Kä 1988 yete ja käne Jack aune Marie-Line tä sribire gwairebe köbö täte Ngöbö kräke. Niaratre tä juto nünankäre kä jene jene känti aune sribi keta kabre nuainbarera kwetre juta Guadalupe aune Guayana Francesa yete, sukursal Francia tä kä ye tuinbiti. Ani kukwe ruäre ngwentari ietre.

¿Ñobätä munkwe ja töi mikani sribire köbö täte Ngöbö kräke?

Marie-Line: Ti ririaba Guadalupe, käre ti nämä kukwe driere ti meye ben, niara nämä kukwe driere kä jutobiti. Nitre mada tare tikwe yebätä kä 1985 yete ti gediankaba kwelate ngwane tikwe ja mikaba prekursora.

Jack: Ti nämä bati ngwane, ja mräkätre nämä kukwe drie tarere aune sribikä köbö täte Ngöbö kräke yebe käre ti nämä ja kete. Ti nämä ngedenkä vacación kwelate ngwane käre ti nämä prekursor ausiliar nuainne. Bämän krüte ruäre te nun nämä niken bute kukwe driekäre dekä nemen dere ja mräkätre prekursor ben. Mrä dere nun nämä niken mren bäre ye nämä kä mike juto tibätä.

Kä 1988 yete ti ja mäkäteba Marie-Line ben. Ye bitikäre, nun raba kukwe driere bäri aune kukwe ñaka nun jiete sribi ye nuainkäre yebätä tikwe töbikaba. Aisete tikwe sribi köbö täte ye kömikaba Marie-Line erere. Kä rikaba kwati ta ngwane nun janama Kwela Nitre Prekursor kräke yete, ye bitikäre nun nübaiba sribi prekursor especial nuainne. Nunkwe sribi prekursor especial ye nuainba kä keta kabre känti Guadalupe, ye bitikäre nun juanba Guayana Francesa.

Sribi keta kabre mikanina mun kisete. ¿Dre käkwe mun dimikanina sribi jökrä ye nuainkäre?

Marie-Line: Texto Isaías 6:8 ye ütiäte krubäte nun kräke ye nämä gare ja mräkätre sribikä Betelte Guayana Francesa yete yei. Aisete nämä ñäke kökräte nuen ngwane nämä niere jadarekä nuen: “Texto meden ütiäte mun kräke ye törö muen ya”. Nun kwitai sribi mada nuainne ye nämäna nemen gare nuen. Nun nämä niere: “¡Nunta nete! ¡Nun juen!”.

Sribi nuainbare nunkwe ye nun ñaka töta nemen ketai sribi madabätä ñobätä ñan aune nunkwe  ye erere nuaindre ngwane sribita mrä nun kisete ye käi ñan raba nemen juto nunbätä. Ne madakäre nunta nemen kä madakänti ngwane nunta ja töi mike ja mräkätre mike gare jai.

Jack: Ja ketamuko nunkwe ye ruäre töi nämä kwin nun kräke yebätä ñan törbaba nun tuai näin mentokwäre ne kwe käre nun tätre ken. Akwa nun kämikakaba Guadalupe ngwane, Jesús kukwe niebare tä tikani Mateo 13:38 ye ja mräkä iti käkwe ñäkäbabätä nuen, yete nieta: “Kä temen ne abko tire kwrere”. Aisete, sribi mada mikata nun kisete ngwane nunta sribire tire arabe te ye nunta ngwen törö jai. Metrere nitre ie nunta kukwe driere ye bäri ütiäte nun kräke.

Nunta nemen kä madakänti ngwane, nitre nünanka kä yekänti yebätä kätä juto tä tuin nuen, aisete nunta ja töi mike nüne niaratre erere. Mrö jene kwetata kwetre akwa niaratre tä dre kwete erere nunta kwete aune dre ñata kwetre erere nunta ñain, akwa nunta ja ngübarebiti ne kwe nun ñan rabadre bren. Nunta ja di ngwen blite kwin sribi jene jene nuainbarera nunkwe yebätä.

Marie-Line: Ja mräkätre nünanka kä yekänti yebätä nunta ja kite. Krire nun rükaba Guayana Francesa ngwane dre rababa bare ye tä törö tie. Ñü nämä näkäin jobe tibien aisete nunkwe ñü mikadre niken ta biti nun rikadre kukwe driere tikwe nütüba. Akwa ja eteba iti käkwe “brän” nieba tie. “¿Akwa ni näin ño?”, tikwe nieba ie. Tikwe paragua diandre kisete biti nun rikadre bicicletabiti nieba kwe tie. Ye köböire nän rababa gare bicicletabiti tie paragua ben kisete. Tikwe ñaka nuaindre akräke kä ñüre näire tikwe ñaka kukwe driedre jire.

Munkwe ja kwitanina kä jene jene känti bä jätä biti bärike jire. ¿Mun raba dre niere kukwe yebätä nuen?

