دجەك پەن ماري-‏لاين 1988-‏جىلدان بەرى تولىق ۋاقىتتى قىزمەتتە.‏ بەيىمدەلگىشتىكتەرىنىڭ ارقاسىندا بۇل باۋىرلاستار گۆادەلۋپا مەن فرانسۋز گۆياناسىندا ٵرتۇرلى قىزمەت اتقاردى.‏ بۇل ەكى جەر دە قازىر فرانسيا فيليالىنىڭ قاراماعىندا.‏ دجەك پەن ماري-‏لاين باۋىرلاستارىمىزعا بىرنەشە سۇراق قويىپ كورەيىك.‏

تولىق ۋاقىتتى قىزمەتتى باستاۋعا سىزدەردى نە تالپىندىردى؟‏

ماري-‏لاين:‏ بالا كۇنىمدە گۆادەلۋپادا اناممەن بىرگە كۇنى بويى ۋاعىزدايتىنمىن.‏ انام قۇلشىنىستى جاريالاۋشى ەدى.‏ مەن ادامداردى جاقسى كورەمىن.‏ سوندىقتان 1985-‏جىلى مەكتەپتى بىتىرە سالىسىممەن ىزاشارلىق قىزمەتتى باستاپ كەتتىم.‏

دجەك:‏ جاس كەزىمدە اينالامداعى باۋىرلاستاردىڭ كوبى قىزمەت دەسە ىشكەن اسىن جەرگە قوياتىن تولىق ۋاقىتتى قىزمەتشىلەر ەدى.‏ ٶزىم كانيكۋل كەزدەرى قوسالقى ٸزاشار بولىپ قىزمەت ەتەتىنمىن.‏ ال دەمالىس كۇندەرى اۆتوبۋسپەن ٸزاشارلار قىزمەت ەتەتىن اۋماققا قاراي جول تارتاتىنبىز.‏ ٴ‌بىز كۇنى بويى ۋاعىزداپ،‏ كەشكىسىن جاعاجايعا باراتىنبىز.‏ سول كۇندەر قىزىققا تولى كۇندەر ەدى!‏

1988-‏جىلى ماري-‏لاينعا ۇيلەنگەننەن كەيىن:‏ «ٴ‌بىزدى ۇستاپ تۇرعان ەشتەڭە جوق،‏ نەگە كوبىرەك قىزمەت ەتپەسكە؟‏»—‏ دەپ ويلادىم.‏ ٴ‌سۇيتىپ،‏ مەن دە ايەلىمە قوسىلىپ،‏ ىزاشارلىق قىزمەتتى باستاپ كەتتىم.‏ ٴ‌بىر جىلدان كەيىن ىزاشارلىق مەكتەپتە وقىعان سوڭ،‏ ارنايى ٸزاشار بولىپ تاعايىندالدىق.‏ ٴ‌بىز فرانسۋز گۆياناسىنا كوشۋگە شاقىرىلماي تۇرىپ،‏ گۆادەلۋپادا بىرنەشە قىزمەتكە تاعايىندالىپ،‏ ولاردى قۋانا اتقاردىق.‏

جىلدار بويى قىزمەتتەرىڭىزدە ٵرتۇرلى وزگەرىستەر بولدى.‏ جاڭا جاعدايعا ۇيرەنىپ كەتۋگە سىزدەرگە نە كومەكتەستى؟‏

ماري-‏لاين:‏ فرانسۋز گۆياناسىنداعى بەتەلدەگى باۋىرلاستار ٴ‌بىزدىڭ سۇيىكتى تارماعىمىز يشايا 6:‏8 ەكەنىن بىلەتىن.‏ سوندىقتان ولار بىزگە قوڭىراۋ شالعاندا ٴ‌جيى اڭگىمەلەرىن قالجىڭداپ:‏ «سۇيىكتى تارماقتارىڭ ەستەرىڭدە مە؟‏»—‏ دەپ باستايتىن.‏ سوندا ٴ‌بىز  قىزمەتىمىزدىڭ وزگەرگەلى جاتقانىن تۇسىنەتىنبىز.‏ ٴ‌سۇيتىپ:‏ «ٴ‌بىز بارمىز!‏ ٴ‌بىزدى جىبەر!‏»—‏ دەيتىنبىز.‏

