bankashi aba ku cifulo batutuma ukuya mu kubombela.

Ba Jack: Bamunyinefwe bamo na bankashi tabalefwaya tukuuke pantu balefwaya fye tutwalilile ukuba nabo. Nomba ilyo twafumine ku Guadeloupe, munyinefwe umo alitwibukisheko amashiwi Yesu alandile ayaba pali Mateo 13:38 ayatila: “Ibala [bantu] ba muli ici calo.” Kanshi nga batupeela umulimo umbi tulebukisha ukuti te mulandu no ko tulebombela, tucili tubombela mwi bala limo line. Na kuba icacindama sana bantu ababa mu cifulo tubilamo imbila nsuma!

Nga twaya mu kubombela ku cifulo cimbi, tulamona ukuti abekala muli cilya cifulo baliba ne nsansa. Kanshi twikala nga filya fine aba kuli ico cifulo bekala. Tusanga ukuti ifya kulya balya fyalipusana ne fyo twabelesha ukulya, lelo tulalya ifyo fine balya no kunwa ifyo banwa, kulila fye na twishiba ukuti tafyatulwalike. Tulesha ukulalanda ifisuma pa mulimo onse uo batupeela.

Ba Marie-Line: Kabili tulasambilila ifingi ku ba bwananyina abo tusanga uko twaya. Ndebukisha ifyacitike bushiku bumo ilyo twaile fye ku French Guiana. Kwali imfula iikalamba sana kabili twalemona kwati tulingile ukulolela imfula ipwe e lyo tuye mu kubila imbila nsuma. Lyena nkashi umo anjipwishe ukuti, “Namuipekanya tuleya?” Nalipapile kabili namwipwishe nati, “Ukuipekanya shani?” Anjebele ati, “Sendeni umwamfuli, twalaya na macinga.” Nalisambilile ifya kucofa incinga ninshi ninjikata no mwamfuli ku kuboko kumo. Nkanasambilila ukucita ifi nga nshalebila imbila nsuma mu mainsa!

Apo mwalikuukapo imiku nalimo 15, bushe kuti mwatwebako ifyafwa sana abantu nga balekuuka?

Ba Marie-Line: Te lyonse canguka ukukuuka. Nomba calicindama ukufwaya ing’anda iisuma umo mwingalaumfwa bwino ukutuushisha nga mwafuma mu kubila imbila nsuma.

Ba Jack: Ilingi line nga twakuukila mu ng’anda, ndapenta mu kati. Limo bamunyinefwe ba ku musambo nga nabeshiba ukuti tatwakakokoleko uko batutuma ukubombela balenjeba abati, “Ba Jack, mwi-icusha ukupenta ing’anda uno muku!”

Ba Marie-Line balishiba sana ifya kulonga ifipe nga tulekuuka! Balabika fyonse mu fibokoshi e lyo balembapo ifyo babikilemo, ku ca kumwenako balalembapo ukuti “ifya mu muputule wa kusambilamo,” “ifya mu muputule wa kulaalamo,” nelyo “ifya mu kicini.” Kanshi nga twafika uko tukukiile, cilatwangukila ukubika cila cibokoshi uko cifwile ukuba. Na kabili pa cibokoshi cimo na cimo balalembapo umutande wa filimo, kanshi cilatwangukila ukusanga ico tulefwaya.

 Ba Marie-Line: Apo twalisambilila ukuteyanya bwino ifintu, tatuwayawaya ukutendeka ukubomba umulimo wa kubila imbila nsuma.

Mutantika shani inshita pa kuti ‘mulebombesha umulimo wenu onse’?—2 Tim. 4:5.

Ba Marie-Line: Ubushiku bwa pali Cimo e bo tutuusha no kupekanya ukulongana. E lyo ukutendekela pali Cibili, tulaya mu kubila imbila nsuma.

Ba Jack: Nangu ca kuti balitweba ama-awala tulingile ukulabomba mu mulimo wa kubila imbila nsuma cila mweshi, tubika sana amano ku mulimo wa kubila ukucila ukubika amano ku ma-awala. Kanshi lyonse nga twafuma pa ng’anda, tulesha apo twingapesha ukulanda no muntu onse uo twakumanya mpaka twabwelela pa ng’anda.

Ba Marie-Line: Ku ca kumwenako, nga twaya mu kwangala ku cifulo cimo tulasendako amatrakiti. Pantu abantu bamo balatulomba impapulo nangu ca kuti tatubebele ukuti tuli Nte sha kwa Yehova. Kanshi tulabika sana amano ku fyo tufwala na ku fyo tucita pantu abantu balatubikako amano.

