Jack ha Marie-Line oservi Jehovápe de tiémpo kompléto 1988 guive. Chupekuéra ojekuaa pyaʼeterei ojadapta haguére umi asignasión pyahúpe. Haʼekuéra ningo oaseptáma heta asignasión pe lugár héravape Guadalupe ha avei Guayana Francésape. Koʼã mokõive lugár rehe koʼág̃a oñenkarga pe sukursál de Francia. Ñañemongetamína Jack ha Marie-Line ndive ha ñaporandu chupekuéra unas kuánta kósa.

¿Mbaʼépa penemomýi raʼe peñepyrũ hag̃ua peservi Jehovápe de tiémpo kompléto?

Marie-Line: Che akakuaa vaʼekue Guadalúpepe, ha pyʼỹinte asẽ vaʼekue un diaite predikasiónpe che sýndi. Haʼe ningo ikyreʼỹeterei vaʼekue Jehová servísiope. Che ahayhueterei la héntepe, upévare atermináre che koléhio 1985-pe añepyrũma ajapo che prekursorádo.

Jack: Chemitãrõ guare, siémpre aĩ vaʼekue umi oservívandi de tiémpo kompléto ha omombaʼetereívandi pe predikasión. Che ajepokuaa vaʼekue ajapo che prekursorádo auxiliár koléhiogui chevakasión aja. Fin de semanakue katu roho jepi kolektívope umi prekursorkuéra rendápe, ha ropredika tódo el día hendivekuéra. Upéi, ropredikapa rire, roho plájape rojediverti hag̃ua. ¡Hetaiterei rovyʼa vaʼekue upe tiémpope!

Marie-Line ha che romenda vaʼekue 1988-pe, ha upe riremínte apensa ha haʼe chejupe: “¿Mbaʼére piko noroñehaʼãi rojapo hetave mbaʼe predikasiónpe? Ndaipóri ningo mbaʼeve orejokóva”. Upévare roñepyrũ rojapo ore prekursorádo. Upéi roñeinvita roho hag̃ua Eskuéla de Prekursórpe, ha un áño haguépe roñenombra prekursór espesiál. Roreko vaʼekue diferénte asignasión orembovyʼaitereíva Guadalúpepe, ha upe rire roñeinvita roho hag̃ua roservi Guayana Francésape.

Peẽ ningo pereko jepéma diferénte asignasión umi áño ohasa vaʼekuépe, ¿mbaʼépa penepytyvõ raʼe ikatu hag̃uáicha pejadapta káda asignasiónpe?

Marie-Line: Umi ermáno oĩva Betel de Guayana Francésape oikuaa vaʼekue Isaías 6:8 haʼeha ore téxto favoríto. Upévare, orerenói jave hikuái, oñepyrũ jepi heʼi oréve ñembojaruhápe: “¿Penemanduʼápa pende téxto favorítore?”. Upépe ore ropilláma rorekotaha peteĩ asignasión pyahu. Upévare roʼe chupekuéra: “¡Ápe ningo roĩ! ¡Oremondóna oréve!”.

 Ore roñehaʼã ani hag̃ua rokompara peteĩ asignasión umi ótro roreko vaʼekuére, pórke upéicha ikatúta rodisfruta porãve pe asignasión rorekóva upe moméntope. Avei ore voi roñehaʼã rojeheʼa umi ermáno ha ermanakuérare umi lugár rohohápe, ha péicha roñeamiga hesekuéra.

Jack: Oĩ vaʼekue heta ore amígo ndoipotáiva rova. Haʼekuéra ningo iñintensión porã ha oipota ag̃uínte ropyta chuguikuéra. Péro rohórõ guare Guadalúpegui, peteĩ ermáno oremomanduʼa umi mbaʼe Jesús heʼi vaʼekuére Mateo 13:38-pe: “Pe kokue katu ko múndo”. Upévare, oñekambia jave ore asignasión, roñehaʼã oremanduʼa roĩha el mísmo kokuépe, tahaʼe haʼéva pe lugár rohoha. Amo ipahápe ningo la iñimportantevéva hína umi hénte oĩva pe territóriope.

