Jack na Marie-Line aromile olaba vamodha mabasa a mudhidhi wotene yaka ya 1988. Awene anziwa wi agahifwanya dhilemelelo dhottiyana-ttiyana, masiki dhawene ahirumeela ottomeliwa mabasa menjene o Guadalupe vina o Guiana Francesa. Ovano mimburo esi dhominli dhinang’aneliwa na katti ya França. Ninfuna nimukose mavuzo mang’onovi Jack na Marie-Line.

Txini yuttukulelini oroma olaba mabasa a mudhidhi wotene?

Marie-Line: Valimi mwana o Guadalupe, masaka mena miyo na mamayaga nammala labo notene nilaleyaga, iyene wali Munamona walaleya na murima wotene. Miyo ddannakwela attu, nona vagomihilemi eskola yaka ya 1985, mohigonela ddahiroma olaba ninga pionera.

Jack: Valimi muzombwe, ddankaletxa na adhari a mudhidhi wotene, aziveliwana mabasa a olaleya. Ddigabudduwa feriya oskola ddanlaba ninga pionero wokamihedha. Dila dhina, omagomo wa sumana, miyo na abali ena nandhowa na karera otugumana mmuruddani mwalaba apionero abale. Iyo nanlaleya labo notene—omagomelowa nadhowa mbara. Nttile nali nsaka nowagalala vaddiddi!

Mmalelihu otelana na Marie-Line yaka ya 1988, ddahiloga meka-meka, ‘Iyo kaninna elobo yonizuzumiha ninkoddela nni ovilibihedha mmabasani a olaleya?’ Miyo na Marie-Line nahiroma olaba mabasa opionero. Mvireli yaka modha, banimalile okosa eskola ya apionero, nahittomiwa ninga apionero avawoka. Nahittomeliwa mabasa ottiyana-ttiyana o Guadalupe, vasogorhova nihiwobeliwa omwalela o Guiana Francesa.

Movira wa mudhidhi muhakela matxinjo menjene mmabasani attomeliwenyu. Txini yukamihedhileni olemelela makalelo maswa?

Marie-Line: Abali o Betel ya Guiana Francesa anoziwa nlebo ninziveliwehu na Izaiya 6:8. Nona dila dhina aganittekenyela muttitto, na nriho anologaga dhahi, “Munowubuwela nlebo ninuzivelani?” Venevo nanziwa wi ninfuna nittomeliwe mabasa maswa nona nanloga, “Nili Veneva! Nirumení!”

Iyo ninorabela oladdaniha mabasa attomeliwehu  ovanene na a mundduni, sabwani nigakosa ejuwene kaninavahe ttima mabasa ankosihu ovanene. Ninotamela okosa mandano na abali vina arogora.

Jack: Wale, abali na arogora ena ahitamela onobaniha wi nihimwale sabwani afuna nikalegevi nawene. Mbwenye mbudduwilihu o Guadalupe, mbali dhahi wahinubutxedha mazu a Yezu anfwanyeya va Mateu 13:38: “Mundda ji elabo.” Nona nigattomeliwa mabasa maswa, ninowubutxedhana nooka-nooka wi iyo ninalabe mundda mmodhene kintanala vego-vegovi valihu. Sabwani yamakamakaya ja okana murudda wa olaleya vina wafwanya attu a walaleya!

Mfiyelihu murudda muswa, nihoona wi attu akala wenewale ali owagalalene. Mohigonela, nahiroma ofwara mweddelo wa mmuruddanimwa. Yojaya enottiyana, mbwenye iyo ninja esile dhinjani vina nimmwa esile dhinmwani, oku nivibarelaga mpaddi wa egumi. Iyo ninovilibihedha wang’ana dhilobo dhapama mwaha wa mabasa-mabasavi anttomeliwehu.

Marie-Line: Ninosunza venjene na dhotagiha dha abali a mmuruddanimwa. Ddinowubuwela elobo epadduwile mmalelihu ofiya o Guiana Francesa. Muzogwe welaga orubwa vaddiddi, nona nahubuwela omujedha oremusa wi nidhowe nalaleye. Mbwenye murogora wanimina wahiddivuza, “Nidhowege?” Notikina, ddahimwakula, “Dhavi?” Iyene wahiloga, “Kattukula sumburunya yawo vina nindowa na sikaleta yehu.” Dhahene ddahisunzela weeddiha sikaleta na sumburunya mmaddani. Kohisunza, txipo kaddigawodhile olaleya nsaka na muzogwe!

Nyuwo mumwala dila 15. Muna malago gani anwodhinyu wavaha abale anna efunelo y’omwala?