Ba Jack: Cimbi icilenga tuleshimikila ni co tulacitila abena mupalamano ifisuma, abo tubomfya nabo ulubansa lumo lwine. Ku ca kumwenako, ndatoola amapepala pa lubansa, ndapoosa ifisoso ifili mu ng’ungulu kabili ndapyanga na mabula. Abena mupalamano balamona ifyo tucita kabili limo balepusha abati, “Bushe kuti mwampeelako Baibolo?”

Apo mwalishimikila sana mu mishi iyabela ukutali, bushe kwaliba fimo ifyaibela ifyacitike ilyo mwalebombela muli ishi incende?

Ba Jack: Taca-anguka ukufika ku ncende shimo ishaba mu Guiana. Ilingi line twale-enda amakilomita 600 umulungu onse mu musebo uwaonaika. Tatwakalabe ifyacitike ilyo twaile ku ncende beta ukuti St. Élie, iyabela mu mpanga ya Amazon. Twalyendele pa ama-awala ayengi ukubomfya motoka beta ukuti 4x4 e lyo no bwato bwa injini. Abantu abengi abaleikala kulya baleimba golde. Baletemwa sana nga twabapeela impapulo kabili balesangwilako utubulungwa twa golde! Mu nshita ya cungulo twalibatambishe vidio imo pa mavidio icilonganino ca kwa Lesa capanga. Kwali abekala mushi abengi abatambileko.

Ba Marie-Line: Papitile fye imyaka iinono ukufuma apo ba Jack babebele ukuyalanda ilyashi lya Cibukisho ku mushi wa Camopi. Pa kufika kuli ulya mushi twalyendele ama-awala nalimo yane no bwato bwa injini pa mumana wa Oyapock. Ala tatwakalabe ifyacitike!

Ba Jack: Nga twafika apali umukuku sana kabili apashishikile, twaletiina ukuti nalimo kuti twabunda. Na lyo line, umukuku walemoneka bwino nga uleisa mu ku kumana no bwato. Uule-ensha ubwato alingile ukwishiba sana ifya kwensha. Ala twali-ipakishe. Nangu ca kuti kuli cilya cifulo kwali fye ba Nte 6, abantu nalimo 50 e basangilwe ku cibukisho ukubikako fye na bena America abalanda ululimi lwa ku India!

Ba Marie-Line: Abacaice kuti baipakishako aya mapaalo ya musango uyu nga basalapo ukubombesha mu mulimo wa kwa Yehova. Ico balingile fye ukucita kucetekela muli Yehova, lyena icitetekelo cabo cikakoselako. Tulamona ifyo Yehova atwafwa.

Mwalisambilila indimi shingi. Nomba bushe cilamwangukila ukusambilila ululimi?

Ba Jack: Iyo mukwai. Naleibikilishako ukusambilila pantu nalishibe ukuti ningile ukusambilila pa kuti ndebila imbila nsuma no kulabomfya ulo lulimi mu cilonganino. Naletungulula Isambililo lya Ulupungu lwa kwa Kalinda mu ciSranantongo * ninshi tabalampeelapo ne lyashi lya kubelenga Baibolo! Nalipwishe munyinefwe umo nga ca kuti abantu baleumfwa ifyo nalelanda. Atile, “Nangu ca kuti tatwacilaumfwa fimo ifyo mwacilalanda, mwacitungulula bwino.” Abaice balingafwile sana ukusambilila ululimi. Pantu nga nalufyanya ukulanda fimo, balenjeba ukuti te fyo mfwile ukulanda, lelo abakalamba bena balentamba fye. Kanshi nalisambilile ifingi ku baice.

Ba Marie-Line: Mu cifulo cimo ico twalebilamo imbila nsuma nalikwete abo nalesambilisha Baibolo mu ciFrench, abo nalesambilisha mu ciPortuguese na bo nalesambilisha mu ciSranantongo. Nkashi umo anjebele ati nga ninkwata abakusambilisha mu ndimi ishalekanalekana mu bushiku bumo, kuti cawama nga ndebalilapo ukusambilisha uo ndesambilisha mu lulimi ulo nshaishibisha, e lyo nalekelesha ukusambilisha uo ningile ukusambilisha mu lulimi naishibisha. Tapakokwele nalimwene ubusuma bwali mu kucita ifyo anjebele.

