Stat long 1988, Jek mo Marilin i mekem wok blong paenia tugeta. Tufala i gat fasin we tufala i save lan kwiktaem long ol jenis, taswe tufala i go prij long plante ples long Gwadelup mo Franis Gwiana. Naoia branj ofis blong Franis i lukaot long tufala ples ya. Bambae yumi askem sam kwestin long Jek mo Marilin.

?Wanem i pulum yutufala blong mekem wok blong Jehova fultaem?

Marilin: Mi gruap long Gwadelup, mo mama blong mi i wan Witnes we i gat strong tingting. Taem mi pikinini, plante taem mi prij fuldei wetem hem. Mi laekem blong prij, taswe long 1985, taem mi finis long skul, mi mekem wok blong paenia.

Jek: Taem mi pikinini, mi joen oltaem wetem ol paenia we oli laekem wok blong prij, mo mi mekem haftaem paenia taem mi spel long skul. Long sam wiken, mifala i tekem bas blong go prij fuldei wetem sam narafala paenia long teritori blong olgeta, mo biaen mifala i go long solwota. !Ol wiken ya oli gud we!

Long 1988 mi maredem Marilin, mo mi stap tingting se, ‘I no gat samting i blokem mitufala blong mekem moa long wok blong prij.’ Mi joenem Marilin long wok blong paenia, nao wan yia biaen, afta long skul blong paenia, oli askem long mitufala blong mekem wok blong spesel paenia. Mitufala i muv i go long plante defren ples long Gwadelup, mo biaen, long Franis Gwiana.

Long ol yia we oli pas, yutufala i mekem wok blong Jehova long ol defdefren ples. ?Wanem i givhan long yutufala blong mekem ol jenis ya? 

Marilin: Ol brata long Betel long Franis Gwiana oli save se mitufala i laekem Aesea 6:8. Samtaem oli ring long mitufala, mo oli tok plei se, “?Yutufala i tingbaot vas ya we yutufala i laekem tumas?” Mitufala i save se bambae oli askem long mitufala blong muv i go long narafala ples. Ale,  mitufala i ansa se, “!Mitufala i save go! !Yu sanem mitufala!”

Sipos mitufala i skelem niufala ples wetem ples we mitufala i lego, maet mitufala i no laekem. Taswe mitufala i no mekem fasin ya. Mo tu, mitufala i traehad blong save gud ol brata mo sista.

Jek: Sam brata mo sista we mitufala i gudfren wetem olgeta, oli traem pulum mitufala blong mitufala i no muv i go long narafala ples. Be taem mitufala i aot long Gwadelup, wan brata i mekem mitufala i tingbaot ol tok blong Jisas long Matiu 13:38 se: “Garen ya, hemia wol.” Taswe, taem mitufala i muv, mitufala i tingbaot we mitufala i stap long sem garen yet. !Samting we i moa impoten, hemia ol man we mitufala i prij long olgeta!

Taem mitufala i kasem wan niufala ples, mitufala i traehad blong glad long ples ya. Mitufala i kakae olsem ol manples, dring olsem olgeta, mo lukaot gud long helt blong mitufala. Long evri ples, mitufala i traehad blong tokbaot ol gudfala samting long ples ya.

Marilin: Mo tu, ol brata mo sista oli tijim mitufala long plante samting. Mi tingbaot taem ya we mitufala i jes kasem Franis Gwiana. I gat bigfala mama blong ren, mo mi ting se mifala i mas wet blong ren i stop, nao mifala i jes go prij. Be wan sista i talem long mi se, “Ale, yumitu go.” Mi sapraes, mo mi askem se: “?Bae yumitu go olsem wanem?” Hem i se: “Karem ambrela, mo yumitu go long baskel.” Long dei ya, mi lanem olsem wanem blong ron long baskel mo holem ambrela tu. !Sipos mi no lanem samting ya, bambae mi neva prij long rentaem!

From we yutufala i muv 15 taem finis, ?yutufala i gat sam advaes blong olgeta we oli wantem muv?

Marilin: I no isi blong muv, i gat plante samting we oli hadwok. Be i impoten blong faenem wan haos we yu save spel gud taem yu kambak long wok blong prij.

