Jack kɛ Marie-Line ehi be fɛɛ sɔɔmɔ lɛ mli akɛ gbalashihilɛ mli hefatalɔi kɛjɛ afi 1988. Amɛnyɛɔ amɛtsakeɔ amɛhe amɛwoɔ shihilɛ fɛɛ shihilɛ mli, ni amɛsɔmɔ yɛ maji kɛ akrowai srɔtoi amli yɛ Guadeloupe kɛ French Guiana. Amrɔ nɛɛ, France nitsumɔhe nine lɛ ni kwɛɔ sɔɔmɔ nitsumɔ lɛ nɔ yɛ maji enyɔ nɛɛ anɔ. Nyɛhãa wɔkɛ Jack kɛ Marie-Line agbaa sane fioo.

Mɛni hã nyɛkɛ nyɛhe wo be fɛɛ sɔɔmɔ nitsumɔ lɛ mli?

Marie-Line: Afɔ mi yɛ Guadeloupe. Mimami yɛ ekãa waa, ni yɛ migbekɛbiiashi lɛ, ekɛ mi fɔɔ shiɛmɔ yaa kɛjɛ leebi kɛyashi gbɛkɛ. Mimami kɛ ekãa sɔmɔ Yehowa ewala gbii fɛɛ. Misumɔɔ mɛi asane waa, no hewɔ lɛ, be ni migbe skul naa yɛ afi 1985 lɛ, mibɔi gbɛgbamɔ nitsumɔ lɛ amrɔ nɔŋŋ.

Jack: Yɛ migbekɛbiiashi lɛ, mikɛ mɛi ni yɔɔ be fɛɛ sɔɔmɔ lɛ mli lɛ bɔɔ waa, ni nyɛmimɛi nɛɛ sumɔɔ shiɛmɔ. Kɛ́ mihã gbɛ lɛ, misɔmɔɔ akɛ gbɛgbalɔi awalɔ. Bei komɛi lɛ, Hɔɔ kɛ Hɔgbaa lɛ, wɔwóɔ bɔs kɛyaa he ni gbɛgbalɔi lɛ yɔɔ lɛ, ni wɔkɛ amɛ shiɛɔ gbi muu fɛɛ, kɛkɛ lɛ, kɛ́ wɔkpa lɛ, wɔtee ŋshɔ lɛ naa. Wɔná miishɛɛ waa diɛŋtsɛ!

Yɛ afi 1988 lɛ, mikɛ Marie-Line bote gbalashihilɛ mli. No sɛɛ etsɛɛɛ lɛ, mibi mihe akɛ, ‛Amrɔ nɛɛ ni sɔ̃ ko kãaa wɔnɔ lɛ, mɛni hewɔ wɔtsuuu babaoo yɛ sɔɔmɔ nitsumɔ lɛ mli?’ Mi hu mibɔi gbɛgbamɔ nitsumɔ lɛ. Afi sɛɛ lɛ, wɔtee gbɛgbalɔi askul, ni no sɛɛ lɛ, ahã wɔbɔi sɔɔmɔ akɛ gbɛgbalɔi krɛdɛi. Wɔkɛ miishɛɛ sɔmɔ yɛ hei srɔtoisrɔtoi yɛ Guadeloupe, kɛkɛ ni ajie wɔ kɛtee French Guiana.

Atsake he ni nyɛsɔmɔɔ yɛ lɛ shii abɔ, ni wɔle akɛ, he fɛɛ he kɛ bɔ ni jɛmɛ shihilɛ yɔɔ. Mɛni eye ebua nyɛ ni nyɛnyɛ nyɛsɔmɔ kɛ miishɛɛ yɛ hei srɔtoi ni nyɛtee lɛ fɛɛ?

Marie-Line: Nyɛmimɛi ni yɔɔ Betel yɛ French Guiana lɛ le akɛ, ŋmalɛ ni wɔsumɔɔ fe fɛɛ ji Yesaia 6:8. No hewɔ lɛ, kɛ́ amɛtswa wɔ lɛ, bei pii lɛ, amɛkɛfeɔ shwɛmɔ ni amɛbiɔ akɛ, “Bɛ nyɛkaiɔ nakai ŋmalɛ lɛ ni nyɛsumɔɔ waa lɛ?” Kɛ́ wɔnu nakai pɛ, wɔle akɛ aaba abatsake he ni wɔsɔmɔɔ yɛ lɛ. No hewɔ lɛ, wɔhereɔ nɔ akɛ, “Naa wɔ! Nyɛtsua wɔ!”

