Jack na Marie-Line tintwari bena mu tisalu tia ntangu zazansoni, tuka muvu wa 1988. Ba zabakana bena mu tifu tiawu tia yukunuku nsobolo, ntiangu bayizi tambula nsobolo ya mbuka zazingi ku Guadeloupe na ku Guyane française. Mbuka zo za zole mu lutumu lwa Betele ya France zena. Tabayuleno’eti biyuvu.

Ngano nti bialutuma mu batika tisalu tia ntangu zazansoni?

Marie-Line: Ku Guadeloupe nakurila, mpe bilumbu biabiansoni, mbo ndieri vulu samunaka na nguri’ani, watiri tisamuni tie na luhemo (zèle). Bantu ba ntomono zolo, ntiangu buna kwa bu namanisa ku lukolo, mu 1985, nayizi batika salu tia mupasuri-nzila.

Jack: Bu ndieri ntwenia, na bisari bia ntangu zazansoni bizololo samuna ndieri vulu bâka. Mu vacance, mbo ndieri vulu bâka mupasuri-nzila wa ntangu fioti. Bilumbu bia lumingu, mbo tweri vulu bakaka bus mu landa mipasuri-nzila ku teritware zawu. Bilumbu biabiansoni, samuna tweri samunaka, mpe mbo tweri manisinaka ku la plage. Bilumbu biango bia nkatika nsayi bieri!

Ntangu fioti, ha manima ma makwela meto na Marie-Line mu 1988, nayizi tiyula, ‛Ntangu ya sârila yayingi ye neto, mbo tala tukurisi salu tieto tia samuna?’ Ni nalanda Marie-Line mu tisalu tia mupasuri-nzila wa ntangu zazansoni. Mvula yimosi yayôka, bu tayizi mana sa lukolo lwa mipasuri-nzila, tayizi bâ mipasuri-nzila mia minene (pionniers spéciaux). Ku Guadeloupe, mbuka za nsayi zazingi bayizi tutambika, ntete batutambika ku Guyane française.

Bisalu biabingi, mpe mahata mamingi balusoba mivu na mivu. Ngano nti bialubakisa mu yukunu na misamu mia môna?

Marie-Line: Mpangi za ku Betele ya Guyane française zazaba ti verse yi tutomo zoloko ni Izaya 6:8. Ntiangu bu beri tutâka mbila mu telefone, mbo beri vulu batikaka mu tu sakasa bu beri tâka, “Ngano verse’eno yi lutomo zoloko ya luta bambukila?” Mpe mbo tweri zabaka ti ntamana mbo batusoba mbuka ya sarila. Mpe mbo tweri vutulaka, “Eba ni beto! tutambika!”

Ka tuzoloko’â ko mu fwanakasa mbuka zi tatoko bâ na mbuka yo ya môna yi twena, mu bungu ti tamana  za fwanakasa ka tuzolo’â mbuka yo ya môna ko. Mpe mbo tudingaka mu sa tindiku na mpangi za môna ku mbuka yi batutambikiri.

Jack: Mu ntama, mpangi zeri kô zeri lembo zoloko tabasisa, mpe mbo beri dingaka mu tu wisa ngatu ka twendandi. Kâ, bu takatuka ku Guadeloupe, mpangi yimosi ya bakala yayizi tu bambula misamu mia tâ Yezu mu Matie 13:38: ‘Musitu ni mutoto nsi.’ Ntiangu, bu tusobaka mbuka, mbo tubambukaka ti, mu musitu wo wa wumosi kwa tuta sala kuma ni kuma ku tubâ. Mu miamiansoni, ni bantu na teritware ziyôkele mfunu!

Bu tutulaka mu teritware ya môna, mbo tumonaka ti bantu bakaka lenda di bâka nawu mu bâ na nsayi mu mbuka zo. Ntiangu, beto mpe mbo tuyêlaka mu sa ntiana bu saka bisi-hata. Bidia kampe bia swaswana biena, kâ mbo tudiaka bio bi badiaka, mpe mbo tunwaka bio bi banwaka, mbo tukengerelaka tikolela tieto mu mpila yifwanane. Mbo tusarilaka ngolo mu zonzelaka kwa bubote bwa mbuka zi batutambikaka.

