A a tia n uaia ni beku ni kabwanina aia tai Jack ao Marie-Line man 1988. A rangi n rabakau ni kaangaraoi aroia nakoni bitaki, ao a butimwaei mwioko aika bati i Guadeloupe ao French Guiana. A a mena ngkai taabo aikai i aan te aobiti n tararua i Buranti. Ti na tabeki titiraki tabeua nakoia Jack ao Marie-Line.

Tera ae kairingkami bwa kam na beku ni kabwanina ami tai?

Marie-Line: I ikawairake i Guadeloupe ao n angiin te tai I uarongorongo ni kabongnga ma tinau ae te tia Kakoaua ae ingainga nanona. I tangiriia aomata, ngaia are ngke e bane au reirei n 1985, I a moana naba au bwaiania.

Jack: Ngke I uarereke, I memena i buakoia naake a kabwanina aia tai aika tangira te mwakuri ni minita. Ni katoaa motirawan te reirei, I beku bwa te bwaiania ae aki katoatai. N tabetai, ti bwati ni kawariia bwaiania ake tabeman n aia aono n te wikeen. Ti uarongorongo ni kabongnga ao imwina ti nakon te bike. A rangi ni kaunga taai akanne!

Tabeua te tai imwini mareu ma Marie-Line n 1988, I iango ni kangai, ‘Bon akea tabetabera, ngaia are ti riai ni kabatiaa riki uataboan te mwakuri ni minita.’ I a raona Marie-Line ni bwaiania. Teuana te ririki imwina imwini kaean te kuura ni bwaiania, ti a mwiokoaki bwa bwaiania aika okoro. A reke mwiokoara aika kakaokoro aika kaunga i Guadeloupe, imwaini kaoakira bwa ti na mwaing nako French Guiana.

A bibitaki mwiokoami i nanon ririki aika bati. Ma tera ae buokingkami ni kaangaraoi aromi nakoni bitaki? 

Marie-Line: A ataia taari n te Betaera i French Guiana bwa ti tatangira te kibu ae Itaia 6:⁠8. Ngaia are ngkana a weteira, a aki toki ni manikangare ni kangai, “Tera ngkoa ami kibu are kam tatangiria?” Ti a ataia ngkanne ae e nang bitaki mwiokoara, ma ti boni kangai naba, “Aikai ngaira! Kanakoira!”

Ti rarawa ni kabotaui mwiokoara ake mai mwaina ma ae boou, bwa a kaawa n aki rau nanora iai. Ti biririmoa naba n ikikina ma taari.

 Jack: N taai aika nako ao taari ake a iangoia bwa a buokira, a kataia ni kabwarai nanora bwa ti na aki mwaing, bwa a tangiria bwa ti na tiku i rarikia. Ma ngke ti a kitana Guadeloupe, e kauringira te tari te mwaane temanna ana taeka Iesu ni Mataio 13:38: “Te tawaana boni botannaomatan te aonnaba.” Ngaia are ngkana a bitaki mwiokoara, ti kakauringira ae ti boni beku naba n te tawaana anne n aki ongeia bwa ia. Ni koauana, e kakawaki riki te aono are ti na kuneia iai aomata!

Ngkana ti roko n ara aono ae boou, ti noria bwa a boni kukurei naba kaaina. Ngaia are ti kataia ni maiu n aroia kaain te aba. Tao e a kaokoro te amwarake, ma ti boni kang kanaia ao ni moi n nimaia, ao ti tarataraa raoi naba marurungira. Ti kekeiaki n tataekini baika kakukurei ni mwiokoara ni kabane.

Marie-Line: A bati naba reireiara mairouia taari ake kaain te aba. I uringa moan rokora i French Guiana. E korakora te karau, ngaia are ti iangoia bwa ti na kakatoka te karau ao ti a nako naba n uarongorongo. Ma e titirakinai te tari te aine temanna ni kangai, “Ti a nako?” I kubanako ao I taku, “Ti na kangaa n nako?” E kaeka ni kangai, “Anaa am kiaba ao ti a bwatika nako naba.” I a rabakau ngkai ni bwatika ma te kiaba. Ngke arona bwa I kabi, I bon aki kona n uarongorongo ngkana e kakarau!

Kam a tia ni mwaing 15 te tai. Iai ami taeka n ibuobuoki nakoia taari ake a kani mwaing naba?

Marie-Line: E kona ni kangaanga te mwaing. Ma e kakawaki karekean te tabo ae rau ae ko kona ni motirawa iai imwin am uarongorongo.