Wɔkɛ he ni akɛ wɔ etee lɛ etooo hei krokomɛi ni wɔsɔmɔ yɛ lɛ ahe, ejaakɛ kɛ́ wɔfee nakai lɛ, wɔnáŋ  miishɛɛ yɛ jɛmɛ. Agbɛnɛ hu, wɔ tsutsu wɔfeɔ nibii ni baahã wɔle wɔnyɛmimɛi lɛ jogbaŋŋ.

Jack: Be ko be ni atsake he ni wɔsɔmɔɔ yɛ lɛ, nyɛmimɛi komɛi ka akɛ amɛbaakɔne wɔyiŋ koni wɔhi shi, ejaakɛ amɛsumɔɔɔ ni wɔshiɔ amɛ. Shi be ni wɔshiɔ Guadeloupe lɛ, nyɛmi nuu ko kai wɔ sane ni Yesu wie yɛ Mateo 13:38 lɛ, akɛ: “Ŋmɔ lɛ ji je lɛ.” No hewɔ lɛ, kɛ́ atsake he ni wɔsɔmɔɔ yɛ lɛ, wɔhãa ehiɔ wɔjwɛŋmɔ mli akɛ, ekɔɔɔ he eko he ni akɛ wɔ baaya lɛ, mfonirifeemɔŋ ŋmɔ kome too lɛ nɔŋŋ mli nii wɔtsuɔ lɛ. Kɛ́ mɛi yɛ he ni wɔyaa lɛ kome too lɛ, wɔbɛ naagba!

He fɛɛ he ni akɛ wɔ baaya lɛ, wɔnaa akɛ mɛi ni yɔɔ jɛmɛ yɛ miishɛɛ. No hewɔ lɛ, wɔbɔɔ mɔdɛŋ akɛ wɔbaahi shi tamɔ amɛ. Nɔ ni amɛyeɔ lɛ, no wɔ hu wɔyeɔ, kɛ́ wɔleee yeli po; ni nɔ ni amɛnuɔ lɛ, no wɔ hu wɔnuɔ. Shi yɛ fɛɛ mli lɛ, wɔkwɛɔ jogbaŋŋ koni hela akamɔ wɔ. He fɛɛ he ni akɛ wɔ baaya lɛ, wɔbɔɔ mɔdɛŋ akɛ wɔbaawie jɛmɛ he ekpakpa.

Marie-Line: Nyɛmimɛi lɛ hu ye amɛbua wɔ waa. Mikaiɔ nɔ ko ni ba be ni wɔtee French Guiana ehee lɛ. No mli lɛ, nugbɔ miinɛ waa, no hewɔ lɛ, wɔkpɛ wɔyiŋ akɛ wɔbaamɛ kɛyashi ebaatse dani wɔya shiɛmɔ. Shi nyɛmi yoo ko bi mi akɛ, “Ofainɛ, wɔbaanyɛ wɔya?” Mihiɛ fee mi yaa. No hewɔ lɛ, mibi lɛ akɛ, “Ni te wɔbaafee tɛŋŋ wɔya lɛ?” Ekɛɛ mi akɛ, “Kɔ okataŋwia lɛ, wɔkɛ moto baaya.” Nakai gbi lɛ, mikase bɔ ni ahiɛɔ akataŋwia kɛtaa moto. Eji mikaseee kulɛ, miyaŋ shiɛmɔ yɛ nugbɔnɛmɔ be lɛ mli fɛɛ!

Nyɛfã aaafee shii 15 sɔŋŋ. Mɛɛ nibii nyɛfeɔ ni hãaa etɔ nyɛ tsɔ kɛ́ nyɛmiifã?

