Jack ne Marie-Line bengilanga pamo mwingilo wa kitatyi kyonso tamba mu 1988. Byobadi bayukene amba bapēlelwanga kwibidila, baitabije mingilo mivule mu Guadelupe ne mu Guiyane wa Bafalanse. Pano bino bifuko bibidi bitalwanga na musambo wa Franse. Lekai bidi twipangule ba Jack ne Marie-Line bipangujo bityetye.

Le i bika byemulengeje mwingile mwingilo wa kitatyi kyonso?

Marie-Line: Byonatamine mu Guadelupe, divule nadi nsapula difuku dyonso na mama, wadi Kamoni mupyasakane. Byonsenswe bantu, o mwanda ponapwile masomo mu 1985, nashilwile kwingila bu pania.

Jack: Byondi mukala, nadi mu bukata mwa bengidi ba kitatyi kyonso basenswe mwingilo. Divule nadi ñingila bu pania mukwashi mu konje. Ku mfulo konso kwa yenga, twadi twenda kyaba kimo na motoka kukasapula na bapania mu wabo mwaba. Twadi tusapula difuku dituntulu​—kupwa twaenda ku nkula. Bine, twadi tusangala mu ano mafuku!

Kitatyi kityetye pa kupwa kwisonga na Marie-Line mu 1988, keneneneja’mba, ‘Tudi’tu na kyaba, mwene tubwanya’tu kulonga bivule mu mwingilo?’ Ebiya nami nashilula kwingila pamo na Marie-Line mwingilo wa bupania. Mwaka umo pa kupita’po, pa kupwa kufunda masomo a bapania, betutonga bu bapania ba pa bula. Betupele mingilo mivule isangaja mu Guadelupe kumeso kwa kuvilukila ku Guiyane wa Bafalanse.

Bemushintyile mingilo bininge mu bula bwa myaka mivule. Le i bika byemukweshe mwibidile mingilo mipya?

Marie-Line: Banabetu ba ku Betele ya Guiyane wa Bafalanse badi bayukile amba tusenswe bininge kisonekwa kya Isaya 6:8. O mwanda ponso pobadi betwita, badi bavudile kwitwipangula na mizaulo amba, “Le muvulukile kisonekwa kyomusenswe bininge?” Twayuka kala’mba mwingilo wetu ubashinta, kupwa twalondolola’mba, “Batwe bano! Witutume!”

 Ketwadipo tudingakanya mwingilo wetu na mingilo mibajinji, mwanda kulonga uno muswelo kwadi kubwanya kwitulengeja tuleke kusangela mwingilo mupya. Kadi twadi tulonga bukomo bwa kuyuka batutu ne bakaka ba mu mwingilo mupya.

Jack: Pa kala, balunda bamo ba milangwe’tu miyampe badi betutyumuna mutyima tuleke kuviluka mwanda badi basaka twikale nabo nyeke. Ino batwe pa kutaluka mu Guadelupe, tutu umo wetuvuluja binenwa bya Yesu bidi mu Mateo 13:38 bya amba: “Budimi i ino ntanda.” O mwanda shi abetushinta mingilo, twadi tuvuluka’mba tukingila’tu’nka mu budimi bumo nansha shi tudi kwepi. Ne kadi, bantu ne mwaba byo bya mvubu bininge!

Shi tubafika mu mwaba mupya, tumonanga bakwetu bashikete’mo’tu na nsangaji. Ebiya, netu twalonga bukomo bwa kwikala mobekadile. Nansha bibwanya kwishila byakudya, ino tudyanga byobadyanga ne kutoma byobatomanga, koku tukwete’ko mpangiko ya kwikinga ku misongo. Twadi tulonga bukomo bwa kunenena mwingilo o-onso māya.

Marie-Line: Twaboile ñeni mivule ku banabetu ba mu kibundi. Navuluka bintu byalongekele tukifikafika mu Guiyane wa Bafalanse. Mvula wanokele bininge, ketulanga’mba tusa kukunga bidi mvula apwe ebiya ketwenda mu busapudi. Ino kaka umo waunena’mba, “Le tubwanya kwenda?” Natulumuka, kupwa nalondolola’mba “Amba’ka?” Waunena’mba, “Sela mumvudi obe, tusa kwenda na makinga.” Enka nenki nefunda mwa kukwatyila mumvudi koku ñendeja kinga. Shi nkyefundile’byopo, nkyadipo wa kubwanya kusapula mu kitatyi kya mvula!

Mwavilukile kintu kya misunsa 15. Le kudi madingi omubwanya kupa boba basaka kuviluka?

