Dépi 1988, Jack é Marie-Line ansanm adan sèwvis aplentan la. Onlo moun sav kè yo sé dé moun ki ka fè kò èvè nenpòt ki sitiyasyon. Yo voyé-yo sèvi diféran koté an Gwadloup é an Guiyàn. Sé 2 téritwa kè filyal a Lafrans ka jéré konnyéla la. An-nou pozé Jack é Marie-Line déotwa kèsyon.

Ka ki ba-zòt anvi sèvi Jéova aplentan ?

Marie-Line : An lévé an Gwadloup é lè an té timoun, byensouvan an té ka pasé tout lajouné èvè manman-mwen an prédikasyon. Manman-mwen té toujou ka pòté bon mannèv an prédikasyon. Konm an enmé pwochen an mwen, an vin pyonyé lè an lésé lékòl, an 1985.

Jack : Lè an té jenn té ni onlo moun ki té ka sèvi Jéova aplentan alantou an mwen é yo té enmé préché toubònman. Lè an té an vakans, an té ni labitid pran sèwvis pyonyé an ranfò. É byensouvan, lèwikenn, mwen é manman nou té ka pran kaw pou nou té ay jwenn dòt pyonyé é défwa an té k’ay èvè ondòt frè osi. Nou té ka préché tout jouné-la é lè nou té fin nou té k’ay pran on ti ben-lanmè. A pa ti byen sa té byen !

An 1988, an mayé èvè Marie-Line. É on titak tan apré, mi sa an di an tchè an mwen : « Konm nou pa ni pon chaj anlè do an nou, ka ki ka anpéché-nou fè plis adan ministè-la ? » Sé konsa, an vin pyonyé osi. On lanné apré, nou fè lékòl a sé pyonyé-la é yo nonmé-nou pyonyé èspésyal. Yo voyé-nou sèvi diféran koté an Gwadloup é sa té byen toubònman. Aprésa, yo mandé-nou ay Guiyàn.

Lanné apré lanné yo mandé-zòt fè plizyè biten diféran. Ka ki édé-zòt fè kò èvè sé chanjman-lasa ?

Marie-Line : Sé frè-la ki an Bétèl a Laguiyàn té sav kè vèwsé préféré an nou sé té Izayi 6:8. Kifè, lè yo té ka kriyé-nou pou di-nou kè yo té kay voyé-nou ondòt koté oben yo té kay mandé-nou fè ondòt biten, yo té ka fè on ti blag èvè nou. Mi sa yo té ka di-nou : « Ès zò ka sonjé ti vèwsé préféré a zòt ? » Dépi yo té di-nou sa, nou té ja sav ka i té ka vin dèyè. Kifè nou té ka réponn-yo tou natirèlman : « Mi nou ! Voyé-nou ! »

 Lè yo voyé-nou on koté oben lè yo ban-nou on nouvo biten a fè, nou pa jen ka konparé ansyen sitiyasyon an nou èvè nouvo la pas sa pé rivé a anpéché-nou aprésyé nouvo sitiyasyon an nou. Anplisdisa, nou ka fè on gwo éfò pou aprann konnèt frè é sè an nou.

Jack : Ni kèlkè lanné dè sa, ni déotwa frè é sè ki pa té vé lésé-nou pati pas yo té vé nou rété èvè yo. Men lè nou lésé Gwadloup, on frè fè-nou sonjé sa Matyé 13:38 ka di : « Jaden-la, sé mond-la. » Alò, lè yo ka voyé-nou ondòt koté, nou toujou ka sonjé kè sé an menm jaden-la nou ka préché kèlkèswa koté-la nou yé la. Anfinaldikont, dépi ou ni on téritwa pou préché é ni moun adan-y, sé sa ki ka konté !

Lè nou ka rivé adan on nouvo téritwa, nou ka vwè kè sé moun-la ka rivé débouyé-yo. Yo ni sa ki fo pou tchè a yo kontan : yo ni on fanmi é yo ni on dèkwa pou yo bwè é manjé. Alò, nou ka éséyé viv kon yo. Pétèt yo pa’a manjé menm manjé ki nou men nou ka manjé sa yo ka manjé é nou ka bwè sa yo ka bwè. Men nou ka fè atansyon pou nou pa tonbé malad kanmenm. Nou toujou ka éséyé palé an byen dè tout koté yo ka voyé-nou.

Marie-Line : Lè nou rivé on koté, sé frè é sè-la ki la la ka aprann-nou onlo biten osi. An pé’é jen oubliyé on biten ki rivé-mwen lè nou té sòti rivé an Guiyàn. Lapli té ka tonbé bon tonbé la é nou konpranndèdi kè fò-nou té atann kè i arété pou nou té koumansé préché. Lèwgadé on sè di-mwen : « Nou pa k’ay alò ? » An té tou étoné é an mandé-y : « Men kijan nou ka fè sa ? » I rété i réponn-mwen : « Ében, ou ka pran parapli a-w é nou ka pédalé. » Kifè an aprann monté bisiklèt èvè on parapli an men an mwen. É siwvwè an pa té fè sa, an pa té’é jen préché an péryòd a lapli !