Marie-Line: Kɛ́ ooto onibii ni ofã oyahi he kroko lɛ, ebɛ mlɛo. Ni kɛ̃lɛ, kɛ́ oná he ko oyato lɛ, esa akɛ osaa jɛmɛ bɔ ni kɛ́ ojɛ shiɛmɔ oba koni obajɔɔ ohe lɛ, obaanyɛ ojɔɔ ohe ni omii ashɛ ohe.

Jack: Bei pii lɛ, mipɛnteɔ tsũ lɛ mli ehee. Nyɛmimɛi ni yɔɔ nitsumɔhe nine lɛ le enɛ. No hewɔ lɛ, kɛ́ wɔtsɛŋ yɛ he ni akɛ wɔ yaa lɛ, bei komɛi lɛ amɛkɛɔ mi akɛ, “Jack, kaagba ohe naa opɛnte tsũ lɛ mli!”

Marie-Line he esa waa kɛ nitoo! Etoɔ nɔ fɛɛ nɔ ewoɔ adekai amli, ni eŋmaa he ni adeka fɛɛ adeka mli nibii yaa lɛ ewoɔ he, tamɔ “hejuuhe,” “sɛɛtsũ,” kɛ “kpatashi.” No hewɔ lɛ, kɛ́ wɔyashɛ he ni wɔyaa lɛ, ewaaa tsɔ akɛ wɔbaale he ni adeka fɛɛ adeka yaa. Eŋmaa nibii ni yɔɔ adeka fɛɛ adeka mli lɛ hu eshwieɔ shi koni kɛ́ wɔmiitao nɔ ko lɛ, ekatɔ wɔ.

 Marie-Line: Akɛni wɔtoɔ wɔnibii ahe gbɛjianɔ jogbaŋŋ hewɔ lɛ, kɛ́ wɔyashɛ shi lɛ, wɔnyɛɔ wɔjeɔ wɔsɔɔmɔ lɛ shishi amrɔ nɔŋŋ.

Te nyɛtoɔ nyɛbe he gbɛjianɔ nyɛhãa tɛŋŋ koni nyɛnyɛ ‘nyɛtsu nyɛsɔɔmɔ lɛ he nii pɛpɛɛpɛ’?​—2 Tim. 4:5.

Marie-Line: Ju lɛ, wɔjɔɔ wɔhe ni wɔsaa wɔhe kɛhã asafoŋ kpeei. Kɛkɛ lɛ, kɛjɛ Jufɔ kɛyaa lɛ, wɔtee shiɛmɔ.

Jack: Eyɛ mli akɛ atsɔɔ ŋmɛlɛtswai abɔ ni kɛ́ hooo kwraa lɛ, esa akɛ wɔkɛshiɛ daa nyɔɔŋ moŋ, shi wɔkɛ wɔjwɛŋmɔ emaaa no nɔ. Shiɛmɔ lɛ ji nɔ ni he hiaa fe fɛɛ yɛ wɔshihilɛ mli. Kɛjɛ be ni wɔbaashi shĩa aahu kɛyashi wɔbaaku wɔsɛɛ kɛba shĩa lɛ, wɔbɔɔ mɔdɛŋ akɛ wɔbaashiɛ wɔhã mɛi fɛɛ ni wɔkɛkpeɔ.

Marie-Line: Akɛ nɔkwɛmɔnɔ lɛ, kɛ́ wɔyaata he ko wɔjɔɔ wɔhe po lɛ, be fɛɛ be lɛ, mihiɛɔ tratii yɛ mihe. Mɛi komɛi babiɔ wɔ woji, eyɛ mli akɛ wɔkɛko amɛ akɛ Yehowa Odasefoi ji wɔ. No hewɔ lɛ, be fɛɛ be lɛ, wɔkwɛɔ jogbaŋŋ yɛ bɔ ni wɔsaa wɔhe kɛ bɔ ni wɔfeɔ wɔnii wɔhãa lɛ he, ejaakɛ mɛi kwɛɔ wɔ waa.

