Seduai iya udah gawa penuh jam ke Jehovah kenyau ari taun 1988. Seduai iya ulih nelebaka diri ba endur ti baru sereta udah nerima mayuh tanggung pengawa ba Guadeloupe enggau French Guiana. Dua iti endur tu diatu dikemataka pampang opis Perancis. Aram kitai berandau enggau seduai iya.

Nama meransang seduai deka gawa penuh jam ke Jehovah?

Marie-Line: Aku dibesaika ba Guadeloupe. Lebuh agi mit, aku suah nginjil sepemanjai hari enggau indai. Iya ransing gawa ke Jehovah nyentukka seharitu. Aku rinduka orang, nya alai sepengudah abis sekula ba taun 1985, aku berengkah nyadi pengerintis.

Jack: Lebuh agi nembiak, aku seruran begulai enggau bala menyadi Kristian ke gawa penuh jam ti rinduka pengawa nginjil. Maya chuti sekula, aku nyadi pengerintis sukung. Ba ujung minggu, aku enggau indai tauka enggau seiku menyadi lelaki kekadang nepan bas mupuk ngagai endur bala pengerintis nginjil. Kami nginjil sepemanjai hari, lalu udah nya ngagai tebing pantai bemain. Maya nya amat ngagaka ati!

Enda lama pengudah jadi enggau Marie-Line ba taun 1988, ku aku madah ngagai diri empu, ‘Kami duai nadai utai ke nekul, lapa enda ngereja mayuh agi pengawa ke Jehovah?’ Aku berengkah nyadi pengerintis enggau bini aku. Setaun udah nya, pengudah enggau sekula ke bala pengerintis, kami duai diasuh nyadi pengerintis spesial. Kami bisi beberapa iti pengawa ti ngerinduka ati ba Guadeloupe sebedau diasuh pindah ngagai French Guiana.

Seduai udah nerima mayuh pengawa betaun-taun ti udah. Nama udah nulung seduai nelebaka diri enggau tanggung pengawa ti baru?

Marie-Line: Bala menyadi ba Betel French Guiana nemu, ayat Bup Kudus ke dikerinduka kami duai iya nya Isaiah 6:8. Nya alai, lebuh sida betalipaun ngagai kami, sida suah nundi kami enggau nyebut, “Agi ingat ayat Bup Kudus ke dikerinduka seduai?” Reti nya, kami deka bisi pengawa ti baru. Nya alai, ku kami duai, “Tu kami! Kirumka kami!”

 Ngambika kami duai gaga ati enggau pengawa ti baru, kami enda mandingka pengawa nya enggau iya ke lama. Kami mega nguji bebakih enggau bala menyadi ba endur ti baru nya.

Jack: Suba sekeda menyadi enggai kami duai ninggalka sida. Nya alai sida nguji ngasuh kami enda pindah. Tang lebuh kami ninggalka Guadeloupe, seiku menyadi lelaki ngingatka kami pasal jaku Jesus ba Matthew 13:38: “Umai nya dunya tu.” Nya alai lebuh nerima pengawa ti baru, kami ngingatka diri enda ngira dini alai, kami agi gawa ba umai ti sama. Laban, utai ke patut dikemeratka nya orang enggau endur alai nginjil.

Pengudah datai ba endur ti baru, kami beratika orang ba endur nya agi ulih idup enggau lantang. Nya alai kami nguji idup baka sida. Pemakai engka enda sebaka. Tang kami makai sereta ngirup utai ke diempa sereta diirup sida. Kami mega nyaga pengerai diri. Kami enggau naka ulih nyebut utai ti manah pasal tiap iti pengawa ke diberi Jehovah.

Marie-Line: Kami duai mega mayuh belajar ari bala menyadi ba endur nya. Aku agi ingat utai ke nyadi enda lama pengudah kami datai ba French Guiana. Maya nya hari balat amat ujan. Nyadi kami ngumbai kami patut nganti ujan ngetu sebedau ulih mupuk nginjil. Tang udah nya, seiku menyadi indu nanya aku, “Ulih mupuk nginjil?” Aku alit ati lalu nanya. “Baka ni?” Iya nyaut, “Kena payung nuan nya. Kitai deka nepan basikal.” Nya meh maya aku belajar megai payung lebuh ngena basikal. Enti enda belajarka nya, aku tentu enda nemu chara deka nginjil maya musin ujan!

Seduai udah pindah kira 15 kali. Nama digaga seduai ngambika enda tusah maya pindah?

Marie-Line: Pindah ngagai endur bukai kekadang tusah. Tang, amat beguna enti kitai ngiga endur ke nyamai alai diau lebuh kitai pulai ari nginjil.

