Pɩnaɣ 1988 taa Jack nɛ Marie-Line papaɣzɩ alɩwaatʋ tɩŋa Ɛsɔ sɛtʋ tʋmɩyɛ. Pasɩm-wɛ se pañakɩ pana se pɛ-wɛtʋ ɛmʋnɩ lone nɖɩ ɖɩ-taa pɛwɛɛ yɔ, nɛ pʋyɔɔ lɛ petisaa nɛ pala tʋma ndɩ ndɩ Guadeloupe nɛ Kuyaanɩ ajɛɛ taa. Fransɩ ɛgbɛyɛ piliŋa cɔŋnɩnɩ lona ana a-naalɛ a-yɔɔ lɛɛlɛɛyɔ. Iyele nɛ ɖɩpɔzɩ Jack nɛ Marie-Line tɔm natʋyʋ pazɩ.

Ɛbɛ seɣti-mɩ nɛ ɩpaɣzɩ alɩwaatʋ tɩŋa Ɛsɔ sɛtʋ tʋmɩyɛ?

Marie-Line: Maakɛ pɩɣa nɛ mɛwɛɛ Guadeloupe lɛ, ɖoŋ ɖoŋ ma nɛ mon-ɖoo ɖisusaɣ tɔm paa ɖooye. Mon-ɖoo kaakɛ Aseɣɖe Tʋ kpekpeka tʋ. Mɔnsɔɔlɩ ɛyaa nɛ pʋyɔɔ lɛ, mantɩɩtɛm sukuli pɩnaɣ 1985 lɛ, manpaɣzɩ nʋmɔʋ lɩzʋʋ tʋmɩyɛ.

Jack: Maakɛ pɩɣa lɛ, ma nɛ alɩwaatʋ tɩŋa Ɛsɔ sɛtʋ tʋmlaɖaa mba pɔsɔɔlɩ tɔm susuu tʋmɩyɛ yɔ ɖɩcakaɣnɩ paa ɛzɩmtaa. Malakaɣ nʋmɔʋ lɩzʋʋ sɩnɩyʋ tʋmɩyɛ alɩwaatʋ ndʋ pahaɣaɣ-ɖʋ nʋmɔʋ sukuli taa yɔ. Kpɩtaʋ ɖɩdɛnɖɛ kɩyakɩŋ taa lɛ, nabʋyʋ taa ɖɩkpakaɣ lɔɔɖɩyɛ nɛ ɖiwoki nʋmɔʋ lɩzɩyaa cɔlɔ kooka ŋga ka-taa paawɛ yɔ. Ðisusaɣ tɔm evemiye kpeekpe nɛ pʋwayɩ lɛ ɖiwokaɣ teŋgu nɔɔ nɛ ɖɩmʋʋ helim. Avema ana aawɛ ɖeu kpem!

Ma nɛ Marie-Line ɖɩɖɔkɩ nesi pɩnaɣ 1988 nɛ pɩla alɩwaatʋ pazɩ pʋwayɩ lɛ, meheyi man-tɩ se: ‘Ðɩfɛyɩnɩ sʋʋtʋ natʋyʋ, pʋyɔɔ lɛ pɩpɔzʋʋ se ɖisusi tɔm nɛ pɩkpaɖɩ.’ Manpaɣzɩ nʋmɔʋ lɩzʋʋ tʋmɩyɛ labʋ ɛzɩ Marie-Line yɔ. Pɩlabɩ pɩnaɣ pʋwayɩ nɛ ɖiwolo nʋmɔʋ lɩzɩyaa sukuli nɛ pɩtɛ lɛ, paha-ɖʋ waɖɛ se ɖɩla nʋmɔʋ lɩzʋʋ kiya tʋmɩyɛ. Ðɩlabɩ tʋma kɩbana ndɩ ndɩ Guadeloupe pʋcɔ nɛ peheyi-ɖʋ se ɖɩkʋyɩ nɛ ɖiwolo Kuyaanɩ.

Pɛlɛɣzɩ-mɩ tʋma ndɩ ndɩ pɩnzɩ nzɩ sɩɖɛwa yɔ sɩ-taa. Ɛbɛ sɩɣaɣnɩ-mɩ se ɩlakɩ lɛɣzɩtʋ nɛ pɩmʋnɩ wɛtʋ kɩfatʋ ndʋ tɩ-taa ɩwɛɣ yɔ?

