Ya Jack na ya Marie-Line yakaombela pamwi umu mulimo wa nsita yonsi ukufuma umu 1988. Yangakwanisya ukwikala ukuli konsi nupya yaomba imilimo ipusanepusane umu Guadeloupe nu mu French Guiana. Incende zyonsi zyoili ndakai zikaangalilwa nu musambo wa ku France. Lekini tuzye ya Jack na ya Marie-Line mauzyo yamwi.

U mulandu ci uno mwatandikiile umulimo wa nsita yonsi?

Ya Marie-Line: Lino nali umwance, nasimikilanga ilingi uwanda onsi na ya mayo aali acincile umu kuombela Yeova. Natemwa sana antu fwandi lino namazile sile isukulu umu 1985, natandike upainiya.

Ya Jack: Lino nali umulumendo, nayanga sana pamwi na ina na ya nkazi aaya umu mulimo wa nsita yonsi aatemilwe sana umulimo wa kusimikila. Naombanga upainiya wa nsita inono nga twalaliika masukulu. Nemo na ya mayo nanti umwina muze umu cilongano twakwelanga basi insita zimwi pa mpela ya mulungu ituya umu kuombela pamwi na ya painiya umu vifulo muno yakasimikila. Twasimikilanga uwanda onsi lyene ituya umukupuza uku nkumba yakwe yemba. Manda yayo yazipanga sana!

Lino twatwaline sile na ya Marie-Line mu 1988, nayuzizye nemwineco inti, kusi ivili vyonsi ivyakutucilinganya, u mulandu ci uno tutange twaombesya umu mulimo wa kusimikila? Natandike ukuombela pamwi upainiya na ya Marie-Line. Lino papisile umwaka onga pa cisila ca kuzanwa ukwi sukulu lyakwe ya painiya, yatunenyile ukutandika umulimo wakwe upainiya uiyele. Twaipakizye ukuomba imilimo ipusanepusane umu Guadeloupe lino yatatala yatunena ukukuukila uku French Guiana.

Mwapokelela imilimo ipusanepusane pa myaka iingi. I vyani vyamwazwa ukuyelezya imikalile ipya?

Ya Marie-Line: Aina aapa Betele ya ku French Guiana yamanyile ilembelo lino twatemwa sana lyakwe Ezaya 6:8. Fwandi ilingi nga yayatumila, yatandikilanga na mazwi asuma akuti: “Uzye mukwiusya ilembelo lino mwatemwa sana?” Nga tuvwa vivyo twamanyanga ukuti itwapeelwa umulimo upya, fwandi twasukanga ukuti, “Apano tuli! Tutumini!”

Tusikolanya imilimo ipya ino twapeelwa kuli ino twaombanga mpiti pano ukucita vivyo kungalenga  tuvilwe ukuipakizya imilimo ipya. Nupya tukaezya na maka ukupanga ucuza na ina na ya nkazi yano twazana uku vifulo kuno yatutuma ukuya umu kuombela.

Ya Jack: Mpiti aina na ya nkazi yamwi yatalondanga ukuti twapita kuze kuno iyatunena ukuya umu kuombela fwandi yezyanga na maka ukutulyombeleka ukuti tutapita. Nomba lino twafumanga uku Guadeloupe, umwina umwi watwiwisyeko amazwi yano Yesu walanzile aya pali Mateo 13:38 akuti: “Calo cikwimilila insi.” Fwandi lyonsi lino twapeelwa umulimo upya tukaiusya sweineco ukuti tucili tukuombela umu calo icili cimwi kwene asi mulandu na kuno tuli. Alino, antu ni cifulo ali vintu vicindame sana!

Nga twafika uku ncende ipya tukalola ukuti yauze yakwanisya ukwikala nupya yaya ni nsansa. Fwandi naswe tukaezya na maka ukwikala wakwe vino aayako yakaikala. Ivyakulya vikapusana na vino twayelezya, nomba tukalya vino aayako yakalya nu kumwa vino yakamwa cikulu sile tukucita ivingatwazwa ukuicingilila uku malwala. Tukaezya na maka ukulanda ivisuma pa mulimo onsi uno twapeelwa.

Ya Marie-Line: Nupya tukasambilila ivingi uku ina na ya nkazi aku ncende iyo. Nkaiusya cimwi icacitike lino sile twafisile umu French Guiana. Yatoonyanga sana fwandi twalolelanga ukuti imvula isile alino tuye umu mulimo wa kusimikila. Nomba nkazi umwi wanguzizye ati: “Uzye imuipekanya ukuya umu mulimo wa kusimikila.” Nazungwike, nupya namwaswike inti: “Tungapita uli vino ikutoonya?” Lyene waswike ati: “Sendini ambulela lyene tumaomvya majinga itu.” Fwandi nasambilile ukulema ambulela ala kuu nkupisya ijinga. Nkana ukusambilila vivyo, nga ntatazile injapo umu mulimo wa kusimikila mu nsita ya mvula!

Mwakuuka pa miku umupipi na 15. Uzye kuli vino mungalandako pa kukuuka ivingazwa yauze?