Marie-Line: Omwala onokalaga elobo yorutxa. Mbwenye elobo yamakamaka ofwanya mburo onivyoniwe ninga oli vatakulu-vawo ogamala wiyela omalaleyoni.

Jack: Masaka menjene nigamwalela numba eswa ddinopintarigi mwarimwa. Abali okatti, aganonelamo wi iyo kaninagonele mudhidhi mwinjene, dila dhina anologaga, “Jack, kuzuzume na opintari numba eji!”

Marie-Line onoziwa pama osasanyedha dhobo dhehu! Iyene onowika mmakashani vitagano dhotene “dhohabana,” “dhokwartu” vina “dhomattuwani.” Nona nigamwalela numba eswa, ninowodha ottiya makashaya vamburoni vanfanyeelani.  Iyene onolebela dhilobo dhili mwari mwa kasha modha-modha, dhahene kaninrutxiwa ofwanya ejile enfunihu.

Marie-Line: Sabwa ya osunza ovisasanyedha deretu, ninowodha okosa mabasa olaleya na mukalelo wapama.

Munsasanyedha dhavi mudhidhi wenyu wila ‘mwakwanihe mabasa attomeliwenyu’?—2 Tim. 4:5.

Marie-Line: Matxiposi ankagala malabo ehu ovuma vina osasanyedha matugumano. Oromana Txipirhi, nindowaga mmabasani olaleya.

Jack: Masiki nipemeliliwaga mawora operheka, iyo kannizuzumela ejuwene. Mabasa olaleya balitxi amakamaka mwigumini mwehu. Oromana mudhidhi ombudduwehu vatakulu mpaka wiyela, ninovilibihedha walaleya attu otene angumanihuna.

Marie-Line: Motagiha, nigadhowaga okosa mavego a pikiniki, ddinottukulaga mafolheto. Attu ena anonikumbirhaga manivuru, masiki nihawaddelaga wi nili Anamona a Yehova. Sabwani, iyo ninowang’ananiha mukalelo wehu wa wabala vina wowaredha. Attu anzuzumela wang’ana dhilobo-dhene esi.

Jack: Miyo ddinoddoddaga mapapi anvava vati, ddinodhowaga oponya zungu vina ddinoselaga mataba angwela vatakulu vehu, dhahene ninovaha onamona sabwa yokala anamwanddamani apama. Awene anonawang’anaga, dila dhina anovuza, “Weyo okana Bibilia wila oddivahe?”

Masaka mena nyuwo mwankosa oleddo wa odhowa olaleya mirudda dholapela. Ehikalawo yotagiha enubuwelinyu muleddonimwa?

Jack: Nanrutxiwa ofiya mirudda dhina dho Guiana. Iyo nanmala sumana yantero nikosaga oleddo rampa dhorutxa dheddihu makilometuru 600. Kanindduwala vadhowilehu ttattamwa ya St. Élie, mutakwani ya Amazonia. Nahimala mawora menjene wila nifiyewo nanwela mukukutta vina nanwela boti. Attu enjene ankala wenewo anamatiba ndarhama. Awene ahinivaha myara dha nddarama wi atamaalelena manivuru ehu! Omattiyu obule, nahalagiha mavidiyu a nikuru nehu. Attu awenjiva a wenewale ahidha wona.

Marie-Line: Ovanenevi, Jack wahikumbirhiwa odhowa o Camopi wi akose diskursu ya muttupo wa Wubuwela Okwa wa Yezu. Wila nifiye wenewo, nahedda mawora manai na boti Mwinje wa Oyapock. Eji yali yotagiha yotikiniha.

Jack: Mwinjeya ogatodaga, manjeya anottamaga vaddiddi. Jotikiniha wona muttamagelo wa manje abale. Masiki vagurumelihu namatxerhengaya wanziwa yakosiye. Mbwenye yali yotagiha yapama vaddiddi. Wenewo wali Anamona a Yehova 6 bahi, masiki dhawene attu owakwana 50 ahidha wona muttupo wa Wubuwela Okwa wa Yezu, otaganyiheya na nlogo na Ameríndios!

Marie-Line: Yotagiha eji enowajedhela azombwe antamela ovilibihedha mmabasani a Yehova. Mudhidhene obo worutxa onofwanyela omukuluvela Yehova vina olibiha nroromelo nawo. Iyo ninowona nikamihedho na Yehova.

Nyuwo muhisunza dhilogelo dhottiyana-ttiyana. Jovevuwa osunza dhilogelo?