Marie-Line: Koobiya mba paawɛ Kuyaanɩ Betɛɛlɩ taa yɔ, paanawa se mayaɣ ŋga ɖɩkɩlɩ sɔɔlʋʋ yɔ, ŋga lɛ Izaayii 6:8. Pʋyɔɔ lɛ, alɩwaatʋ ndʋ payaɣ-ɖʋ yɔ, ɖoŋ ɖoŋ lɛ papaɣzɩɣnɩ aleɣya tɔm tʋnɛ: “Ɩtɔzʋʋ mayaɣ ŋga ɩkɩlɩ sɔɔlʋʋ yɔ kɔ-yɔɔ?” Piyeki nɛ ɖɩnaɣ se pacaɣ-ɖʋ lɛɣzʋʋ tʋmɩyɛ, pʋyɔɔ lɛ ɖicosaɣ se: “Ða yɔ, tiyi-ɖʋ.”

Ðɩɩkpakɩɣ tʋma wena ɖɩtɛm labʋ yɔ nɛ ɖɩmaɣzɩɣnɩ kɩfana wena paɖʋʋ-ɖʋ yɔ, mbʋ pʋyɔɔ yɔ,  ye ɖɩlabɩ mbʋ yɔ, pɩpɩzɩɣ piyele se ɖɩtaanɩɩ leleŋ ɖa-tʋmɩyɛ kɩfaɖɛ taa. Ðɩñakaɣ pana ɖɔɖɔ se ɖɩɖʋ taabalɩyɛ nɛ koobiya mba pɛwɛ ɖa-tʋmɩyɛ kɩfaɖɛ ɖɩlaɖɛ taa yɔ.

Jack: Alɩwaatʋ ndʋ tɩɖɛwa yɔ tɩ-taa, taabalaa nabɛyɛ, mba paawɛnɩ lɩmaɣza kɩbana yɔ, paañaɣ pana se peyele nɛ pitii ɖo-toma taa nɛ ɖɩtaaɖɛɛ, mbʋ pʋyɔɔ yɔ pañɩnaɣ se ɖɩcaɣ pɔ-cɔlɔ. Ɛlɛ alɩwaatʋ ndʋ ɖɩkʋyɩ Guadeloupe yɔ, koobu abalɩñɩnʋ nɔɔyʋ tɔzɩ-ɖʋ Yesu tɔm ndʋ tɩwɛ Maatiyee 13:38 taa yɔ tɩ-yɔɔ. Ɛyɔɔdaa se: “Hayɩm kɛlɛ ɛjaɖɛ.” Pʋyɔɔ lɛ, alɩwaatʋ ndʋ pɛlɛɣzɩɣ-ɖʋ tʋmɩyɛ yɔ, ɖɩtɔzʋʋ se ɖɩwɛ hayɩm kʋɖʋmam mbʋ pɩ-taa, paa le ɖɩtɩɩwɛɛ yɔ. Toovenim taa lɛ, ɛyaa nɛ kooka pɔ-tɔm kɩlɩnɩ cɛyʋʋ!

Ðɩtalɩɣ kooka kɩfalaɣ nakɛyɛ taa lɛ, ɖɩnaɣ se lalaa wɛɛ nɛ panɩɣ leleŋ pe-wezuu caɣʋ taa peeɖe. Pʋyɔɔ lɛ, ɖɩñakɩ pana se ɖɩcaɣ wezuu ɛzɩ peeɖe mba yɔ. Tɔɔnaɣ pɩzɩɣ nɛ kɛwɛɛ ndɩ, ɛlɛ ɖɩtɔkɩ mbʋ pɔtɔkɩ yɔ nɛ ɖɩñɔʋ mbʋ pɔñɔʋ yɔ nɛ ɖɩñakɩ pana se ɖɩcɔnɩ ɖo-tomnaɣ taa alaafɩya ɖeɖe camɩyɛ. Ðɩñakɩ pana se ɖɩyɔɔdɩ tɔm kɩbandʋ paa tʋmɩyɛ nɖɩ lɛ ɖɩ-yɔɔ.

