Naek Jack ma Srar Marie-Line sufarmyan kwar kayamyam ro oras nakam ro taun 1988. Suraḇe moḇ ḇebabo ido, sukara samswen ḇa kukro sumarisen ker. Suna fararur nabor kwar ro sup Guadeloupe ma Guyana Prancis. Baboine, kantor cabang ḇero Prancis iso ḇemamwarek fararur ḇesren ro sup suru suine. Rwama kofakfuken su.

Rosai ḇefnai fa mumarisen musun ro fararur oras nakam?

Srar Marie-Line: Yaba ro sup Guadeloupe. Ro fafisu anya, yaso ker Awin i ḇo nuḇaryas ro arwo rawo mandira. Isof rasine, Awin imyaren kaker. Ayama yamarisen yasrow snonkaku sya. Inja ro taun 1985 ya, yaksun ro fararur perintis fafisu yamnai kwar ro SMA.

Naek Jack: Fafisu yababo kaker, yaḇebati kuker perintis ḇeryaḇ faro fararur ḇesren ya. Ras libur ido, yun perintis ekstra. Ras Sabtu ma Minggu ke, na nkoso bis fnoḇek perintis sya fa nkora nkoḇaryas ro moḇ sedi. Na nkoḇaryas ro arwo rawo mandira, raposa nkoraḇe swan andir. Fafisu anya nkomarisen kaku!

Yafarḇuk kuker Marie-Line ro taun 1988. Mura ido yakara, ’Roi ono nadwarek nu ḇa. Inja, rya bisa nufarmyan kayam ro fararur ro oras nakam.’ Mura, yasowarpu Marie-Line fa yaksun ro fararur perintis. Taun oser ramnai, nuyakso sekolah perintis. Nufarkor raposa, skur nu ḇe perintis istimewa. Sor nu fa nufarmyan ro moḇ riḇeso ro Guadeloupe. Ḇarpur wer, sor nu ḇe Guyana Prancis.

Nkorower mboi, fararur musmai na nfadadwer ker. Rosai ḇefnoḇek mu fa mumarisen muso nakam?

Srar Marie-Line: Naek ḇero Betel Guyana Prancis sifawi mnuk numarisen kaku iso Yesaya 6:8 ya. Inja rofyor setelfon nu, sifarfnak ker ḇo soḇe, ”Muswarepen kaker mnuk mumarisen kaku ani ke?” Nufawi ḇeri inema nari nusmai fararur ḇebabo wer, inja na nukarem radine, ”Nusoine! Mkowan Nu Mura!”

Numa numarisen faro fararur nusmai ro fafisu ine. Inja, numewer numam fararur ro fafisu  naiwara ipyum syadi ro baboine. Nusewar kako fa numambir pyum syadi naek ma srar ḇero moḇ nufarmyan babo ine.

Naek Jack: Fafisu naiwara, naek ma srar sisya simewer nuraḇe moḇ ḇese wer. Inja, sisewar nyan fa nuḇarek monda ro moḇ sedi. Mboi, fafisu nubur sup Guadeloupe, naek oso danun ḇe nu fa nuswarepen Yesus wos ḇyena ḇero Matius 13:38: ”Yaf ya irya supswan.” Inja, rofyor siwan nu ḇe moḇ ḇese, nuswarepen ker snar ro moḇ risai monda nura ro na, nuisya nuro yaf oser kaker. Ḇefandun syadi iso snonkaku ḇero moḇ nufarmyan anya.

Fafisu nura ro moḇ ḇebabo, numam mboi kawasa ḇero moḇ anya simarisen ro kenem sena. Inja, nusewar fa nukenem raris moḇ sikenem raya. Nufawi nuyakan roḇean sena ḇa, mboi nusewar fa rosai san na, nuyakan na, rosai sinem na, nuyakinem na. Numam pyum kako fa nuduf ḇa. Nufawar fawar ḇepyum nusmai ro fararmyan ḇe si.

Srar Marie-Line: Nufarkor nabor kako ro naek srar ḇero diwa sya. Imbe yafar fafisu nurama babo ro Guyana Prancis. Ras oso imbe nkora nkoḇaryas, fama ras anya mekem ya iba fafaya. Inja yakara nkowaf rawo mekem ya imnai resari. Mboi yakandor kukro imbesrar oso doḇe, ”Indo, kura.” Yoḇe, ”Bah, imyun bo?” Ikofen ḇo doḇe, ”Wuf payung beja. Kuyek speda ḇo kura.” Inja, ras anya insape yafarkor fa yek speda ḇo yuf payung. Yafarkor roi ine ḇesyandari, oroḇa kada fafisu mekem dado ker ido, nari yara yaḇaryas ḇa!

Muraḇe moḇ ḇese rarwan ri 15 kwar. Imbe mukofenḇair nyan ḇepyan faro ḇera ḇe moḇ ḇese kako ke?

