Munazinyetu Jack naMarie-Line kwa tameka sirugana sosiruwo nasinye mo-1988. Awo kuyika usimbu komavango oku ava va tumu ntani awo kwa tambura yitumbukira yoyinzi moGuadeloupe ntani moFrench Guiana. Mavango ogo ngesi nagenye kwa kara mepakero mbili lyoBeteli zaFransa. Tu zeni tu ka zogere naJack ntani naMarie-Line kuhamena mapuro gamwe.

Yisinke ya mu tumangedere mu tameke sirugana sosiruwo nasinye?

Marie-Line: Ame kwa kulira moGuadeloupe ntani yikando yoyinzi ngani zi mokuzuvhisa nonane ava va kere nomupampi mosirugana sokuzuvhisa. Ame kwa hara vantu, ntani konyima zapa na mene sure ame kwa tamekere uzuvhisi wokukarerera mo-1985.    

Jack: Apa na kere munona, ame ngani kara nkenye apa kumwe novanavazinyetu ava ngava rugana sirugana sosiruwo nasinye ntani awo kwa here sirugana sokuzuvhisa. Ame ngani rugana uzuvhisi wokuvatera apa nga zi pata sure. Poyiruwo yimwe moyikondovike, ose ngatu rondo mbesa yipo tu ka zuvhise kumwe novazuvhisi wokukarerera momukunda ogu ngava zuvhisire. Ose ngatu rugana ezuva mudima ntani konyima ngatu zi kefuta. Ose ngatu hafere sili yiruwo oyo!

Konyima zapa twa likwere naMarie-Line mo-1988, ame kwa lipulire asi: ‘Ose kwato yitumbukira, morwasinke tuna kudira kulihameka unene mosirugana sokuzuvhisa?’ Makura yipo na tamekere name kurugana uzuvhisi wokukarerera. Konyima ose kwa zire kosikora zovazuvhisi wokukarerera ntani konyima zomvhura zimwe tava tu tura tu kare vazuvhisi wosiruwo nasinye. Ose kwa haferere yitumbukira yoyinzi moGuadeloupe komeho va tu tume koFrench Guiana.

One kwa gwana yitumbukira yoyinzi monomvhura da ka pita. Yisinke ya mu vatera yipo mu yike ukaro woupe?

Marie-Line: Vanavazinyetu womoBeteli zaFrench Guiana va divire asi ose kwa hara etjangwa lyomwaJesaya 6:8. Apa ngava tu bela, awo ngava tu pura asi: “Tomu diworoka etjangwa lyeni eli mwa hara?” Ose twa yi divire asi vana hara kutupa situmbukira sosipe. Makura ose ngatu limburura asi: “Nyose ava, tu tumeni!”

 Ose kapi atu hetakanesa situmbukira setu sosipe koyitumbukira eyi twa gwene nare, morwa nsene tu yi rugana ayo ngayi tu ninkisa tu dire kuhafera situmbukira sosipe. Ose kuhetekera ko hena kulidiva novanavazinyetu.

Jack: Vanavazinyetu vamwe kapi va here tu diruke, awo kwa tu korangedere tu kare. Nye apa twa dirukire moGuadeloupe, munazinyetu gumwe kwa tu diworokesere nonkango daJesus edi da kara mwaMateusa 13:38. Ado kwa tanta asi: “Epya ko lyene yiwo uzuni ou.” Yipo nye, apa atu gwana yitumbukira yoyipe, ose kulitantera nyamwetu asi yi kare asi kupi nava tu tuma, ose simpe kuna kuruganena mepya lyokulifana. Yomulyo po kuna kara vantu ntani noku tuna kuzuvhisira.

Apa ava tu tumu komukunda nagopeke, ose kudimburura asi vantu wopeke kuna kuparuka noruhafo. Yipo nye, ose kuhetekera ko kuparuka ngwendi yiwo. Nondya dawo kuvhura di lisige nedi twa yika, nye ose kulya nondya edi ava li, ntani nokunwa eyi ava nu. Nye ose kuhetekera ko kukunga ukanguki wetu. Ntani nkenye apa ose kuhetekera ko kuuyunga yoyiwa kuhamena nkenye sirugana va tu pa.

Marie-Line: Ose kulirongera ko yoyinzi kovanavazinyetu ava atu ka gwana komavango oku ava tu tumu. Tani diworoka eyi ya horokere konyima tupu zapa twa ya sikire moFrench Guiana. Ezuva olyo mvhura zonene kwa rokere, ose kwa gazarere asi twa hepa tanko kundindira mvhura zi seke ntani natu za mokuzuvhisa. Nye munazinyetu gomukadi gumwe kwa tanterere nge asi: “Tu ze ko.” Ame kwa tetukire, tani mu pura asi: “Ngapi omu natu za?” Makura yipo ga limbwilire asi: “Gusa etangwa lyoge, tatu zi nonombasikora.” Ame kwa lirongere kukwaterera etangwa mewoko oku kuna kusinga mbasikora. Ngano kapi na lirongere, ngano kapi na zuvhisire posiruwo somvhura.

