Jack anga Marie-Line du a fuuten diniwooko omen yali kaba. Den bigin anga a fuuten diniwooko aini 1988. Den man fiti denseefi gawgaw te den foloisi go a wan peesi. Den du omen wooko aini a olikanisâsi a Gwadelup anga Faansi Gayana. Nownow na a beikantoo fu Faansikondee e luku a wooko a den tu kondee ya. Meke u akisi Jack anga Marie-Line wantu sani.

Saide u bigin pionili?

Marie-Line: Mi kiya a Gwadelup. Di mi be nyoni, mi be lobi peleiki hii dei anga mma, wan Kotoigi di be e peleiki fayafaya. Mi lobi sama, neen meke faisi mi kaba sikoo aini 1985 a so mi bigin anga a kowownu pioniliwooko.

Jack: Di mi be yonkuu, mi be e paa anga baala anga sisa di be e du a fuuten diniwooko. Den be lobi a peleikiwooko tuutuu. Te mi be abi fakansi, da mi be e du a yeepi pioniliwooko. Son sataa anga sonde, u be e teke besi fu go peleiki makandaa anga den pionili na a pisi pe den be e peleiki. U bee peleiki hii dei, baka dati u be e go suwen aini a se. A ten de be switi te.

Di mi anga Marie-Line toow aini 1988, mi pakisei taki: ’U ná abi tyaipi kosutu, a be o bun fu u du moo gi Yehofa.’ A so mi bigin pionili makandaa anga Marie-Line. Baka wan yali, u go na a pionili sikoo. Baka dati neen den poti wi enke spesuutu pionili. A omen peesi u be abi a gaandi fu peleiki di u be de a Gwadelup. Baka dati den akisi u fu go a Faansi Gayana.

A omen sani u du aini a olikanisâsi. San be e yeepi u fu teke gwenti te u be foloisi go a wan taa peesi?

Marie-Line: Den baala fu a beikantoo fu Faansi Gayana be sabi taki Yesaya 6:8 a wan fu den tekisi di u moo lobi. Neen meke ala yuu te den be telefon u fu taigi u taki den o sende u go a wan taa peesi, den be e akisi u taki: „U sabi ete sowtu tekisi u moo lobi?” Te den be taki so u be e fusutan wanten taki den be o sende u go a wan taa peesi. Neen meke u be e piki taki: „Luku u ya! Sende u!”

 Te den baala be sende u go a wan taa peesi, wi á be e maiki en anga pe u be de kaba. Efu u be o du a sani ya, a be o moo taanga gi u fu lobi a nyun peesi pe u be go. U be e meke mati anga den baala anga sisa fu a nyun peesi pe u go.

Jack: Fosi, son mati fu u be e gi u taanga-sikin fu wi á foloisi, bika den á be wani u gwe fika den. Ma di u be e foloisi komoto a Gwadelup, wan baala membee u san Yesesi be taki a Mateyesi 13:38. Ape sikiifi taki: „A goon, na a goontapu.” Neen meke te u be e foloisi go a wan taa peesi, u be e holi a pakisei taki na aseefi goon u be e wooko ete, winsi pe fu goontapu u be mu go. San moo pelensipali, a fu peleiki gi sama!

Te u go a wan nyun peesi, wi e si taki den sama di de ape e piisii. Neen meke wi e meke moiti fu du sani enke den. A nyanyan fu den nai de aseefi enke san u be gwenti, ma wi e meke moiti fu nyan san den e nyan anga fu diingi san den e diingi. Ma wi e luku bun tu fu wi á nyan sani di sa meke u siki. Wi e meke moiti tu fu taki bun fu ala den peesi pe u go.

Marie-Line: U leli omen sani fu den baala anga sisa tu. Mi sabi ete taki a pisiten di u be doo Faansi Gayana, ná pikin alen be e kai. Neen meke wan leisi u be e wakiti fu a alen pasa, da u be o go peleiki. Ma wan sisa akisi mi taki: „U nai gwe noh?” Mi akisi en taki: „Fa wi o go?” A sisa taki: „Teki i paasoo, da wi o go anga baisigii.” A so mi leli lei baisigii anga wan paasoo a mi ana. Efu mi á be leli a sani ya, mi á be o man peleiki na alenten!

A wan sani fu 15 leisi u foloisi. Sowtu taanga-sikin yu abi gi baala anga sisa di mu foloisi go a wan taa peesi?