Marie-Line: Ðɩkpɛlɩkɩɣ ɖɔɖɔ lɔŋ sakɩyɛ ɖenɖe ɖiwoki yɔ peeɖe koobiya cɔlɔ. Mɔntɔzʋʋ alɩwaatʋ ndʋ ɖɩcalɩ talʋʋ Kuyaanɩ kajalaɣ ɖeɖe yɔ tɩ-yɔɔ. Tɛʋ kaawɛ nɛ kɩnɩɣ siŋŋ nɛ pʋyɔɔ lɛ ɖɩmaɣzɩ se pɩpɔzʋʋ se ɖɩɖaŋ nɛ kɩfɛɛ pʋcɔ nɛ ɖɩɖɛɛ tɔm susuu. Peeɖe koobu halɩñɩnʋ nɔɔyʋ pɔzɩ-m se: “Ðɩpɩzɩɣ nɛ ɖɩɖɛɛ?” Pɩɖɩɣzɩ-m nɛ mɔnpɔzɩ-ɩ se: “Ɛzɩma tɩyɛ?” Ecosi-m se: “Kpaɣ ñɛ-tɛ lɛɛma, nɛ ɖɩkpaɣ ɖɛ-cɛɛcɛnaa nɛ ɖɩɖɛɛ.” Peeɖe mɛnkpɛlɩkɩ ɛzɩma mɔnɖɔkɩ lɛɛma nɛ mansaa cɛɛcɛ yɔ. Ye mantaakpɛlɩkɩ labʋ mbʋ yɔ, wiɖiyi mantaasusi tɔm tɛʋ alɩwaatʋ taa kpa!

Ɩlɛɣzɩ lona ɛzɩ tam 15 mbʋ yɔ. Ɩwɛnɩ lɔŋ nɩɩyɩ se ɩtasɩɣ lalaa pɩlɩɩnɩ lona lɛɣzʋʋ yɔɔ?

Marie-Line: Lone lɛɣzʋʋ pɩzɩɣ nɛ pɩkɛ kaɖɛ pʋyʋ. Ɛlɛ pɩcɛyaa se ŋhiɣ lone nɖɩ ɖɩ-taa ŋpɩzɩɣ nɛ ŋhɛzɩ camɩyɛ alɩwaatʋ ndʋ ŋlɩɣnɩ tɔm susuu nɛ ŋpɩsɩ yɔ.

Jack: Ðoŋ ɖoŋ lɛ, manɖaɣnaɣ taʋ tɔlɩm ɖa-ɖɩɣa kɩfalaɣ taa. Ye ɛgbɛyɛ piliŋa taa koobiya ɩnawa se ɖɩɩkaɣ lone naɖɩyɛ taa caɣʋ se pileɖi yɔ, pɔyɔɔdʋʋ ɖoŋ ɖoŋ se: “Jack, taahʋʋ tɔlɩm taʋ yɔɔ lɛɛlɛɛyɔ!”

Marie-Line kɛ wondu kpeɣliyu weyi ɛwɛ niye yɔ! Ɛɖʋʋ wondu huyiŋ taa nɛ ɛmaɣ huyiŋ ɛnɩ ɩ-yɔɔ hɩla ɛzɩ “lɩm ɖɩzɔyɛ,” “ɖɩhɛnɩyɛ,” “nɛ tɔɔnaɣ ɖɩdɩzɩyɛ” mbʋ yɔ. Piyeki nɛ alɩwaatʋ ndʋ ɖɩtalɩɣ ɖa-ɖɩɣa kɩfalaɣ taa yɔ, pɩpɩzɩɣ nɛ pɩwɛɛ-ɖʋ kɛlɛʋ se ɖɩsɩɩ paa huyuu ŋgʋ lɛ ki-kuduyuu tɛɛ. Ɛmaɣ  takayaɣ nakɛyɛ yɔɔ wondu ndʋ tɩwɛ paa huyuu ŋgʋ lɛ kɩ-taa yɔ tɩ-hɩla se pɩsa nɛ ye ɖɩñɩnɩɣ nabʋyʋ lɛ ɖɩpɩzɩ nɛ ɖɩna-pʋ lɔŋ.

Marie-Line: Ɛzɩma ɖɩkpɛlɩkɩ ɖʋtʋ labʋ camɩyɛ yɔ pʋyɔɔ lɛ, ɖɩpɩzɩɣ nɛ ɖɩpaɣzɩ tɔm susuu kpaagbaa.

Ɛzɩma ɩlakɩnɩ mɩ-alɩwaatʋ tʋmɩyɛ se pɩsa nɛ ‘ɩla mɩ-Ɛsɔ sɛtʋ tʋmɩyɛ kiya’?—2 Tim. 4:5.