ٴ‌بىز تاعايىندالعان قىزمەتىمىزدى بۇرىنعىسىمەن سالىستىرمايمىز.‏ بۇل ٴ‌بىزدى جاڭا قىزمەتىمىزدى باعالاماي كەتۋدەن قورعايدى.‏ سونداي-‏اق باۋىرلاستارمەن جاقىن تانىسۋ ٷشىن ٶزىمىز ٴ‌بىرىنشى بولىپ ارەكەت ەتەمىز.‏

دجەك:‏ كەيبىر دوستارىمىز كەتكەنىمىزدى قالاماعاندىقتان،‏ يگى نيەتپەن ٴ‌بىزدى كوشپەۋگە كوندىرگىلەرى كەلدى.‏ ٴ‌بىراق گۆادەلۋپادان كەتكەنىمىزدە ٴ‌بىر باۋىرلاس ماتاي 13:‏38 دەگى يسانىڭ:‏ «ەگىندىك —‏ وسى دۇنيە»،‏—‏ دەگەن سوزدەرىن ەسىمىزگە سالدى.‏ سودان قىزمەتىمىز وزگەرگەن سايىن،‏ قاي جەردە جۇرسەك تە ٴ‌بىر «ەگىندىكتە» ەڭبەك ەتىپ جۇرگەنىمىزدى ەسىمىزدە ۇستايمىز.‏ بارىنەن ماڭىزدىسى ادامدار مەن ۋاعىزدايتىن اۋماق قوي!‏

جاڭا اۋماققا كەلگەندە،‏ سول جەردىڭ تۇرعىندارى جاپ-‏جاقسى ٶمىر سۇرەتىندەرىن كوردىك.‏ سوندىقتان ٴ‌بىز دە سولار سياقتى ٶمىر سۇرۋگە تىرىستىق.‏ تاعامدارى باسقا بولسا دا،‏ دەنساۋلىعىمىزعا قاراي،‏ ٴ‌بىز دە ولار نە جەسە،‏ سونى جەپ،‏ نە ىشسە،‏ سونى ىشتىك.‏ ٵربىر قىزمەتىمىز جايلى تەك جاقسى پىكىر ايتۋعا تىرىساتىنبىز.‏

ماري-‏لاين:‏ سونداي-‏اق جەرگىلىكتى باۋىرلاستاردان دا كوپ نارسەگە ۇيرەندىك.‏ فرانسۋز گۆياناسىنا العاش كەلگەنىمىز ەسىمدە.‏ ٴ‌بىر كۇنى جاڭبىر شەلەكتەپ قۇيىپ تۇردى.‏ ٴ‌بىز قىزمەتكە جاڭبىر باسىلعان سوڭ شىعامىز دەپ ويلادىق.‏ ٴ‌بىراق ٴ‌بىر ايەل باۋىرلاس مەنەن:‏ «قىزمەتكە بارۋعا دايىنسىڭ با؟‏»—‏ دەپ سۇرادى.‏ مەن تاڭعالىپ:‏ «قالاي بارامىز؟‏»—‏ دەدىم.‏ ول بولسا:‏ «قولشاتىرىڭدى الىپ ال،‏ ۆەلوسيپەدپەن بارامىز»،‏—‏ دەدى.‏ وسىلايشا ٴ‌بىر قولىممەن قولشاتىر ۇستاپ،‏ ٴ‌بىر قولىممەن ۆەلوسيپەد ايداۋدى ۇيرەندىم.‏ بۇنى ۇيرەنبەگەنىمدە،‏ جاڭبىرلى كۇندەرى ۋاعىزعا شىعا الماس ەدىم.‏