Marie-Line: A ná wan makiliki sani fu foloisi. Ma toku i mu meke moiti fu abi wan peesi pe i sa kisi iseefi baka te i wooko taanga aini a peleikiwooko.

Jack: Te u be doo a wan taa peesi, mi be lobi felifi a osu di u be o tan. Neen meke te den baala fu Betel be fusutan taki u ná o tan langa, da den be e taigi mi taki: „Jack, i ná abi fu felifi a osu ya!”

Marie-Line sabi paki den lai fu u te u mu foloisi. Ai poti ala sani aini dosu, da ai sikiifi san de aini a dosu. Ai sikiifi taki disi a fu a „wasi osu”, „siibi kambaa” efuso „kukuu”. Te  u doo na a nyun osu, ai moo makiliki gi u fu sabi aini sowtu kambaa u mu poti den sani di u tyai. Ai sikiifi san de aini ala den dosu tu. A sani ya e yeepi u fu wi á suku den sani fu u.

Marie-Line: Fu di u leli fa u mu seeka sani bun a fesi, meke u man bigin gawgaw anga a peleikiwooko te u foloisi go a wan taa peesi.

Fa wi e paati u ten, fu man du u ’wooko bun’?​—2 Tim. 4:​5.

Marie-Line: Monde wi e teke boo, da wi e seeka gi komakandaa. Tudewooko te anga sonde, we go a peleikiwooko.

Jack: Winsi fa den baala poti wan yuu di u mu wooko ala mun, tokuso na a peleikiwooko na a moo pelensipali sani gi u. Te u komoto a osu, te enke wi e daai kon baka wi e meke moiti fu taki anga ala sama di wi e miti.

Marie-Line: Te u go koi, ala yuu mi e tyai talakitaati. Son leisi sama e kon akisi u efu u ná abi buku gi den, winsi wi á taigi den taki wi a Yehofa Kotoigi. Neen meke wi e luku bun san wi e wei anga a fasi fa wi e tyai useefi. Den sama e poti pakisei a den sani ya.

Jack: Wi e tyai useefi bun na a pisi pe wi e tan tu. Te u si pampila a sitaati, wi e piki den puu ape fu a peesi sa tan kiin. Wi e kiin u dyali tu. Te den sama fu a biiti si den sani ya, son wan fu den e akisi u taki: „U ná abi wan Beibel gi mi noh?”

U peleiki omen leisi a faawe peesi. U sa taigi u san wi ondoofeni di u go peleiki a wan fu den peesi ya?

Jack: A á makiliki fu go a son peesi a Faansi Gayana. Son leisi a 600 km u be mu lei go a son peesi. A wan hii wiki u be e de a pasi. Mi e membee ete di u be go a St. Élie, aini a Amasone-busi. A baka omen yuu fosi u doo pe u be e go. U be go anga wan hei futu wagi anga wan pikin muntolu boto. Gaanse sama di e tan anda a gowtu wooko den e du. Te u be gi den buku, da son wan fu den be e gi u gowtu fu holibaka gi a wooko. Te neti tapu, da u be e daai wan fu den felon fu a olikanisâsi gi den. A omen sama be e kon.

Marie-Line: Taade ya, den baala be akisi Jack fu a be sa holi a lezing na a Membeefesa a wan kampu den e kai Camopi. Anga boto u be mu go anda. A fo yuu langa u be de na a Oyapock-liba. Mi be lobi a waka ya.

Jack: Den sula e moo ogii a den peesi pe a wataa saka. Ala yu ati e naki te wi e doo den sula. A sama di e tii a boto mu sabi bun san ai du. U be piisii taki u be abi a okasi fu go yeepi anda. Winsi fa u be de anga 6 Kotoigi namo, tokuso a 50 sama be de na a Membeefesa. Wantu Ingii be kon tu!

Marie-Line: Yonkuuwan di wani du moo gi Yehofa sa ondoofeni den sani ya tu. I mu fitoow Yehofa a den okasi ya. A sani ya o meke i biibi taanga. A omen leisi wi e si fa Yehofa e yeepi u.

A omen tongo i leli. A makiliki gi i fu leli wan taa tongo?

