Jack bala Marie-Line kaa kpa ụka nyaa wuu họ ụkụrwọ nya iJihova dọmwụ bwu ẹka nya 1988. Ị jẹ́-ẹ yẹ ọhịhị nyaa da nyọka pwoku iwe-ahụrụ ịdatị-datị, lẹ ị jẹ́ họ akụrwọ lụmẹ-lụmẹ ịị Guadeloupe bala French Guiana. Ẹga imimiiye ịwẹ juwa e-ekpeleji nya egbeju ẹpwa nyahị ọla France lẹẹlẹẹ. Ahị tọ Jack bala Marie-Line ịtọ ẹla ịmanyị-ịmanyị wẹẹ.

Ịyẹ à tị́ gunu gbịla nyọka ri angị kpa ụka nyaa wuu ya ẹrụ ọnyịịla?

Marie-Line: Ụka kam ri onjwo ịị Guadeloupe, am bala ịnam kaa ya ẹrụ ọnyịịla gbee ká obyi ka hi, ụka lụmẹ-lụmẹ. Ọ kaa ya ẹrụ ọnyịịla lila-ila. Angịnyị hám, lẹ nyọlẹ kam họ kpá bwu ube-ụpwụ bwaa la 1985 lẹ, m̀ dọmwụ nyọka ye ịlahị nya ụgbẹyị ẹẹ.

Jack: Ụka kam ri okolobya, m̀ kaa juwa bala angịlẹ kị kaa kpa ụka nyaa wuu họ ụkụrwọ nya iJihova, ká ẹrụ ọnyịịla ọ-kpa pyẹ tị háa yẹẹyẹẹ. Ụka ká ube-ụpwụ nyahị á ka ọmwịịnyọ, m̀ kaa chịchịịchị ye ịlahị nya ụgbẹyị. La ọmyịmyị nya epwihi, ahị kaa ju imoto kaka tọ aanahị ịịwa o-oye nyaa. Ahị kaa ya ẹrụ ọnyịịla gbee ká obyi ka hi, lẹ ahị kaa rụ kaka mwịịnyọ ọ-ọnụụka nya ihu lẹlẹ. Ụka ọwẹ kpịpyọ lụmẹ.

Nyọlẹ kam ye Marie-Line la 1988 bwaa lẹ, m byi ịlọm yẹkẹẹ, ‘Ahị lịlọhị, lẹ ahị họ ụkụrwọ nya iJihova gụ ọọwa mẹ.’ M̀ dọmwụ nyọka ye ịlahị nya ụgbẹyị lala ahụm ịnyịnyị. Ẹka ookpokpo kịlahị, nyọlẹ kahị ka ube-ụpwụ nya angị ye ịlahị nya ụgbẹyị kpá, lẹ ị chụhị nya angị kpa ụka nyaa wuu ya ẹrụ ọnyịịla lẹlẹ. Ahị họ akụrwọ ịdatị-datị ịlẹ kị kpịpyọ yẹẹyẹẹ ịị Guadeloupe ene kịị yahị du ka French Guiana.

Ụkụrwọ nyanụ yẹda yẹẹyẹẹ ẹ-ẹpwụ nya ẹka ịwẹ lẹ. Ịyẹ à tị́ danụ ụbwọ nyọka yẹ ọhịhị nyanụ da nyọka pwoku iwe-ahụrụ inyeewe?

Marie-Line: Aanahị ịlẹ kị juwa ị-ịBẹtẹlụ ọla French Guiana jẹ́ nyori ụpwụ ịgọgọ ọlẹ kọ kaa kpụhị ịpyọ gụgụ wuu nyị ri Ayịsaya 6:8. Lẹ, ụka kị wụrụụhị, ị kaa chị ụmwara yẹkẹẹ, “Anụ kpịtịya nya ụpwụ ịgọgọ ọlẹ kọ kaa kpụnụ ịpyọ gụgụ wuu lẹẹ wẹẹ?” Kori kị ya ịnyị lẹ aalẹ, ahị jẹ́ nyori ụkụrwọ nyahị juwa ka yẹda lẹ. Lẹ, ahị kaa waa ịnyịnyị yẹkẹẹ, “Ahị lẹẹ lẹ, duuhi mẹ.”