Marie-Line: Paa Hodo ŋgʋ lɛ, ɖɩhɛzɩɣ nɛ ɖɩñɔɔzʋʋ kediɣzisi. Kpaɣnɩ Piya nɛ pɩɖɛɛ lɛ, ɖiwoki tɔm susuu.

Jack: Paa pɩwɛɛ se ɖisusi tɔm nɛ pɩtalɩ ñɩɣtʋ natʋyʋ paa fenaɣ ŋga yɔ, ɖɩɩkaŋ ɖa-lɩmaɣza pɩ-yɔɔ. Tɔm susuu tɔm kɩlɩnɩ cɛyʋʋ ɖe-wezuu caɣʋ taa. Kpaɣnɩ alɩwaatʋ ndʋ ɖɩlɩɣ ɖɩɣa nɛ pɩkɔɔ pɩsɩɩnɩ alɩwaatʋ ndʋ ɖɩpɩsɩɣ yɔ, ɖɩñakɩ pana se ɖɩyɔɔdɩnɩ mba payɩ ɖɩkatɩɣ yɔ.

Marie-Line: Alɩwaatʋ ndʋ ɖiwoki aleɣya naayɛ taa mbʋ yɔ, paa ɛzɩmtaa lɛ mɔnɖɔkʋʋ traktɩwaa mɔ-yɔɔ. Ɛyaa nabɛyɛ ñɔtʋʋnɩ-ɖʋ nɛ pɔpɔzʋʋ-ɖʋ takayɩsɩ, paa ɖitiheyi-wɛ se ɖɩkɛ Yehowa Aseɣɖe Tɩnaa yɔ. Pʋyɔɔ ɖɩñakɩ pana se ɖo-wondu suu nɛ ɖɛ-wɛtʋ ɩmʋnɩ camɩyɛ. Pɩkɛ mbʋ ɛyaa yʋsʋʋ lɔŋ yɔ.

Jack: Ðɩlɩzɩɣ aseɣɖe ɖɔɖɔ pɩtɩŋnɩ ɛzɩma ɖɩlakɩ camɩyɛ lakasɩ ɖɔ-cɔlɔ ñɩma yɔ pɩ-yɔɔ. Menteɣziɣ takayɩsɩ tataa, mɔlɔʋ ñɩtʋ ndʋ tɩwɛ ñɩtʋ ɖɔkʋ taa yɔ nɛ mɔñɔɔzʋʋ kaɖaɣ ŋga kɔcɔ ɖa-ɖɩɣa nɛ kata yɔ ka-taa. Ðɔ-cɔlɔ ñɩma naɣ mbʋ nɛ pɔpɔzʋʋ nabʋyʋ taa se: “Pɩtɩla ŋfɛyɩnɩ Bibl nɛ ŋha-m?”

Isusi tɔm ɖoŋ ɖoŋ poliŋ kookasɩ taa. Ɩtɔzʋʋ nabʋyʋ yɔɔ nʋmɔŋ ɛnɩ ɩ-ɖɔm taa?

Jack: Kuyaanɩ ɛjaɖɛ taa lɛ, pɩwɛ kaɖɛ se ɛyʋ ewolo kookasɩ nasɩyɩ taa. Ðoŋ ɖoŋ lɛ, pɩwɛɛ se ɖɩɖɔ nʋmɔʋ kilomɛtanaa 600 kpɩtaʋ kʋɖʋmʋʋ taa, habɛɛ wena afɛyɩ ɖeu yɔ a-yɔɔ. Ðɩɩsɔʋ alɩwaatʋ ndʋ ɖiwobi Saint-Élie, Amaazoonii laʋ tɛɛ yɔ tɩ-yɔɔ. Pɩɩkpaɣ-ɖʋ ñɩɣtʋ sakɩyɛ pʋcɔ nɛ ɖɩtalɩ peeɖe, nɛ pɩɩwɛɛ se ɖɩsʋʋ lɔɔɖɩyɛ nɛ kpɩyʋʋ. Ɛyaa mba paawɛ peeɖe yɔ pa-taa sakɩyɛ kaakɛ sika huyiyaa. Pɩsa nɛ pawɩlɩ ɛsɩmɩyɛ takayɩsɩ nzɩ ɖɩhaɣ-wɛ yɔ sɩ-yɔɔ lɛ, pa-taa nabɛyɛ haɣaɣ sika paɣ cikpena! Ðanaɣ yɔɔ lɛ, ɖɩwɩlɩ ɛgbɛyɛ video nakʋyʋ. Peeɖe mba sakɩyɛ kɔma nɛ pɔcɔnɩ-kʋ.

