Jack bona Marie-Line be lagani 1988 amo, ful-taim hesiai gaukara idia karaia hebou. Idia be noho daladia idauidau idia manada dainai Guadeloupe bona French Guiana dekenai asainmen momo idia abia dae. Unai gabu rua be hari France ena brens ofesi henunai idia gaukara. Mani Jack bona Marie-Line ita nanadaia.

Dahaka ese umui ia durua dainai ful-taim hesiai gaukara umui abia dae?

Marie-Line: Lau be Guadeloupe dekenai lau tubu daekau, bona nega momo egu sinana ida ai haroro. Ia be Witnes taihu goadana ta. Taunimanima lau lalokau henidia, unai dainai lagani 1985 ai, egu sikuli lao haorea neganai painia gaukara lau hamatamaia.

Jack: Lau maragi neganai, lau be haroro gaukara idia ura henia bada ful-taim hesiai taudia lau bamoa momo. Sikuli holidei neganai, heduru painia gaukara lau karaia. Wikeni ai, nega haida basi ai abia bona painia taudia ida do ai haroro dina ibounai lalonai. Gabeai kone dekenai ai lao. Unai nega lau moalelaia!

Lagani 1988 ai, Marie-Line ida ai headava bena daudau lasi, sibona lau nanadaia, ‘Ai be maduna lasi, namona be emai hesiai gaukara ai habadaia?’ Marie-Line ida painia gaukara ai karaia. Lagani ta murinai, painia sikuli amo ai ore murinai, ai idia abia hidi spesel painia gaukara ai karaia totona. Guadeloupe ai asainmen namodia momo ai moalelaia, unai murinai ai idia boiria French Guiana dekenai ai lao totona.

Lagani momo idia hanaia lalonai, asainmen idauidau umui abia. Dahaka ese umui ia durua emui noho dalana matamatana umui abia dae totona?

Marie-Line: French Guiana Betele dekenai idia gaukara tadikaka idia diba, emai feivret Baibel siri be Isaia 6:8. Unai dainai ai idia rini henia neganai mai kiri danu do idia gwau, “Emui feivret Baibel siri umui laloatao, a?” Unai negai, ai laloparara asainmen matamata ta do ai abia, unai dainai ai gwau, “Ai inai! Ai Umui Siaia!”

Ai ura lasi emai asainmen matamata be asainmen gunadia ida ai hahegeregerea, badina unai ese ai do ia koua emai asainmen ai moalelaia totona.  Danu, ai hekwarahi emai asainmen matamatana ai tadikaka taihu ai dibaia namonamo totona.

Jack: Guna, tadikaka bona taihu haida be ai idia koua tano ma ta dekenai ai lao lasi totona, badina idia ura idia kahirakahira ai noho. To, Guadeloupe ai rakatania neganai, tadikaka ta ese Iesu ena hereva Mataio 13:38 amo ai ia hagoadaia, ia gwau: “Witi umana be tanobada.” Unai dainai emai asainmen ia idau neganai, ai laloparara, ai be witi umana tamona dekenai ai haroro noho, herevana edeseni ai noho. Momokani, unai teritori ai idia noho taudia ai haroro henia be gau badana!

Teritori matamatana ta ai ginidae neganai, ai itaia unuseniai idia noho taudia haida be edia mauri idia moalelaia. Unai dainai ai ura emai noho mauri danu be unuseniai idia noho taudia bamona. Reana edia aniani be ia idau, to idia ania gaudia ai ania, bona idia inua gaudia ai inua, to emai helt danu ai laloa bada. Emai hereva dalana amo ai hahedinaraia ai abia asainmen ibounai be mai ena namo.

Marie-Line: Danu, unuseniai idia noho tadikaka taihu amo gau momo ai dibaia. Nega ginigunana French Guiana dekenai ai ginidae negana lau laloatao. Medu bada ia diho dainai ai laloa do ai naria medu do ia ore bena do ai lao haroro. To, taihu ta ese lau ia nanadaia, “Ita lao diba, a?” Lau hoa bona lau gwau, “Edena bamona ita lao?” Taihu ia gwau, “Emu damaru oi abia bona iseda basikele amo do ita lao.” Unai negai, damaru lau dogoatao bona nega tamona basikele lau taria dalana lau dibaia. Bema unai lau dibaia lasi, medu negana ai do lau haroro diba lasi!

Umui be nega 15 bamona gabu ma ta amo umui lao gabu ma ta. Ma haida durua totona, dahaka heduru hereva umui henia diba?