سىزدەر شامامەن 15 رەت كوشىپ-‏قونىپ جۇرگەن ەكەنسىزدەر.‏ كوشۋگە قاتىستى قانداي ٴ‌تيىمدى كەڭەس ايتاسىزدار؟‏

ماري-‏لاين:‏ كوشىپ-‏قونۋ وڭاي شارۋا ەمەس.‏ ٴ‌بىراق قىزمەتتەن قايتقاندا ٶز ۇيىڭدەي بولاتىن باسپانا تابۋ وتە ماڭىزدى.‏

دجەك:‏ مەن ادەتتە جاڭا ۇيىمىزدىڭ ٸشىن بويايمىن.‏ فيليالداعى باۋىرلاستار ٴ‌بىزدىڭ سول جەردە كوپ بولمايتىنىمىزدى بىلسە،‏ كەيدە ماعان قالجىڭداپ:‏ «دجەك،‏ بۇل جولى قابىرعالارعا تيىسپەي-‏اق قوي»،‏—‏ دەپ ايتاتىن.‏

 ماري-‏لاين بۋىپ-‏تۇيۋدىڭ قاس شەبەرى بولىپ العان.‏ ول بارلىق زاتتى قوراپتارعا سالىپ،‏ سىرتىنا «جۋىناتىن بولمە»،‏ «جاتىن بولمە»،‏ «اس ٷي» دەپ جازىپ قويادى.‏ سودان جاڭا ۇيگە كەلگەندە،‏ قوراپتاردى قاجەتتى بولمەلەرگە كىرگىزەمىز.‏ سونداي-‏اق ول ٵر قوراپتىڭ سىرتىنا ىشىندەگى زاتتاردىڭ ٴ‌تىزىمىن جازادى.‏ سوندىقتان قاجەتتى زاتتاردى تەز تاۋىپ الامىز.‏

ماري-‏لاين:‏ جيناقى بولىپ ۇيرەنگەنىمىزدىڭ ارقاسىندا قىزمەتىمىزگە بىردەن كىرىسىپ كەتە الامىز.‏

‏«قىزمەتتەرىڭىزدى تولىقتاي اتقارا بەرۋ» ٷشىن ۋاقىتتارىڭىزدى قالاي جوسپارلايسىزدار؟‏ (‏ٴ‌تىم.‏ 2-‏ح.‏ 4:‏5‏)‏.‏

ماري-‏لاين:‏ دۇيسەنبى كۇندەرى دەمالىپ،‏ كەزدەسۋلەرگە دايىندالامىز.‏ ال سەيسەنبىدەن باستاپ قىزمەتكە شىعامىز.‏

دجەك:‏ ساعات نورماسىن ورىنداۋ كەرەك بولسا دا،‏ ٴ‌بىز وعان بايلانىپ قالمايمىز.‏ قىزمەت —‏ ٶمىرىمىزدىڭ وزەگى.‏ سوندىقتان ۇيدەن شىققاننان قايتىپ كەلگەنگە دەيىن جولىقتىرعان ادامداردىڭ بارىمەن سويلەسۋگە تىرىسامىز.‏

ماري-‏لاين:‏ تابيعاتقا شىعىپ دەمالعان كەزدە دە،‏ وزىممەن بۋكلەتتەر الىپ الامىن.‏ كەيبىر ادامدارعا ەحوبا كۋاگەرلەرى ەكەنىمىزدى ايتپاساق تا،‏ ولار بىزدەن ادەبيەتتەر سۇرايدى.‏ سوندىقتان كيگەن كيىمىمىز بەن ٴ‌جۇرىس-‏تۇرىسىمىزعا ٴ‌مان بەرەمىز.‏ ادامدار مۇنداي نارسەلەردى بايقايدى.‏