Marie-Line: Pitileɖi yɔ, paha Jack waɖɛ se ɛyɔɔdɩ samaɣ taa tɔm, Yesu sɩm yɔɔ tɔzʋʋ sɔnzɩ wiye Camopi tɛtʋ cikpetu taa. Pʋcɔ nɛ ɖɩtalɩ peeɖe lɛ, ɖɩsʋ kpɩyʋʋ nɛ ɖɩɖɔ nʋmɔʋ ñɩɣtʋ naanza Oyapock pɔɔ yɔɔ. Pɩɩkɛ alɩwaatʋ kɩbandʋ kpem.

Jack: Ðenɖe pɔɔ taa lɩm falaɣ ɖoŋ yɔ, peeɖe ɖɔm pɩzaɣ se pɩwɛɛ kaɖɛ kpem. Toovenim taa lɛ, alɩwaatʋ ndʋ ɖɩnaɣ kpɩyʋʋ ñɔtʋʋnɩ lona ana yɔ, pɩkpaɣaɣ-ɖʋ sɔɔndʋ kpem. Pɩɩwɛ se kpɩyʋʋ sayʋ ɛwɛɛ niye pʋcɔ nɛ ɛpɩzɩ ɛɖɔ lona ana a-taa. Ɛlɛ pɩɩkɛ alɩwaatʋ kɩbandʋ. Paa Aseɣɖe Tɩnaa loɖo ɖeke kaawɛna yɔ, ɛyaa ɛzɩ 50 mbʋ yɔ kaakɔmnɩ Yesu sɩm yɔɔ tɔzʋʋ sɔnzɩ ɖɩlaɖɛ, pɩkpɛndɩnɩ ɛyaa mba payaɣ-wɛ se Amérindiens waa yɔ pa-taa nabɛyɛ!

Marie-Line: Piya evelisi pɩzɩɣ nɛ sihiɣ taa leleŋ ɛnɩ, ye sɩha sɩ-tɩ se sɩla Yehowa tʋma nɛ pɩkpaɖɩ yɔ. Pɩwɛɛ se ɛyʋ ɛtaa Yehowa liu wɛtʋ ndʋ tɩ-taa, nɛ pɩkpazɩ e-tisuu ɖoŋ. Ðɩnaɣaɣ ɖoŋ ɖoŋ ɛzɩma Yehowa wɛɛ nɛ ɛsɩɣnɩ-ɖʋ yɔ.

Ɩkpɛlɩkɩ kʋnʋmɩŋ sakɩyɛ. Kʋnʋmɩŋ kpɛlɩkʋʋ wɛ-mɩ kɛlɛʋ na?

Jack: Aayɩ. Mɛnkpɛlɩkɩ kʋnʋmɩŋ ɛnɩ se pɩsa nɛ monsusi tɔm nɛ mansɩnɩ ɛgbɛyɛ. Pɩɩwɛ se mɔncɔnɩ Feŋuu Tilimiye Kpɛlɩkʋʋ yɔɔ Sranan tongo * kʋnʋŋ taa, halɩ pʋcɔ nɛ paha-m Bibl kalʋʋ! Mɔnpɔzɩ koobu nɔɔyʋ se mana se panɩɣ ndʋ mɔyɔɔdʋʋ yɔ tɩ-taa. Ecosi se: “Nabʋyʋ taa ɖɩɩnɩɣ tɔm pee lɛɛna taa, ɛlɛ pɩɩwɛ ɖeu kpem.” Piya kaasɩnɩ-m kpem. Alɩwaatʋ ndʋ piyiɣdiɣ-m yɔ siheyiɣ-m, ɛlɛ sɔsaa ñaalakɩ mbʋ. Mɛnkpɛlɩkɩ tɔm sakɩyɛ piya evelisi cɔlɔ.

