Jack ek Marie-Line i dan servis a plen tan depi 1988. Zot kapab adapte avek diferan sirkonstans e zot in aksepte diferan form servis Guadeloupe ek Lagwiyann Franse. Tou le de landrwa i tonm anba biro brans Lafrans aprezan. Annou demann Jack ek Marie-Line detrwa kestyon.

Kwa ki’n fer zot konmans servis a plen tan?

Marie-Line: Konman en zanfan ki’n grandi Guadeloupe, souvan mon ti al predikasyon lazournen antye avek mon manman ki ti en proklanmater devoue. Mon kontan bann dimoun, alor konman mon ti fini lekol an 1985, mon ti konmans fer pionye.

Jack: Ler mon ti ankor zenn, mon ti toultan pas letan avek bann serviter a plen tan ki ti kontan predikasyon. Mon ti abitye fer pionye asistan pandan vakans lekol. Parfwa dan wikenn, nou ti pran bis pour al zwenn bann pionye dan zot teritwar. Nou ti fer predikasyon lazournen antye e apre nou ti al lo lans. Sa letan ti gou!

Pa bokou letan apre ki mon ti’n marye avek Marie-Line an 1988, mon ti dir dan mon menm, ‘Nou napa bokou responsabilite, akoz nou pa fer plis dan predikasyon?’ Mon ti konmans fer pionye avek Marie-Line. Enn an pli tar, apre ki nou ti’n asiste lekol pionye, nou ti ganny apwente konman pionye spesyal. Nou ti annan bann responsabilite Guadeloupe ki nou ti vreman kontan, avan ki nou ti ganny demande pour al Lagwiyann Franse.

Dan sa bann dernyen lannen, zot in sanz servis plizyer fwa. Kwa ki’n ed zot adapte dan tou sa bann sityasyon?

Marie-Line: Bann frer dan Betel Lagwiyann Franse ti konnen ki nou verse prefere i Izai 6:8. Alor, ler zot ti telefonn nou, souvandfwa zot ti fer dyok e demann nou, “Eski zot rapel zot verse prefere?” Nou ti konnen ki sa i vedir ki nou pou ganny en nouvo servis, alor nou ti dir, “La nou la! Anvoy nou!”

Nou evite fer konparezon avek bann servis ki nou ti fer avan, parski sa pou anpes nou apresye nou nouvo servis. Nou osi esey fer zanmi avek bann frer ek ser dan nou nouvo servis.

 Jack: Dan lepase, serten frer ek ser pa ti anvi nou ale, alor zot ti esey konvenk nou pour reste avek zot. Me ler nou ti kit Guadeloupe, en frer ti fer nou mazin parol Zezi dan Matye 13:38: “Sa plantasyon i lemonn.” Alor ler nou sanz servis, nou rapel ki nou ankor pe servi dan menm teritwar malgre nenport ki landrwa kot nou ete. Apre tou, bann dimoun ek teritwar ki pli enportan.

Ler nou ariv dan en nouvo teritwar, nou vwar ki sa bann dimoun pe deza viv byen dan sa landrwa. Alor, nou esey viv parey zot. I kapab ki manze i diferan me nou manz sa ki zot manze e nou bwar sa ki zot bwar. Me kantmenm sa, nou pran bann prekosyon neseser pour nou lasante. Nou fer zefor pour koz an byen lo nou servis.

Marie-Line: Nou osi aprann en kantite avek bann frer ek ser dan sa landrwa. Mon mazin en keksoz ki ti arive ler nou ti fek ariv Lagwiyann Franse. Lapli ti pe tonm for e nou ti mazinen ki nou ti pou bezwen esper lapli aret tonbe avan nou al predikasyon. Me apre, en ser ti demann mwan, “Ou pare pour ale?” Mon ti sirprann e reponn, “Ki mannyer nou pou ale?” I ti reponn, “Pran ou parasol, nou pou al lo bisiklet.” Alor mon ti aprann ki mannyer pour atrap en parasol e pedal bisiklet an menm tan. Si mon pa ti’n aprann fer sa, zanmen mon ti pou kapab fer predikasyon dan letan lapli.

Zot in bouz apepre 15 fwa. Eski zot annan okenn konsey pour donn lezot konsernan al servi dan diferan landrwa?

