Jack ni Marie-Line anvara nkhayi nteko wowiivahereriya ukati wotheene ukhuma mwaakha wo 1988. Ayo ancuweliya ukhala anamathelana owaakuva wiilemaleliha makhalelo makhwaawe, ni ahaakhela miteko cinci u Guadalupe ni u Guiana Francesa. Ipeteli yo França nna va phinwacera ayo mapuro meelyaayo. Nttwee nimoopane mwaha vakaani munna Jack naamwaarawe Marie-Line.

Isiyani iwiirihaleni ulakela wancera uvara nteko wowiivahereriya ukati wotheene?

Marie-Line: Mi kuunuwenle u Guadalupe, ni ukati waaryaaka mwanhima, imaara cinci kaanaalalyeeraka naamaama ukhuma uwicisu mpaka ucoocilo. Ayo yaari Saahiti a Yehova owiikurumica venci. Mi kinawaafenta atthu; phimaana, ukati waamalihalyaaka icikola mwaakha wo 1985, kahancera uvara nteko weepiyoneeru.

Jack: Ukati waaryaaka mmirawo, kaanaaweettana venci mayamunna yaavara nteko wowiivahereriya ukati wotheene waacivela ulalyeera. Ni kaanaakhalaka piyoneeru ookavihera kavahiyaka iferiya ucikolani. Ikwaha cikhwaawe, wiimaleloni isumana, mi ni mapiyoneeru naanankelaka karera wiira nirwee ulalyeera mapuro makhwaawe. Naanaalalyeera mpaka ucoocilo ni namalihaka, naarwaa uthuka umaka. Ule waari ukati woociva!

Uthelanaca waka ni Marie-Line mwaakha wo 1988, mi kahoopuwela: ‘Hi nihaana ukati mwinci. Vano nihivarelaka nteko uyo ukatyuuyo wiira nivare cinene nteko woolalyeera?’ Phimaana, mi kahancera uvara nteko weepiyoneeru wamoca ni Marie-Line. Uvira waya mwaakha mmoca, nahosoma icikola yomapiyoneeru ni naholattuliya ukhala mapiyoneeru owiivaherera. Nahovara miteko cinci cootteeliha nrima u Guadalupe, ni wahoolo naholattuliya urwaa uvara nteko u Guiana Francesa.

Ikwaha cinci mwaholepeliya urwaa uvara nteko mapuro makhwaawe. Isiyani inookaviherani wiilemaleliha makhalelo makhwaawe? 

Marie-Line: Mayamunna o Peteli yo Guiana Francesa yaanacuwela wiira iveerusu yoonicivela ikhanle Isaiya 6:8. Phimaana, yanilikarelaka, ayo yanceraka unithukana yeeraka co: “Nnawuupuwela iveerusu yo mbiiblyani inoocivelani cinene?” Ayo yeeraka commo, hiiva naanaacuwela wiira ampheela unilepela urwaa uvara nteko nipuro nikhwaawe, phimaana hiiva naakhulaka co: “Niri va! Nnirumeke!”

Hiiva ninawiikurumica unyema ulattaniha nteko unvareehu nna va ni nteko waavareehu nipuro nikhwaawe.  Kontha nancaka ulattanihaca ninaahala uhiya uvaha ifayita nteko unvareehu nna va. Ciicammo ninaatotha waacuwela ratta mayamunna.

Jack: Khalayi, apatthaniihu akiina yahonilepela wiira nihithame nipuro naavareehu nteko. Ayo yeerale commo nlattu woociveliya ni hiiva, ni khayaapheela wiira naahiye. Masi ukati waathamaleehu u Guadalupe, munna mmoca ahonuupusera moolumo a Yesu ari nhina Matewus 13:38: “Imatta inaaciya ituninya.” Phimaana, khula ukati waalepeliyeehu uthama ni urwaa uvara nteko nipuro nikiina, naaneekurumica wuupuwela wiira, hataa nithamelaka ncoko nkiina, nanlelo ninvara nteko imatta imocaaru. Kontha itthu yuulupale cinene uri ukhala nipuro noolalyeera ni atthu oohala waalalyeera.