Jack: Aku selalu ngechat begian dalam rumah baru kami. Lebuh bala menyadi ba pampang opis nemu kami enda diau lama ba endur alai kami dianjung, kekadang sida nundi aku, “Jack, enda ibuh kiruh ngechat rumah nuan!”

Marie-Line landik nyikap barang! Iya nyimpan semua utai dalam kutak lalu ngelekatka tanda ba kutak nya baka “bilik mandi,” “bilik tinduk,” “dapur,” enggau utai bukai. Nya alai, lebuh datai ba rumah baru, kami ulih nyimpan kutak ba bilik ke patut. Enggau ngaga lis ba kutak, kami duai ulih jampat tetemuka utai ke diguna.

Marie-Line: Ketegal kami udah belajarka chara  ngatur pengawa enggau manah agi, kami ulih jampat berengkah enggau pengawa nginjil.

Baka ni seduai ngatur jam ngambika ulih ngereja semua pengawa seduai?—2 Tim. 4:5.

Marie-Line: Tiap Hari Satu, kami duai belelak lalu nyediaka utai ke dikena begempuru. Hari Dua ngagai Hari Minggu, kami enggau pengawa nginjil.

Jack: Taja pan kami duai patut ngena jam baka ke udah ditetapka ba pengawa nginjil ninting bulan, kami enda kelalu betatika nya. Pengawa nginjil ke pemadu beguna ba pengidup kami. Nya alai, kenyau nurun ari rumah nyentuk ngagai maya pulai ke rumah, kami enggau naka ulih berandau enggau semua orang ke ditemu kami.

Marie-Line: Ambika chunto, lebuh kami duai bepinik, aku seruran mai surat mit. Sekeda orang nanya lalu minta litaricha taja pan kami enda madahka diri Saksi-Saksi Jehovah. Ketegal nya, kami bejimat pasal chara begari sereta ulah diri. Orang beratika ulah enggau pendiau kitai.

Jack: Kami duai mega meri saksi lebuh ngereja utai ti manah ngagai orang ke berimbai pendiau. Aku ngumpul keretas, muai uras sereta nyapu daun ba luar rumah kami. Sida beratika nya lalu kekadang nanya, “Kati nuan bisi Bup Kudus ke ulih diberi ngagai aku?”

Seduai suah nginjil ba endur pesisir. Kati seduai agi ingatka utai ti ngerinduka ati lebuh ngagai endur nya?

Jack: Sekeda endur ba Guiana tusah deka digagai. Kami duai patut nengah jalai ti jai penyauh 600 km (370 batu) pengelama seminggu. Utai ti seruran dikingatka kami iya nya lebuh ngagai St. Élie, ba utan Amazon. Kami begunaka beberapa jam nepan speedbot tauka perengka pengangkut ba ai ke bukai ngagai endur nya. Mayuh orang ke diau dia ngelumbung mas. Ketegal beterima kasihka litaricha kitai, sekeda ari sida meri kami duai beberapa tekang mas ti mit! Maya lemai hari, kami mandangka siti video ari gerempung kitai. Mayuh orang ke diau dia datai.

Marie-Line: Beberapa taun ti udah, Jack diasuh meri cheramah maya Ngingatka Pemati Jesus ba Camopi. Kami duai patut nepan speedbot pengelama empat jam nengah Sungai Oyapock ngagai endur nya. Tu siti peneleba ti ngagitka ati kami.

Jack: Ba ai sungai ke enda dalam, wung iya deras amat. Amat rindu ulih meda wung nya enggau semak. Orang ke ngemudika bot patut landik ngemudi nengah wung nya. Tang nya peneleba ti ngerinduka ati. Taja pan 6 iku aja Saksi Jehovah ke datai maya Ngingatka Pemati Jesus, tang bisi kira 50 iku orang ke ngulu pengawa nya. Sida nya nyengkaum sekeda orang Indian-Amerika!

Marie-Line: Bala ke biak tau bulih peneleba ti ngerinduka ati baka nya enti sida deka gawa mayuh agi ke Jehovah. Sida patut arapka Jehovah lebuh napi utai ke baka nya, ngambika pengarap sida tegap. Kami duai empu suah meda chara Jehovah nulung kami.

Seduai udah belajarka beberapa iti bansa jaku. Kati nya senang ba seduai?