دجەك:‏ كورشىلەرىمىزگە دە جاقسى كۋالىك بەرۋگە تىرىسامىز.‏ مىسالى،‏ جەردە جاتقان قاعازداردى جيناپ،‏ قوقىس جاشىگىنە تاستايمىن،‏ سونداي-‏اق باقشاداعى جاپىراقتاردى جينايمىن.‏ كورشىلەر مۇنى بايقاپ،‏ كەيدە:‏ «ماعان كيەلى كىتاپ بەرە الاسىز با؟‏»—‏ دەپ سۇرايدى.‏

سىزدەر شالعاي اۋماقتاردا كوپ ۋاعىزدادىڭىزدار.‏ قانداي دا ٴ‌بىر قىزىقتى وقيعالار ەستەرىڭىزدە مە؟‏

دجەك:‏ گۆيانادا كەيبىر ايماقتارعا جەتۋ وتە قيىن.‏ ٴ‌بىز ٴ‌جيى اپتا ىشىندە جامان جولدارمەن 600 شاقىرىم جول جۇرەتىنبىز.‏ امازونا ورمانىنداعى سەنت-‏ەلي دەگەن اۋىلعا بارعانىمىز ەستەن كەتپەيدى.‏ وندا جەتۋ ٷشىن جول تالعامايتىن كولىكپەن جانە قايىقپەن بىرنەشە ساعات جول جۇردىك.‏ ونداعى تۇرعىنداردىڭ كوبى التىن ىزدەۋشىلەر ەدى.‏ كەيبىرەۋلەر ادەبيەتتەرىمىزگە ساداقا رەتىندە التىننىڭ كىشكەنتاي بولىكتەرىن بەردى.‏ ال كەشكىسىن ولارعا ۇيىمنىڭ ٴ‌بىر بەينەروليگىن كورسەتتىك.‏ جەرگىلىكتى تۇرعىنداردىڭ كوبى كەلدى.‏

ماري-‏لاين:‏ جاقىندا دجەكتى ەسكە الۋ كەشىندە بايانداما ايتۋعا كاموپيگە شاقىردى.‏ وندا جەتۋ ٷشىن ٴ‌بىز وياپوك وزەنى ارقىلى قايىقپەن ٴ‌تورت ساعاتتاي جۇزدىك.‏ بۇل ٴ‌بىر قىزىقتى ساپار بولدى.‏

دجەك:‏ سۋ دەڭگەيى تومەن بولعان كەزدە،‏ وزەندە قايىقپەن ٴ‌جۇزۋ قاۋىپتى.‏ بۇل كورىنىستى ٶز كوزىڭمەن كورۋ وتە اسەرلى ەكەن.‏ وسىنداي كەزدە قايىقشى شەبەر بولۋ كەرەك.‏ ٴ‌بىراق بۇل ساپار بىزگە ۇنادى.‏ وندا 6 عانا كۋاگەر بولسا دا،‏ ەسكە الۋ كەشىنە 50 شاقتى ادام كەلدى.‏ ولاردىڭ ىشىندە امەريكالىق ۇندىستەر دە بولدى.‏

ماري-‏لاين:‏ ەحوباعا كوپ بەرگىسى كەلەتىن جاستار دا وسىنداي قىزىقتى وقيعالاردى باستان كەشىرە الادى.‏ وسىنداي جاعدايلاردا ەحوباعا ارقا سۇيەۋىڭ كەرەك،‏ سوندا سەنىمىڭ نىعايادى.‏ ٴ‌بىز ٴ‌جيى ەحوبانىڭ بىزگە قالاي كومەكتەسىپ جاتقانىنا كۋا بولامىز.‏