 Ahị kaa cheji ba hi ọ-chụ ụkụrwọ nyahị onyogo kaka pwoku onyeewe, chajị kori kahị họ ịnyị, ang ọlẹ kahị la á ka myịhị lẹhị ka. Ahị kaa maga nyọka jẹ́ aanahị alẹng bala anyang ịnyịnyị.

Jack: Ụka ọhẹ kẹkpẹ, aanahị ịhyẹ á tịtọ kahị ka rụ hyaa ka, lẹ ị juhi ọhụ nyori ahị nyị juwa balaa mẹ. Ma ụka ọlẹ kahị rụ bwu Guadeloupe, ọọnahị ọhẹ kpụhị ịtịya nya omyi ẹla nya iJisọsị ọlụpwụ nya ịMatiyu 13:38: “Ẹrụ ọlẹ kọ ya ajẹ ịwẹ tọ, a ri odehe ọlẹ lẹ.” Lẹ ụka myị́ ụka ká ụkụrwọ olujwo á warị, ahị kaa kpịlọhị ịtịya nyori, ẹga myị́ ẹga kahị ji, ẹrụ ọwọwa ahị wẹẹ họ ụkụrwọ lẹ. Ẹga ọlẹ kahị ka ye angịnyị ya ẹla ju bala angịnyị ịlụwa à ju apyobwuna gụ ịnyịlẹhị lẹ!

Kori kahị pwụ ẹga onyeewe, ahị kaa yẹ nyori angịnyị ehe ịkịla lala ahị à juwa ẹ-ẹga ọọwa le, ị tị kaa chị ọkẹkẹnị. Lẹ ahị kaa maga nyọka hịhị lala alụwa ịnyịnyị. Ang oriri ọlụwa ka datị myị́, ma ahị kaa ri ang ọlẹ kị ri bala ọ-nwà ang ọlẹ kịịwa nwà ịnyịnyị. Ahị tị kaa họ ịnyị ụ-ụgbẹyị ọlẹ kọ ka jụ́ụhị ẹdụrụ ka. Ahị kaa maga nyọka ya ẹla ọnyịịla u-uhye nya ẹga myị́ ẹga kahị họ ụkụrwọ.

Marie-Line: Ahị jẹ́ ang lụmẹ-lụmẹ bwu ẹga nya aanahị ịlẹga ịịwa ịnyịnyị. M̀ kpịtịya nya ẹlẹhẹ ọlẹ kọ họ nyọlẹ kahị pwụ́ French Guiana bwaa. Enyi wẹẹ do ọtụka-ọtụka ụka ọọwa, lẹ ahị me kahị ka dayị ká enyi ka chị kpá ene kahị ka kpehe nyọka ya ẹrụ ọnyịịla. Ọọwa lẹ, ọọnahị ọhẹ à tọm wo yẹkẹẹ, “Ahị rụ mẹ?” Ịtọ ẹla nyamwụ lam ẹbyẹbyị, lẹ m̀ tọọ wo, “Ụ-ụgbẹyị oyina tị́?” Ọ wẹm yẹkẹẹ, “Hu ịnawụ ọchanwụ nyang mẹ. Ahị ka kpa oje nyahị.” Jaabwọ kam jẹ́ bwu chị oje la ịnawụ ọchanwụ ụ-ụbwọ à wẹ lẹ. Kori kam họ ịnyị ka ịnọ, ḿ ka jẹ́-ẹ kpa ẹrụ ọnyịịla pyẹ ụka nya ụhyọọ ẹnẹnẹhẹ ka!