Jack: Enda. Aku belajarka semua bansa jaku nya ngambika ulih nginjil sereta nulung eklisia. Aku diasuh ngiring pengawa belajarka majalah Watchtower dalam jaku Sranantongo * taja pan aku bedau agi diberi tanggung pengawa macha Bup Kudus ba sekula teokratik! Aku nanya seiku menyadi lelaki sekalika bala menyadi ulih meretika utai ku aku. Iya madahka, “Kekadang kami enda meretika sekeda leka jaku, tang nuan udah ngiring pengawa nya enggau manah.” Bala anak mit mayuh nulung aku. Enti utai ke disebut aku nya salah, sida ke mit ti madah ngagai aku, ukai sida ke besai tuai. Aku mayuh belajar ari sida ke anak mit.

Marie-Line: Ba siti endur, aku bisi pemelajar Bup Kudus ke ngena jaku Perancis, Portugis, enggau Sranantongo. Seiku menyadi indu meransang aku ngajar ngena jaku ke tusah dulu, iya nya jaku Portugis. Udah nya ngajar ngena jaku ke ditemu aku. Keterubah, aku enda mereti kebuah iya meri aku jaku lalau ke baka nya.

Nyadi sekali, aku ngajar pemelajar ke ngena jaku  Sranantongo dulu. Udah nya, aku ngajar seiku indu ke datai ari menua Brazil ke ngena jaku Portugis. Lebuh aku berengkah ngajar iya, menyadi indu ke enggau aku madahka, “Marie-Line, asai aku salah bansa jaku ke dikena nuan nya!” Aku nyau nemu diri udah ngena jaku Sranantongo, ukai ngena jaku Portugis! Diatu, baru aku nemu kebuah iya meri jaku lalau nya.

Seduai dikerinduka bala menyadi Kristian. Baka ni seduai ulih semak enggau bala menyadi?

Jack: Jaku Dalam 11:25, NWT madahka: “Orang ke meri enggau ati ti gerah mudah, deka mujur.” Kami duai enda kakang ati gerah jari enggau bala menyadi. Bekaul enggau pengawa ngaduka Palan Gempuru, sekeda menyadi madah ngagai aku: “Awakka bala penginjil ngereja nya.” Tang aku nyaut: “Aku mega penginjil. Nya alai, enti bisi pengawa ke patut digaga, aku mega deka enggau.” Taja pan semua kitai patut bisi awak ke diri empu, tang kami duai enggai ngelakka nya nagang kami ari ngereja utai ti manah ngagai bala menyadi.

Marie-Line: Kami duai enggau naka ulih ngayanka pengibuh ngagai bala menyadi. Enggau nya, kami ulih nemu kemaya sida begunaka orang nyaga tauka ngambi anak sida pulai ari sekula. Udah nya kami ngatur baru jadual kami ngambika ulih nulung sida. Enggau nya, kami ulih nyadi bakih ti manah ke sida ketegal sedia deka nulung lebuh sida begunaka nya.

Nama berekat ke diulih seduai ari gawa ba endur ke begunaka mayuh agi penginjil?

Jack: Ketegal gawa penuh jam ke Jehovah, kami duai bulih mayuh berekat. Kami suah bisi peluang belematika bemacham utai ke ditempa Jehovah. Taja pan napi penanggul, kami enda kelalu irau ketegal bisi sukung ari nembiak Petara enda ngira dini alai kami.

Lebuh agi biak, aku dijil ba French Guiana ketegal enggai enggau pengawa ti bekaul enggau soldadu. Aku enda nyangka ulih pulai baru ngagai endur nya nyadi pengerintis seberai tasik lalu ulih ngelawa rumah jil. Endang amat, Jehovah gerah jari deka meri berekat!

Marie-Line: Utai ke amat ngagaka ati aku iya nya ulih gawa ke bala menyadi. Kami duai gaga ati ulih sama gawa ke Jehovah. Tu mega ngasuh tikah kami majak tegap. Kekadang Jack bisi nanya sekalika ulih mai sepasang laki bini ke begunaka jaku peransang begulai makai enggau kami. Aku suah nyebut, “Aku mega berundingka utai ti sama!” Tu suah nyadi ba kami duai.

Jack: Beberapa taun ti udah, aku ditemu bisi penyakit riman. Taja pan Marie-Line enda rindu ninga nya, aku bisi madah ngagai iya: “Sulu, aku bedau tuai. Tang enti sema aku nadai dudi hari, aku nemu diri udah ngena pengidup ngereja utai ti beguna bendar sereta nyembah Jehovah. Nya ke ngasuh ati aku gaga.”—P-kal. 25:8.

Marie-Line: Jehovah udah meri kami duai pengawa ke enda kala disadang kami lalu Iya ngemendarka kami ngereja nya. Kami bulih mayuh amat berekat ba pengidup. Kami deka gawa ke Jehovah ba dini-dini endur ke diasuh gerempung kitai laban kami pechaya Jehovah deka nulung kami.