سىزدەر بىرنەشە ٴ‌تىل بىلەسىزدەر.‏ ولاردى ۇيرەنۋ وڭاي بولدى ما؟‏

دجەك:‏ وڭاي بولدى دەي المايمىن.‏ قاجەت بولعان سوڭ ٴ‌تىل ۇيرەنبەسكە بولمادى.‏ مەن سرانان-‏تونگو * تىلىندە ٵلى كيەلى كىتاپتى وقىماي جاتىپ،‏ ماعان سول تىلدە «كۇزەت مۇناراسىن» جۇرگىزۋ تاپسىرىلدى.‏ مەن ٴ‌بىر باۋىرلاستان قالاي جۇرگىزگەنىمدى سۇرادىم.‏ ول:‏ «كەيبىر سوزدەرىڭدى تۇسىنبەي قالعان كەزىمىز بولدى،‏ ٴ‌بىراق جالپى جامان ەمەس»،‏—‏ دەدى.‏ بالالاردىڭ كومەگى زور بولدى.‏ ەگەر قاتە جىبەرسەم،‏ ەرەسەكتەر ەمەس،‏ بالالار تۇزەتەتىن.‏ سول بالالاردىڭ ارقاسىندا كوپ نارسە ۇيرەندىم.‏

ماري-‏لاين:‏ ۋاعىزدايتىن اۋماعىمدا فرانسۋز،‏ پورتۋگال،‏ سرانان-‏تونگو تىلدەرىندە زەرتتەۋ ساباقتارىم بولدى.‏ ٴ‌بىر ايەل باۋىرلاس زەرتتەۋ ساباعىن وزىمە قيىن تىلدەن،‏ ياعني  پورتۋگال تىلىنەن باستاپ،‏ وڭايىمەن اياقتاۋعا كەڭەس بەردى.‏ وسى كەڭەستىڭ قانشالىقتى پايدالى ەكەنىن كەيىن ٴ‌تۇسىندىم.‏

بىردە مەن ٴ‌بىرىنشى سرانان-‏تونگو تىلىندە،‏ سوسىن پورتۋگال تىلىندە زەرتتەۋ ساباعىن وتكىزدىم.‏ پورتۋگال تىلىندەگى زەرتتەۋ ساباعىنا كىرىسكەن كەزدە،‏ قاسىمداعى ايەل باۋىرلاس ماعان:‏ «ماري-‏لاين،‏ ول سەنى ٴ‌تۇسىنىپ تۇرعان جوق»،‏—‏ دەدى.‏ سويتسەم،‏ برازيليالىق ايەلگە پورتۋگالشا سويلەۋدىڭ ورنىنا سرانان-‏تونگو تىلىندە سويلەپ وتىر ەكەنمىن!‏

قىزمەت ەتكەن جەرلەرىڭىزدەگى باۋىرلاستار سىزدەردى قاتتى جاقسى كورەدى ەكەن.‏ ولارمەن قالاي جاقىن دوس بولىپ كەتتىڭىزدەر؟‏

دجەك:‏ ناقىل سوزدەر 11:‏25 تە‏:‏ «جومارت جان وركەندەيدى»،‏—‏ دەلىنگەن.‏ ٴ‌بىز وزگەلەر ٷشىن ٶزىمىزدى دە،‏ ۋاقىتىمىزدى دا ايامايمىز.‏ بىردە پاتشالىق سارايىنىڭ جوندەۋ جۇمىسىنا قاتىستى كەي باۋىرلاستار:‏ «بۇل ٸستى جاريالاۋشىلارعا قالدىر»،‏—‏ دەدى.‏ ٴ‌بىراق مەن:‏ «مەن دە جاريالاۋشىمىن عوي.‏ ٴ‌بىتىرۋ كەرەك جۇمىس بولسا،‏ مەن دە قاتىسقىم كەلەدى»،‏—‏ دەدىم.‏ ارينە،‏ ٴ‌بارىمىز دە كەيدە وڭاشا قالعىمىز كەلەدى،‏ ٴ‌بىراق بۇل وزگەلەرگە جاقسىلىق جاساۋعا كەدەرگى بولماۋ كەرەك.‏