Srar Marie-Line: Kora ḇe mo ḇese ima roi ḇepyan ḇa. Ḇape, kofrur kaku moḇ koḇarek ya fa ipyum ido, kona moḇ fa komnaisu fyor kobur ro ḇaḇeḇaryas.

Naek Jack: Na yaḇecat rum nuḇedi bandum ya. Fyor naek ro kantor cabang sifawi nari nukain kawan ḇa ro moḇ nufarmyan ro ya, sifnak nu ḇo soḇe, ”Jack e, wafrur marmor awer au fa ḇecat rum ine!”

Marie-Line ima fyawi fyasos fasawsaw roiebor nuḇena! Isun na ḇe karton, ma ro karton oser-oser fyas, ”kakus”, ”sim”, ”moḇ ḇekankun”, ma ḇesena. Inja, fyor nuro rum ḇebabo kwar, bisa  nurir karton anna ro moḇ ḇyena oser-oser. Marie-Line fyas kako roiebor ḇero karton yadori. Inja, napyan fa nusrow beri roi nusewar na.

Srar Marie-Line: Snar nufawi nyan nufasos pyum roi nakam, inja bisa nura beri fa nuḇaryas.

Moḇsa mufasos mnis oras muḇena insama ’mufrur posa afuffarmyan mubedi’?—2 Tim. 4:5.

Srar Marie-Line: Ras Senin ido, na numnaisu ma nufrur fasasos faro fananjur. Ras Selasa ḇebo, nura nuḇaryas.

Naek Jack: Na nuḇuk oras ro fararmyan imnis sor ro nu. Ḇape numam monda faro roi ine ḇa. Roi ḇepon kaku ro kenem nuḇena iso ḇaḇeḇaryas ya. Ro fyor nusae ro rum isof nubur, nusewar fa nuyawos ḇe snonkaku nusrow sya kam.

Srar Marie-Line: Rupa ra, fafisu numbran farma, yun ker syapram na. Nukofenḇair ḇepon ḇaim numa Saksi Yahwe si nu, mboi ono sisya sfanam nu fa sor syap-syap na. Iso ḇefnai fa numam pyum moḇ nusansun nu rai ma kenem nuḇena. Snar iso roi snonkaku smam ker na.

Naek Jack: Nubuk kesaksian kako kuker nufasna frur pyum ḇe snonkaku ḇeḇarek fanam nu sya. Imnis ra, yun papus ma yasawen na, ḇaido yasasapu undam ḇesapi ḇero bubes rum andire. Fyorno ido ḇemam roi nufrur nane sifuken, ”Bisa yor Refo oso ḇe aya ke?”

Muḇaryas ker ro moḇ ḇeḇinkwan na. Inja musmai fawar ḇepyum ke?

Naek Jack: Ro Guyana, moḇ ḇeḇeso samswen fa kora yoḇ na. Ro swaf minggu oser, nufrur marandan kawanwan ya kilometer ri 600, ma sampak na naḇyeḇa kaku. Nupok nuḇefnder ḇa ras nuraḇe mnu St. Élie, ro supyado Amazon. Nuyek oto ma jonson ro swaf kawan. Ḇebor ḇeḇarek ro diwa sya, sfararur fa sisewar brawen. Simarisen sismai syap koḇedi, inja ḇeḇeso sya sḇuk brawen ḇemawa fa nḇe farsarser! Roḇ ya, nufasnai vidio oso. Kawasa ḇebor srama fa sakmam vidio ani.

Srar Marie-Line: Ras oso sor Jack fa dun faya Swarapepen ro Camopi. Insama nuraḇe ḇe diwa, na nuyek jonson ro swaf oras rifyak ro Warḇeki Oyapock. Inema fawar ḇepyum kaku.

Naek Jack: Fyor warḇeki ya isyor, syap na nasambraḇ, ine bisa nun roi ḇemun ḇe nu. Numkak kero fyor jonson nuyek ani ifrar fanam war ḇedaf anya. Ḇeyun pyum jonson monda siso nari ḇebur roi ḇemun anine. Mboi, marandan ani nun marisen kaku. Saksi riwonem monda ḇero dia, mboi ḇeyakso ro munara Swarapepen ani barbor sena sisyadi ro 50, kawasa Indian sia sakso kako!

Srar Marie-Line: Romawa babo simarisen sḇuk kenem sena fa sfarmyan ḇe Yahwe ido, nari saksmai fawar ḇepyum imnis radine. Sfarkor si fa sikyar faro Yahwe, ma kakyar sena na nsambraḇ syadi. Numam ker ro mankun nu kwar moḇsa Yahwe ifnoḇek nu rai.

Mufarkor fa mufawi muyawos ro wos riḇeso kwar. Ine napyan ḇe mu ke?