Marie-Line: I kapab vreman difisil pour sanz landrwa. Kantmenm sa, i enportan pour trouv en lakaz kot ou kapab santi ou konfortab ler ou sorti predikasyon.

Jack: Normalman dan sak nouvo lakaz kot nou al reste mon kontan penn anndan. Si bann frer kot biro brans ti konnen ki petet nou pa pou reste lontan dan en servis, parfwa zot ti pou dir, “Jack, pa fatig ou pour penn lakaz sa voyaz!”

Marie-Line in vin vreman bon lo anpakte keksoz. I met tou keksoz dan bann bwat e lo la i ekri “lasanmben,” “lasanm” oubyen “lakwizin.” Alor, ler nou ariv kot nou nouvo lakour, i pli fasil pour nou plas bann bwat dan son landrwa apropriye. I fer en lalis tou sa ki i annan dan sak bwat pour ki nou kapab trouv vitman sa ki nou bezwen.

 Marie-Line: Vi ki nou’n aprann pour byen organize, nou kapab konmans nou predikasyon deswit.

Ki mannyer zot organiz zot letan pour ki zot “akonpli byen [zot] minister?”​—2 Tim. 4:5.

Marie-Line: Dan Lendi nou repoze e prepar nou renyon. Larestan zour nou al predikasyon.

Jack: Menm si tou le mwan nou bezwen kouver en serten kantite erdtan dan predikasyon, nou pa ti konsantre lo la. Predikasyon i sa keksoz pli enportan pour nou. Konman nou kit lakour ziska ler nou retournen, nou esey koz avek tou dimoun ki nou zwenn.

Marie-Line: Par egzanp, ler nou al piknik mon toultan anmenn bann trak avek mwan. Serten dimoun i vin demann nou piblikasyon, menm si nou pa’n dir zot ki nou Temwen Zeova. Sanmenm sa nou vey byen nou konportman ek nou fason sanze. Dimoun i remark byen sa bann pti keksoz.

Jack: Nou osi donn temwannyaz ler nou fer bann bon keksoz pour nou vwazen. Mon anmas bann papye ater, mon zet bin e mon balye lari otour nou lakaz. Nou bann vwazen i remark sa e parfwa zot demande, “Eski ou annan en Labib pour ou donn mwan?”

Souvandfwa zot in fer predikasyon dan bann landrwa elwannyen. Eski zot rapel en keksoz spesyal dan enn sa bann vwayaz?

Jack: I annan serten teritwar dan Lagwiyann Franse ki difisil pour arive. Souvan nou bezwen vwayaz 600 kilomet dan en semenn, lo bann semen ki vreman difisil pour pase. Nou vizit ki nou ti fer dan en vilaz ki apel St. Élie, dan lafore Amazonn, ti enn inoubliyab. I ti pran nou plizyer erdtan pour ariv laba dan spidbot e dan transpor ki kapab pas dan tou sord kalite semen. Laplipar dimoun ki reste laba ti travay dan min lor. Vi ki zot ti apresye nou piblikasyon, serten ti donn nou bann pti bout lor konman kontribisyon. Aswar nou ti montre zot en video ki lorganizasyon Temwen Zeova i fer. En kantite dimoun dan sa landrwa ti vin asiste.

Marie-Line: Tou resaman, Jack ti ganny demande pour fer diskour memoryal dan en vilaz ki apel Camopi. Pour ariv laba, nou ti voyaz pour kat erdtan dan bato lo Larivyer Oyapock. Sa ti en zoli leksperyans.

Jack: Kot delo i ba, normalman larivyer i koul vit, i annan ros e i kapab vreman danzere. Mon asir ou ki i enpresyonan pour vwar tousala. Sa dimoun ki anmenn bato i bezwen kalipa pour kapab navig dan sa kalite landrwa. Me i ti en zoli leksperyans. Menm si i ti annan zis sis Temwen Zeova ki ti la, apepre senkant dimoun ti asiste memoryal enkli serten Amerindians.

Marie-Line: Bann zenn i kapab ganny bann zoli leksperyans koumsa si zot anvi fer plis pour Zeova. Dan sa bann sirkonstans, ou bezwen annan konfyans dan Zeova e sa i fer ou lafwa vin pli for. Nou souvan vwar ki mannyer Zeova in ed nou.

Zot in aprann diferan langaz. Eski i fasil pour zot aprann sa bann langaz?