Jack: Wɔtsɔɔ nibii kpakpai ni wɔfeɔ wɔhãa wɔkutsoŋbii lɛ hu nɔ wɔyeɔ amɛ odase. Mihalaa jwɛi yɛ shikpɔŋ ni mikɛwoɔ bɔɔla lɛ mli, ni mikɛ rek kpalaa baji ni ekpɔlɔ eshwie shi yɛ agbo lɛ naa lɛ hu. Mikutsoŋbii lɛ naa enɛ, ni bei komɛi lɛ, amɛbiɔ mi akɛ, “Miitao Biblia. Aleenɔ, obaaná eko ohã mi?”

Bei pii lɛ, nyɛfãa gbɛ nyɛyashiɛɔ yɛ hei ni jekɛ waa. Ani gbɛfãi nɛɛ eko yɛ ni nyɛhiɛ kpaŋ nɔ kɔkɔɔkɔ?

Jack: Guiana hei komɛi yɛ ni jɛmɛ yaa wa waa diɛŋtsɛ. Bei pii lɛ, be ni otsi lɛ baaba naagbee lɛ, wɔfã gbɛ kilomitai 600 (mailii 370), ni gbɛjegbɛi lɛ ekomɛi ehiii. Wɔhiɛ kpaŋ gbɛ ni wɔfã kɛtee St. Élie ni yɔɔ Amazon koo lɛ mli lɛ nɔ kɔkɔɔkɔ. Wɔkɛ tsɔne ko ni yɔɔ hewalɛ waa kɛ lɛlɛ ni akɛ ahɛd (outboard motor) ewo he ni fã gbɛ lɛ, ni ehe wɔ ŋwɛlɛtswai abɔ. Mɛi ni yɔɔ jɛmɛ lɛ ateŋ mɛi pii tsaa shika tsuru. Wɔhã amɛ woji, ni amɛteŋ mɛi komɛi kɛ shika tsuru tsu onia kɛtsɔɔ akɛ amɛhiɛ esɔ. Gbɛkɛnaashi lɛ, wɔjie asafo lɛ vidio ko wɔhã amɛ, ni amɛteŋ mɛi pii bakwɛ.

Marie-Line: Nyɛsɛɛ nɛɛ, afɔ̃ Jack nine ni eyahã Kaimɔ lɛ wiemɔ lɛ yɛ Camopi. Wɔkɛ lɛlɛ ni akɛ ahɛd ewo he fã gbɛ ŋmɛlɛtswai ejwɛ yɛ Oyapock Faa lɛ nɔ dani wɔyashɛ jɛmɛ. Wɔná miishɛɛ waa!

Jack: Faa lɛ hei komɛi yɛ ni nu faaa yɛ jɛmɛ, ni kɛ̃lɛ, ehoɔ oya waa. Kɛ́ ona lɛ, eyɛ fɛo waa, milakaaa bo! Shi eyɛ oshãra hu, ejaakɛ kɛ́ mɔ ni kudɔɔ lɛlɛ lɛ he esako lɛ, lɛlɛ lɛ baanyɛ ayashi tɛ. Mɛi aaafee 56 ba Kaimɔ lɛ, ni amɛteŋ mɛi 6 pɛ ji Odasefoi. Amerindiabii, ni ji Guiana shikwɛ̃ɛbii lɛ, komɛi po ba! Anɔkwa, wɔná miishɛɛ.

Marie-Line: Kɛ́ oblahii kɛ oblayei kɛ amɛhe hã Yehowa ni amɛtsu babaoo yɛ esɔɔmɔ lɛ mli lɛ, amɛbaaná niiashikpamɔi ni ŋɔɔ tamɔ enɛ. Niiashikpamɔi ni tamɔ nɛkɛ lɛ hãa onaa akɛ, esa akɛ okɛ ohiɛ afɔ̃ Yehowa nɔ, ni kɛ́ ofee nakai lɛ, ehãa ohemɔkɛyeli lɛ mli waa. Wɔna Yehowa nine yɛ wɔshihilɛ mli shii abɔ.

Nyɛkase wiemɔi pii. Ani eji nyɛdromɔ keenɔ?

