Jack na Marie-Line bakakora omurimo g’obwire bwona kwiha omu mwaka gwa 1988. Ahabw’okubasa kwehanganira embera ezitarikushushana, bakahebwa emirimo etari emwe omuri Guadeloupe n’omuri Guiana ya France. Otwo tucweka hati twona nitukorera aha nsi ya ofisi ya France. Reka hagire ebibuzo ebi twabuza Jack na Marie-Line.

Ni enki ecabahigire kukora omurimo g’obwire bwona?

Marie-Line: Nkakurira omuri Guadeloupe, kandi ncari muto nkaba ninkunda kuburira na mama owabire natamu amani omu murimo g’okuburira. Ninkunda abantu; ni yo nshonga ku namazire ishomero omu mwaka gwa 1985, nkatandika obupayoniya.

Jack: Ncari muto, nkaba ninkunda kuba ndi n’abahereza b’obwire bwona ababire bari kukunda omurimo g’okuburira. Nkaba ninkira kukora obupayoniya bw’omuyambi omu bwire bw’ekihumuro c’amashomero. Omuri wikendi, tukaba nitukwata emotoka, tuza kwekwatanisa n’abapayoniya omuri teritori. Tukaba nituburira izoba ryona bwayima tuza aha nyanja. Obwo bwire bukaba nibushemeza munonga!

Hahwire obwire buce ntahize Marie-Line omu mwaka gwa 1988, nkegambira ngu: ‛Hati titwine ec’okukora; ahabw’enki tutari kukora byingi omu murimo g’okuburira?’ Nkekwatanisa na Marie-Line omu kukora obupayoniya. Bwanyima y’omwaka gumwe, ku twarugire omu ishomero ry’abapayoniya, tuketwa kuza kuba abapayoniya b’omutano. Tukakora emirimo myingi omuri Guadeloupe, bwanyima batweta kuza kukorera omuri Guiana ya France.

Mukatunga empinduka omu murimo ogu mwakozire eyi myaka yona. Ni enki ecabakwasize kwakira empinduka nsya?

Marie-Line: Benetata b’ahari ofisi y’omuri Guiana ya France bakaba nibamanya ku nitukunda ecahandikirwe c’omuri Isaaya 6:8. Obwe rero, obwire bwona obu babire nibatweta, bakaba nibatandika bari kutushesya, batubuza ngu: “Nimwijuka ecahandikirwe eki muri kukunda?” Eco kikaba nikituma twamanya ku twaza kuhindurirwa emirimo, rero tubagarukamu ngu: “Reba turi aha! Mututume!”

 Nitwerinda kugeranisa emirimo eyi twakozire omu bwire bwa kare ahabw’okuba nikibasa kutuma tutashemerererwa ebi turi kukora hati. Nitutamu amani kugira ngu tumanye benetata na banyanyazi.

Jack: Omu bwire bwa kare, hine benetata na banyanyazi abamwe ababire batari kwenda ngu tubarugeho, rero batugema ngu tugume na bo. Konka ku twarugire omuri Guadeloupe, mwenetata omwe akatwijusya ebigambo bya Yesu ebiri omuri Matayo 13:38, ebiri kugira ngu: ‘Omusiri ni ensi.’ Obwe rero ku twabire nituhindurirwa emirimo, tukaba nitweyijusya ku tucari kuhereza omu musiri gumwe ahu twakuba turi hona. Kandi, abantu hamwe n’omwanya g’okuburiramu ni co kikuru!

Twahika omuri teritori nsya, nitushanga abandi batwire yo kandi bashemerirwe. Obwe rero, n’itwe nitugezaho kubaho nk’abo bantu abatwire yo. Ebyokurya nibibasa kuba bitari kushushana n’eby’owitu, konka nitugezaho kurya ebi bari kurya, tunywa ebi bari kunywa, konka turinda n’amagara gitu. Nitutamu amani kugira ngu tugambe ebirungi ebiri omu murimo gona ogu twahebwa.

Marie-Line: Nambwenu nitwegera byingi ahari benetata na banyanyazi. Ninyijuka obu twahikire omuri Guiana ya France aha murundi g’okubanza. Enjura ekaba eri kugwa munonga, twatekateka ngu turindeho kake enjura emare kugwa tubone kuza kuburira. Konka munyanyazi omwe akambuza ati: “Tugende?” Nkatangara, nagarukamu nti: “Bata shi?” Akangarukamu ati: “Kwata omutaka, twaza kugenda aha magari.” Oko ni ko nayegire kuvuga igari okwasire n’omutaka. Kuri ntarabyegire, nkaba ntari kubasa kuburira omu bwire bw’enjura!