Anụ mwụ́ ka ẹga ịdatị-datị lala iwo kụrụ ịrụ lẹ. Anụ la irya ọhẹ kanụ ka ju angịkịla u-uhye nya ọ-mwụ́ bwu ẹgẹhẹ ka ẹga ọkịla?

Marie-Line: Ẹpwa ọmwụ́mwụ kaa lujwo lụmẹ. Ma, à baba nyọka mwahị nya ẹga ọlẹ ká ka jẹ́-ẹ la okpunyi ụka ká nyà bwu ẹrụ ọnyịịla ọ-kpa pyẹ.

Jack: M̀ kaa pá ube ọnyị myị́ ọnyị kahị ju ka ido onyeewe. Ụka ká aanahị ịla egbeju ẹpwa á jẹ́ nyori áhị ja tata ẹ-ẹga onyeewe ọlẹ kị yahị du ka ka, ị kaa byim la ụmwara-ụmwara yẹkẹẹ: “Jack, a nwụ ịlọng pá ube nyang ido onyeewe ụka ọlẹ kaka.”

Marie-Line jẹ́-ẹ ju olo lụmẹ. Ọ kaa ya ang ju a-akpa ịdatị-datị bala ọ-da ẹnyị baa lala “ẹga o-hyo enyi,” “ẹga onune,” bala “ẹga ọ-kpụ ang.” Lẹ  ụka kahị pwụ́ ẹpwa nyahị onyeewe, ahị jẹ́-ẹ ya akpa ọnyọnyọọnyị nọ u-ube ọlẹ kọ chịla. Ọ kaa da ẹnyị nya ang ọnyị myị́ ọnyị ọlẹpwụ nya akpa ọnyọnyọọnyị chajị kahị ka jẹ́-ẹ yaa hyaa.

Marie-Line: Chajị nyọlẹ kahị jẹ́-ẹ nwụla ang nọ yẹẹyẹẹ wẹẹ, ahị jẹ́-ẹ dọmwụ nya ẹrụ ọnyịịla ọ-kpa pyẹ ahyaahị ẹ-ẹga onyeewe.

Ányị anụ tị́ kaa nwụla ụka nyanụ nọ chajị kanụ ka jẹ́-ẹ họ ụkụrwọ nya Ohe Oluhye “jịra kpẹẹkpẹẹ”?—2 Tim. 4:5.

Marie-Line: Ẹnụ nya ịMọndị, ahị kaa mwịịnyọ bala ọ-nwụlanọ nya ọjịra-jịra. Bwu ẹnụ nya ịTusdee kịlahị, ahị kaa kpehe ka ya ẹrụ ọnyịịla.

Jack: Ahị la awa ịlẹ kị hu nọ hahị nyọka họ ụkụrwọ pwụ́, irya nyahị á tị kaa juwa ka. Ẹrụ ọnyịịla ọ-kpa pyẹ à baba hahị gụ wuu lẹ. Bwu ụka ọlẹ kahị kaa rụ bwu ẹpwa gbee ka pwụ ụka ọlẹ kahị kaa tịrẹkpẹ nyà, ahị kaa maga nyọka ya ẹla ju ọng myị́ ọng ọlẹ kahị tọ.

Marie-Line: Ụka kahị dọmwụ kpehe ka yụya lawụlẹ, m̀ kaa kpa ịtịrakị bịlọm. Angịhyẹ kaa wẹ ẹga nyahị kaka tọhị wo nya apwụ, kori kahị dọmwụ byaa ene nyori ahị ri Alibeenu nya iJihova ka wẹwẹ. Chajị nyọọwa lẹ, ahị kaa dụmwọ-dụmwọ u-uhye nya ang ọkụrụ-kụrụ bala abwẹla nyahị. Angịnyị kaa yẹ ang ịlịnyị.