Nathamelaka ncoko wophiyaaru, ninawoona wiira atthu ankhala uyo ncokooyo anaatteeliya. Phimaana, ninawiikurumica ukhala toko ayo cinkhalaaya. Hataa iyoolya inlyaaya ivirikanaka niiyoolya yaalemalenleehu, hiiva ninaalya citthu cinlyaaya ni ninaawurya citthu cinwuryaaya, masi ninawiiwacera saana wiira cihiniphwanye iretta. Ninawiikurumica wiira nuulume saana nteko unvareehu.

Marie-Line: Niheetthuca citthu cinci ni mayamunna o mapuro yaathameleehu. Kinawuupuwela ukati waapacenreehu uphiya u Guiana Francesa. Nihuku nimoca yaanaarupa ipula cinene, ni hiiva noopuwenle co: ‘Niweherere ipula waamusa, vano phinhaleehu wancera ulalyeera.’ Masi nrokoraka o wanlokoni mmoca ahokikoha: “Cani, khaninrwaa?” Mi kahokhala ootikhinihiya ni kahomwaakhula: “Masi ninhala urwaa cani?” Uyo ahokaakhula akiirelaka: “Muncise sumpurerya ni icinka nttwee.” Nno phi nihuku neetthucalyaaka weettiha icinka kinancisale sumpurerya. Ni wahoreera, kontha kaheetthucale, akaahala ulalyeera iyiita yotheene!

Ikwaha cookhalaka 15 mwaholepeliya uthamela mapuro makhwaawe. Mirukuni cirineenyu cinhala waakavihera ale anhala upheela uthamela mapuro makhwaawe?

Marie-Line: Uthama unaarika. Masi itthu yofayita cinene ukhanle ukhalana nipuro noohala umumula waturuwaka wuulalyeerani.

Jack: Mi unaakicivela cinene upintari mpaani waya khula inupa inthameleehu. Mayamunna yoonaka wiira khanaahala upica nipuro naathamenleehu phiyaaru, yaakiirela co: “Jack, ila ikwaheela pooti uhipintari inupa ithamenleenyu!”

Marie-Line holemalela ni naacuwela ratta-raatta utthukaca mirintti! Uyo naahela citthu cotheene mmakaaxani ni nawantikha waculu ikaaxa citthu cihenlyaawe nhina, toko: “citthu consoworo,” “citthu cookatti,” “citthu coowaapyeeliya” ni citthu cikhwaawe. Vano, naphiyaka  inupa yophiyaaru impheeleehu uthamela, khunrika weesa khula itthu wanipuroni waya. Marie-Line ciicammo nawantikha nipuro citthu cotheene cihenlyaawe nhina khula ikaaxa. Upanka commo unaanikavihera waakuva uphwanya itthu impheeleehu.

Marie-Line: Ukhala wiira niheetthuca wiitthenkaca ratta, ninaakhitiri wowaakuvya wancera uvara ntekweehu.

Muntthenkaca cani ukatiinyu wiira nkhitiri ‘uvara ratta nteko wa Nluku’?—2 Tim. 4:5.

Marie-Line: Khula nihuku nookeliya nteko, hiiva ninaamumula ni utthenkaca mikutthaano. Ukhuma nnayeeli mpaka itominku, ninaarwaa wuulalyeerani.

Jack: Ninaacuwela wiira wiimaleloni khula mweeri, nihaana nipiiheraka iwoora cimpheeliya, masi iyo khinakhala itthu intepeehu uweheeha. Itthu yuulupale inhoolelihereehu muukumini wihu ukhanle ulalyeera. Ukhuma ukati unkhumeehu wapuwani wihu nirwaaka wuulalyeerani, mpaka ukati unhokolyeehu, ninawiikurumica uwuulumana atthu otheene anaaphwanyeehu.

Marie-Line: Narwaaka wuuthukani ni mayamunna, mi unaakicivela ucisa ifolyeetu. Ahaavo atthu anwa unilepela ilivuru cihu, hataa nihiihimyaka wiira nikhanle Masaahiti a Yehova. Noopuwelaka iyo, ninawoona wiira nihaana niwaraka ikuwo cohisima ni nihaana nithoonyeraka meettelo omaana. Kontha nnyo phi citthu atthu cinweheehaaya.