Jack: Kahiyo. Ddisunzile dhilogelo esi wila ddiwodhe olaleya vina okamihedha mmulogoni. Miyo kaddaziwa omweng’ensa Bibilia na elogelo ya Sranantongo * masiki dhawene ddaheddiha Nsunzo na Mwang’aneli na elogelo ejile! Ddahivunza mbali mmodha mukalelo wedihilemi. Iyene wahakula, “Oheddiha deretu, mbwenye mazu mena kananonelamo.” Aima baddikamihedhetxa. Ddigavonya mazu, awene anloga wi ddivonya, anddimuwaya kaddaddela. Ddihisunza dhinjene na azombwe abale.

Marie-Line: Mmuruddani dhahi, ddasunziha Bibilia na Efranses, Ezugu vina Sranantongo. Murogora dhahi wahiddivaha nlago nawi ddiromege osunziha na elogelo yorutxa ddigamala ddigomihe na elogelo yohirutxa. Momaguva-mwene nlago nttile nahiddikamihedha.

Siku nimodha, ddaromile weddiha nsunzo na Bibilia na elogelo ya Sranantongo nanda nsunzo nafwarela na elogelo ya Ezugu. Varomilimi nsunzo nanawili, murogora wali na miyo ohiloga, “Marie-Line,  enkala ninga vanele okala makattamiho!” Ddahinonelamo wi ddamusunzihile muyana w’o Brazil na elogelo ya Sranantongo ottiya omusunziha na Ezugu!

Attu abale akamihedhiwe na nyuwo anowukwelani vaddiddi. Muwodhile dhavi okana omarho wofiyedheya na abali?

Jack: Gano 11:25 enloga: “Muthu onvaha, onofuma.” Iyo kaninkana manyazo a wakamihedha attu ena. Ddigakuputtaga Numba ya Omwene, attu ena anloga: “Kattiya mabasa abo ba anamalaleya.” Miyo ddannakula: “Ndde, miyo vina ddanamalaleya. Nona vagakala mabasa ofuneya wila akosiwe, miyo ddinofuna okalavo.” Ebaribari wi enofuneya mudhidhi wokala vehu-vene, masiki dhawene ninowubuwelaga wi yosakula yehu kinirabelihe wakosela opama attu ena.

Marie-Line: Iyo ninovilibihedha watonyihedha efunelo yehu abali na arogora ehu. Na mukalelo obu, ninofiyedha oziwa wi awene anomutamela muttu wohalana anawa vatakulu obe muttu wowadhowela oskola. Ninowodha wang’ananiha dhokosa dhehu wi niwodhe wakamihedha. Dhahene, ninowunuwiha mandano na attu ena vina ninokala womala nawale wila nakamihedhe na dhojombeliwa dhawa.

Mareliho gani akelilenyu sabwa yolaba wego wajombeliwe anamalaleya?

Jack: Mabasa a mudhidhi wotene ahinivaha mareliho ohagalaliha mwigumini mwehu. Nsaka na mundduni nahikana gari ya wona dhilobo dhinji dhottiyana-ttiyana dhipaddutxile Yehova. Masiki na maguddulano, nikana murenddele wa muyubuweloni sabwani vego-vegovi vankalihu ninokamihedhiwa na nlogo na Mulugu.

Valimi muzombwe ddahifugeliwa o Guiana Francesa sabwa yohikosa mpaddi wa politika. Kaddajedhela wi na sikuna ddigahibudduwa mukambura baddikala misionario vina ddigahirumelihiwa odhowa wawona attu ali mukambura ninga namalaleya. Txibarene, Yehova onovaha mareliho aye na okwela!

Marie-Line: Oziwa wi ddihakamihedha attu ena enoddihagalaliha. Iyo ninowagalala mmabasani a Yehova. Eji enolibiha matelo ehu. Dila dhina, Jack onoddivuzaga akala enowodheya iyo wawoba atelani ena akumuwile wi adhe aje vamodha na iyo. Ddinowakula, “Miyo ddobuwela okosa elobo yakakene!” Jijuwene enkosegihu.

Jack: Ovanenevi, ddihang’aniwa na dotoro ddifwanyiwana eredda ya câncer de próstata. Vewale Marie-Line muselu obu kaziveliwe, miyo ddimwaddela: “Namwalaga wokweya, akala miyo ddinokwa mangwana, ‘kaddinakwe na vyaka dhofwanyelela sabwani kaddinatti wuluvala.’ Mbwenye ddinakwe woziveliwene, ddiziwaga wi ddilabihedha egumi yaga na dhilobo dhomuyani vina dhofwanyelela.”—Wita 25:8.

Marie-Line: Yehova wahinittomela mabasa ahajedhelihu vina ohinittiya okosa dhilobo dhotikiniha. Txibarene mwigumini mwehu nihikosa dhilobo dhapama. Ninele odhowa wego-wegovi onanittomele nikuru na Yehova, sabwani ninokuluvela wi Mulugu onele onikamihedha!