One kwa diruka yikando yokusika po 15, mwa kara ko nomagano aga muna hara kugava kwava vana hara kudiruka ndi?

Marie-Line: Kudiruka kapisi ureru. Nye ya wapa kugwana embo lyewa oku no vhura kupwizumukira konyima zokukatunda moyirugana yokuzuvhisa.   

Jack: Ame kuhetekera ko kupaindurura monda zonzugo ezi tuna kudirukira. Apa vanavazinyetu womoBeteli ngava diva asi kapi tuna kukara mo siruwo, awo ngava sindagura nge pokutanta asi: “Jack kapisi hepero o painde nzugo zoge sikando esi!”

 Marie-Line kwa diva sili nawa kurongera yininke! Age kuyitura momapakote nokuyitjanga asi “yomobati,” “yomonzugo zokurara,” “yomokombisa,” ntani nayimwe hena. Apa atu ka sika kembo lyepe, ayo kuturerupira kutura mapakote ogo monzugo ezi gana wapere. Marie-Line kutjanga hena elikwamo lyoyininke eyi yina kara mwankenye epakote yipo yi ka tu rerupire kugwana usimbu eyi tuna hepa.

Marie-Line: Mokumona asi ose kutura yininke nawa, ayo kutuvatera tu tameke nosirugana setu usimbu.

Ngapi omu wapaike elikwamo lyeni yipo mu ‘sikise mo sirugana seni’?—2 Tim. 4:5.

Marie-Line: MoMandaha, ose kupwizumuka nokuliwapaikira komapongo. Ano kutundilira moUvali, ose kuza moyirugana yokuzuvhisa.

Jack: Nampili ngomu twa kara nonovili edi twa hepa kusikisa mo, ose kapi atu kondjere mokudisikisa mo. Kuzuvhisa kuna kara sininke somulyo unene kwetu. Yipo nye, kutunda tupu apa atu pwaga membo dogoro apa atu ka tengura, ose kuhetekera ko kuuyunga nankenye ogu tuna kuligwana nage.

Marie-Line: Pasihonena, apa atu zi kevango lyokupwizumukira, ame nkenye apa kupitura ko yitratate. Vantu vamwe kutuhedera noku tu hundira yimbapiratjangwa nampili ngomu atu dili kuvatantera asi ose Nombangi daJehova. Yipo nye, nkenye apa ose kudivilisa asi tuna dwara yidwara yokuwapera. Vantu kunomena yininke yangoso.

Jack: Ose hena kugava umbangi pokukara vamusinda wovawa. Ame kudamagura yimbapira, nokupwagesa yihando ntani nokukomba meharango lyetu. Vamusinda kutumona ntani poyiruwo yimwe kutupura asi: “Kapi muna kara ko noBibeli?”

Yikando yoyinzi, one kwa ka zuvhisira konomukunda dokoure. Kuvhura mu tu simwitire ko yininke yimwe yoyiwa eyi mwa limonena ndi?

Jack: Nomukunda dimwe domoGuiana, udigu kukasika ko. Yikando yoyinzi nkenye sivike, ose kugenda sinano sokusika ponokilometa 600 moyitaura yokudira kuwapa. Sihorokwa simwe esi ani dili kudivara kuna kara apa twa zire komukunda gwedina St. Élie ogu gwa kara momusitu gwaAmazon. Ayo kwa tu gusire novili dononzi komeho tu ka sike komukunda ogo ntani ose kwa ruganesere etuwa lyononkondo ntani nosikepa sosinunu. Sinzi sovantu ava va tunga momukunda ogo kurugana momina zongorodo. Vamwe kwa tu pere ngorodo morwa va here kulikida rupandu koyimbapiratjangwa eyi twa va pere. Masiku, ose kwa likidire vidiyo zetu zimwe ano sinzi sovantu womomukunda kwa wizire va ya tarere.

Marie-Line: Ntaantani tupu kava pulire Jack a ka gave siuyungwa soMurarero moCamopi. Ose kwa ruganesere sikepagona esi twa gendere naso momukuro gwaOyapock. Aro kwa kere sili rugendo roruwa.

Jack: Ayo kwa kere siponga sili mokupita pomavega gorupupo. Ayo kwa tu hafesere sili pokumona omu sikepa sina kuhedera porupupo. Pwa hepa musingi gomuwa nsene muna hara kupita po. Nye ose kwa haferere rugendo oro. Nampili ngomu twa ka gwene ko tupu Nombangi ntazimwe, vantu wokusika po 50 kwa wizire koMurarero kukwatera mo norudi roVaamerindians.

Marie-Line: Yihorokwa yangesi yiyo yina kundindira vadinkantu ava vana hara kuruganena Jehova unene. Wa hepa kuhuguvara Jehova momaukaro aga ntani ayo kunkondopeka epuro. Ose kulimonena omu Jehova a tu vatere mosirugana setu.