Ya Marie-Line: Kukuka insita zimwi kungaya intazi. Nomba nanti ciye vivyo cacindama ukulonda incende kuno mungatemwa ukwikala nu kupuuza nga mwawela umu mulimo wa kusimikila.

Ya Jack: Ilingi nkapenta ing’anda lino tutatala twingilamo. Ndi cakuti aina aku musambo iyamanya ukuti tusikulengela uku ncende iyo, insita zimwi yanenanga iyati: “Ya Jack mutapenta ing’anda iyo!”

Ya Marie-Line yamanya sana ukulonga. Yakalonga vyonsi umu vibokosi nu kulembapo iviya ivilimo kuno vilinzile ukuya wakwe, “vii i vya kulusasa,” “ku muputule wa kulalako,” “ku cikini” na vyuze sile. Fwandi nga twafika pa ng’anda itu ipya, cikatwangukila lino tukulongolola ukwika ivibokosi kuno vilinzile  ukwikala. Yakalemba vyonsi ivili muli cila cibokosi pakuti catwangukila ukuzana iciviya cino tukulonda.

Ya Marie-Line: Pa mulandu wakuti twamanya ivya kulonga ningo iviya cikatwangukila ukutandika umulimo lino twafika sile ukwaula ukusumba insita.

Uzye mukatantika uli imilimo inu pakuti muombe ningo umulimo winu uwa kusimikila?—2 Tim. 4:5.

Ya Marie-Line: Tukapuza pa mande nu kupekanya ukulongana. Lyene tukatandika umulimo wa kusimikila pali ciili mpaka umulungu iusila.

Ya Jack: Nanti icakuti tukalondekwa ukukwanisya maawazi yamwi cila mwezi tusiika amano pali vivyo swemo tukaomba sile. Ukuomba umulimo wa kusimikila aali cintu cicindame sana umu umi witu. Ukufuma pa nsita ino twafuma pa ng’anda ukuya umu kusimikila ukufikila lino twawela tukaezya na maka ukusimikila aliwensi wino twakomaana nawe.

Ya Marie-Line: Nga tukuya umu kucina nkasenda utupepala twi landwe. Antu yamwi yakaiza pano tuli nu kulenga impapulo zino tukweti nanti icakuti tutayanenyile ukuti sweswe ya Nte Yakwe Yeova. Pa mulandu wakwe cii tukacenjela sana umu mizwalile itu na muli vino tukacita. Antu yakaika sana mano uku vintu vivyo.

Ya Jack: Nupya tukasimikila nga tukucitila ainamupalamano ivintu ivisuma. Yakalola vino nkazifya pa ng’anda paane kusola mapepala, ukwita ivikona nu kupyela mafwa aali pa musolo. Ainamupalamano itu nga yalola vivyo yakanguzya iyati: “Uzye imukwata Baibo iyakumpeela?”

Ilingi mukasimikila umu mizi sana. Uzye mungiusyako vimwi iviiyele ivyacitike lino mwaombelanga umu vifulo vii?

Ya Jack: Mu Guiana, incende zimwi zyatala pa kuyafikako. Ilingi twapitanga amakilomita 600 mu mulungu mu miseo iipe. Nkaiusya sana ivyacitike lino twaile umu kutandala uku St. Élie umuzi uwayela umu musitu wa Amazon. Twapitanga maawazi aingi ukuomvya motoka ikakwanisya ukupita umu museo uwononeke na kawato. Antu aingi aikalanga kuku imbanga goldi. Pa kulanga ukutaizya pa mpapulo zino twayapeelanga, yamwi yatupeelanga utuulungwa utunono twakwe goldi pa kusangwilako. Manguzi twayatambisizyeko vidyo yonga iya mwi uvi litu. Aingi yazanyilweko.

Ya Marie-Line: Patalengile ya Jack yayaneyile ukuyalanda ilyasi lya Ciusyo uku Camopi. Pa kuyafika kuku, twapisile maawazi 4 pa Luzi Lwa Oyapock ukuomvya kawato. Cazifile sana ukupita pa maawazi 4 ukuomvya uwato.

Ya Jack: Pano twazana manzi anono uwato wasimulanga sana nupya cico cali nu kuleta uzanzo. Cuvwisyanga ningo sana ukulola kuno uwato ukusimulisya pa manzi aingi. Kapisya wa wato alinzile ukumanyikisya ukupisya pakuti akwanisye ukupita pa manzi ya musango uwo. Nomba cazifile sana ukupita pa manzi ya musango uwo. Nanti cakuti kwali sile ya Nte 6, antu 50 izile iyazanwa uku Ciusyo ukwikako sile na ina Amerindiana yamwi!

Ya Marie-Line: Acance yangaipakizya ivisuma vii ndi cakuti yakuombela sana Yeova. Mulinzile ukutaila sana Yeova ndi cakuti mukupita umu vintu vya musango uu, nupya utailo winu ulakomelako. Ilingi tukalola vino Yeova akatwazwa.

Mwasambilila indimi izipusanepusane. Uzye camwangukila ukusambilila indimi zizyo?