Marie-Line: Egeetiye naɖɩyɛ taa, pɩɩpɔzaa se mɛnkpɛlɩkɩnɩ ɛyaa Bibl Fransɩɩ, Pɔrtiigaalɩ nɛ Sranan tongo kʋnʋmɩŋ taa. Koobu halɩñɩnʋ nɔɔyʋ kaatasɩ-m lɔŋ se manpaɣzɩnɩ kʋnʋŋ ŋgʋ maanɩɣ camɩyɛ yɔ nɛ mɛntɛzɩnɩ ŋgʋ manɩɣ camɩyɛ yɔ. Pitileɖi lɛ, manɩɩ pɩ-taa se lɔŋsɩnɖɛ wɛ lɔŋ tasʋʋ mbʋ pɩ-taa.

Kɩyakʋ nakʋyʋ, pɩɩpɔzaa se mɛnkpɛlɩkɩnɩ nabɛyɛ Bibl; kajalaɣ tʋ Sranan tongo kʋnʋŋ taa, nɛ lɛlʋ Pɔrtiigaalɩ kʋnʋŋ taa. Manpaɣzɩ  naalɛ tʋ kpɛlɩkɩnʋʋ lɛ, koobu halɩñɩnʋ weyi ma nɛ ɩ ɖiwoba yɔ, eheyi-m se: “Marie-Line, mamaɣzɩɣ se nabʋyʋ ɛɛɖɔŋ camɩyɛ!” Peeɖe menɖiɣzinaa se maawɛ nɛ mɔyɔɔdʋʋnɩ Preeziili halʋ Sranan tongo kʋnʋŋ, ŋgʋ Pɔrtiigaalɩ kʋnʋŋ pɩɩwɛ se mɔyɔɔdɩnɩ-ɩ.

Mba mɩ nɛ wɛ ɩɩlabɩ tʋmɩyɛ yɔ, paasɔɔlɩ-mɩ siŋŋ. Ɛzɩma ɩpɩzaa iyele nɛ taabalɩyɛ wɛɛ mɩ nɛ koobiya mɩ-hɛkʋ taa?

Jack: Aduwa 11:25 yɔɔdʋʋ se: “Ciyam weyi ɛlakɩ kɩbandʋ yɔ, pakaɣ-ɩ haɣzʋʋ.” Ðɩkpakaɣ ɖa-alɩwaatʋ nɛ ɖa nɛ lalaa ɖɩcakɩ nɛ ɖɩsɩɣnɩ-wɛ. Kewiyaɣ Kpaaŋ ñɔɔzʋʋ hɔɔlʋʋ taa lɛ, nabɛyɛ kaaheyi-m se: “Yebini tɔm susuyaa tʋmɩyɛ nɖɩ.” Ɛlɛ moncosuu se: “Ɛɛɛ, ma ɖɔɖɔ mɛnkɛ tɔm susuyu. Pʋyɔɔ lɛ, ye pɩpɔzʋʋ se pala tʋmɩyɛ naɖɩyɛ yɔ, mɔnsɔɔlaa se mɛwɛɛ peeɖe.” Paa pɩpɔzʋʋ ɖa-taa paa anɩ alɩwaatʋ natʋyʋ ɛ-tɩ yɔɔ yɔ, ɖoŋ ɖoŋ lɛ ɖɩtɔzaɣ ɖa-tɩ se ɖɩtɩsɔɔlɩ se alɩwaatʋ ndʋ tɩɖɩɣ-ɖʋ nʋmɔʋ nɛ ɖiyele labʋ kɩbandʋ lalaa.

Marie-Line: Ðɩñaɣ pana se ɖɩwɩlɩ se ɖɩmaɣzɩɣ ɖo-koobiya kɛzɛɣa yɔɔ. Piyeba nɛ ɖɩpɩzɩ nɛ ɖɩtɩlɩ alɩwaatʋ ndʋ pañɩnɩɣ se nɔɔyʋ ɛcɔnɩ pe-piya yɔɔ, yaa ewolo nɛ ɛkpaɣ-sɩ sukuli taa yɔ. Pʋwayɩ lɛ, ɖɩpɩzaɣ se ɖɩɖaɣnɩ labʋ ɖʋtʋ se pɩsa nɛ ɖihiɣ alɩwaatʋ nɛ ɖɩsɩnɩ-wɛ. Nʋmɔʋ ŋgʋ kɩ-yɔɔ ɖɩtɩŋnaa nɛ ɖa nɛ lalaa ɖɩpɩsɩ taabalaa kɩbama, nɛ ɖɩhaɣ ɖa-tɩ faaa se ɖɩɖʋ-wɛ nesi alɩwaatʋ ndʋ pɩpɔzʋʋ-wɛ sɩnʋʋ yɔ.