Rog̃uahẽvo peteĩ território pyahúpe, rohecha mbaʼéichapa ovyʼa umi hénte oikóva upépe. Upévare, roñepyrũ roiko haʼekuéraicha. Umi mbaʼe hoʼúva hikuái ikatu idiferénte, péro ore lomímonte rojeservi umíva. Roñatendénte siémpre ipotĩ hag̃ua pono orembohasy. Siémpre roñehaʼã roñeʼẽ porã káda uno umi asignasión roreko vaʼekuére.

Marie-Line: Heta mbaʼe avei roaprende umi ermáno ha ermána oikóvagui umi lugárpe. Chemanduʼa por ehémplo mbaʼépa oiko vaʼekue rog̃uahẽrõ guare Guayana Francésape. Peteĩ díape tuichaiterei oky, ha upévare ropensa iporãvetaha rohaʼarõnteramo opi raẽ roho hag̃ua ropredika. Péro upéi peteĩ ermána oporandu chéve: “¿Jahátama piko japredika?”. Upéva chesorprende ha haʼe chupe: “¿Mbaʼéichaiko péicha jave ñasẽta?”. Pe ermána heʼi chéve: “Ejagarra la ne sombrílla, ha jaha visikléta ári”. Upéicha aaprende peteĩ fórma pyahu aiko hag̃ua visikléta ári: Un ládo che pópe ajoko che sombrílla, ha ótro ládo katu amaneha la che visikléta. Naaprendéirire upéva, ndaikatumoʼãi kuri upéi asẽ apredika okyha tiémpope.

Peẽ ningo peváma 15 véserupi, ¿mbaʼe konséhopa pemeʼẽkuaa ikatúva oipytyvõ ojeváta jave?

Marie-Line: Ijetuʼu sapyʼánte la java hag̃ua. Péro reju rire predikasióngui iñimportánte reguereko peteĩ lugár ikatuhápe reñeñandu nde rogapeguáicha.

Jack: Rova jave che ajepokuaa jepi apinta pe óga ryepy. Péro umi ermáno oĩva Betélpe oikuaáramo ndoropytaaremoʼãiha peteĩ lugárpe, sapyʼánte heʼi chéve: “Jack, ko vuéltape anínte repinta ko óga”.

Marie-Line ivaleterei oprepara ha okarga hag̃ua la ore kosakuéra. Haʼe omoĩ diferénte káhape ha ombohéra umíva, por ehémplo “dormitório”, “kosina”, “váño”, ha umícha. Upévare rog̃uahẽvo la ore róga pyahúpe, ifasilvéma oréve romohendapa hag̃ua la ore kosakuéra. Haʼe ojapo peteĩ lísta omoĩháme  mbaʼe mbaʼépa oĩ káda káhape, ha upéicha ikatu pyaʼeve rotopa oimeraẽ mbaʼe roikotevẽva.

Marie-Line: Ore roaprende roorganisa porã hag̃ua umi mbaʼe rorekóva, ha upévare pyaʼe voi ikatu jeýma roñepyrũ ropredika.

¿Mbaʼéichapa pemohenda pene tiémpo ikatu hag̃uáicha ‘pejapo porã pene rembiapo’? (2 Tim. 4:5).

Marie-Line: Lunekue ropytuʼu ha rojeprepara rreunionrã, ha martes guive roñepyrũma ropredika, rojapo rrevisíta ha estúdio.

Jack: Roikuaáramo jepe káda mes rokumpli vaʼerãha la ore óra, ore noroñekonsentrái upévare. Oréve g̃uarã iñimportanteve pe predikasión. Rosẽ guive ore rógagui roju jey peve, roñehaʼã ropredika enterove rotopávape.

Marie-Line: Por ehémplo, rosẽ jave de paséo siémpre araha unos kuánto tratádo che kartérape. Sapyʼánte umi hénte oñemboja orerehe ha ojerure oréve puvlikasión, jepe ndoroʼéiti chupekuéra ore haʼeha testígo de Jehová. Upévare siémpre roñatende mbaʼéichapa roñemonde ha roñekomporta. Umi hénte ningo ohechapaite hína umi mbaʼe.

Jack: Ore avei ropredika ore vesinokuérape orekalidávo hendivekuéra. Por ehémplo, ahupi umi kuatia oĩva yvýpe ha amombo vasurérope, ha avei siémpre amopotĩ che korapy. Ore vesinokuéra ohecha upéva ha sapyʼánte oporandu oréve: “¿Sapyʼa rei piko ndereguerekói peteĩ Biblia chembaʼerã?”.