Mukafuruka emirundi eri kuhika ahari 15. Mbehi mwine ebi muri kwenda kugambira abandi aha bikwatirine n’okufuruka?

Marie-Line: Okufuruka nikiteganisa. Konka nabwe, oshemerire kuronda omwanya murungi g’okutahamu, oguratume wahurira ori omu ka owawe, waruga kuburira.

Jack: Ninkunda kutera erangi enju yitu eyi twafurukiramu. Benetata b’ahari ofisi baba bari kumanya ku tutaratureyo obwire buringwa, hine obu bari kungambira ngu: “Jack, otafayo kutera erangi omuri obu bwire!”

Marie-Line namanya kupakira ebintu kurungi! Nata ebintu byona omu bibokisi kandi ahandikaho ahu bishemerire kuza; eby’omu kinabiro,  omu fumbiro, n’ahandi. Obwe rero ku turi kuhika omu nju nsya, nikitworobera kuta buri kikoreso omu mwanya gwaco. Nambwenu nahandika ebiri omu bokisi kugira ngu tuhike turi kubona eki turi kuronda.

Marie-Line: Ahabw’okuba twayegire kutebekanisa ebintu ge, nikituma tutajagarara; nituhika turi kutandika omurimo.

Ni bata oku mwakozire entebekanisa y’obwire kugira ngu ‘muhikize kimwe okuhereza kwanyu’?—2 Tim 4:5.

Marie-Line: Aha Rwokubanza, nituhumuraho kandi tutebekanisa enterane. Kwiha Orwakabiri, nituza omu murimo g’okuburira.

Jack: N’obu twine eshaha ezi tushemerire kuhisya buri kwezi, tituri kukitaho omutima. Omurimo g’okuburira ni go g’omugasho omu kubaho kwitu. Twaba turi kuruga omu ka ninga turi kutaha, nituganira na buri omwe owu twabugana omu muhanda.

Marie-Line: Ecokureberaho: Twaba turi kuza kutamburamu turi kuhumuramu, ningendana obutabo. Abantu bamwe nibatuhika rero batushaba obutabo, kandi tutabagambire ku turi Abahamya ba Yehova. Ni yo nshonga turi kwerinda omu ku turi kujwara n’okwetwara. Abantu nibafa ahari ebyo bintu.

Jack: Nambwenu ebikorwa birungi ebi turi kukorera batahi bitu nibituma twaburira. Nintorotora ebisingwe, nza kubyata, kandi nkondora amababi g’ebiti agari hihi y’enju yitu. Abatahi bitu nibabireba obumwe batubuza bati: “Mbehi tonyamba okampa Bibuli mazima?”

Mukaburira omu byaro bya hare. Mbwenu shi mwine ekintu c’omutano eki muri kwijuka omuri otwo tucweka?

Jack: Ebyaro bimwe by’omuri Guiana kubihikamu ticorobi. Tukaba nitukira kukora engendo ndingwa eziri kuhika ahari kilimeta 600 omu sande, kandi omu mihanda mibi. Tituriyebwa obu twatayayire akacweka ka St. Élie, omu ihamba rya Amazon. Tukamara amashaha mingi kugira ngu tuhikeyo, nabwo turi omu motoka y’amani obundi tugenda omu bwato. Abantu bingi ababire batwireyo bakaba nibarima ezabu. Abamwe bakatusima ahabw’ebitabo ebi twabahire, batuha ezabu nk’ebiconco! Omu mwabazyo, tukabereka vidiyo zitu. Hakija abantu.

Marie-Line: Juba aha, Jack akashabwa kuha toku y’Ekijusyo omu kacweka ka Kamopi. Kugira ngu tuhikeyo, tukagenda amashaha ana omu bwato bwa ingini, omu mugera gwa Oyapock. Bikaba biri kushemeza munonga.

Jack: Kuhika ahu amizi g’omugera gari kweshuka aha rukiri nikitinisa. Konka mbagambisize amazima, kureba amizi gari kweshuka ori omu bwato nikishemeza. Omuvugi naba ashemerire kuba ari kumanya ge ecoma kugira ngu agarabemu. Konka tituriyebwa ebyo bintu birungi. N’obu habire hatwireyo Abahamya 6 bonka, hakija abantu abari kuhika ahari 50 aha Kijusyo, harimu n’abataka b’omuri Asia!

Marie-Line: Abacari bato abari kwenda kukorera Yehova byingi na bo nibija kwerebera ebintu nk’ebi birungi. Noba oshemerire kwesiga Yehova omuri ezo mbera, kandi okwikiriza kwawe nikukizaho kuhama. Mazima tukerebera omukono gwa Yehova.

