Щек у Мари-Лин жь сала 1988-да тʹәвайи хьзмәтийа һәртʹьмда ньн. Әԝана пе ве йәке нас ьн, кӧ зу һини гӧһастьна дьбьн, ләма жи ԝана Гԝадәлуп у Гӧйанайа Франсида, бона кʹижана филиала Франсайе щабдар ә, гәләк кʹьфшкьрьн ԛәбул кьрьн. Ԝәрә әм чәнд пьрса бьдьнә Щек у Мари-Лин.

Чь ԝә һелан кьр кӧ хьзмәтийа һәртʹьм дәстпекьн?

Мари-Лин: Әз Гԝадәлупеда мәзьн бумә. Зарʹотийеда мьн гәләк щар тʹәви дийа хԝә, кӧ гәләк хирәт бу, шәбәԛе һʹәта еваре хьзмәт дькьр. Әз мәрьва һʹьз дькьм, ләма жи мьн ча мәкʹтәб хьлаз кьр, сала 1985-да әз бумә пешәнг.

Щек: Щаһьлтийеда дор-бәре мьн гәләк хушк-бьред ӧса һәбун, йед кӧ хьзмәткʹаред һәртʹьм бун у хьзмәти һʹьз дькьрьн. Мьн гәләк щар ԝәʹде татилед мәкʹтәбе ча пешәнге кʹомәкдар хьзмәт дькьр. Щара шәми-ләʹда, әм пе отобусе тʹәви пешәнга дьчунә мьһалед ԝан. Мә тʹәмамийа рʹоже хьзмәт дькьр, у паше еваре дьчунә бәр бәʹре. Әԝ ԝәʹдәки хԝәш у һʹәԝас бу!

Сала 1988 мьн Мари-Лин станд. Һьнә ԝәʹдә шунда, мьн пьрс да хԝә: «Әм аза нә, чьрʹа хьзмәтийеда һе зедә нәкьн?» Ләма әз жи мина Мари-Лин бумә пешәнг. Саләк паши мәктʹәба пешәнга, әм ча пешәнгед мәхсус һатьнә кʹьфшкьрьне. Мә Гԝадәлупеда чәнд щурʹә кʹьфшкьрьнада хьзмәт дькьр у паше мәрʹа готьн, ԝәки дәрбази Гӧйанайа Франси бьн.

Һун нава гәләк салада щурʹә-щурʹә кʹьфшкьрьна ԛәбул дькьн. Ле чь али ԝә дькә, кӧ зу һини кʹьфшкьрьнед тʹәзә бьн?

Мари-Лин: Бьред жь Бәйтʹәла Гӧйанайа Франси заньбун, ԝәки әм гәләк һʹьз дькьн рʹеза жь Ишайа 6:8. Ләма жи чахе әԝана мәрʹа тʹеле дьхьстьн, щара һʹәнәкти мәрʹа дьготьн: «Рʹеза ԝәйә һʹьзкьри те бира ԝә?» Мә заньбу, ԝәки чахе әԝана ве йәке мәрʹа дьбежьн, әԝ те һʹәсабе кӧ кʹьфшкьрьна мә те гӧһастьне, ләма мә щаба ԝан ӧса дьда: «Ва Әм! Мә Бьшиньн!»

Мә кʹьфшкьрьнед хԝәйә бәре бәрамбәри йед тʹәзә нәдькьр, чьмки һәрге мә ӧса бькьра, мә дькарьбу шабун нәстанда. Хенщи ве йәке, мә хԝәрʹа нет дани, ԝәки хушк-бьра нас кьн.

 Щек: Бәре, һьнә һәвалед мә бь дьле хԝәйи сах дьхԝәстьн рʹе мә бьгьрьн, сәва әм дәрбази щики дьн нәбьн, чьмки ԝана дьхԝәст әм жь ԝан дур нәчьн. Ле чахе әм жь Гԝадәлупе чун, бьраки гьлийе Иса ани бира мә кӧ Мәтта 13:38-да ньвисар ьн: «Әʹрд дьнйа йә». Ләма жи чахе кʹьфшкьрьна мә те гӧһастьне, әм тиньн бира хԝә, ԝәки фьрԛи тʹӧнә әм кʹидәре нә, йәкә тʹәмамийа дьнйайе дәшт ә, у мәрьв дьһа ԛимәт у фәрз ьн!