Jack: Dabi ee. Hiamɔ ni yɔɔ lɛ hewɔ wɔkase wiemɔi nɛɛ. Akɛ nɔkwɛmɔnɔ lɛ, be klɛŋklɛŋ ni mikwɛ Buu-Mɔɔ Nikasemɔ lɛ nɔ yɛ Sranantongo * mli lɛ, no mli lɛ, mifeko Biblia kanemɔ po yɛ nakai wiemɔ lɛ mli! Sɛɛ mli lɛ, mibi nyɛmi nuu ko bɔ ni etee lɛ ehã. Ekɛɛ mi akɛ, “Saji ni owie lɛ ekomɛi yɛ ni wɔnuuu shishi, shi obɔ mɔdɛŋ waa.” Gbekɛbii lɛ ye amɛbua mi waa. Kɛ́ mitɔ̃ lɛ, onukpai lɛ ewieee, shi gbekɛbii lɛ wieɔ. Amɛtsɔɔ mi nibii pii.

Marie-Line: Yɛ he ko ni wɔyasɔmɔ yɛ lɛ, mi-Biblia mli nikaselɔi lɛ ateŋ mɛi komɛi wieɔ French, mɛi komɛi hu wieɔ Portuguese, dani mɛi komɛi hu wieɔ Sranantongo. Nyɛmi yoo ko wo mi ŋaa akɛ, mikɛ mɛi ni wieɔ wiemɔi lɛ ateŋ nɔ ni wa hã mi fe fɛɛ lɛ akase nii klɛŋklɛŋ, koni mikɛ mɛi ni wieɔ nɔ ni waaa hãaa mi kwraa lɛ agbe naa. Eyeee be ko ni mina akɛ, ŋaa kpakpa ewo mi lɛ.

Gbi ko lɛ, mikɛ mɛi enyɔ yaakase nii. Amɛteŋ mɔ kome wieɔ Sranantongo, ni mɔ kroko lɛ jɛ Brazil ni ewieɔ Portuguese. Mikɛ Sranantongo mɔ lɛ kase nii  klɛŋklɛŋ. No sɛɛ be ni mikɛ mɔ ni wieɔ Portuguese lɛ bɔi nikasemɔ lɛ, nyɛmi yoo lɛ ni kɛ mi nyiɛ lɛ kɛɛ mi akɛ, “Marie-Line, efeɔ mi akɛ, enuuu nɔ ni owieɔ lɛ shishi!” Asomoaŋ, mikɛ yoo lɛ miiwie Sranantongo moŋ fe Portuguese!

Nyɛmimɛi ni yɔɔ hei ni nyɛsɔmɔ yɛ lɛ sumɔɔ nyɛsane waa. Mɛni nyɛfeɔ ni hãa amɛbasumɔɔ nyɛsane waa nakai?

Jack: Abɛi 11:25 lɛ kɛɔ akɛ: “Mɔ ni hãa mɔ nɔ lɛ, ebaashwere.” Wɔshashaooo shi kwraa akɛ wɔkɛ wɔbe kɛ wɔnibii baashã afɔle wɔhã mɛi. Bei komɛi lɛ, kɛ́ aatsu nii yɛ Maŋtsɛyeli Asa lɛ nɔ lɛ, nyɛmimɛi komɛi kɛɔ mi akɛ: “Enɛ lɛ, shi ohã shiɛlɔi lɛ ni amɛfee.” Shi mikɛɔ amɛ akɛ: “Mi hu shiɛlɔ ji mi, aloo? No hewɔ lɛ, kɛ́ nitsumɔ ko yɛ ni esa akɛ atsu lɛ, miisumɔ ni matsu eko.” Eyɛ mli akɛ ehe miihia ni wɔ fɛɛ wɔná dekã wɔhã wɔhe moŋ, shi wɔkɛ no efeee naajiemɔ; wɔfeɔ mɛi ejurɔ.

Marie-Line: Wɔbɔɔ mɔdɛŋ akɛ wɔbaale nyɛmimɛi lɛ jogbaŋŋ. Enɛ yeɔ ebuaa wɔ ni wɔleɔ nɔ ni wɔbaanyɛ wɔfee kɛye wɔbua amɛ, tamɔ ekolɛ kɛji amɛteŋ mɔ ko miitao mɔ ko eshi ebii lɛ ehã be kukuoo ko aloo eetao mɔ ko awó amɛ kɛjɛ skul. Kɛ́ wɔna nakai lɛ, wɔtoɔ gbɛjianɔ koni wɔnyɛ wɔye wɔbua amɛ. Akɛni wɔyeɔ wɔbuaa amɛ nɛkɛ hewɔ lɛ, ehã wɔbatsɔmɔ nanemɛi waa.