Jack: I aki toki ni beenia ara auti. N tabetai, a ataia taari n te aobiti n tararua ae ti na aki tiku ni maan, ngaia are a taku, “Jack, tai tabe ngkai ma beeniakin te auti!”

E rangi n rabakau Marie-Line ni botii ara bwai! E karini bwaai nako n taiani bwaoki ao e korei ni kanikinaei, “te roki,” “te ruu,” “te umwanikuuka,” ao tabeua riki. Ngaia are ngkana ti roko n ara auti ae boou, ti a kona ni katikui bwaoki aikai ni nneia. E korei naba kanoani bwaoki nako, ngaia are ti kona ni waekoa ni kunei baike ti kainnanoi.

Marie-Line: Ibukina bwa ti a rabakau ni  bairei raoi bwaai, ti a kona ni waekoa ni moana ara uarongorongo.

Kam kangaa ni bairea ami tai bwa kam aonga ni “kakororaoa raoi [ami] mwakuri ni minita”?​—2Tim. 4:5.

Marie-Line: Ti motirawa ni katoa Moanibong ao ti katauraoi ibukini bobotaki. Ti uarongorongo n te Kauabong ao boong ake imwina.

Jack: E ngae ngke iai te aoa ae ti na kakoroa, ma ti aki kaatuua ara iango n anne. E kakawaki riki iroura te mwakuri ni minita. Man te tai are ti kitana iai ara auti ni karokoa okira, ti kataia ni maroro ma aomata nako ake ti kaitiboo ma ngaiia.

Marie-Line: N te katoto, ngkana ti nako ni bikiniki, I aki toki n uotii taian turaeki. A kakawarira tabeman ao a bubutii booki, e ngae ngke ti tuai n tuangia ae Ana Tia Kakoaua Iehova ngaira. Anne bukina ae ti taratara raoi ni kaineti ma arora ni kunnikainira, ao aroarora. A tatarai baikanne aomata.

Jack: Ti uarongorongo naba man arora aika raraoi nakoia kaain rarikira. I ririkoi maange, I kanakoi kanoan turam ni maange, ao I kaitiaki n te onnaroka i rarikin ara auti. A nonora anne kaain rarikira ao n tabetai a taku, “Ko aki kani karekea au Baibara?”

N angiin te tai kam uarongorongo n aono aika tionako. Iai te bwai ae kam uringnga ae kakawaki ni mwanangami akanne?

Jack: E kangaanga kawaran aono tabeua i Guiana. Ti mwamwananga tao 370 te maire (600 te kiromita) i nanon te wiki ni kawai aika bubuaka. Ti rangi n ururinga kawaran te kaawa ae St. Élie ni buakonikain te Amazon. Ti kabanei aoa aika bati ibukini kaeana i aon te kaa ni kawai aika aobuaka, ao te booti. Angia kaain te tabo anne bon taani keni koora. A rangi ni kakaitau tabeman ibukin ara boki, ao a anganira mwakoro ni koora aika uarereke bwa aia bwaintangira! N te tairiki, ti kaota te taamnei teuana ae katauraoaki man ara botaki. A bati aika roko ni mataku.

Marie-Line: N taai aika nako, e a butiiaki Jack bwa e na anga te kabwarabwara ibukin te Kauring n te kaawa ae Camopi. Ti mwananga i nanon aoa aika bati n te booti rinanon te Karaanga ae Oyapock. E rangi ni kaunga mwanangara anne.

Jack: N te tabo are e ora iai te karaanga, e kona ni karuanikai te aira. E rangi ni kan taraakin te aira ngkana ko nang roko iai. E riai te tia kabuta te booti n ataa te bwai ae e na karaoia ngkana e roko iai. Ma bon te mwananga ae kaunga. E ngae ngke tii 6 taani Kakoaua ikanne, ma e nakon 50 mwaitiia aika roko n te Kauring n ikotaki ma ake boni kaain te aba!

Marie-Line: A kona n namakina te kimwareirei aei rooro n rikirake ake a kani kabatiaa riki aia tai ibukin Iehova. Ko riai n onimakina Iehova ngkana ko rinanon aekaki aikai, ao e boni kakorakoraaki iai am onimaki. N angiin te tai, ti bon nora ana ibuobuoki Iehova.

Kam reiakin taetae aika kakaokoro. E bebete karaoan anne?