Peẽ ningo pyʼỹinte peviaha jepi mombyry pepredika hag̃ua, ¿penemanduʼápa oiko hague álgo espesiál peteĩva umi viáhepe?

Jack: Guayana Francésape oĩ heta lugár ijetuʼúva ñag̃uahẽ hag̃ua. Pyʼỹinte roviaha vaʼerã umi tape ivaívare 600 kilómetro una semána pukukue. Chemanduʼa porãiterei por ehémplo roviahárõ guare peteĩ lugár héravape Saint-Élie, opytáva pe Amazónaspe. Rog̃uahẽ hag̃ua upépe roviaha peteĩ kamionéta 4x4-pe ha avei kanóape. La majoría umi hénte oikóva upépe ombaʼapo umi mína de órope. Omombaʼetereígui umi puvlikasión rohejáva chupekuéra, oĩ algúno omeʼẽ vaʼekue oréve kontrivusiónramo óro pedasoʼi. Kaʼarupytũvo rohechauka umi héntepe peteĩ vidéo ojapo vaʼekue ñane organisasión, ha heta hénte upepegua oho ohecha hag̃ua.

Marie-Line: Ndaʼaréi ojejerure kuri Jáckpe ojapo hag̃ua pe diskúrso de Konmemorasión peteĩ lugár héravape Camopi. Rog̃uahẽ hag̃ua upépe, roviaha 4 óra aja peteĩ kanóape pe rrío Oyapock rehe. ¡Igustoiterei kuri upe viáhe!

Jack: Pe rrío ningo ipererĩramo jepe ipeligrosoiterei, pórke oĩ umi párte oĩháme ita ha hatãiterei osyryhápe pe y. Legálmente neimpresionaiterei rehecha jave la ne kanóa ohoha hína upe gotyo ládo. Pe kanoéro ivakeáno vaʼerã ikatu hag̃uáicha ojehasa porã umírupi. Péro igustoiterei kuri upe viáhe. Oĩramo jepe 6 Testígonte upe Konmemorasiónpe, oiméne 50 persónarupi voi roĩ kuri upérõ. Umíva apytépe unos kuánto indíhena.

Marie-Line: Umi imitãva ojaposevéva Jehová servísiope ikatu avei ohasa umichagua experiénsia iporãitereíva. Umichagua situasiónpe rekonfia vaʼerã Jehováre, ha péicha imbareteve la nde jerovia. Ore ningo heta vése rohecha mbaʼéichapa Jehová orepytyvõ.

Peẽ ningo peñeʼẽkuaa heta idióma, ¿ifásil piko peẽme peaprende umi idióma?

Jack: Nahaniriete katu. Aaprende kuri umi idióma ikatu hag̃uáicha apredika ha aipytyvõ umi kongregasiónpe. Por ehémplo, peteĩ vuéltape amoakã vaʼerã kuri pe Ñemañaha Ñehesaʼỹijo peteĩ idióma héravape sranangtongo, * péro che neʼĩra vaʼekue ajapo pe lektúra de la Biblia upe idiómape. Atermina rire, aporandu peteĩ ermánope mbaʼetekópa osẽ chéve raʼe, ha haʼe heʼi chéve: “Sapyʼánte norontendéi la eréva, péro igustoiterei kuri”. Umi mitã tuichaiterei chepytyvõ vaʼekue. Haʼe vai jave algúna kósa, ha umi kakuaa ndeʼíriramo chéve mbaʼeve, umi mitã katuete chekorrehi. Che ningo heta mbaʼe aaprende vaʼekue umi mitãgui.

Marie-Line: Peteĩ sónape, areko vaʼekue heta estudiánte oñeʼẽva francés, ótro portugués ha ótro sranangtongo. Peteĩ ermána heʼi chéve añepyrũ hag̃ua astudia pe persóna oñeʼẽvandi pe idióma ijetuʼuvéva chéve, ha aheja hag̃ua últimope pe añeʼẽ porãvéva. Pyaʼe voi antende upe konsého ideprovechotaha chéve.

 Peteĩ díape astudia vaʼerã kuri mokõi persónandi, pe primera oñeʼẽ sranangtongo ha pe ótra oñeʼẽ portugués. Añepyrũrõ guare pe segundo estúdio, pe ermána chemoirũva heʼi chéve: “Marie-Line, haʼe nontendéi hína la nde eréva”. Upépe apilla añeʼẽha hína sranangtóngope peteĩ brasilérape, añeʼẽ rangue chupe portuguéspe.