Zò ja chanjé kaz omwen 15 fwa. Ès zò té’é pé ban-nou dé ti konsèy an domenn-lasa ?

Marie-Line : Sa pa fasil lè ou ka chanjé kaz konsa. Men sa ki enpòwtan sé dè touvé on ti koté ou pé mété-w alèz a-w lè ou fin préché.

Jack : Dabitid an toujou ka woupenn andidan kaz-la. É défwa sé frè a Bétèl-la té ka fè on ti blag èvè mwen é yo té ka di-mwen : « Jack, fwa-lasa ou pa’a oblijé woupenn kaz-la ! » Yo té ja sav kè nou pa té’é fè lonfé koté-lasa.

Lè sé pou déménajé on kaz, Marie-Line sé on mèt-a-mannyòk. I ka mèt toutbiten an kawton é i ka maké asi chak sé kawton-la kikoté yo k’ay,  pa ègzanp « sal dè ben », « chanm », « kuizin ». Konsa, lè nou rantré an kaz an nou, sa pi fasil pou nou dè mèt tout biten annòd an kaz-la. É ni ondòt biten i ka fè ankò : i ka maké asi on lis tousa ki adan chak kawton pou nou pé sa touvé sa nou ka chèché pi vit.

Marie-Line : Konm nou aprann òwganizé-nou, nou pé koumansé préché tousuit.

Kijan zò ka òwganizé-zòt pou zò pé sa « sèvi Bondyé afon » ? (2 Tim. 4:5).

Marie-Line : Lèlendi nou ka pozé kò an nou é nou ka préparé sé réinyon-la. É lèmawdi, nou ka koumansé préché.

Jack : Menmsi nou sav nou ni on kantité lè a fè chak mwa, nou pa’a pran tèt an nou pou sa. Sa ki pi enpòwtan pou nou sé préché. Lè nou ka préché, nou ka éséyé palé ba toutmoun nou ka jwenn dépi lè nou sòti akaz joustan nou viré.

Marie-Line : Pa ègzanp lè nou ka manjé adan on pawk, an toujou ka pran dé ti trak èvè mwen. Ni moun ki ka vin mandé-nou piblikasyon é poutan nou pa jen di-yo kè nou Témwen a Jéova. Sé pousa osi nou ka fè atansyon a jan nou ka abiyé é a konpòwtasyon an nou. Sé moun-la ka rété gadé sé biten-lasa.

Jack : Nou janti èvè vwazen an nou, kifè sa ka pèwmèt-nou bay on témwanyaj osi. An ka ranmasé sé papyé-la ki atè-la é an ka mèt-yo an poubèl-la. An ka pasé on balyé a gazon adan jaden an mwen pou ranmasé sé fèy-la alantou a kaz-la. Sé vwazen-la ka vwè tousa é dépawfwa mi sa yo ka mandé-nou : « Ou pa ni on Bib ban mwen souplé ? »

Souvantfwa, zò ay préché adan téritwa ki té lwen menm. Ès zò té’é pé rakonté-nou on biten èspésyal ki pasé pannan sé vwayaj-lasa ?

Jack : An Guiyàn, dépawfwa, sé on bab pou rivé sèwten koté. Souvantfwa, nou té ka fè 600 kilomèt chak simenn asi dé chimen démonté. Nou pé’é jen oubliyé fwa-la nou té ay Saint-Élie la, adan foré a Lamazoni. Nou pran onpakèt tan pou nou té rivé : fò-nou té ni on kat-kat é on ti kannòt a motè. Lamajorité a moun ki té ka rété la sé té dé moun ki té ka fouyé pou chèché lò. Nou lésé piblikasyon ba yo é pou di-nou mèsi, ni déotwa ki ban-nou dé ti mòso lò pou sé piblikasyon-la. Lèswa-la nou montré-yo on vidéo. Onlo moun vin gadé-y.

Marie-Line : Pa ni tèlman lontan dè sa, yo mandé Jack fè diskou a mémoryal-la a Camopi. Pou nou té rivé la, fò-nou té vwayajé òbò on kannòt asi on flèv yo ka kriyé Loyapòk pannan 4 èdtan. Sé té on èkspéryans entérésan toubònman !

Jack : Lèwvwè dlo-la pa té fon, délè, sa té vréman danjéré ! Mésyé ! An pé di-zòt kè sa ka soukwé tchè a-w ! Fò moun-la ki ka menné kannòt-la konnèt mannyé-y byen menm. Men sé té on bèl èkspéryans. É pou Mémoryal-la, nou té yenki a 6 Témwen, men ni pliski 50 moun ki vin é pawmi yo té ni déotwa zendyen ki ka viv an Amérik.

Marie-Line : On jenn pé viv dé bèl ti èkspéryans konsa si i ka travay plis pou Jéova. Konm fò ou konté asi Jéova onlo, fwa a-w ka vin pli fò. Byensouvan, ou ka vwè kijan Jéova ka mèt men a-y pou i édé-w.

Zò aprann palé plizyè lang. Ès sa vé di kè zò ni on don pou sa ?