Jack: Hiiva ciicammo ninaavaha usaahiti neekurumicaka ukhala amwaattamani oomaana. Mi kinaalokotthacaka makhanta, kinaarwaaka uriha ikokhola ni kinaakweca ikokhola cinkhalaka vate waya inupeehu. Aattamananiihu anawoona iyo ni anaanikohaka: “Khanrina Ibiiblya va? Kinaalepela nkivahe.”

Nyuuva nheetta cinene nrwaaka mapuro menci wiira mwalalyeere. Ihaavo itthu ihinliyaleenyu yaakhumelenle ikwaha imoca mweettaleenyu nrwaaka nipuro?

Jack: U Guiana, ahaavo mapuro anrika uphiya. Ikwaha cikiina, naanaakhala usumana imoca ni weetta ikiloometro coopwaha 600 mmaparapaarani coohilokaloka. Ikwaha imoca, nahorwaa u Saint-Élie, itakhwa yo Amazônia—khaninliyala ule nkwahoole! Wiira niphiye, nahoviriha iwoora cinci neettaka nkaaroni yoorika uphara ni nkalawani yo moothooru. Ntekwaaya atthu enci ankhala ule ncokoole ukhanle uthipa iwooru. Enci caanawaacivela cinene ilivuru cihu mpaka, yaanaakumihaka ncanko; ni ncankwaaya yaakhala maluku owooru. Weelaka, naanawaathoonyera ividiyu co mumphwinkoni wihu, ni yaanaawa atthu enci.

Marie-Line: Myaakha vakaani uttuli, Jack hopaca ulattuliya utaphulela mwaha wo Nuupuwelelo na nookhwa a Kristu aliteeya o Camopi. Wiira niphiye, naheetta iwoora cese nkalawani yo moothooru mmoolokoni Oiapoque. Khawaareere uciva.

Jack: Nipuro nihiisalyaaya cinene uyo moolokooyo, maaci anaatepa utthawa cinene ni anawoopiha. Unaatikhiniha woona maaci iwaaka niikuru cinene weeva unari nkalawani. Ule neettiha ikalawa haana acuwelaka itthu invaraawe wiira hikhupiye ni maaci. Masi wahoreera cinene. Wanuupuweleloni, yaarivo Masaahiti a Yehova 6, masi yahowa atthu ookhalaka 50 yahaari Masaahiti, ni akhwaawe yaari apoovu o ule ncokoole aneehaniya indíginas.

Marie-Line: Mmirawo mpheela wiivaherera uvara cinene nteko wa Yehova ciicammo pooti unkhumelela citthu cootteeliha nrima toko nnyo. Weeva uhaana unkhuluvelaka Yehova wiira waamini waa ukhale woolipa. Imaara cinci, ninaakhitiri woona wiira Yehova ri moonikavihera.

Nyuuva nnaacuwela wuuluma iluuka cinci. Niireke nnooyarelaniya?

Jack: Mena vakaani. Mi kinkhitiri wuuluma iluuka cinci kontha kahaana kiitthucaka. Kahaana kihoolelaka usomiya irevista Ukhalenla niiluuka ineehaniya Sranantongo *, kihinaaya hataa uvahiya mphantte woosoma Ibiiblya wanlokoni! Kahonkoha munna mmoca khampa yaanawiiwannya itthu yoolumaaka. Uyo ahaakhula: “Ahaavo moolumo ahikhitinriihu wiiwa, masi nhopanka saana.” Asinamwane yaanaanikavihera venci. Atthu oolupale khayaanihimyera navonyaka itthu, masi asinamwane yaanaanihimyera. Mi kiheetthuca cinene naayo asinamwannyaayo.

Marie-Line: Uhaavo ncoko waasomihaaka Ibiiblya atthu anooluma ifrancês, ikunya ni niiluuka Sranantongo. Nrokorihu mmoca ahokivaha nruku. Uyo ahokiirela wiira kaapacere waasomiha atthu anooluma iluuka yaakirika, ni kaamalihere waasomiha atthu oluuka yoohikirika. Woohipica, mi kahoonelela wiira uyo waari nruku womaana.