Wazasɩ nzɩ ihiɣaa alɩwaatʋ ndʋ ɩɖʋ nesi lona wena a-taa pɩpɔzʋʋ tɔm susuyaa yɔ?

Jack: Alɩwaatʋ tɩŋa Ɛsɔ sɛtʋ tʋmɩyɛ yeba nɛ ɖihiɣ wazasɩ sakɩyɛ ɖe-wezuu caɣʋ taa. Ðoŋ ɖoŋ lɛ, ɖɩɩwɛnɩ waɖɛ se ɖɩna Yehowa wondu kɩlɩzɩtʋ ndɩ ndɩ nɛ pɩhaɣ-ɖʋ taa leleŋ. Paa ɖɩɩkatɩ kala yɔ, ɖɩwɛnɩ maɣzɩm taa laŋhɛzɩyɛ mbʋ pʋyɔɔ yɔ, ɖɩnawa se paa le ɖɩtɩɩwɛɛ yɔ, Ɛsɔ samaɣ ɖʋʋ-ɖʋ nesi.

Maakɛ pɩɣa evelaɣ lɛ, paɖʋ-m salaka Kuyaanɩ mbʋ pʋyɔɔ yɔ, menkizaa se maalakɩ sɔɔjatʋ tʋmɩyɛ. Mantaamaɣzɩ kpa se wiɖiyi mankaɣ labʋ Ɛsɔtɔm tiyiyu tʋmɩyɛ peeɖe nɛ paha-m nʋmɔʋ se mansʋʋ salakanaa taa nɛ monsusi tɔm. Toovenim taa lɛ, Yehowa wazɩɣ faaa!

Marie-Line: Mbʋ pɩhaɣ-m taa leleŋ nɛ pɩkpaɖɩɣ yɔ lɛ ɛzɩma mahaɣ man-tɩ faaa nɛ mansɩɣnɩ lalaa yɔ. Ða-taa wɛ leleŋ se ɖɩwɛ Yehowa tʋmɩyɛ taa. Pɩsɩnɩ-ɖʋ ɖɔɖɔ nɛ ɖe-nesi ɖɔkʋʋ cɛyɩsɩ. Nabʋyʋ taa, Jack pɔzʋʋ se ɛna se ɖɩpɩzɩɣ nɛ ɖɩyaa nesi ɖɔkɩyaa mba pitibi-wɛ yɔɔɔ yɔ nɛ ɖa nɛ wɛ ɖɩtɔɔ tɔɔnaɣ na. Ðoŋ ɖoŋ lɛ moncosuu se: “Mbʋ ɖɔɖɔ maawɛɛ nɛ mamaɣzɩɣ!” Alɩwaatʋ sakɩyɛ taa lɛ, ɖa-naalɛ ɖɩmaɣzɩɣ tɔm kʋɖʋmtʋ yɔɔ.

Jack: Pitileɖi yɔ, payʋsaa se mɛwɛnɩ kansɛɛrɩ kʋdɔŋ nakʋyʋ. Paa Marie-Line ɛtɩsɔɔlɩ se ɛnɩɩ tɔm tʋnɛ yɔ, meheyi-i se: “Man-kʋsɔɔlaɣ, mantɩkpadɩyɩta ɛlɛ ye mansɩbɩ lɛɛlɛɛyɔ yɔ, manawa se mankpaɣ me-wezuu nɛ malabɩnɩ mbʋ pɩmʋ ñɩm siŋŋ yɔ, mɛnsɛɛnɩ Yehowa, nɛ pɩhaɣ-m taa leleŋ.”—Kiɖe 25:8.

Marie-Line: Yehowa ɖʋ-ɖʋ tʋma wena a-yɔɔ ɖɩtaamaɣzɩ kpa yɔ, nɛ ɛha-ɖʋ waɖɛ se ɖɩla mbʋ ɖɩtaamaɣzɩ pɩ-yɔɔ yɔ. Toovenim taa lɛ, ɖe-wezuu suni wondu kɩbandʋ. Paa le Yehowa ɛgbɛyɛ eheyiɣ-ɖʋ se ɖiwolo yɔ, ɖɩkaɣ wobu mbʋ pʋyɔɔ yɔ ɖɩwɛnɩ lidaʋ se Yehowa kaɣ-ɖʋ sɩnʋʋ paa ɛzɩmtaa!