Jack: Ahị kaa ya ẹrụ ọnyịịla ịnyịnyị bwula ọ-họ ang ịnyịịla ha angịnyị. M̀ kaa yile apwụ́, go ajeyi ka hụrụ, bala ọ-tụ́ eji ju ẹpwa nyahị. Aloye ẹpwa nyahị kaa yẹm ụka ọhẹ, lẹ ị kaa tọm wo yẹkẹẹ, “À la ịBayịbụụ ọhẹ a ka ya ham?”

Anụ kaa ya ẹrụ ọnyịịla ẹ-ẹga ịlụrụ yẹẹyẹẹ. Anụ kpịtịya nya ẹlẹhẹ ọkpịpyọ-kpịpyọ ọlẹ kọ họ ẹ-ẹpwụ nya ẹdịyẹ ọlịnyị ọhẹ?

Jack: Ọ kaa lujwo nyọka pwụ́ ụpa nya Guiana ịhyẹ. Ụka lụmẹ-lụmẹ ẹ-ẹpwụ nya epwihi, ahị kaa jẹdịyẹ ụ-ụgbẹyị ọtịpyọ lala ịmayịlị 370. Áhị ka jẹ́-ẹ deeri hi ụka ọhọhẹ ọlẹ kahị ka St. Élie ọlẹ kọ juwa i-ipyinu nya Amazon ka. Ẹdịyẹ ọwa kpahị lala awa lụmẹ-lụmẹ ene kahị pwụ́ ụwa. Ahị ju imoto ọ-la ịtaya ịtụka ọhẹ bala ụmwụ nya enyi. Iru nya angịnyị ịlụwa ri angị kaa mwahị nya okpoko ịgọm. Chajị nyọlẹ ká ẹla nyahị myị angịhyẹ nyaa lẹhị lẹ, ị ya okpoko ịgọm hahị nya ụbwọ ọ-gba kpehe! Alobyi, ahị mẹ ifim nyahị jáa. Angịnyị lụmẹ-lụmẹ warị ka yẹ.

Marie-Line: Kpanjẹ, ị byi Jack nyị ya ẹla dodehe ụka nya ọ-Họ Kpa Kpịtịya nya igu nya ịKịrayịsị ịị Camopi. Ahị ju ụmwụ nya enyi ẹ-ẹpwụ nya awa ine nyọka chị íhù nya Oyapock eku, ene kahị-ị̀ pwụ́ ụwa. Ọ kpịpyọ lụmẹ.

Jack: Ẹga ká enyi á lụmẹ ka, ọhụ́ụ ọlụwa kaa la ọngịrị yẹẹyẹẹ. Ọhụ́ụ ịwẹ kaa hụ́hị lụmẹ ụka ká ụmwụ nya enyi á juwa jẹ tụ́ jwaa chwẹẹ. Ọngọ pá ụmwụ nya enyi á jẹ́ ụkụrwọ yẹẹyẹẹ ka, ọ́ ka jẹ́-ẹ bwu ụwa ka. Ma, ọ kpịpyọ lụmẹ. Alibeenu nya iJihova ịrwọnyẹ kem à juwa ẹ-ẹga ọwa lẹ, ma angịnyị lala iwo ịrụ juwa ọ-ọHọ Kpa Kpịtịya nya Igu nya ịKịrayịsị, tụ́ ala Amerindia.

Marie-Line: Ẹla ịnyịịla ịlịịwẹ juwa godayị gbe aanahị ịlẹ kị tịtọ nyọka họ ụkụrwọ ha iJihova gụ ọwọwa. À baba nyọka dahịhile iJihova ẹ-ẹpwụ nya iwe-ahụrụ ịwẹ, ị tị ka ju ọmyịmyị nyang ọngịrị ịnyịnyị. Ahị kaa yẹ ụbwọ ọdada nya iJihova ọ-ọhịhị nyahị.

Anụ jẹ́ òja lụmẹ-lụmẹ lẹ. Òja ọjẹ́jẹ kaa chịnụ kpẹẹ?