Marie-Line: Kuviluka kubwanya kwikala kukomo. Inoko, i biyampe kutana kifuko kyobwanya kwiivwana bu udi kwenu shi ubajoka mu busapudi.

Jack: Nadi na kibidiji kya kupentulula munda mwa njibo yetu. Banabetu ba ku musambo, shi abayuka’mba ketusapo kwija’ko, badi banena kyaba kimo amba, “Jack, kokapenta kala njibo!”

Marie-Line uyukile bininge kukuta bivwe! Welanga bintu mu masanduku ne kulemba’po amba, “kikoloni,” “kyumba kya kulāla’mo,” “mpishi,” ne bikwabokwabo. Ebiya, shi tubafika kotwenda, twadi tupēlelwa kutūla sanduku ne sanduku mu kyumba  kyoifwaninwe. Ulembanga pa sanduku ne sanduku bintu bidi’mo mwa kusokwela bukidibukidi bintu byotusakilwa.

Marie-Line: Byotwadi na ndudi uno muswelo, twadi tupēlelwa kwenda mu busapudi pampikwa kwija.

Le mutandikanga mpangiko yenu namani mwanda wa ‘kuvuija ne pa mfulo mwingilo wenu’?​—2 Tm. 4:5.

Marie-Line: Dya Mwanzo dyonso, tukōkolokwanga ne kuteakanya kupwila. Kushilwila mu Dya Bubidi, twendanga mu busapudi.

Jack: Nansha nsá ya kusapula byoitungilwe, ketutengapo mutyima ku nsá. Kusapula ye kintu kya mvubu mu būmi bwetu. Kitatyi kyonso kyotutamba ku njibo kufika’nka ne bibwana kitatyi kya kujoka, tuloñanga bukomo bwa kusapwila bantu bonso botutana.

Marie-Line: Kimfwa shi tubaenda kukenangija, divule dine ñendanga na matrakte. Bantu bamo betufwenanga, balomba mabuku, nansha shi ketwibalombwelepo amba twi Batumoni ba Yehova. O mwanda, tutanga mutyima ku muvwadilo ne mwiendelejo wetu. Bantu betutalanga.

Jack: Kadi tupānanga bukamoni kupityila ku muswelo otwikēle biyampe na balondakani netu. Mboyanga mapapye, kumwanga kyala, ne kusekwila mu kabudimi kadi pa lubanza. Balondakani netu bamonanga, kadi kyaba kimo bangipangula’mba, “Le ubulwe’po kumpa’ko Bible wami?”

Mwadi muvudile kusapula mu myaba mitolwele. Le muvulukile’ko kintu kyomwemwenine mu ino ñendo?

Jack: Mu Guiyane, i bikomo kufika mu myaba imoimo. Divule twadi twenda makilometele 600 mu yenga mutuntulu kadi mu mashinda mabi. Ketukelwapo kitatyi kyotwakapempwile kibundi dya Saint Élie, mu ditó dya Amazone. Twalongele mansá mavule pa kufika’ko lwa motoka ne lwa hors-bord. Bantu bavule ba mu kino kibundi bakimbanga olo. Pa kufwija’ko mwanda wa mabuku etu, bamo badi betupa tubibese twa olo bu kyabuntu! Ku kyolwa twadi tutadija mavideo a bulongolodi. Bantu bavule ba mu kibundi badi beatala.

Marie-Line: Ne kwija mpika, banena Jack akanene mwisambo wa Kivulukilo mu Camopi. Pa kufika’ko, twaendele mansá aná na kamatolo mu Munonga wa Oyapock. Bine, wadi mwanda usangaja.

Jack: Popa padi mema matyetye mu munonga, mulungu wadi ubwanya kuleta kyaka. Mbwanya kwimulombola’mba natengelwe pa kwimwena uno mulungu. Ngovi wadi muyuke mwa kulongela. Uno wadi mwanda usangaja bininge. Nansha byokwadi Batumoni 6 kete, ino ku Kivulukilo kwatenwe bantu 50, kubadila’mo ne bene Amerika bamobamo!

Marie-Line: Ino myanda isangaja itengēle ne bankasampe basaka kulongela Yehova bivule. Mufwaninwe kukulupila mudi Yehova mu ngikadilo ya uno muswelo, kadi lwitabijo lwenu lukakomejibwa. Divule dine tumonanga mwitukwashisha Yehova.

Mwefundile ndimi mivule. Le mudi na kyabuntu kya kwifunda ndimi?