ماري-‏لاين:‏ باۋىرلاستارىمىزعا جەكە كوڭىل ٴ‌بولۋ ٷشىن كۇش سالامىز.‏ وسىلايشا كەي باۋىرلاستارعا بالاسىن قارايتىن نە مەكتەپتەن الىپ كەتەتىن ادام كەرەك ەكەنىن ٴ‌بىلىپ جاتامىز.‏ سودان ولارعا كومەكتەسە الۋ ٷشىن جوسپارىمىزدى وزگەرتەمىز.‏ قاجەت كەزدە قاستارىنان تابىلعاندىقتان باۋىرلاستارمەن جاقىن دوس بولىپ كەتتىك.‏

قاجەتتىلىك بار جەردە قىزمەت ەتكەننىڭ قانداي باتالارىن كورىپ جۇرسىزدەر؟‏

دجەك:‏ تولىق ۋاقىتتى قىزمەت ٶمىرىمىزدىڭ ٴ‌سانىن كەلتىردى.‏ ٴ‌بىز ەحوبانىڭ ٵرتۇرلى جاراتىلىستارىن تاماشالاي الامىز.‏ الدىمىزدان قيىندىقتار شىعا كەلسە دە،‏ جانىمىز تىنىش.‏ ويتكەنى قايدا جۇرسەك تە،‏ ەحوبانىڭ حالقى قولدايتىنىن بىلەمىز.‏

جاس كۇنىمدە بەيتاراپتىق ساقتاعانىم ٷشىن فرانسۋز گۆياناسىندا تۇرمەدە وتىرعان ەدىم.‏ كۇندەردىڭ كۇنىندە وسى جاققا ميسسيونەر بولىپ كەلەمىن جانە تۇرمەدەگىلەرگە ۋاعىزدايمىن دەپ ويلاماپپىن.‏ راسىندا دا،‏ ەحوبا بىزگە باتاسىن اياماي توكتى!‏

ماري-‏لاين:‏ وزگەلەرگە كومەكتەسۋ ماعان زور قۋانىش سيلايدى.‏ ەحوبانىڭ ٸسىن اتقارىپ جۇرگەنىمىزگە باقىتتىمىز.‏ سونداي-‏اق ٴ‌بىز ٴ‌بىر-‏بىرىمىزگە جاقىنداي تۇستىك.‏ كەيدە دجەك ماعان:‏ «جىگەرگە مۇقتاج ەرلى-‏زايىپتىنى قوناققا شاقىرايىق»،‏—‏ دەپ ايتادى.‏ سوندا مەن:‏ «مەن دە سونى ويلاپ تۇر ەدىم»،‏—‏ دەيمىن.‏ وسىلاي ويىمىز ٴ‌جيى ٴ‌بىر جەردەن شىعادى.‏

دجەك:‏ جاقىندا ماعان قۋىقاستى بەزىنىڭ قاتەرلى ىسىگى دەگەن ناقتاما قويىلدى.‏ ايەلىمە بۇنى ەستۋ ۇناماسا دا،‏ مەن وعان بىلاي دەدىم:‏ «قىمباتتىم،‏ ەرتەڭ ٶلىپ قالسام،‏ جاسىم ۇلعايعاندىقتان كوز جۇمبايمىن.‏ ٴ‌بىراق ٶمىرىم ەڭ قۇندى نارسەلەرگە،‏ رۋحاني ىستەرگە تولى بولعاندىقتان ەش وكىنىشسىز كەتەمىن» (‏مۇس.‏ 1-‏ج.‏ 25:‏8‏)‏.‏

ماري-‏لاين:‏ ەحوبا بىزگە ەشقاشان ويىمىزعا كەلمەگەن ىستەردى تاپسىردى.‏ ومىرىمىزدە كوپ جاقسى نارسەلەر ورىن الدى.‏ ەحوبانىڭ ۇيىمى ايتقان كەز كەلگەن جەرگە بارۋعا دايىنبىز،‏ ويتكەنى ەحوباعا تولىقتاي سەنەمىز.‏