Чахе әм щара пешьн тенә сәр територийа тʹәзә, әм дьвиньн, мәрьв ԝедәре ча дьжин, у әм жи мина ԝан дьжин. Хԝарьна ԝан щурʹәки майин ә, ле әм һини хԝарьн-вәхԝарьна ԝан дьбьн, у чьԛас дькарьн мьԛати сьһʹәт-ԛәԝата хԝә дьбьн. Әм сәр хԝә дьхәбьтьн, сәва сәр һʹәму кʹьфшкьрьнед хԝә позитив бьньһерʹьн.

Мари-Лин: Әм ӧса жи гәләк тьшта жь хушк-бьред ԝедәре һин дьбьн. Те бира мьн чахе әм тʹәзә һатьн Гӧйанайа Франси, рʹожәке мә дьхԝәст бьчуна хьзмәтийе, ле баранәкә ԛайим дьбари. Әм дьфькьрин, кӧ баран вәкә паше әм һәрʹьн. Ле хушкәке жь мьн пьрси: «Тӧ һазьр и әм һәрʹьн?» Әз әʹщебмайи мам, у мьн жерʹа гот: «Әм ча һәрʹьн?» Әԝе жи мьнрʹа гот: «Бәрбарана хԝә һьлдә у әме пе бисиклете һәрʹьн хьзмәтийе». Һьнгеда әз һин бум, ԝәки пе бәрбаране бисиклете бажом. Һәрге әз ве йәке һин нәбума, әзе тʹӧ щар баранада нәчума хьзмәтийе.

Һун ԝәкә 15 щара дәрбази щики тʹәзә бунә. Һуне чь ширәта бьдьнә ԝан хушк-бьра, йед кӧ дьхԝазьн дәрбази щики дьн бьн?

Мари-Лин: Чахе дәрбази щики дьн дьбьн нәһеса йә. Фәрз ә, ԝәки ԝедәре хԝәрʹа маләкә ӧса бьвиньн, кʹидәре һун бькарьбьн паши хьзмәтийе һеса бьн.

Щек: Чахе әм дәрбази маләкә тʹәзә дьбун, гәләк щар мьн мал рʹәнг дькьр, ԝәки һьнәки бәдәԝ у тʹәмьз бә. Бьред жь филиале чахе заньбун кӧ әме гәләк ԝәхт ԝедәре нәминьн, щара мьнрʹа дьготьн: «Щек, ве щаре щәфе нәкʹьшинә, мале рәнг нәкә!»

Мари-Лин буйә һостә ве йәкеда, кӧ һур-мура тʹоп кә. Әԝ һәр тьшти дькә ԛӧтʹийа у сәр дьньвисә кӧ чь һур-мур ьн, мәсәлә «йед дәставе», «йед отʹахе», йан жи «йед кʹох». Ләма жи чахе әм дәрбази маләкә тʹәзә дьбьн, мәрʹа дьһа һеса йә һәр ԛӧтʹики дайньн щийе ԝе. Әԝ һьн жи башԛә дьньвисә кӧ һәр ԛӧтʹийада чь һәйә, у мәрʹа һеса йә зу бьвиньн тьштед кӧ мәрʹа лазьм ьн.

 Мари-Лин: Әм һин бунә организә у тʹәрбәт бьн. Бь сайа ве йәке әм хьзмәтийа хԝә щийе тʹәзәда зу дәстпедькьн.

Һун ча ԝәʹде хԝә пʹарәвәдькьн, сәва «ԛӧльхе хԝә» бьԛәдиньн? (2 Тимтʹ. 4:5)

Мари-Лин: Әм Дӧшәма рʹьһʹәт дьбьн у бона щьвате хԝә һазьр дькьн. Ле жь Сешәме дәстпекьри һʹәта хьлазийа һʹәфтийе, әм хьзмәт дькьн.