Mukega endimi ezitari zimwe. Konka shi obushangirwe nimukunda endimi?

Jack: Ingaha buzima. Nkega ezo ndimi ahabw’okuba hakaba hariho ecetengo c’amani. Nkaba ninyebembera Omunara g’Omurinzi omu rurimi rwa Sranantongo * ntakatandikire n’obushomi bwa Bibuli omu kibina! Nkabuza mwenetata oku nakikora. Akangarukamu ngu: “Hine ebigambo bimwe ebi tutashoborocerwa, konka byaba bibonire.” Abana bakanyamba munonga. Ku nabire ndi kukora enshobi, nkaba nimpurira bagamba, konka abakuru bakaba batari kugamba. Nkegera byingi aha bacari bato.

Marie-Line: Omuri teritori emwe, nkaba nyine abegi ba Bibuli b’Orufurenki, Orupotugo, n’Orusranantongo. Munyanyazi akampabura ngu ngume mbanze nayegesa omu ndimi ezigumire mperuke n’ezi ndi kumanya ge. Bwanyima nkareba omugasho oguri omuri obwo buhabuzi.

Izoba rimwe, nkega Bibuli n’omuntu omu Rusranantongo,  kandi owa kabiri namwegesa omu Rupotugo. Ku natandikire kwegesa owa kabiri, munyanyazi akagira ati: “Marie-Line, noshwa hariho ekizibu!” Nkashanga ndi kugambira omukazi w’omuri Brazili omu Rusranantongo, omu mwanya g’okumugambira omu Rupotugo!

Mukaba abanywani ba benetata na banyanyazi b’ahu mwakorire omurimo. Mukakikora bata?

Jack: Omu Nfumu 11:25 nihagira hati: “Omuntu efura aryatunga.” Nitukunda kumara obwire n’abandi kandi tubereka obufura. Aha bikwatirine n’okuhunduza Enju y’Obukama, abamwe bakaba nibangira ngu: “Reka ababurizi babe ni bo baboneza.” Rero mbagambira ngu: “Nanye ndi omuburizi. Obwe rero yaba hine omurimo oguriho, nanye ninyenda kugukora.” N’obu twena turi kwetenga obwire bw’okuba turi twenka, tushemerire kwijuka ku obwo bwire butashemerire kutuzibira kukorera abandi ebirungi.

Marie-Line: Nitutamu amani twereka ku nitufa ahari benetata na banyanyazi. Nitumanya obwire obu abamwe bari kuba bari kwenda ow’okubareberera abana ninga shi kubayamba kubiha ah’ishomero. Nitushuba tutaho entebekanisa y’okubakwasa. Obwe rero kuba twetegwire kukwasa abandi omu bi bari kwetenga nikituma obunywani bwitu bwaguma.

Ni eha migisha eyi mwatungire omu kuhereza omu tucweka oturi kwetenga obuyambi?

Jack: Tukatunga emigisha myingi omu buhereza bw’obwire bwona. Tukatunga omugisha g’okureba ebi Ruhanga yahangire. N’obu twabugine ebizibu, twine obusinge bw’omu mutima ahabw’okuba nitumanya ku twashagikire abantu ba Ruhanga.

Ncari muto nkasibwa omuri Guiana ahabw’okutahengamira rubaju. Nkaba ntari kumanya ku ndirara nagarukayo ndi omumishonari kandi nkabasa kutayayira abasibe. Mazima, Yehova ni efura omu kugaba emigisha yeye!

Marie-Line: Ekiri kunshemeza kusinga ebindi, ni okukwasa abandi. Nitushemererwa ahabw’okuhereza Yehova. Nambwenu eco kikatuma nyowe n’omushija wange twakizaho kukundana. Hine obu Jack ari kumbuza yaba turi kubasa kweta mwenetata na munyanyazi abahwiremu amani, ngu turye hamwe cakiro. Nanye ninkira kumugarumamu ngu: “Haza nanye ni co naba ndi kutekateka!” Nitubuganisa ebitekateko.

Jack: Juba aha, bakanshangamu endwara ya kansa. N’obu Marie-Line atari kushemererwa namugambira ebi bigambo, konka nkabimugambira: “Nkunzi yange, tinkakuzire, konka n’obu nakufa nyensakare nimba nafa ge, ndi kumanya ku nakoresize ge amagara gange ndi kuhereza Yehova kandi nkamushemeza.”—Kut 25:8.

Marie-Line: Yehova akatuma twakora ebintu ebi twabire tutari kutekateka. Mazima tukabona emigisha myingi omu kubaho kwitu. Nitwikiriza tutari kubanganisa ngu ahu Ruhanga aritutuma hona, turyazayo!