Marie-Line: Mbo tulongokaka mpe misamu miamingi kwe mpangi zi tukwe bwanaka. Bambuka nita bambuka buna bu tatula tia ntete ku Guyane française. Mvula ya yinene yeri nokaka, ni bu tabanza ti tatoko kêla mvula ya wa, ntete twe tasamuna. Kâ mpangi yimosi ya yikento yakundiyula: “Tulendi kwenda?” Ni nayituku, namuvuturila, “Bwe?” Wakumvuturila “bonga parasoleil’aku, mpe mbo tukwenda mu velo zeto.” Ni buna nalongokela mu simba parasoleil na mu nata velo ha timosi. Tala ti ka nalongoka ko, kani kabwe ka naketi’â samuna ko mu ntangu ya mvula!

Mbala 15 lwasoba mbuka. Ngano mwa malongi me neno mu bungu dia bampangi, mu musamu wutariri soba kwa mbuka?

Marie-Line: Soba mbuka wulendi bâ musamu wa mpasi. Kâ, musamu wakaka wa mpasi ni mu baka mbuka ya mbote yi mona ti ku nzo’aku wena bu tukaka ku samuna.

Jack: Mbo nivulu lengaka peinture mu kati dia nzo zeto za môna. Mpangi za Betele bu zizabaka ti ka tuzingila ko ku mbuka yi batutambikiri, ntangu zakaka mbo bakuntsotsaka mpe mbo batâka, “Jack, kulengandi nzo yo peinture!”

Marie-Line nkatika ngolo kena mu kutika valize! Tima ni tima, mu valize katûlaka tio, mpe mbo kasaka bidimbu mu valize zazansoni zi katsoneka “tikozo,” “chambre,” “tikuku,” na biakaka. Buna, bu tutulaka mu nzo’eto ya môna, ka tumonaka mpasi ko mu kwe tûri valize ha mbuka zawu. Mbo kasaka  lutangu lwa bima bie mu muna valize, ntiangu, tala ti tima tie neto nsatu, ka tumonaka mpasi ko mu kulu tia baka.

Marie-Line: Mu bungu ti tayizi longoka mu tomo bâka ba kutama, lenda dia bâ neto mu batika tisalu tia samuna mu mpila ya yibote.

Bwe lusarilaka ntangu’eno mu tomo “sala tisalu tieno”?​—2Ti. 4:5.

Marie-Line: Bilumbu bia lêndi (lundi), huma tuhumaka mpe kubama tukubamaka mu bungu dia tukutakanu. Mboko maredi (mardi), ku tisalu tia samuna tukwendaka.

Jack: Ni bu sa ti ntangu ye kô yi tufweti lungisaka mu salu tia samuna ngonda batele ngonda, ka tubelokelaka yo lwaka ko. Salu tia samuna nkatika tima tia mfunu tiena kwe beto. Mu ntangu yi tudukaka na tii bu tukâlaka, mbo tusarilaka ngolo mu zonzesa bantu babansoni ba tubwabanaka na bo mu nzila.

Marie-Line: Mu tifwani, bu tukwe zebaka, trakte zi bâka nani ntangu zazansoni. Bantu be kô batumonekenaka mpe batulombaka mikanda, ni bu sa ti ka tubatelele’â ko ti beto Mbangi za Yehova twena. Ntiangu, tutomo saka keba mu mpila yi tulwatilaka na mu mpila yi tudiatilaka. Bantu mio mi tusaka batalaka.

Jack: Mbo tubâka mpe na nsayi kwe bantu batuzungirilaka. Mbo nitotaka bititi, mbo nilosaka zala, mpe mbo nikipaka bifulu. Bantu batuzungirilaka mbo bavulu monaka tifu tio, mpe ntangu zakaka mbo bayulaka, “Ngano lulendi kumbakila Bibila?”