Щек: Рʹаст ә борщдарийа мә һәйә кӧ чьԛас сьһʹәт хьзмәт кьн, ле һʹьш-аԛьле мә сәр сьһʹәта нинә. Әʹмьре мәда хьзмәти щийе сәрәкә дьгьрә. Һәма әм ча жь мал дәрдькʹәвьн, әм чьԛас дькарьн ԝан һʹәмуйарʹа йед кӧ рʹасти мә тен, шәʹдәтийе дьдьн һʹәта вәдьгәрʹьн мал.

Мари-Лин: Чахе әм дьчьн пикнике, әз һәр гав тʹәви хԝә бәлавока һьлдьдьм. Щара һе әм набежьн, кӧ әм Шәʹдед Йаһоԝа нә, һьнә мәрьв хԝәха незики мә дьбьн у әʹдәбйәта жь мә дьхԝазьн. Ләма жи кʹьнщхԝәкьрьн у рʹабун-рʹуньштьнеда әм гәләк фәсал ьн, чьмки мәрьв дина хԝә дьдьн сәр ве йәке.

Щек: Әм ӧса жи шәʹдәтийе дьдьн бь ве йәке, кӧ щинарарʹа һʹәйф ьн. Әз дор-бәре мала хԝә у щинара сәр әʹрде кʹахаза тʹоп дькьм, гәмаре дьбьм давежьм, у нав бахчә бәлга тьрмьх дькьм у тʹәмьз дькьм. Щинаред мә ве йәке дьвиньн у щара дьпьрсьн: «Кʹьтеба Пироз бал ԝә һәйә кӧ бьдьнә мьн?»

Һун гәләк щар дьчьн щийе дур хьзмәт дькьн. Кʹижан ԛәԝьмандьна мәхсус ԝәйе мәрʹа гьли кьра?

Щек: Гӧйанайеда чәтьн ә бьгьһижьнә һьнә щийа. Пʹьрʹ щара әм һʹәфтекеда 600 километьр рʹийед хьрабрʹа дьчьн. Бира мә начә чахе әм чунә Сан Ели, кӧ меше Амазонеда йә. Әм пе әʹрәба кӧ рʹийед чәтьнрʹа дьчә у пе ԛәйька бь мотор, нава чәнд сьһʹәтада гьһиштьнә ԝи щийи. Мәрьвед ԝедәре һʹәчʹи зәʹф шьхӧле ԝан әԝ ә, кӧ әʹрдеда зерʹ дьгәрʹьн. Жь ԝан һьнәка һурькед зерʹа ча ԛӧрбанкьрьн данә мә, бь ве йәке ԝана рʹазибуна хԝә данә кʹьфше бона әʹдәбйәтед мә! Еваре мә мәрьвед ԝи щийирʹа видеокә тʹәшкиләта мә нишан кьр. Гәләк мәрьв тʹоп бьбун.

Мари-Лин: Чәнд сал пешда Щекрʹа готьн, ԝәки һәрʹә Камопийе готара бона Евара Биранине бьхунә. Әм чар сьһʹәта пе ԛәйька бь мотор Чʹәме Ойапокерʹа чун. Әԝ ԝәʹдәки хԝәш у һʹәԝас бу!

Щек: Ви чʹәмида, щийед кӧ ав ньмьз у гӧрʹ бу, гәләк хоф бу, чьмки гәләк кәвьр һәбун. Чахе ԛәйьк ида незики ԝан кәвьред мәзьн дьбу, дьле мә дькʹӧта. Ԛәйькчи гәрәке щерʹьбанди буйа, сәва ве ава гӧрʹда бәр ԝан кәвьрарʹа дәрбаз буйа. Рʹаст ә һьнге тьрс бу, ле гәләк һʹәԝас бу. Әм тʹәне 6 Шәʹдед Йаһоԝа бун, ле ԝәкә 50 мәрьв һатьнә сәр Биранине, нава кʹижанада Америндианс жи бун!