Jack: Ehe. M̀ jẹ́ òja ịwẹ chajị nya ọbaba ọlụwa ịnyị. M̀ kpịlahị ẹ-ẹpwụ nya Ẹpwang ọ-Kụ Gbeji Ọjẹ́jẹ la òja nya Sranantongo * ene kam dọmwụ họ ụpa nya ịBayịbụụ ọwawa. Ụka kam tọ ọọnahị ọhẹ wo kori kị wo ẹla nyam, ọ yẹkẹẹ, “Ụka ọhẹ, áhị kaa wo ẹla ọlẹ ká wẹẹ ya ka, ọ tị há.” Anjwo dam ụbwọ nyịlẹhị-ịlẹhị. Kori kam jẹ́ ya ka, ị kaa ya jem, angịgbahị á tị kaa myị họ ịnyị ka. M̀ jẹ́ ang lụmẹ-lụmẹ bwu ẹga nya anjwo.

Marie-Line: Ẹgẹhẹ juwa kam kaa jẹ́ ịBayịbụụ ta angịlẹ kị kaa ya òja nya French, Portuguese, bala Sranantongo. Ọọnahị ọnyang ọhẹ jum ọhụ nyori, am nyị mẹ ang jẹ angịlẹ kị kaa ya òja ọlẹ kọ lam ujwo gụgụ wuu jene, ene kaam nyị ka mẹ ang jẹ angịlẹ kị kaa ya òja ọlẹ kam jẹ́ yẹẹyẹẹ. Ọ nọ pyịnyẹng ene kam jẹ́ ang odudu kọ chịla nyọka họ ịnyị.

 Ẹnẹhẹ juwa kam mẹ ang jẹ ọngọhẹ la Sranantongo ene kaam mẹ ang jẹ ọngọkịla la Portuguese. Ụka kam dọmwu nya ọ-mẹ ang jẹ ọngọ oheeye ọọwa, ọọnahị ọnyang ọlẹ kọ juwa balam byim yẹkẹẹ, “Marie-Line, akama ji pyii!” Ụka ọwẹ m jẹ́ nyori m̀ wẹẹ mẹ ang jẹ ọnyang ọla Brazil la òja nya Sranantongo ọkọkọ nya Portuguese ọlẹ kọ wo wẹẹ lẹ!

Anụ há aanahị ịlẹ kanụ-ụ̀ họ ụkụrwọ bala yẹẹyẹẹ. Ányị anụ tị́ bwu tụ́ ju aanahị chwẹẹ ịịwẹ?

Jack: Ụpwụ nya Etu 11:25 yẹkẹẹ: “Ọlọnahị kaa pyẹpyọọ.” Ahị kaa maga nyọka họ ang ha angịkịla bala ọ-ya ụka nyahị haa. Ụka kahị tịtọ nyọka nwụla Ube nya Ịpyị-Adịrahụ, aanahị ịhyẹ kaa byim am nyị ba hi ọwẹ ha aanahị ịkịla mẹ. M̀ tị kaa wẹ yẹkẹẹ: “M̀ tị́ ri ọọnanụ ịnyịnyị. Lẹ kori ká ụkụrwọ á ji aalẹ, m̀ tịtọ nyọka họ ịnyịnyị.” Ahị wuu baba nya ụka ọhẹ ọlẹ kahị ka ji ụbwọọhị, ma ahị kaa kpịlọhị ịtịya nyori áhị tịtọ ká ọọwa ka wuhi kpa la ọ-họ ang ọnyịịla ha angịkịla ka.