Marie-Line: Nega haida ia auka gabu ta amo gabu ma ta oi lao totona. To, haroro gaukara amo oi giroa bona oi laga-ani namonamo gabuna ta ia noho be mai anina bada.

Jack: Nega momo lau be ai noho ruma ena lalona kahadia lau penia. Brens ai idia noho tadikaka idia diba emai asainmen ta dekenai do ai noho daudau lasi, lau do idia hauraia bona idia gwau, “Jack, ruma penia lalohadai oi abia lasi!”

Marie-Line be kohu haboua karana (packing) ia diba momo. Boksi ta ta dekenai gau ibounai “bathroom kohudia,” “mahuta gaudia,” “kisini kohudia,” bona gau ma haida do ia udaia bona edia ladana do ia torea. Unai dala amo ruma matamatana  dekenai ai ginidae neganai, unai boksi ta ta be edia gabu korikori dekenai ai atoa diba. Unai boksi ta ta lalonai idia noho gaudia edia lista do ia karaia, unai amo ai ura abia gauna ai davaria haraga diba.

Marie-Line: Emai kohu ai atodia namonamo dainai, emai hesiai gaukara ai hamatamaia haraga diba.

Emui sediual be edena bamona umui karaia unai amo ‘emui hesiai gaukara umui hagugurua momokani’?​—2 Tim. 4:5.

Marie-Line: Monday ai, ai lagani bona hebou gaudia ai hegaegaelaia. Tuesday amo, haroro gaukara ai hamatamaia.

Jack: Herevana hora tamona do ai haroro, to unai ai laloa bada lasi. Haroro gaukara ai atoa guna emai mauri lalonai. Ruma ai rakatania negana amo ela bona ruma dekenai ai giroa, ai ura ai davaria taudia ibounai ai hereva henia.

Marie-Line: Bema picnic totona gabu ta ai lao, nega momo pepapepa haida lau abia. Taunimanima be ai dekenai do idia mai bona pablikeisen totona do idia henanadai, ena be idia ai hadibaia lasi ai be Iehova ena Witnes taudia. Nega momo emai dabua toana bona emai kara ai naria namonamo badina taunimanima be unai idia itaia.

Jack: Danu emai kara namodia amo neiba taudia ai haroro henia. Hegeregere, emai ruma badinai pepa momoru lau gogoa, aniani momoru lau kokia, bona au ena raurau lau reiki. Emai neiba be unai idia itaia bona nega haida idia henanadai, “Oi dekenai Baibel ta ia noho, a?”

Umui be daudau teritori momo dekenai umui haroro vadaeni. Edena haroro teritori oi moalelaia?

Jack: Guiana ai, teritori haida dekenai lao totona be auka. Nega momo dala be ia dika dainai wiki tamona bamona kilomita 600 bamona do ai lao. Amazon ena uda badana ai ia noho hanua ta ladana St. Élie ai vadivadi henia negana lau laloa. Unai hanua ai ai ginidae totona, motuka bona powerboat amo hora momo ai lao. Unai gabu ai idia noho taudia momo be golo tahua gaukara idia karaia. Iseda pablikeisen idia laloa bada dainai, haida be golo nadi maragidia (nuggets of gold) do idia henia edia kontribusen bamona! Adorahi ai iseda orea ena vidio haida do ai hahedinaraia bona momo idia mai.

Marie-Line: Vanegai sibona, Jack idia noia Camopi hanua dekenai Memorial tok ia henia totona. Unai gabu ai lao totona, motorboat amo Oyapock sinavai ai hora foa ai lao. Unai be ekspiriens idauna.

Jack: Sinavai ena ranu ia maragi, ranu ia heau haraga bona ia be mai ena dika. Bona unai ranu ia heau haragaharaga oi itaia neganai ia be hoa gauna. Bouti ia taria tauna be ia lao gabuna ia diba be namo. To unai be ekspiriens namona. Ena be witnes taudia be 6 sibona, to 50 be memorial ai idia mai, idia haida be Amerindian taudia!

Marie-Line: Inai bamona ekspiriens namodia ese matamata taudia ia durua Iehova idia hesiai henia noho totona. Unai bamona negadia ai Iehova oi abidadama henia, bona emu abidadama do ia goada. Nega momo Iehova ena heduru ai itaia.

Umui be gado momo umui dibaia. Gado ma ta dibaia karana be haraga, eiava?