Мари-Лин: Щаһьлед кӧ дьхԝазьн һе зедә бона Йаһоԝа бькьн, әԝана жи дькарьн рʹасти ԛәԝьмандьнед ӧса һʹәԝас бен. Һун гәрәке һәр дәрәщада итʹбарийа хԝә Йаһоԝа биньн, у ԝе баԝәрийа ԝә һе ԛәԝи бә. Әм әʹмьре хԝәда тʹьме дәсте Йаһоԝа дьвиньн.

Һун чәнд зьмана заньн, ле ԝәрʹа һеса бу һин бьн?

Щек: На, һеса нибу. Һʹәԝщәти һәбу, ләма әз ԝан зьмана һин бум. Мьн гәрәке «Бьрща Ԛәрәԝьлийе» бона Һинбуне сәр зьмане Сранантонго * дәрбаз кьра, ле һәла һе әз пе дәрса хԝәндьна Кʹьтеба Пироз жи дәрнәкʹәтьбум. Чахе мьн дәрбаз кьр, паше мьн жь бьраки пьрси, кӧ һәла ча бу хәбәрдана мьн, фәʹмдари бу йан на. Әԝи жи мьнрʹа гот: «Тʹәне һьнә хәбәр мә фәʹм нәкьр, ле ӧса гәләк рʹьнд бу». Зарʹа гәләк али мьн дькьрьн. Чахе мьн шаши дькьрьн, мәзьна мьнрʹа нәдьготьн, ле зарʹа дьгот. Әз гәләк тьшт жь щаһьла һин бумә.

Мари-Лин: Територийакеда, һинбунед мьнә Кʹьтеба Пироз һәбун сәр зьмане Франси, Португали, у Сранантонго. Хушкәке мьнрʹа ширәт да, ԝәки пешийе һинбуна сәр ԝи зьмани дәрбаз кьм, кʹижан мьнрʹа лап чәтьн ә, ле хьлазийе йа сәр ԝи зьмани дәрбаз кьм, кʹижани әз рʹьнд заньм. Чьрʹа әве ширәта ӧса да мьн?

Рʹожәке, мьн һинбуна сәр зьмане Сранантонго дәрбаз кьр у паше йа сәр зьмане Португали. Чахе  мьн һинбуна дӧда дәстпекьр, әԝе хушке мьнрʹа гот: «Мари-Лин, әԝ фәʹм накә тӧ чь хәбәр дьди». Мьн фәʹм кьр, ԝәки мьн тʹәви жьнька Бразили, дәԝса сәр зьмане Португали, сәр зьмане Сранантонго хәбәр дьда. Ләма жи әв ширәта ве хушке гәләк керһати бу.

Ԝан щийада кʹидәре һун хьзмәт дькьн, хушк-бьра ԝә зәʹф һʹьз дькьн. Һун чь дькьн кӧ тʹәви ԝан ӧса незик дьбьн?

Щек: Мәтʹәлок 11:25-да те готьне: «Нандаре сьһʹәт у ԛәԝат бә». Әм хԝә паш нахьн, сәва тʹәви хушк-бьра ԝәʹдә дәрбаз кьн у бона ԝан тьштәки бькьн. Чахе Ода Щьватеда лазьм ә тьштәки бькьн, һьнә бьра мьнрʹа дьбежьн: «Тӧ нәкә, бьра мьзгинванед дьн бькьн». Ле әз ԝанрʹа дьбежьм: «Нә әз жи мьзгинван ьм, ләма әз жи дьхԝазьм аликʹарийе бьдьм чахе шьхӧл һәйә». Рʹаст ә әм гьшк жи һʹәԝщә нә бона хԝә ԝәʹдә бьвиньн ԝәки һеса бьн, ле әм гәләк щар тиньн бира хԝә, кӧ әԝ йәк гәрәке рʹе мә нәгьрә, сәва хушк-бьрарʹа ԛәнщийе бькьн.