Mɛɛ jɔɔmɔi nyɛná akɛni nyɛyasɔmɔ yɛ hei ni hiamɔ lɛ da yɛ lɛ hewɔ?

Jack: Be fɛɛ sɔɔmɔ nitsumɔ lɛ ehã wɔná jɔɔmɔi babaoo. Bei pii lɛ, hei ni wɔyasɔmɔɔ yɛ lɛ hãa wɔnaa Yehowa adebɔɔ nibii srɔtoisrɔtoi ni yɔɔ fɛo. Eyɛ mli akɛ wɔkɛ naagbai ekpe moŋ, shi wɔyeee wɔtsui, ejaakɛ wɔle akɛ, he fɛɛ he ni wɔbaaya lɛ, Nyɔŋmɔ webii lɛ baaye abua wɔ.

Miblahiiaŋ lɛ, awo mi tsuŋ yɛ French Guiana yɛ mihe ni mikɛwooo asraafoi anitsumɔ lɛ mli lɛ hewɔ. Nakai beiaŋ lɛ, ebaaa mijwɛŋmɔ mli kɔkɔɔkɔ akɛ, wɔsɛɛ ko lɛ, mayasɔmɔ yɛ jɛmɛ akɛ maŋsɛɛ sɔɔlɔ, ni akɛ, abaaŋmɛ mi gbɛ po ni miyaye mɛi odase yɛ tsuŋwoohei. Ani enɛ jeee Yehowa dɛŋ jɔɔmɔ? Eji jɔɔmɔ kpele diɛŋtsɛ!

Marie-Line: Nɔ ko bɛ ni hãa mináa miishɛɛ fe ni mikɛ mihe baashã afɔle mahã mɛi. Eŋɔɔ wɔnaa waa akɛ wɔmiisɔmɔ Yehowa. Yehowa sɔɔmɔ lɛ ehã wɔgbãla lɛ esɔ. Bei komɛi lɛ, Jack baabi mi kɛji wɔbaanyɛ wɔfɔ̃ gbalashihilɛ mli bii komɛi ni nijiaŋ eje wui lɛ nine kɛba shĩa kɛhã niyeli. Efɔɔ kaa akɛ makɛɛ lɛ akɛ, “Oookɛɛ oyɛ mijwɛŋmɔ mli!” Bei pii lɛ, nɔ ni esusuɔ lɛ, no nɔŋŋ mi hu misusuɔ.

Jack: Nyɛsɛɛ nɛɛ, akɛɛ mi akɛ miná prostate cancer. Bei komɛi lɛ, mikɛɔ Marie-Line akɛ: “Misuɔlɔ, mishɛko he ni abaakɛɛ ‘migbɔ jogbaŋŋ.’ Shi kɛ́ migbo wɔ́ po lɛ, edɔɔɔ mi.” Kɛ́ miwie nakai lɛ, esumɔɔɔ kwraa. Shi yɛ anɔkwale mli lɛ, edɔɔɔ mi, ejaakɛ mile akɛ, mikɛ miwala etsu nɔ ko kpakpa, no ji, mikɛsɔmɔ Yehowa, ni enɛ hãa mitsui nyɔɔ mimli waa.​—1 Mo. 25:8.

Marie-Line: Sɔɔmɔ hegbɛi kɛ nibii ni Yehowa ehã wɔtsu lɛ ekomɛi yɛ ni wɔkãko shi wɔlako pɛŋ akɛ wɔbaatsu. Edro wɔ nibii kpakpai pii wɔwala gbii abɔ fɛɛ. Wɔkɛ wɔhiɛ fɔ̃ɔ Nyɔŋmɔ nɔ yɛ nɔ fɛɛ nɔ mli. No hewɔ lɛ, he fɛɛ he ni asafo lɛ baakɛɛ wɔ akɛ wɔya lɛ, jɛmɛ wɔbaaya!