Jack: I pa fasil. Mon ti aprann sa bann langaz akoz i ti neseser. Mon ti bezwen kondwir letid Latour Veyer dan langaz Sranantongo, * menm avan fer en lektir Labib. Mon ti demann en frer si zot ti kapab konpran. I ti reponn, “Parfwa nou pa ti konpran serten mo me i ti vreman byen.” Bann zanfan ti vreman ede. Ler mon ti fer fot, zot ti pou dir mwan en keksoz me pa bann adilt. Mon ti aprann en kantite avek bann zanfan.

Marie-Line: Dan en teritwar mon ti annan bann letid Labib an Franse, Portige ek Sranantongo. En ser ti sizere ki mon konmans avek sa langaz ki pli difisil e fini avek sa enn ki pli fasil pour mwan. Deswit mon ti konpran akoz sa ser ti dir mwan sa.

En zour, mon ti annan en letid an Sranantongo e en lot an Portige. Ler mon ti konmans sa letid Portige, sa ser ki ti pe akonpanny mwan ti dir, “Marie-Line, mon krwar ki i annan en problenm la!” Mon ti realize ki mon ti pe koz  Sranantongo avek en madanm Brezilyen olye koz Portige.

Bann frer ek ser ki zot in travay avek i vreman kontan zot. Ki mannyer zot in kapab vin bann zanmi pros avek zot?

Jack: Proverb 11:25, NWT i dir: “En dimoun zenere pou prospere.” Nou pa ezite pour pas letan e fer keksoz avek lezot. Konsernan mentenans Lasal Rwayonm, serten frer ti dir mwan: “Les bann proklanmater fer sa.” Me mon ti reponn: “Mon osi mon en proklanmater. Alor si i annan travay pour fer, mon anvi la mwan osi.” Menm si nou tou nou bezwen en letan pour nou menm, souvan nou bezwen rapel ki nou pa anvi ki sa letan i anpes nou fer dibyen lezot.

Marie-Line: Nou fer zefor pour demontre lentere personnel dan nou bann frer ek ser. Dan sa fason, nou kapab konnen kan ki zot bezwen en dimoun pour vey zot zanfan oubyen al sers zot lekol, koumsa nou kapab aziste nou plan pour ed zot. Sa i fer nou vin pli pros avek lezot e pare pour ed zot ler zot bezwen led.

Ki benediksyon zot in gannyen ler zot in servi kot i annan plis bezwen?

Jack: Nou’n ganny bokou benediksyon dan servis a plen tan. Souvan nou’n santi nou pros avek lanatir, pe apresye diferan kreasyon Zeova. Menm si nou’n pas dan bann difikilte, nou annan lape lespri parski nou konnen ki nou annan sipor pep Bondye nenport landrwa kot nou ete.

Ler mon ti ankor zenn, mon ti ganny met dan prizon Lagwiyann Franse akoz mon pa ti pran kote dan bann zafer politik. Mon pa ti’n zanmen imazinen ki mon ti pou retourn laba konman en misyonner e ganny permisyon pour vizit bann prizon konman en minis relizye. Zeova i vreman kontan pour donn nou son benediksyon.

Marie-Line: Sa ki fer mwan vreman kontan i ler mon donn mon letan pour servi lezot. Nou kontan dan servis Zeova. I’n fer nou maryaz vin pli solid. Parfwa, Jack pou demande si nou kapab envit en koup marye ki bezwen lankourazman pour pran en repa avek nou. Souvan mon reponn, “Sanmenm ki mon ti pe mazinen!” Laplipar ditan nou ti pe mazin menm keksoz.

Jack: Tou resaman, mon ti ganny dir ki mon annan kanser prostat. Menm si Marie-Line pa kontan pour tann sa, mon’n bezwen dir li: “Mon seri, mon pa ankor vye me menm si mon mor demen, mon konnen ki mon’n servi mon lavi pour fer sa keksoz pli enportan e sa i pour servi Zeova. Sa i fer mwan vreman kontan.”​—Zen. 25:8.

Marie-Line: Zeova in fer nou servi dan bann landrwa ki nou pa ti zanmen krwar nou pou kapab arive. Nou lavi in vreman ranpli avek bann bon keksoz. Nou annan konfyans dan Zeova ki nenport landrwa ki son lorganizasyon i demann nou pour ale, laba menm ki nou pou ale.