Jack: E bon aki. I reiakin taetae aikai ibukin te uarongorongo ao buokaia taari. I a kaira naba te reirei n te Taua-n-Tantani n te taetae ae Sranantongo * imwain ae I karaoa te wareware n te Baibara iai! I titirakina te tari te mwaane temanna bwa a ota ke a aki. E kaeka ni kangai, “N tabetai, ti a aki ota n am taeka tabeua, ma e rangi n nakoraoi.” A rangi n ibuobuoki ataei. Ngkana iai bureu, a a bon tuangai naba, ma tiaki anne aroia ikawai. A bati baika I reiakin mairouia ataei.

Marie-Line: N te aono teuana, I kairi reirei n te Baibara n te taetae ni Buranti, ni Botukare, ao Sranantongo. E kaungaai te tari te aine temanna bwa N na kaira moa te reirei n te taetae are kangaanga riki irou, ao te kabanea te taetae are I taneiai iai. I waekoa n ataa kakawakin te taeka n reirei anne.

N te bong teuana, I kaira moa te reirei n te Baibara n te taetae ae Sranantongo ao te kauoua n te taetae ni Botukare. Ngke I a moana  au reirei are te kauoua, e taku te tari te aine are toau, “Marie-Line, taraan ae iai te kangaanga!” I a ataia ae I a kamanena te taetae ae Sranantongo nakon te aine ae kamanena te taetae ni Botukare!

Kam rangi n tangiraki irouia taari ake kam beku ibukia. Kam kangaa ni karekea ami iraorao ae kaan ma taari?

Jack: E kangai Taeka N Rabakau 11:25: “E na toronibwai te aomata ae tituaraoi.” Ti aki tabwara n anga ara ibuobuoki nakoia tabemwaang. A taku tabeman nakoiu ibukin onobwaian te Tabo n Taromauri: “Katikua bwa a na karaoia taan uarongorongo.” Ma I taku: “Bon te tia uarongorongo naba ngai. Ngaia are ngkana iai te mwakuri ae e na karaoaki, N na ibuobuoki naba.” E ngae ngke ti bane ni kainnanoa te tai ae ti na tiku iai i bon iroura, ma ti kakauringira ae ti na aki kariaia anne bwa e na tukira mani buokaia tabemwaang.

Marie-Line: Ti kakorakoraira ni kaotiota tabeakinaia taari. N te aro anne, ti a ataa te tai are a kainnanoa iai tararuaaia natiia ke anaakia man te reirei, ao ti kona ni kaangaraoi ara babaire bwa ti na ibuobuoki. Ibukin anne, ti a karekea ara iraorao ae kaan ma taari ao ti tauraoi ni buokiia ngkana a kainnanoa buokaia.

Baikara kakabwaiaami man ami beku n te tabo are kainnanoaki riki iai te ibuobuoki?

Jack: A bati kakabwaiaara ngkai ti kabwanina ara tai. E bati ara tai ni matakuakin ana karikibwai aika kakaokoro Iehova ao ti kukurei iai. E ngae ngke iai kangaanga, ma a rau nanora ibukina bwa ti ataia ae ti boutokaaki irouia ana aomata te Atua, n aki ongeia bwa ti mena ia.

Ngke I kairake, I karabuutinaki i French Guiana ibukin teiu i nuka. I aki kakoauaa ae N na manga okira ikanne bwa te mitinare, ao I kariaiakaki naba ni kawari karabuuti n uarongorongo iai. E bon tituaraoi Iehova n ana kakabwaia!

Marie-Line: Te bwai ae karekea riki kukureiu, bon arou n anga au ibuobuoki nakoia tabemwaang. Ti kukurei ni beku ibukin Iehova. Ti a kaaniaki riki iai ngkai taanga ngaira. N tabetai ao e tuangai Jack bwa ti na kaoa te taanga teuana ae a kainnanoa kaungaakia bwa ti na amwarake ma ngaiia. N angiin te tai, I kaeka ni kangai, “I bon iangoa naba anne!” Taraan ae titeboo baika ti iaiangoi.

Jack: N taai aika nako, I a tuangaki bwa e a reke irou te kaentia. E ngae ngke e aki kan ongo anne Marie-Line, ma I taku nakoina: “Taraia buu, ngkana I mate ningabong e ngae ngke I tuai ni kara, ma ‘I rauaki ni maiuu’ ibukina bwa I beku ibukin Iehova ao I karaoi baika bati aika manena.”​—KBwaai 25:8.

Marie-Line: E a tia Iehova n anganira mwioko aika ti aki kantaningai ao e kariaia bwa ti na karaoi baika riaon ara iango. A rangi ni bati baika raraoi aika ti karaoi i nanoni maiura. Ti onimakina raoi te Atua, ao n aki ongeia bwa e kanakoira nakea ana botaki, ti na bon nako!