Umi ermáno ha ermána oĩva umi lugár peẽ peservi haguépe ningo penderayhueterei, ¿mbaʼépa pejapo raʼe pereko hag̃ua chupekuéra pene amigoitéramo?

Jack: Proverbios 11:25 heʼi: “Pe persóna ipojerávape katuete oñevendesíta”. Oréve igustoiterei rohasa tiémpo ermanokuérandi, ha rojapo heta mbaʼe hesehapekuéra. Rojapo jave mantenimiénto ore Salónpe, oĩ vaʼekue ermáno heʼíva chéve: “Ehejána umi puvlikadór tojapo upéva”. Péro che haʼe chupekuéra: “Che ningo peteĩ puvlikadór avei. Oĩramo algún traváho tekotevẽva ojejapo, che ajapose avei”. Jaikuaa ningo enterove ñaikotevẽha tiémpo ñaime hag̃ua ñaneaño, péro roñehaʼã ani hag̃ua upéva orejoko rojapo hag̃ua iporãva ótro rehehápe.

Marie-Line: Roñehaʼãmbaite rohechauka roñeinteresaha umi ermanokuérare. Péicha pyaʼeve ropilla oikotevẽpa hína hikuái álgien oñatende ifamiliakuérare, térã ogueru chupekuéra eskuélagui. Umícha jave rokambiánte umi mbaʼe rojapose vaʼekue ikatu hag̃uáicha roipytyvõ chupekuéra. Upéicha rupi, roiko iñamigoitéramo ha ikatúma roipytyvõ chupekuéra oikotevẽ jave hikuái.

¿Mbaʼe iporãvapa pehupyty peservi haguére umi lugár ifaltavehápe puvlikadór?

Jack: Rohupytýma ningo hetaiterei vendisión roservi haguére Jehovápe de tiémpo kompléto. Por ehémplo, pyʼỹinte roime jepi ag̃uiete pe naturalésagui, ha péicha rodisfruta umi mbaʼe Jehová ojapo vaʼekue. Sapyʼánte rohasáramo jepe umi mbaʼe ijetuʼúva, ore ndorojepyʼapýi roikuaágui ore ermanokuéra siémpre oĩha orepytyvõ hag̃uáicha, tahaʼe haʼéva pe lugár roĩha.

Chemitãrõ guare, aha vaʼekue kárselpe Guayana Francésape ndajaposéi haguére servísio militár. Núnka naimoʼãiva peteĩ díape aha jeytaha upépe peteĩ misionéroicha, ha oñemeʼẽtaha chéve permíso apredika hag̃ua umi kárselpe. Añetehápe ningo Jehová ipojeraiterei orendive, ha upévare tuichaháicha orevendesi.

Marie-Line: Che ningo aipytyvõseterei che rapichápe, ha upéva hína la chembovyʼavéva. Ore rovyʼaiterei ikatu haguére roservi Jehovápe, ha upéva orepytyvõ avei oreunidove hag̃ua ore matrimóniope. Sapyʼánte Jack heʼi chéve oinvitaseha okaru hag̃ua orendive peteĩ matrimónio oñedesanimávape. Ha pyʼỹinte haʼe chupe: “¡Che ningo hústo apensa hína kuri avei upéva!”. Heta vésema oiko upéva orerehe.

Jack: Ojapo unos kuánto áño ojepilla hague arekoha kánser de próstata. Ndogustáiramo jepe Marie-Línepe amombeʼu koʼẽrõitéma ikatuha amano, che haʼe chupe: “Che amór, che ningo ndachetujái gueteri. Péro oiméramo amanótama koʼẽrõite, aikuaa aipuru porã hague che rekove ajapóvo upe añetehápe ovaléva la péna, aservi Jehovápe, ha upéva chembovyʼaiterei” (Gén. 25:8).

Marie-Line: Jehová ningo omeʼẽ oréve umi asignasión norohaʼarõiete vaʼekue, ha opermiti oréve rojapo umi mbaʼe ni noroimoʼãi vaʼekue. Añetehápe rohasa heta mbaʼe iporãitereíva ore rekovépe. Ore roime roho hag̃uáicha oimeraẽ lugár Jehová organisasión ojerurehápe oréve, pórke rojerovia Jehová siémpre oĩtaha orendive.