Ku teritware za mala luvulu samuninaka. Lulendi bambukila mwa misamu mia nzitukulu mi lubwabanaka na mio mu nzila?

Jack: Ku Guyane, mu tula ku mbuka zakaka, mpasi. Mbo tuvulu diataka kilomètre 600 mu lumingu lumosi, mpe mu nzila za mbi. Ntangu yi tayôkesa ku hata dia St. Élie, die ku sangi dia Amazone, ya tutomo bambukilaka. Ntangu yayingi yafawnakana mu tula kô, wafwanakana tabaka kaminio, mpe takota bwatu. Bantu babîngi babâka kô, ore bavulu kwe dingaka. Bô beri tondaka mu bungu dia mabuku meto, bala ba ore beri hanaka mu makabu ma mutima! Nkokela bu yeri fwanaka, mbo tweri songelaka video za organizasio. Bisi-hata babingi beri kwizi za talaka.

Marie-Line: Ka ntama ko, balombaka ku Jack kasa tinzonzi tia Mbambukulu moyo ya lufwa lwa Yezu ku hata dia Camopi. Mu tula ku hata dio, heures 4 tasa mu bwatu mu sabuka nzari ya Oyapock. Misamu mia nzitukulu tamona.

Jack: Mu mbuka zeri na mamba mamingi, bitari (les rapides) nkatika bunkuta bieri tâka. Lulendi kunkwikila, musamu wa nzitukulu weri mu mona bwatu bu takwenda penepene ya bitari biango. Tinati tia bwatu tisalu tiandi tia keri zabaka mu sala mu mbuka za mpila yo. Diangana nzietolo ya mbote yeri. Ni bu sa ti Mbangi za Yehova sambanu (6) kwa zeri kûna, kampe bantu 50 bayiza ku Mbambukulu moyo ya lufwa lwa Yezu, mu kati na Ba-amérindien!

Marie-Line: Bantwenia balendi mona nsayi mu misamu mio tala ti baheni ntangu yayingi kwe Yehova. Yehova tuvulu sikirilaka mu ntangu za mpila yo, mpe timinu tieto mbo titomo bâka ngolo. Mbo tuvulu monaka bwe Yehova katubakisilaka.

Mazu mamingi lwayizi longoka. Ngano ka wena musamu wa mpasi ko kwe beno mu longoka mazu?

Jack: Mpasi. Tala ti mazu mo nalongoka, mu bungu ti, wafwanakana nalongoka mo. Timoko tia Nzo ya Zangama ya Munkengi ndieri twarisaka mu zu dia Sranantongo *, kâ ka natoko’â sa na kani ntangulu ya Bibila ko! Mpe mbo ndieri yulaka bampangi tala ti babakuri. Mbo beri tâka, “Ntangu zakaka ntelo zi bâka kô zi tulembo bakulaka, kâ bwa bu bâka.” Bala nkatika bakisa beri kumbakisaka. Bu beri lembo kumbakulaka, mbo beri kwizi kuntelaka, kâ bantu ba kula kâni. Misamu miamingi nayizi longoka kwe bantwenia.

Marie-Line: Mu teritware yimosi, na bantu beri zonzaka Lumputu, Portugais, na Sranantongo ndieri longokaka. Mpangi yimosi ya yikento yakuntela natoko batikilaka mu longokaka na bantu bazonzaka mazu me mpasi kwe meno, mpe mbo namanisinaka kwe bantu bazonzaka mazu malembolo mpasi kwe meno. Ha manima nayizi bakula ndwenga za malongi mandi.

Tilumbu timosi, nabatikila mu longoka na muntu weri zonzaka Sranantongo, ha manima na muntu  weri zonzaka Portugais. Bu nabatika mu longoka na muntu wa nzole, mpangi ya yikento yi tabâka yakuntela, “Marie-Line, kampe kuta toma musamu ko!” Hana nayizi bakula ti, ku mukento weri Musi-Brezile ndieri zonzelaka mu Sranantongo kani namuzonzela mu Portugais!