Marie-Line: Ja kwitadre ju madate ye ñaka nuäre. Akwa ütiäte krubäte kukwe drie ye bitikäre ja rabadre ruinta ja gwirete nie ye kwin krubäte.

Jack: Käre nunta ja kwite ju madate ngwane, tita kä gwita ye jüke. Nun ñan täi kä kabre te sribire kä keteiti känti nämä gare ja mräkätre sukursal ie ngwane nämä niere tie: “Jack, mäkwe ñaka kä gwita ye jüka”.

Tribe mikadre ño ngwäte ye gare kwin Marie-Line ie. Tä jondron jökrä mike kajate aune dreta mikani te erere tä tike kaja yebätä, ñodre “jondron jübara”, “ja dükara” aune “jondron cocinante”. Ye köböire nunta nemen ju madate ngwane kaja jene  jene ye mikadre medente ye tärä nemen gare nuen. Jondron mikata ngwäte ye kwandre jötrö nuen yekäre niarata tike jökrä täräbätä.

Marie-Line: Nunkwe jondron ükadrete ño niena gare nuen, aisete nunta nemen kä madakänti ngwane bengwairebe nunta sribi Ngöbökwe ye kömiketa.

¿Munta kä ükete ño jai ne kwe ora ribeta nuäi ye erere mun rabadre kukwe driere? (2 Tim. 4:5).

Marie-Line: Lunente nunta nemen gwi aune nunta ja ükete gätä kräke. Köbö mada yete nunta niken kukwe driere.

Jack: Ebökänä ora ribeta nuen akwa nun ñan tä ja töi mike yebätä. Ñakare aune kukwe driedre ye bäri ütiäte nun kräke. Nunta niken jibiti nükebe nunta nüketa gwi ngwane nunta ja di ngwen blite nitre jökrä ben.

Marie-Line: Ñodre nunta niken mröre mentokwäre ngwane käre tita niken täräkwata kia ngwena jai. Nun testiko Jehovakwe nun ñan niere, akwa nitre tä kite täräkwata kärere nunye. Ye medenbätä nunta ja ngwäkite ño aune ja ngwen ño yebätä nunta ja ngübarebiti. Ñobätä ñan aune ye jökrä nitre tä mike ñärärä.

Jack: Arato nunta ja ngwen kwin nitre nünanka nun bäre ben yebiti nunta kukwe kwin bämike. Jondron kwata kitani tibien ye käre tita ükökrö, tita kitekä aune jardín pueblote ye tita ükete kwin. Ye tuin nitre ie, aisete ruäre ngwane tätre niere tie: “¿Biblia tärä mäkwe? ¿Mä raba ngwen kwati tie?”.

Käre munta niken kukwe driere mobe mentokwäre. ¿Ye meden törö bäri muen?

Jack: Guayana Francesa yete ñan nuäre rabakäre kä ruäre känti. Bä kabre nunkwe nänba bämän krati karote 600 kilómetro ji kämekämebiti. Bati nun janama Amazonia kä Staint Élie yete ye tä törö tie. Rabakäre yete nun rikaba ora kabre te karo nänkrä kä kämekäme te ta yete, ye bitikäre nun rikaba botete. Nitre nünanka kä yekänti ye tätre sribire oro känänbätä. Nunkwe täräkwata bianba ietre ye käi rababa juto krubäte bätätre aisete ruäre törbaba ütiä biain nuen medenbätä oro kiakia bianba kwetre nuen ütiäre. Ka rikaba drüne ngwane nunkwe video mikaba tuare, nitre janama kwati mrusaire.

Marie-Line: Bati, Jack nübaiba Camopi kukwe kädriere conmemoracionbätä. Rabakäre kä yekänti nunkwe nänba ora kräbokä botete ñö Oyapock ngrabare.

Jack: Ñö nginimo aune nente dite ye raba ni nuainne tare. Ni bote ngwanka yei bote ngwandre medente ta ye tädre gare kwin. Nita kite mate ken ngwane ye jürä ngwan bä jabätä. Akwa nun rikaba kä yekänti ye käi rababa juto nunbätä. Ni Testiko nämä ni tibe gätäbätä akwa nitre ñan Testiko janama 50 näre ye ngätäite nitre amerindio janama arato.

Marie-Line: Monsotre bati tö sribidi bäri Jehová kräke yekwe kukwe kwin krubäte ne erere raba nemen arato. Kukwe ne kwrere känti metrere tö ngwandre Jehovai aune ye köböire tödeka nikwe tä nemen dite. Jehová tä ni dimike ño ye tä tuin nie.

Blita gare muen kukwe keta kabrebiti. ¿Akräke mun töbätä kukwe ye kräke?