 Nihaavo nihuku naahalaaka waasomiha Ibiiblya atthu eeli; ntthu oopacerooyo kaahala unsomiha niiluuka Sranantongo, ni onayeelyuuyo kaahala unsomiha niikunya. Ukati wampacenryaaka onayeelyuuyo, nrokoraka aakivelenle ahokiirela: “Nuunu Marie-Line, unkhala toko khaneewa itthu inhimyeenyu.” Ule phuukati woonalyaaka wiira, uhiya uwuulumana niikunya athiyana o Brasil yaasomihaka, miiva kaasomiha niiluuka Sranantongo!

Nyuuva nnaafentiya cinene ni mayamunna o maloko akhanleenyu. Nkhitinri cani ukhalana upatthani woolipa ni mayamunna o wanlokoni?

Jack: Miruku 11:25 ineera: “Ntthu oovaha naahala uphwanya mpuha.” Hiiva unaanicivela cinene ukhala ni mayamunna ni waapankela citthu. Wapheeliyaka uvariya nteko woorehererya Isalau yo Umwene, ahaavo ankiirelaka: “Mwaahiyere uyo ntekooyo anamalalyeera.” Masi mi kinaakhulaka co: “Mi ciicammo kinamalalyeera. Wakhala nteko umpheela uvariya, kimpheela ukavihera.” Ninaacuwela wiira otheene cihu uhaavo ukati umpheelakeehu ukhala veekha, masi ninawiikurumica wuupuwela wiira iyo khinlamuliya unihiiha waapankela citthu comaana akhwiihu.

Marie-Line: Hiiva ninawiikurumica uthoonyera wiira ninawaawacera mayamunna. Wootakihera, munna mmoca ampheelaka ntthu oohala waawacera asaanaawe awula waarweela ucikolani, hiiva ninaakumiha ukati wiira ninkavihere. Itthu innikavihera ukhalana upatthani woolipa ni mayamunna ukhanle wiivaherera wiira naakavihere khula ukati umpheelaaya ukaviheriya.

Iparakhani caakhenleenyu nlattu wo wiivaherera uvara nteko mapuro oothwaa anamalalyeera?

Jack: Nlattu woovara nteko wowiivahereriya ukati wotheene, hiiva ninaatteeliya venci. Ikwaha cinci, nihooneeha wakhiviru citthu cooreera cumpalyaawe Yehova. Ahonikhumelela marikariko menci, masi unaanitaphuwa nrima kontha ninaacuwela wiira ninaakaviheriya naapoovu a Nluku, hataa nikhalaka nipuroni.

Ukati waaryaaka mmirawo, kahotthukiya u Guiana Francesa nlattu woohirwaa utoropani. Akoopuwela wiira wanihukuni kaanaahala uturuwela nwo khampa misiyonaariyu ni utthuniheriya ulalyeera mmakhattya. Khweeliini, Yehova khanoonela isooyo iparakha cinvahaawe!

Marie-Line: Itthu imoca intepa ukitteeliha nrima ukhanle waakavihera akhwaaka. Unaanitteela nrima venci nlattu woovara nteko wa Yehova. Iyo inaanikavihera wiiwanana muuthelanani wihu. Ukati nkhwaawe, Jack naakiirelaka co: “Munna fulano naamwaarawe ari ni masukhuli. Unoonela cani uwiihana wiira nowaalyane?” Imaara cinci, mi kinaakhulaka co: “Phi itthu yoopuwelaaka yeeyo!” Iyo inaanikhumelelaka.

Jack: Mphiyaaruni, kihoonelela wiira kihaana iretta ineehaniya cancro de próstata. Hataa ukhalaka wiira Marie-Line khunoncivela koolumaka ila, mi kahomwiirela: “Amwaaraka, kinakhwaale meelo, akaahala ukhwa kinooluvanle venci. Masi kaahala ukhwa kinasukhunru, kontha kihokhala muukumini waka motheene kipankaka citthu coominepani, cirina ifayita.”—Upha. 25:8.

Marie-Line: Yehova honihulela mikhora cinci wiira ninvarele nteko ni mananna nahaaweherereehu ni honikavihera upanka citthu cahaaweherereehu wiira naanaahala upanka. Muukumini wihu khacireere unikhumelela citthu comaana. Ninankhuluvela venci Nluku, ni mphwinkwaawe woothotokanihiya wanilepelaka wiira nirwee nipuro, hi ninaarwaa nno nipuronno!