Mpangi zi lwabakisa beno zitomo zoloko. Bwe lwalendela mu bâ na tindiku tia mbote na bawu?

Jack: Bingana 11:25 yitele ti: “Muntu wukabaka mbo kabokesa.” Ka tulembeketaka ko mu hana ntangu’eto kwe bakaka. Mu musamu wutariri kipa kwa Nzo ya nsambululu, mpangi zakaka za bakala zakuntela: “Bika bisamuni basala tisalu tio.” Kâ natâ ti: “Ok, meno mpe tisamuni tiena. Buna, tala ti tisalu tiena tifweti salama, dieka bo, nzololo nasala tio.” Wa matieleka ntangu zakaka mwa nsatu ntangu ya beto beni yi bâka neto, kâ, mbo tubambukaka ti ka tufweti’â tabika nsatu za beto beni ko zatukabakasa mu yirikaka mbote kwe bakaka.

Marie-Line: Ngolo tusarilaka mu kipaka mosi na mosi ya bampangi. Ntiangu, tudingaka mu zaba ntia ntangu babâka na nsatu ya muntu mu kipa bala bawu peleko mu kwe ba bonga ku lukolo. Mbo tuvulu sobaka programe’eto ngatu tabâka na ntangu ya ba hana lubakusu. Mu mpila yo nkatika tindiku tukurisaka na bantu bakaka, bu tubâka ba kubama mu ba hana lubakusu mu ntangu yi babâka na lo nsatu.

Ntia tusakumunu lwayizi baka mu bakisa mu mbuka zo mwe tisalu tiatingi?

Jack: Mu tisalu tia ntangu zazansoni, tusakumunu twatwingi tayizi baka. Mbo tuvulu bâka penepene na bima bia sala Nzambi, mpe mbo tuvulu taluzulaka bima bia swaswana bi kasala. Ni bu sa ti misamu miakaka mwa mpasi miena kwe beto, tidzunu tia mutima tie neto mu bungu ti tuzebi ti lubakusu lwa kanda dia Nzambi lwe neto kuma ni kuma ku tubâ.

Bu ndieri ntwenia, bayizi kuntûla ku boloko ku Guyane française, mu bungu ti nakala mu kota misamu mia politike. Ka ndieri’â zabaka ko ti, mbo naketi vutu kwa kâla mu timisionere, mpe ka nazaba ko ti mbo baketi kungana nzila mu kwe samuna bantu be ku boloko. Wa matieleka, Yehova tifu tia kaba kasongelaka bu kahanaka tusakumunu twandi!

Marie-Line: Nsayi yayîngi ye nani, ni mu tihana mu bungu dia bantu bakaka. Nsayi ye neto mu bâ mu tisalu tia Yehova. Tisalu tia Yehova tiayizi sa ti makwela meto mpe mabâ ngolo. Ntangu zakaka, Jack mbo kankuteleka tala ti tulendi tikisa bantu ba kwelana be mu bunokena ngatu takabana bidia. Vula vula mbo nivutulaka ti, “Musamu mpe ni wo nita banzaka!” Ntangu zi bâka kô tuvulu banzaka musamu wumosi.

Jack: Ka ntama ko, bayizi kumbaka na Kansere ya prostate. Ni bu sa ti Marie-Line ka zoloko’â ko mu wâka musamu wo, namutela: “Chérie, ka ndieka’eti tomo nuna ko, kâ tala ti nkululu fwa, nzebi ti luzingu lwani mu misamu mia timpeve nsariri lo, mu bima bifwanakane biasalama nsariri lo.”​—Mba. 25:8.

Marie-Line: Yehova watutambika mu mbuka zi tweri lembo kêlaka, mpe watuhana nzila mu yirika misamu mi tweri lembo banzaka. Luzingu lweto lwa nkatika lwa fuluka lwe mu bima bia mbote. Mbo tukwenda kô kwakwansoni ku tu tambika organizasio ya Yehova, mu bungu ti Yehova tutomo sikirilaka ti ntangu zazansoni mbo katubakisa!