Naek Jack: Napyan ḇaḇeri. Yafarkor wos anna insa yaḇukiḇaryas ma yaḇukifnoḇek sidang. Fyor yafarkor ro wos Sranantongo * yaksmai tugas ḇaim ro ḇaḇewasya Refo, mboi sor aya fa yafarkin farkarkor Baryas ro wos ani. Yafuken ḇe naek oso ifawi roi yakofen na ke roḇa. Doḇe, ”Wos ḇeḇeso nkofawi na ḇa, ḇape ipyum kwar.” Romawa sya kako sifnoḇek aya. Yawos sasar ido, nari sikofenḇair na ḇe aya. Mboi, snonkaku ḇeba sya sfasis monda. Yafarkor nabor ro romawa sya.

Srar Marie-Line: Ro moḇ oso, yaḇukfarkor Refo ro wos Prancis, Portugis, ma Sranantongo. Imbesrar oso danun ḇe aya insama yaḇukfarkor Refo ro wos ḇesamswen kaku resari insape wos ḇepyan na. Inema anun ḇepyum kaku.

Ras oso, yaḇukfarkor Refo ro wos Sranantongo ramnai ro wos Portugis. Fyor yaḇukfarkor Refo ḇesuru ya, imbesrar ḇeso aya ikofen, ”Marie-Line e, wos risai wawos ya!” Yafawi ḇa ḇo yawos ro wos Sranantongo, mboi ḇefarkor Refo anya dawos ro wos Portugis!

 Naek srar sya siswar kaku mu. Inja, rosai ḇefrur fa mufanam faro si?

Naek Jack: Amsal 11:25 doḇe, ”Snonkaku ḇena snemura nari ḇyesaḇarar ḇa.” Inja numarisen nuḇuk swaf ma samambraḇ nuḇena faro naek srar sya. Fyor nkoḇe nkofrur mnis kaḇer Balai Karajan, naek ḇeḇeso sikofen ḇe aya, ”Iḇye mura, na manḇaryas sya siso ḇefrur ya.” Ḇape, yakarem, ”Aya kako manḇaryas ḇae, inja fararur naisya ido na yakfararur kako.” Fyorno ido, komarisen kokain ro mankunko. Nu kako, ḇape numarisen nusewar fa nufnoḇek snonkaku ḇesesya.

Srar Marie-Line: Nusewar fa numam naek srar roi sfandun na. Inja, nufawi fafisu risai sfandun fafnoḇek nuḇena. Imnis raris, numamwarek pyan romawa sesi ḇaido nura nuyun pyan si ro rumfarkor ḇe rum. Nufasos jadwal nuḇedi insama nuna swaf fa nufnoḇek si. Numarisen nufnoḇek naek srar sya, inja nufanam kuker si.

Barakas rosai monda musmai na snar mufarmyan ro moḇ ḇefandun syadi manḇaryas?

Naek Jack: Snar nufarmyan ro oras nakam, inja nusmai marasrisen ro kenem nuḇena. Ro moḇ nufarmyan ro na kam, nuna swaf nabor fa numam Yahwe ḇraur ḇepyum Ḇyena. Fyorno ido nusmai samswen, mboi nusmai sneprei ḇesya kwar snaro nufawi naek srar sya sisaramper nu ro moḇ risai monda nura ro na.

Fyor yababo ya, yasun ro bui ḇero Guyana Prancis snar yamewer yaso ro polotik. Yakara ḇaḇeri na yakaḇer wer ḇe sup ani fa yafarmyan ḇe misionaris. Sḇuk ijin kako ḇe aya fa yaḇaryas ro bui. Barakas Yahwe ḇyuk ḇe aya nabor fafayaḇa!

Srar Marie-Line: Yamarisen kaku snar yafrur roi nabor faro snonkaku ḇesesya. Numarisen snar bisa nufarmyan kayame. Farḇakḇuk nuḇena kako nsambraḇ syadi. Fyorno ido, roi nukara na namnis. Imnis raris, Jack doḇe imarisen fa nuyor imbeswa ro sidang ḇefandun wos sneprei fa nkonan kayame. Ma yakofen, ”Aya kako yakara radiri!”

Naek Jack: Insape dokter ikofen yaduf kanker prostat. Ras oso, yakofen roi Marie-Line imarisen ryower na ḇa. Yoḇe, ”Ne rwower pyum, yaḇe mansar ḇaime. Mboi meser yamar ido, yamarisen kwar snar yaḇuk kenem yedi fa yafarmyan faro Yahwe I ma ine nafrur fa yaryaḇ kaku.”​—Kej. 25:8.

Srar Marie-Line: Yahwe ḇyuk fararur nukara na ḇaḇeri. Yahwe iso ḇefrur fa nusmai fawar ḇepyum nabore. Kenem nuḇena nafo kuker roi ḇepyum. Nukyar nari Yahwe ifnoḇek nu ḇesya kwar. Inja, organisasi iwan nu ḇe moḇ risai monda, nukofen ḇeri, ”Nusoine! Mkowan nu mura!”