Jek: Oltaem mi pentem bakegen insaed blong haos we bambae mitufala i stap long hem. Samtaem ol brata long branj ofis we oli save se maet mitufala i no stap longtaem long niufala ples ya, oli tok plei se, “!Jek, yu no westem taem blong pentem haos ya!”

!Marilin i savegud wok ya blong fulumap ol samting long ol bokis! Hem i fulumap olting long ol katon mo i raet long olgeta se “olting blong swim,” “rum blong slip,” “kijin,” mo ol narafala  samting olsem. Taem mitufala i muv, i isi blong save wanem ples long haos we ol katon ya oli mas go long hem. Hem i mekem wan lis tu, blong evri samting insaed long ol katon wanwan, hemia i mekem se i isi blong faenem samting we mitufala i lukaotem.

Marilin: From we mitufala i folem wan plan olsem, mitufala i save stat blong prij kwiktaem.

?Wanem program we yutufala i folem blong “finisim gud minista wok” blong yutufala?—2 Tim. 4:5.

Marilin: Long Mande, mitufala i spel mo rerem ol miting. Stat long Tusde i go, mitufala i prij.

Jek: I tru se i gat wan stret namba blong ol aoa we mitufala i mas kasem. Be mitufala i no tingting tumas long samting ya. Wok blong prij i bigfala samting long laef blong mitufala. Taem mitufala i aot long haos go kasem we mitufala i kamhom bakegen, mitufala i traem prij long olgeta man we mitufala i mitim.

Marilin: Sipos mitufala i go long piknik, oltaem mi karem sam traket wetem mi. Samfala oli kam askem ol buk, nating we mitufala i no talem long olgeta se mitufala i Witnes blong Jehova. Taswe, mitufala i lukaot gud long klos mo fasin blong mitufala. Ol man oli stap lukluk samting ya.

Jek: Mo tu, mitufala i kaen long ol man raonabaot, blong givim wan gudfala witnes long olgeta. Mi pikimap ol doti we oli stap olbaot, putum long tin doti, mo mi rek long yad blong mitufala. Ol man raonabaot oli lukluk samting ya, mo samfala oli askem se: “?Yu save givim wan Baebol?”

Yutufala i bin prij tu long sam ples farawe. ?Yutufala i tingbaot sam gudfala stori?

Jek: Long Gwiana, i had blong go long sam ples. Plante taem, mitufala i ron 600 kilometa long wan wik, long ol rod we oli nogud. Mi tingbaot yet, taem ya we mitufala i go long St. Élie, long dakbus blong Amazon. Mitufala i ron plante aoa long fo wil trak mo spid bot. Bighaf blong ol man long ples ya oli lukaotem gol. !Samfala we oli glad tumas long ol buk blong yumi, oli givim ol smosmol pis gol blong talem tangkiu! Long naet, mitufala i soemaot wan video blong oganaesesen, mo plante man oli kam luk.

Marilin: I no longtaem oli askem long Jek blong i go mekem Memoriol long Camopi. Blong kasem vilej ya, mitufala i ron fo aoa long spid bot long Oyapock Reva. !I gud tumas!

Jek: Long ples we reva i no dip, taed i strong mo i gat ol bigfala ston aninit long wota we oli save brekem bot. Taem bot i kam klosap long ples ya, mi sapraes blong luk olsem wanem wota i ron strong. Man we i draevem bot i mas savegud reva ya. Be mifala i sef go kasem vilej. !Nating se mifala i 6 Witnes nomo, be 50 man oli kam long Memoriol, wetem sam Indian blong Amerika tu.

Marilin: Ol yangfala we oli wantem mekem moa long wok blong Jehova, oli save gat gudfala taem olsem. Yufala i mas trastem Jehova oltaem, nao bilif blong yufala bambae i kam strong moa. Plante taem mitufala i luk olsem wanem Jehova i givhan long mitufala.

Yutufala i lanem plante lanwis. ?I isi blong lanem ol niufala lanwis?