Jack: Ñakare, ti nämä ribere jai yebätä tikwe ja kitaba blite kukwe madabiti. Ñodre, ti mika jämi ñäke Bibliabätä kukwe sranangtongo * yebiti ngwane ti mikaba ja tötika Ni Mikaka Mokre ye jie ngwen. Rükaba gare ya ti ngwantariba ja mräkä iti ie ngwane, nieba kwe tie: “Mä blitani ye ruäre ñan nü gare nuen akwa mäkwe nunie kwin krubäte”. Ti nämä kukwe meden niere blo ye nitre umbre ñan nämä niere tie akwa kiatrebrä nämä niere metre ta tie. Kiatre ti dimikaba ye köböire kukwe rababa gare krubäte tie.

Marie-Line: Kä ruäre känti ti nämä nitre blite kukwe francés, portugués aune sranangtongo yebiti ye tötike Bibliabätä. Kukwe bäri ribi ti kräke yebiti tikwe nitre tötikadre käne aune kukwe bäri nuäre ti kräke yebiti tikwe nitre tötikadre mrä nieba ja eteba itikwe tie. Kukwe bäri ribi ti kräke ye abokän portugués. Ñobätä kukwe ye nieba kwe tie ye ñan rükaba gare tie.

 Bati ti rikaba ni nibu tötike, iti ben tikwe ja tötikadre kukwe sranangtongo yebiti, biti nibukäre yebe tikwe ja tötikadre kukwe portugués yebiti. Ti rababara nibukäre ye tötike ngwane, ja eteba nänkä tibe käkwe nieba tie: “Marie-Line, mä kukwei ñan nibi nüke gare ie”. Ye abokän meri blite kukwe portugués yebiti ben ti nämä blite kukwe sranangtongobiti tikwe gaba. Ye ngwane batibe, ñobätä ja eteba kukwe nieba tie ye rükaba gare tie.

Munkwe sribibare yekänti ja mräkätre tä mun tarere krubäte. ¿Munkwe dre nuainbare ja ketakäre kwin bentre?

Jack: “Ni mantiame yekwe jondron kwin rabai” nieta Proverbios 11:25 yete. Nun ñan tä töbike bati bobu ni mada dimikakäre. Tita ja töi mike Ju Ja Ükarakrö ükete aune bätete siba ngwane ja mräkätre ruäre tä niere tie: “Ja mräkätre kukwe driekä tuenmetre nuainne”. Akwa tita niere ietre: “Ti kukwe driekä arato. Aisete sribi tärä ngwane ti tö nuain siba”. Ebökänä ni jökrä tä kä ribere jai akwa yebiti ta nunta ja töi mike ja mräkätre dimike.

Marie-Line: Nunta ja töi mike ja mräkätre itire itirebätä dimikakäre. Ye köböire ja mräkä meden tä ni ribere monso ngwankäre kwelate aune tuakäreta ye tä nemen gare nuen. Nunta kä ükete jai aune nunta niaratre dimike. Ye köböire nunta nemen ja kete kwin bentre aune nunta juto biare niaratre dimikakäre tä ribere jai ngwane.

¿Ni kukwe driekä ribeta känti munkwe sribibarera ye köböire dre kwin namanina munkwe?

Jack: Nunta sribire köbö täte Ngöbö kräke ye käkwe kä mikanina juto krubäte nunbätä. Jehovakwe jondron keta kabre sribebare ye nunkwe käi ngwanina juto jabätä sribibätä kräke. Kukwe keta kabre tare ben nunkwe ja tuanina akwa käre nun töita jäme, kä meden känti nunta akwa juta Jehovakwe tä nun dimike ye gare kwin nuen.

Ti nämä bati ngwane, ti ñaka ja mikaba nänkä rübätä ye dokwäre ti kitaba ngite Guayana Francesa. Ti rükaita misionero erere kä yekänti aune kä biain tie nänkäre nitre kitani ngite yei kukwe driekäre ye tikwe ñaka nütüba jire. Jehová tä kukwe kwin keta kabre mike nemen bare nun kräke.

Marie-Line: Nunta ni mada dimike ye bäri tä kä mike juto tibätä. Nunta sribire kä jutobiti Jehová kräke. Ye köböire nunta nüne kwin jabe. Ruäre ngwane Jack tä ngwentari tie, ¿ni raba ja mräkä tä di nekä ye nübaire mröre jabe? Ye erere ti täni töbike tita niere ie, ye bä kabre tä nemen bare.

Jack: Bitinkä cáncer de próstata tä tibätä nieba tie. Marie-Line ñan töta nemen ne kukwe nuai, akwa tita niere ie: “Nane ti krütadre ngwane, ñan umbre kisete ti krütadre. Akwa, kätä juto tibätä ñobätä ñan aune ja nire tikwe nebiti tikwe sribibare Jehová kräke ye bäri kwin kukwe jökrä mada kräke” (Gén. 25:8).

Marie-Line: Nun ñaka kukwe ngübare abokän erere Jehovakwe bianina nuen aune nun tuanimetre kwe sribi keta kabre nuainne. Kukwe keta kabre kwin namanina nunkwe. Juta Jehovakwe käkwe nun juain medente ye erere känti nun näin ñobätä ñan aune nunta tö ngwen kwatibe ie.