Мари-Лин: Әм алийе хԝәда чьԛас дькарьн дькʹәвьнә һʹәйра хушк-бьра. Ӧса әм педьһʹәсьн кӧ кʹерʹа чь аликʹари лазьм ә, мәсәлә ԝәки бәр зарʹа бьн, йан жи зарʹа жь мәкʹтәбе биньн. Паше әм ида дькарьн ԝәʹдә бьвиньн, сәва бькарьбьн аликʹарийе бьдьнә ԝан. Бь сайа ве йәке, әм һәврʹа незик дьбьн, у һазьр ьн кʹомәке бьдьнә ԝан, чахе әԝана һʹәԝщә нә.

Һун чь кʹәрәма дьстиньн кӧ хьзмәт дькьн ԝан щийа, кʹидәре һʹәԝщәти һәйә?

Щек: Бь сайа хьзмәтийа һәртʹьм, әʹмьре мә бь кʹәрәма тʹьжә буйә. Әм гәләк щар щийед ӧсада хьзмәт дькьн, кʹидәре тʹәбийәт зәʹф бәдәԝ ә, у әм жь чекьрьна дәсте Йаһоԝа ләзәте дьвиньн. Рʹаст ә чәтьнайи жи һәнә, ле дьле мә рʹьһʹәт ә, чьмки әм заньн, ԝәки әм кʹӧ жи нибьн, щьмәʹта Хԝәде кʹеләка мә йә.

Әз щаһьлтийеда Гӧйанайа Франсида жь бо хԝәйкьрьна тʹәвнәбуйине кʹәтьмә кәле. Ле тʹӧ щар һʹьше мьнрʹа дәрбаз нәдьбу, кӧ рʹожәке әзе ча мисйонер вәгәрʹьм ви щийи у кәлада гьртийарʹа шәʹдәтийе бьдьм. Рʹасти жи Йаһоԝа тʹьме бь мәрʹдани хьзмәткʹаред хԝә кʹәрәм дькә!

Мари-Лин: Шабуна мьнә лапә мәзьн әԝ ә, кӧ әз дькарьм аликʹарийе бьдьмә мәрьва. Әм бәхтәԝар ьн, кӧ Йаһоԝарʹа хьзмәт дькьн. Бь сайа хьзмәтийе әм ӧса жи ча жьн-мер һәврʹа гәләк незик бунә. Щара Щек мьнрʹа дьбежә кӧ әм фьлан жьн-мери тʹәглифи сәр нанхԝарьне кьн, сәва ԝана бьшьдиньн. Әз жи жерʹа дьбежьм: «Әз жи һәма дәрһәԛа ве йәке дьфькьрим!» Гәләк щар әм мина һәв дьфькьрьн.

Щек: Чәнд сал пешда әз пеһʹәсийам, кӧ нәхԝашийа мьнә кансер һәйә. Рʹаст ә Мари-Лин һʹьз накә ве йәке бьбьһе, ле әз щара жерʹа дьбежьм: «Дәлала мьн, һәрге әз сьбе бьмьрьм, рʹаст ә әзе ча ‹каләки әхтйар› нәмьрьм, ле әзе дьлрʹьһʹәт бьмьрьм, чьмки мьн әʹмьре хԝә хьзмәтийа Йаһоԝада дәрбаз кьрьйә, чь кӧ бь рʹасти гәләк ԛимәт ә» (Дәстп. 25:8).

Мари-Лин: Йаһоԝа бона мә дәри вәкьр у мәщал да мә кӧ тьштед ӧса бькьн, кʹижан кӧ мә нә жи дькарьбу бьда бәр чʹәʹве хԝә. Әʹмьре мә рʹасти жи бь кʹәрәма тʹьжә йә. Тʹәшкиләта Йаһоԝа мә кʹӧда жи бьшинә әме һәрʹьн, чьмки әм бь тʹәмами итʹбарийа хԝә Йаһоԝа тиньн у баԝәр ьн, ԝәки әԝ ԝе әʹсә али мә бькә!