Jek: Nogat. Mi lanem ol lanwis ya from we i gat nid long ol kongregesen. !Mi no mekem wan Baebol riding yet long lanwis Sranantongo * be oli askem long mi blong lidim Wajtaoa Stadi! Mi askem long wan brata sipos oli kasem save. Hem i ansa se: “Samtaem mifala i no kasem save, be yu mekem gudfala wok.” Ol pikinini oli givhan bigwan long mi. Taem mi mestem wan toktok, oli talem, be ol bigman nogat. Mi lanem plante samting long ol pikinini.

Marilin: Long wan ples, mi mekem ol Baebol stadi long lanwis Franis, lanwis blong Potugal, mo Sranantongo. Wan sista i talem se i moagud yu mekem ol stadi fastaem long lanwis blong Potugal we i had moa, nao biaen yu mekem olgeta we oli toktok Sranantongo. Mi no kasem save from wanem hem i talem olsem.

Be wan dei, mi luksave se advaes ya i waes. Mi  mas mekem wan stadi long Sranantongo, mo narawan long lanwis blong Potugal. Mi stat wetem Sranantongo, be taem mi mekem narafala stadi, sista we i joen wetem mi i talem se: “!Marilin, hem i no kasem save long yu!” !Mi stap toktok Sranantongo long wan woman Brasil, be mi sud toktok lanwis blong Potugal!

Ol brata mo sista oli lavem yutufala. ?Olsem wanem yutufala i fren gud wetem olgeta?

Jek: Ol Proveb 11:25 i talem se: “Man we i stap givim ol samting long narafala man long gladhat blong hem, oltaem hem i gat plante samting.” Mitufala i glad blong givhan long ol narafala. Long saed blong ol wok blong lukaot long Haos Kingdom, samfala oli talem se: “Ol pablisa oli save mekem.” Be mi mi talem se: “Mi tu mi wan pablisa. Sipos i gat sam wok blong mekem, mi wantem givhan.” I tru se yumi evriwan i nidim smoltaem blong stap yumi nomo, be mitufala i no wantem se samting ya i blokem mitufala, blong mitufala i no moa givhan long ol narafala.

Marilin: Mitufala i traehad blong save gud ol brata mo sista. Olsem nao, taem oli nidim wan man blong lukaot long pikinini o go from olgeta long skul, mitufala i luksave. Mitufala i jenisim ol plan blong mitufala blong givhan long olgeta taem oli nidim. Taswe mitufala i fren gud wetem olgeta.

?Wanem ol blesing we yutufala i kasem?

Jek: Mitufala i kasem plante blesing long wok blong Jehova fultaem. Mitufala i gat janis blong lukluk ol nambawan samting we hem i wokem raonabaot long yumi. Nating se mitufala i fesem sam hadtaem, be mitufala i gat pis long tingting, from we mitufala i save se ol man blong Jehova oli sapotem mitufala.

Taem mi mi yangfala, mi go kalabus long Franis Gwiana from we mi no wantem joen long ami. Mi neva tingbaot se wan dei bambae mi gobak long ples ya olsem wan misinari, mo mi save visitim prisen haos olsem wan minista blong God. !Tru ya, han blong Jehova i no sot!

Marilin: Samting we i mekem mi mi glad moa, i blong halpem ol narafala. Mitufala i glad tumas blong mekem wok blong Jehova fultaem, mo samting ya i mekem se mitufala i lavlavem mitufala moa. Samtaem Jek i wantem singaot wan hasban mo waef we tufala i harem nogud smol, oli kam kakae wetem mitufala. Nao mi mi talem se: “!Mi tu mi gat sem tingting!” Samting ya i hapen plante taem.

Jek: I no longtaem i pas, dokta i faenemaot se mi mi gat kansa (prostate). Nating se Marilin i no wantem harem, be mi stap talem long hem se: “Daling, sipos mi mi ded tumora, i tru se mi no ‘olfala we i olfala.’ Be i oraet, from mi gat wan gudfala laef we mi yusum fulwan long wok blong Jehova.”—Jen. 25:8.

Marilin: Jehova i openem plante doa we mitufala i neva tingbaot, mo i letem mitufala i mekem ol samting we i bitim tingting blong mitufala. Mitufala i gat wan gudfala laef. !Bambae mitufala i go long eni ples we oganaesesen blong Jehova i talem, from we mitufala i trastem Jehova fulwan!