Bushiku bumo naile mu kusambilisha umuntu Baibolo mu ciSranantongo e lyo naya mu kusambilisha  na umbi mu ciPortuguese. Ilyo natendeke ukusambilisha umuntu walenga bubili, nkashi twali nankwe anjebele ukuti, “Ba Marie-Line, cilemoneka kwati umusambi taleumfwa ifyo mulelanda!” Nalilwike nati nalelanda iciSranantongo ku mwanakashi umwina Brazil mu cifulo ca kuti nande nankwe mu ciPortuguese!

Abo mwalebombela pamo nabo e lyo na bo mwa-afwile balimutemwa sana. Cinshi camwafwile ukuba sana ifibusa na ba bwananyina?

Ba Jack: Ilembo lya Amapinda 11:25 litila: “Umuntu wa bukapekape akakwata ifingi.” Kanshi tulaitemenwa ukuba pamo na ba bwananyina no kubacitila ifisuma. Nga tulewamya Ing’anda ya Bufumu ba munyinefwe bamo balenjeba abati: “Lekeni bakasabankanya babombe uyu mulimo.” Na ine nalebeba nati: “Na ine wine nine kasabankanya. Kanshi nga kuli umulimo uo bakasabankanya balingile ukubomba, na ine ndafwaya ukubombako.” Nangu ca kuti bonse tulafwaya ukukwatako inshita ya kuba fweka, tulebukisha ukuti tatulingile ukulenga inshita ya kuba fweka yatulesha ukucitila aba bwananyina ifisuma.

Ba Marie-Line: Tulesha apo twingapesha ukucitila bamunyinefwe na bankashi ifilanga ukuti twalibabikako amano. Nga tulecita ifi tuleshiba nga ca kuti balekabila uwa kusakamana abana babo nelyo uwa kuyabasenda nga bainuka ku sukulu. Lyena tulatontonkanya pa fyo twingacita pa kuti tubafwe. Ukucita ifi kulalenga tuleba sana ifibusa pantu tulaipeelesha ukubaafwa ilyo balekabila aba kubaafwa.

Bushe Yehova amupaala shani pa fyo mwasalilepo ukuya mu kubombela uko bakabila ba mbila nsuma bacepa?

Ba Jack: Umulimo wa nshita yonse walilenga Yehova atupaala icine cine. Tulatemwa sana ukumona ifyo Yehova abumba. Nangu ca kuti limo limo tulakwata amafya, tatusakamikwa icili conse pantu abantu ba kwa Lesa balatwafwa konse uko twaya.

Ilyo nali umulumendo, balinkakilepo mu cifungo ku French Guiana pa mulandu wa kukanaingila ubushilika. Nshaishibe ukuti ku ntashi nkabombapo bumishonari mu French Guiana kabili nshaishibe ukuti bakansuminishapo no kutandalila abafungwa mu cifungo ku kubakoselesha. Ukwabula no kutwishika Yehova alapaala ababomfi bakwe!

Ba Marie-Line: Ukwafwa abantu e kulenga sana ndesekelela. Twaliba ne nsansa ifi tubomba umulimo wa kwa Yehova. Ukubombela pamo umulimo wa kwa Yehova kwalilenga icupo cesu ukukoselako. Inshita shimo ba Jack balanjipusha nga kuti twaitako abaupana bamo ku ca kulya abakwata amafya. Ilingi nga banjipusha ndasuka nati, “Ifi fine e fyo na ine nacilatontonkanya!” Kanshi ilingi tulatontonkanya fimo fine.

Ba Jack: Papitile fye imyaka iinono ukufuma apo bansangile na kansa beta ukuti prostate cancer. Umwina mwandi Marie-Line alyumfwile ububi ilyo namwebele amashiwi ya kuti: “Mukashi wandi, nga ca kuti nalifwile mailo, ninshi nafwa fye ukwabula ukukota nge fyo nale-enekela ukuti nkafwa ‘uwa myaka iingi.’ Nomba kuti nafwa ne nsansa pantu nalishiba ukuti nalibomfya ubumi bwandi bonse ku kubombela Yehova.”—Ukute. 25:8.

Ba Marie-Line: Yehova alitupeele imilimo iyalekanalekana iyo tushale-enekela kabili alilenga twacita ifintu ifyo tushatalile atutontonkanyapo. Ala Yehova alitupaala icine cine mu bumi bwesu! Kuti twaya ukuli konse uko icilonganino ca kwa Yehova catweba ukuyabombela pantu twalicetekela ukuti Yehova akatwalilila ukuba na ifwe!