Jack: Lasi. Unai gado lau dibaia badina lau haroro diba bona kongrigeisen ai heduru do lau henia. Sranantongo * gado ai Gima Kohorona stadi lau naria, to unai gado ai Baibel duahiduahi ena kahana lau do karaia lasi! Tadikaka ta lau nanadaia bema egu kahana ia lalopararalaia. Ia gwau: “Nega haida hereva haida ai lalopararalaia lasi, to oi karaia namo herea!” Natu maragidia ese lau idia durua bada. Hereva ta lau gwauraia kerere neganai, lau do idia durua, to tadikaka bona taihu be unai bamona idia karaia lasi. Natu maragidia amo gau momo lau dibaia.

Marie-Line: Teritori ta dekenai, egu Baibel stadi be French, Portuguese, bona Sranantongo gado taudia. Taihu ta ia gwau namona be lau dekenai ia auka gado ia hereva tauna ena stadi lau karaia guna, gabeai lau dibaia namonamo gado ia herevalaia tauna ena stadi lau karaia. Gabeai, unai hereva ena namo lau lalopararalaia.

Nega ta, Baibel stadi rua lau ura karaia, ta be Sranantongo gado ai bona ma ta be Portuguese  gado ai. Stadi iharuana lau hamatamaia neganai, lau ia bamoa taihu ia gwau, “Marie-Line, oi gwauraia herevadia ia lalopararalaia lasi!” Lau laloparara, lau be Sranantongo gado ai Brazil hahinena lau hereva henia noho, to Portuguese gado lasi!

Hesiai gaukara umui karaia tanodia ai idia noho taudia be umui idia lalokau henia bada. Edena dala ai tadikaka taihu ida tura namodia ai umui lao?

Jack: Aonega Herevadia 11:25 ia gwau: “Hariharibada tauna ena gaudia be do idia momo.” Mai emai ura ida emai nega bona goada ai henia ma haida ai durua totona. Kingdom Hall ena meintenens gaukara haida lau karaia totona, tadikaka haida be lau dekenai idia gwau: “Namona be pablisa ese unai gaukara idia karaia.” To lau haere idia dekenai: “Lau, danu be pablisa ta. So bema gaukara idia noho ita karaia totona, lau ura heduru lau henia.” Ena be nega haida nega ita atoa sibona iseda ura gaudia haida ita karaia totona, to ai ura lasi unai ese ai ia koua ma haida dekenai kara namodia ai hahedinaraia totona.

Marie-Line: Ai gaukara goada emai tadikaka taihu ta ta ai laloa bada totona. Unai amo ai diba bema idia ura ta ese edia natudia ia naria, eiava sikuli gabuna ai motuka amo ia udaia. Bena emai palani ai haidaua diba bona heduru ai henia. Unai dala amo ai be tura namodia ai ai lao, badina ai noho hegaegae heduru ai henia totona.

Pablisa momo lasi gabudia ai hesiai gaukara umui karaia neganai dahaka hahenamo umui davaria?

Jack: Ful-taim hesiai gaukara lalonai hahenamo momo ai moalelaia. Nega momo Iehova ese ia havaraia gaudia ai moalelaia. Ena be hekwakwanai idia vara, to lalomaino ai abia badina ai diba herevana edeseni ai noho, Dirava ena taunimanima ese ai idia durua.

Lau do mero matamata neganai, egu Keristani gini siri karana dainai dibura ruma ai lau idia atoa. Lau diba lasi dina ta lau be misinari ai lau lao bona unuseniai do lau giroa lou, bona gwaumaoro do idia henia dibura ruma taudia lau haroro henia totona. Momokani, Iehova ena harihari bada karana be bada herea!

Marie-Line: Lau moalelaia gauna be sibona lau henia ma haida lau durua totona. Iehova ena hesiai gaukara ai karaia dainai ai moale bada. Danu, unai ese emai headava ia hagoadaia bada. Nega haida, Jack be lau do ia nanadaia bema hegeregere idia lalomanoka headava taudia ai boiria do ai aniani hebou totona. Nega momo do lau gwau, “Lau be unai bamona lau laloa noho!” Nega momo ai be gau tamona ai lalohadailaia noho.

Jack: Lagani haida gunanai, lau be prostate cancer gorere lau abia. Ena be Marie-Line ia ura lasi unai sivarai ia kamonai, ia lau hamaoroa: “Lalokau, lau do buruka lasi, to bema lau mase haraga, lau diba egu mauri lau gaukaralaia mai anina bada gaukarana lau karaia, Iehova lau hesiai henia, bona unai lau moalelaia bada.”​—Gen. 25:8.

Marie-Line: Iehova ese ai dekenai ai laloa do ai karaia diba lasi asainmen idauidau ia henia. Emai mauri lalonai gau namodia momo ai moalelaia. Dirava ai abidadama henia, unai dainai iena orea ese ai idia noia gabu ta do ai lao neganai, ai lao sibona!