Jack: Aa. Nefundile ino ndimi mwanda kwadi kisakibwa. Nadi mfwaninwe kwendeja Kifundwa kya Kiteba kya Mulami mu Kisranantongo * papo kebampele nansha kipindi kya butangi bwa Bible! Naipangula tutu umo mokyapityila. Wanondolola’mba, “Kyaba kimo ketwadipo twivwanija bishima bimobimo, inoko kyadi senene.” Bana badi bankwasha bininge. Shi nalonga kilubo, badi banena, ino batame kutupu kunena. Nefundile bivule kupityila ku bankasampe.

Marie-Line: Mu mwaba umo, nadi nefunda na bantu Bible mu Falanse, Kiportige ne mu Kisranantongo. Kaka umo waundingila’mba shilula na ludimi lukomo bininge kupwa wifule na lolwa loyukile. Ne kwija mpika naivwanija ano madingi a tunangu.

Difuku dimo, nadi wa kwifunda Bible na muntu wisamba Kisranantongo ne na mukwabo wisamba Kiportige. Ami pa kushilula kwifunda na muntu wa bubidi, kaka otwadi nandi waunena’mba “a Marie-Line, mona’mba kudi kyakolejanga!” Najingulula’mba  nadi nesamba na mwana-mukaji wa mu Brezile mu Kisranantongo pa kyaba kya kwisamba nandi mu Kiportige!

I bemusanswe bininge kudi bomwadi mwingila nabo. Le mwabwenye kupwana na banabetu namani?

Jack: Nkindi 11:25 unena’mba: “Muntu wa buntu ukamona biyampe.” Ketwikakangapo kwipānina bakwetu. Pa mwanda utala kukundula njibo ya bulopwe, batutu bamo baunenene amba: “Leka basapudi bakundule’yo.” Ino nebalondolola’mba: “I amo, nami ne musapudi. Nanshi shi kudi kaji ka kwingila, nami mfwaninwe kwingila.” Nansha batwe bonso byotusakanga kitatyi kya kwikala pa batwe bene, twadi tuvuluka nyeke amba kwikala pa batwe bene kekufwaninwepo kwitulengeja tuleke kulongela bakwetu biyampe.

Marie-Line: Twalongele bukomo bwa kulombola’mba tutele batutu ne bakaka mutyima. Mu uno muswelo, twadi tuyuka kitatyi kyonso kyobasakilwa muntu wa kwibatadila babo bana nansha kukebasela ku masomo. Ebiya twabandaula mpangiko yetu mwanda wa kwikala na kitatyi kya kwibakwasha. O mwanda twapwene nabo bininge, ne kwiteakanya mwanda wa kwibakwasha ponso bobasakilwa bukwashi.

Le i madyese’ka omwamwenine mu kwingidila kokwa kusakilwa basapudi bavule?

Jack: Mwingilo wa kitatyi kyonso i mwituletele nsangaji mu būmi. Byotwadi tumona bintu bipangile Yehova, twadi tusangelanga bupangi palapala. Nansha byokwadi makambakano, ino tudi na ndoe ya mutyima mwanda tuyukile amba twakweshe bantu ba Leza konso kotwadi twenda.

Ponadi nsongwalume, baunkutyile mu Guiyane wa Bafalanse mwanda wa kupela kwikuja mu myanda ya ntanda. Nkyadipo nanga’mba nkajokela’ko bu mishonele ne kupebwa lupusa lwa kupempula bantu ba mu buloko bu mwingidi wa Leza. Bine, Yehova upānanga madyese andi na buntu!

Marie-Line: Kintu kinsangaja bininge i kwipānina bakwetu. Tusangedile kwikala mu mwingilo wa Yehova. Kadi uno mwingilo walengeje tupwane bininge bu ba mulume ne mukaji. Kyaba kimo, Jack wadi ungipangula shi tubwanya kwita ba mulume ne mukaji batyumukilwe mutyima ku bidibwa. Divule dine nadi nondolola’mba, “Nami ye monadi nangila!” Twadi’nka tulanga bya muswelo umo.

Jack: Baunkwete panopano misongo ya dyaya dya ku nsukwilo. Nansha Marie-Line byokebyamusangejepo, namulombwele amba: “A muswe, shi ne wa kufwa kesha, nkisapo kufwa ‘mununu bininge.’ Ino nsa kufwa musangale, koku ndyukile amba ne mulonge bintu bivule bya ku mushipiditu kadi bisangaja mu būmi bwami.”—Ngo. 25:8.

Marie-Line: Yehova wetushitwidile bibelo mu muswelo oketwadipo tulanga, ne kwitukwasha tulonge bintu byoketwadipo tufwatakanya. Bine, twi bemwene bintu biyampe bivule mu būmi bwetu. Na kikulupiji kyonso mudi Leza, tukenda konso kwitunena bulongolodi bwa Yehova kwenda!