Marie-Line: Ahị kaa maga nyọka mẹjẹ aanahị nyori ahị kpaa i-irya. Bwula ọọwa, ahị kaa jẹ́ ụka ọlẹ kị baba nya ọngọhẹ nyọka kpẹhị rịrị anyị nyaa lee ọ-ka hu anyị nyaa bwu ube-ụpwụ kpa nyà. Ọọwa lẹ, ahị kaa nwụ ang ịlẹ kahị tịtọ nyọka họ rịrị chajị kahị ka jẹ́-ẹ daa ụbwọ ẹẹ. Chajị nyọlẹ kahị kaa nwụlanọ nyọka daa ụbwọ ụka kị baba nyamwụ wẹẹ, ahị ri aligu nya awụlẹ yẹẹyẹẹ.

Ahị ọwawa iyina anụ tị́ ye bwu ụkụrwọ ọhọhọ ẹ-ẹga ịlẹ ká ọbaba ji?

Jack: Ịlahị nya ụgbẹyị oyeye ya ahị ọwawa lụmẹ-lụmẹ hahị. Ahị la iwe yẹẹyẹẹ nyọka yẹ akụrwọ-ụbwọ ịnyịịla-ịnyịịla nya iJihova bala o-ye ịpyọ ọkpụkpụ bwu ẹpwụ nyaa. Ahị la akama ịhyẹ odu lẹ, ahị la okpunyi nya ọkịlẹtụ ịnyịnyị chajị ahị jẹ́ nyori, ẹga myị́ ẹga kahị ji, aanahị ka chẹkpẹ juhi.

Ụka kam ri okolobya, ị wum ju agba ịị French Guiana chajị ḿ myị ri isoja ka. Ḿ jẹ́ nyori m̀ ka jẹ́-ẹ tịrẹkpẹ kele ẹnẹnẹhẹ nyọka myị ẹrụ ọnyịịla lee ọ-dọmwụ la iwe nyọka ya ẹla ju alagba ka. IJihova kaa pyẹ ụbwọ nyamwụ maa, wahị kụrụụhị ịnyịlẹhị!

Marie-Line: Ang ọlẹ kọ ya ọkẹkẹnị ham gụ wuu ri o-hu ịlọm ha chajị nya angịkịla. Ahị chị ọkẹkẹnị nyọlẹ kahị jam họ ụkụrwọ nya iJihova. O du kahị tụ́ ju awụlẹ chwẹẹ lala ahụ bala ọrụ. Ụka ọhẹ, Jack kaa tọm wo kori kahị ka jẹ́-ẹ wụrụ ahụ bala ọrụ ịlẹ kị baba nya ọhụ ojuju wẹ ẹpwa nyahị. Ụka lụmẹ-lụmẹ, m̀ kaa wọọ yẹkẹẹ, “Ẹla ọwẹ kpangga m wẹẹ kụ irya ju lẹ!” Ụka lụmẹ-lụmẹ, ịịwẹ ahị kaa la ẹla ookpokpo i-irya lẹ.

Jack: Kpanjẹ, m̀ la ẹbẹ ọgọja. Nanana nyori ọ́ kaa kpụ ahụm ịpyọ ka, m̀ kaa byoo yẹkẹẹ: “Ẹnwa, ḿ ri ọngọgbahị lụmẹ lẹka, ma kori kam gbu ijuju wẹwẹ, m̀ ka chị ọkẹkenị chajị m̀ jẹ́ nyori m̀ kpa ọhịhị nyam họ ang o-ju apyobwuna, kọ ri ụkụrwọ nya iJihova.”—Ọmwụ. 25:8.

Marie-Line: IJihova wụrụ agbẹyị lụmẹ-lụmẹ bala ọ-ya iwe hahị nyọka họ ang ịlẹ kahị ka jẹ́-ẹ me irya nyori ahị ka ju họ ẹnẹnẹhẹ ka. Ọhịhị nyahị myị̀ la ang ịnyịịla ịnyịlẹhị. Ahị dahịhile Ohe Oluhye yẹẹyẹẹ, lẹ ẹga myị́ ẹga ká ogu nyamwụ á byihi nyị ka, ụ-ụwa ahị ka ka lẹ!