Jack: Nono. Ma mi be abi fu leli den tongo ya fu be man peleiki anga fu yeepi den kemeente pe mi be go. Wan leisi mi be mu holi a Wakititolen-sutudi aini Saanantongo * fosi mi be holi wan lezing na a mindiiwiki komakandaa. Baka a komakandaa mi akisi wan baala fa a go. A taigi mi taki: „Wi á be e kaba fusutan ala san i be e taki, ma a be bun.” Den yonkuuwan be e yeepi u tuutuu. Te mi be meke wan fowtu, den be e taigi mi, ma a ná ala yuu den gaansama be e taigi mi taki mi meke wan fowtu. A omen sani den yonkuuwan leli mi.

Marie-Line: Son peesi mi be abi sutudi di be e taki Faansi, Potogisi anga Saanantongo. Wan sisa be taigi mi taki a moo bun fu mi be bigin anga a tongo di be moo taanga gi mi fu taki. Baka dati da mi tapu anga a tongo di be moo makiliki gi mi. A á langa fosi mi fusutan saide a be taigi mi a sani ya.

 Wan dei mi be abi tu sutudi. Wan fu den be e taki Saanantongo, a taawan be e taki Potogisi. Mi go na a sutudi di be e taki Saanantongo fosi. Di mi bigin anga a taa sutudi neen a sisa di mi anga en be go taigi mi taki: „Marie-Line, a folow nai fusutan san yu e taki.” A di a taigi mi so fosi mi kisi miseefi taki a Saanantongo mi be e taki anga a Balasili uman!

Na ala se pe u go sama e lobi u. Fa wi e du meke mati anga den baala anga sisa?

Jack: Odo 11:25 taki: „Sani o waka bun gi wan sama di lobi gi taawan sani.” U lobi meke ten gi taawan, u lobi yeepi den a sani tu. Te u be e yeepi wooko na a Kownukondee zaal, son baala be e taigi u taki: „Fika a wooko de gi den peleikiman.” Da mi e taigi den taki: „We, mi a wan peleikiman tu. Efu wooko de fu du, da miseefi mu wooko.” Ala sama e wani de en wawan son leisi. Ma u nai meke a sani de tapu u fu du bun gi taawan.

Marie-Line: Wi e meke moiti fu soi den baala anga sisa taki wi e booko wi ede anga den. A so wi e sabi efu den abi u fanowdu fu luku den pikin gi den baka sikoo, efuso fu go teke den te sikoo komoto. Wi e sete u sikeima taa fasi da wi e yeepi den. A so wi anga den baala anga sisa e toon bun mati, fu di u de kabakaba fu yeepi den.

Sowtu wini u fende di u yeepi a pe moo peleikiman de fanowdu?

Jack: A fuuten diniwooko yeepi u fu de koloku. Fu di u be e peleiki a busi meke u be e fende a okasi fu si den sani di Yehofa meke. Winsi fa a á be makiliki son leisi, tokuso wi á be e buuya bika u be e holi a pakisei taki winsi pe u de, a foluku fu Yehofa o yeepi u.

Di mi be moo yonkuu, den be sooto mi a Faansi Gayana fu di mi á be wani toon suudati. Noiti mi be denki taki mi be o go aini a kondee ape enke zendeling. Mi á be sabi tu taki den be o gi mi a gaandi fu go peleiki aini sitaafu-osu. Yehofa belesi u tuutuu. A soi u kiin taki a lobi gi sama sani.

Marie-Line: A sani di e meke mi piisii tuutuu, a te mi e yeepi taawan. Ai bigi gi u taki wi abi a gaandi fu wooko gi Yehofa. A sani ya yeepi u fu toon bun mati anga useefi. Son leisi Jack e akisi mi efu a sa kai wan toowpaa di booko-saka kon nyan wan sani anga u. Gaanse leisi mi e taigi en taki: „Na aseefi sani de mi be e denki!” Mi anga Jack e denki go na a wanse.

Jack: Wantu yali pasa, dataa taigi mi taki mi abi prostaat kanker. Marie-Line nai wani yee a taki ya, toku mi e taigi en taki: „Mmaama, efu mi dede tamaa, a ná di mi ’gaandi meke mi o dede’. Ma toku mi sabi taki na a moo bun sani mi du anga mi libi, bika mi koboloiki en fu wooko gi Yehofa. A sani de e meke mi piisii.”​—Gen. 25:​8.

Marie-Line: Yehofa gi wi a okasi fu du omen sani di wi á be denki. A belesi u te ye. Wi e fitoow Yehofa, neen meke a pe a olikanisâsi fi en sende u go, na ape wi o go!