One mwa lironga maraka gomanzi sili, ayo ureru kulironga maraka ndi?

Jack: Hawe, ame kwa lironga maraka aga, morwa na here kukavatera mokuzuvhisa ntani nomombungakriste. Sikando simwe ame kwa pitisilire elirongo lyoRuhungu meraka lyoRusranantongo, * ame na hana tanko kugava nampili ereso lyoBibeli. Apa na pulire munazinyetu omu nina rugana. Age kwa tanterere nge asi: “Poyiruwo yimwe kapi tuna kwata egano eyi ono uyunga. Nye ono rugana nawa.” Vanonagona kwa vaterere nge sili. Apa ngani tura mapuko, awo ngava yi tantere nge, nye vakurona awo ngava mwena. Ame na lirongere yininke yoyinzi kovanonagona.

Marie-Line: Momukunda gumwe, ame ngani lirongo novantu moRufransa, Ruputu ntani noRusranantongo.  Munazinyetu gumwe gomukadi kwa tanterere nge asi ni tameke kulironga novantu ava ava uyunga eraka lyoudigu po ntani nani ka hulilira nava veraka eli na diva. Ame kwa gwanenene mo mauwa mekorangedo olyo.

Ezuva limwe ame kwa lirongere Bibeli nomuntu moRusranantongo ntani gumwe moRuputu. Apa na lirongere nogu gwauvali, munazinyetu gomukadi kwa tanterere nge asi: “Marie-Line, ono kara noudigu!” yipo na dimbwilire asi ame kwa zogerere nomukadi gomuBrasilia moRusranantongo mevango lyokuzogera nage moRuputu.

One kwa mu hara sili unene vantu ava mwa rugana kumwe nawo. Yisinke ya mu vatera mu tulise po ukaume novanavazinyetu?

Jack: Yisewe 11:25 kutanta asi: “Kara ono manguruka, makura ngo ragopa.” Ose nkenye apa kukara novakwetu ntani nokuvaruganena yininke. Apa ngatu wapukurura Sinyanga soUhompa, vamwe ngava tantere nge asi: “Sigira ko vazuvhisi va yi rugane.” Ame ngani va limburura asi: “Ame name nimuzuvhisi. Nsene asi yirugana yina kara ko, name na hara kuvatera.” Nampili ngomu twa hara kukara nyoselike poyiruwo yimwe, ose kulidiworokesa asi kapisi tu pulisire yininke oyo yi tu ninkise tu dire kuruganena uwa vakwetu.

Marie-Line: Ose kulitura mo unene yipo tu lidive novanavazinyetu. Monkedi ozo, ose kudiva siruwo esi va hepa gumwe ava takamesere vana vawo ndi a ka va simbe kosure. Makura ose kutjindja elikwamo lyetu yipo tu va vatere. Eyi kutuninkisa tu tulise po ukaume wounene novakwetu ntani nokuvavatera nsene vana hepa evatero.

Matungiko musinke mwa gwana pokukazuvhisira oku kuna hepa vazuvhisi?

Jack: Sirugana sosiruwo nasinye kwa tu retera ruhafo rorunene. Yikando yoyinzi ose kugwana siruwo sokuhafera yininke eyi ga sita Jehova. Nampili ngomu atu ligwanekere nomaudigu, ose kukara nombili momutjima morwa twa yi diva asi vanavazinyetu kuvhura va tu vatere, yi kare asi kupi tuna kara.

Apa na kere mumati, ame kwa tulire nge modorongo moFrench Guiana morwa kudira kulihameka moupolitika. Ame kapi na gazarere asi ezuva limwe ngani ka tengura moFrench Guiana ngomutumwa nokugwana epulisiro lyokuzuvhisira vanadorongo. Yosili, Jehova kututungika unene.

Marie-Line: Apa ani vatere wopeke, ayo kuhafesa nge sili unene. Ose tuna hafa kweyi atu ruganene Jehova. Ayo ya vatera nonkwara detu di pame. Poyiruwo yimwe, Jack kupura nge nsene kuvhura tu zigide valikwali ava va tengura monyima kembo lyetu. Yikando yoyinzi, ame nkenye apa kumulimburura asi: “Name yiyo nina gazara.” Yikando yoyinzi ose kugazara yininke yokulifana.

Jack: Ntaantani tupu kava kwatekere nge kankera zovagara. Nampili ngomu ga dira kuhara kuyisimwitira Marie-Line, ame kumutantera asi: “Mukadange, kapi nina kurupa, nye nsene ni fa nampili mungura, hansa. Ame kwa ruganesa eparu lyange mokukarera Jehova.”—Gen. 25:8, NW.

Marie-Line: Jehova kwa tu pa yitumbukira eyi ngatu dili kugazara ntani ose kwa gwana matungiko gomanzi. Yipo nye, yi kare asi kupi ko ngazi tu tuma mbunga zaJehova, ose yiko ngatu za kooko morwa twa huguvara Karunga.