Jack : Awa. An aprann sé lang-lasa pas an té oblijé aprann-yo. Fò an té dirijé Tou dè Gad la an sranan tongo * alòskè an po’o té menm fè on lèkti a Labib lasal ! An mandé on frè kijan an débouyé-mwen. Mi sa i di-mwen : « Dépawfwa, nou pa té ka rivé konprann ayen, men i té bon kanmenm. » Sé timoun-la té ka édé-mwen onlo. Lèwvwè an té ka fè fòt, yo pa té pè vin di-an sa alòskè sé granmoun-la pa té ka di-mwen ayen. Sé jenn-la aprann-mwen onlo biten menm.

Marie-Line : Adan on téritwa, an té ka fè étid a moun an fransé, an pòwtigé é an sranan tongo. On sè di-mwen kè lè ou ka fè étid a moun an plizyè lang diféran menm jou-la, vométan ou koumansé jouné-la èvè lang-la ou ka palé mwen byen la é kè ou fini-y èvè tala ou ka palé pibyen  la. An pa tadé a konstaté kè sé té on bon konsèy menm.

On jou, fò an té fè on étid an sranan tongo é fò an té fè ondòt an pòwtigé. Lèwgadé, an té sòti koumansé dézyèm étid-la, é sè-la ki té èvè mwen la di-mwen : « Marie-Line, dapré-mwen ni on ti biten ki pa k’ay ! » Sé lè an rann-mwen kont kè an té ka palé ba on brézilyèn an sranan tongo olyé an té palé ba-y an pòwtigé.

Sé frè é sè la ki travay èvè zòt la enmé-zòt onlo. Men kijan zò fè vin bon bon zanmi konsa ?

Jack : Pwovèb 11:25 ka di : « On moun ki donan, zafè a-y ké maché. » Nou toujou paré a ba lézòt sa nou ni dè méyè. An té ka òwganizé-mwen pou pawtisipé adan antrètyen a Sal di Wayòm-la. Men on jou, déotwa frè di-mwen : « Lésé sa pou sé pwoklamatè-la ! » Men an di-yo : « Men mwen osi an sé on pwoklamatè ! Donk si ni on travay a fè, fò an bay on pal osi ! » Menmsi sa enpòwtan kè nou pran on moman pou nou, nou toujou ka sonjé kè fò pa sa anpéché-nou fè lézòt dibyen.

Marie-Line : Nou ka fè éfò pou nou entérésé-nou a chak frè é sè ki an lasanblé-la. Sé konsa nou ka vin sav kè yo bizwen on moun pou gadé timoun a yo oben on moun pou ay chèché-yo lékòl. Alò, nou ka aranjé-nou pou nou disponib. Lè ou toujou paré pou édé lézòt lè yo bizwen on biten, ou ka vin pibon zanmi èvè yo ankò.

Zò ay la yo té bizwen pwoklamatè. Ès zò pé palé-nou dè bénédisyon zò trapé ?

Jack : Konm nou adan sèwvis aplentan la, a pa ti bèl vi an nou bèl ! Pli souvan ki rarman, nou ka pwofité dè bèl kréyasyon a Jéova. Sé vré, nou jwenn difikilté, men lèfètkè nou sav kè kèlkèswa koté-la nou yé la òwganizasyon a Jéova ka soutyenn-nou, sa ka trankilizé lèspri an nou.

Lè an té jenn, yo mèt-mwen lajòl an Guiyàn pas an pa té vlé vin sòlda. An pa jen imajiné kè an té’é viré an péyi-lasa on jou é kè sé la an té’é misyonè. An pa jen imajiné nonplis kè konnyéla sé mwen ki té’é ay préché ba moun ki lajòl. Jéova sé on Bondyé ki donan menm : i ka ban-nou tèlman bèl bénédisyon !

Marie-Line : Lè an ka ba lézòt sa an ni dè méyè, pa ni biten ki ka rann-mwen pi kontan ki sa. Nou kontan travay ba Jéova. Sa fè mayé an nou vin pli solid ankò. Dépawfwa, Jack ka mandé-mwen si nou pé envité on frè é madanm a-y a manjé akaz pou nou pé sa ankourajé-yo. Byensouvan, mi sa an ka di-y : « Men jistèman, ou pran sa an bouch an mwen ! » Nou toujou ka ni menm lidé-la.

Jack : Pa ni lontan dè sa, sé dòktè-la di-mwen kè an ni on kansè a lapwòstat. Marie-Line pa enmé tann sa, men délè an ka di-y : « Doudou, si an mò dèmen, menmsi an pa mò ‘vyé vyé vyé’, an ké mò èvè tchè-kontan pas an sav an fè onlo bèl biten ba Jéova an vi an mwen, é sé biten-lasa ni onlo valè » (Jén. 25:8).

Marie-Line : Nou pa jen konpranndèdi kè Jéova té’é wouvè sé pòt-lasa ban nou ! I fè-nou fè dé biten nou pa jen konprann nou té’é pé fè ! Jéova ban-nou onlo bèl biten menm ! Pa jen manké-nou ayen ! Nou ni konfyans an Bondyé a san pou san, é lè òwganizasyon a-y ka mandé-nou ay on koté, nou toujou k’ay !