Ya Jack: Awe foo. Nasambilile indimi zii pakuti nasimikila nu kwazwa amu cilongano. Natungulwile Isambilililo Lya Lupungu lwa Mulinzi umu Cisranantongo * ala ntatala napeelwapo ni lyasi lya kuwelenga Baibo. Nuzizye umwina ndi cakuti yuvwanga vino nasambilizyanga. Waswike ukuti: “Insita zimwi tutaali tukuvwikisya vino mukulandapo, nomba imwatungulula ningo sana.” Acance yatwazwilizye sana. Nga naluvyanya yanenanga, nomba aikolo yene yatanenanga. Nasambilile ivintu ivingi uku yacance.

Ya Marie-Line: Umu cifulo cimwi, nakweti masambililo ya Baibo amu Cifrench, Ciportuguese ni Cisranantongo. Nkazi umwi wanenyile ukuti natandikila na masambililo ya ndimi zino ntamanyile sana ukuvwanga alino nsyalikizya na mu ndimi zino manyile ningo. Nilwike icalenzile alande vivyo.

Uwanda umwi, natandikiile ni sambililo lya mu Cisranantongo alino ipalondelela ilya mu Ciportuguese. Lino natandike ukutungulula isambililo lya Ciportuguese, nkazi wanenyile ukuti: “Ya Marie-Line, nkulola kwati pamayako uwavya umwi!” Lyene nilwike  ukuti nalandanga uku mwanaci uwa ku Brazil umu Cisranantongo umu cifulo ca kulanda nawe umu Ciportuguese!

Yano mwaombela pamwi nayo yamutemwa sana. Uzye mwacita uli pakuti muye ya cuza asuma uku ina yayo?

Ya Jack: Pa Mapinda 11:25 pakati: “Umuntu wa mwenzo wa luse wene alaya nu longo.” Tusilezyoka ukuya pamwi na antu yauze nanti ukuyacitilako vimwi. Nga kwaya ukuzifya Ing’anda ya Wene, aina yamwi yakanena ukuti: “Lekini ya kasimikila aliyo yaomba.” Nomba nkayanena ukuti: “Nani kwene nene kasimikila. Fwandi nga kuli imilimo ya kuomba, nkalonda ukuzanwako.” Nanti icakuti swensi kwene tukalonda ukukwata insita yakuya swenga, tukaiusyako ukuti tutalinzile ukuleka cico citulesye ukucitilako yauze ivisuma.

Ya Marie-Line: Tukaezya na maka ukulanga aina na ya nkazi ukuti twaikako sana mano. Ukucita vivyo kukalenga tumanye ndi cakuti yakulondekwa umwi uwakuyalolelako ana nanti ukuyasenda uku sukulu. Nga twamanya vivyo tukatantika ningo imilimo itu pakuti tuyazweko vino yakulondekwa ukwazwiwa. Ukucita vivyo kukalenga twakomya ucuza witu na yauze nu kuipekanya ukuyazwilizyako lino yakulondekwa uwazwilizyo.

A mapaalo ci yano mwapokelela umu kuombela ukukalondekwa ya kasimikila aingi?

Ya Jack: Umulimo wa nsita yonsi walenga tupaalwe sana. Ilingi tukaipakizya ukulola uumbo wakwe Yeova. Nanti icakuti insita zimwi tukakwata intazi, twakwata umutende umu melenganyo pano twamanya ukuti antu yakwe Leza yakatutungilila konsi kuno tuli.

Lino nali umulumendo, nanyefilwe umu cifungo ca ku French Guiana pa mulandu wa kukana ukuya umusilika. Ntatazile inelenganyepo ukuti wanda umwi ndaswilila uku French Guiana ala nene misyonali nu kupeelwa insambu zya kutandalila amu vifungo nu kuyasimikila. Mu cumi cumi Yoeva akapaala wakwe cimwi!

Ya Marie-Line: Ukuipeela nemwineco ukwazwilizya yauze kwandetela sana uluzango. Twaya sana ni nsansa pano tukaombela Yeova. Nupya ukucita vivyo kwalenga icupo citu ukukoma. Insita zimwi, ya Jack yakanguzya ndi cakuti tungamako atwalane yamwi akulondekwa ukukomeleziwa ukuti twize tuliile pamwi nayo. Lyonsi nkaasuka ukuti: “Nani kwene avino inkwelenganya vivyo kwene!” Insita izingi cikacitika ukuti tukwelenganya pa vintu ivili vimwi.

Ya Jack: Patalengile yanzanyile na kansa aakalenga catala pa kusumba manzi. Nanti icakuti ya Marie-Line yasiuvwa ningo ukuvwa amazwi yaa, nkayanena inti: “Mamane, ntatala nakota, nomba nanti icakuti nafwa likwene, namanya ukuti naomvizye umi wane uku kucita ivintu vicindame, ku kuombela Yeova na cico cikalenga inje sana ni nsansa.”—Utan. 25:8.

Ya Marie-Line: Yeova watupeela imilimo iingi ino tutatazile twelenganyepo ukuti tungaomba nupya watulenga tucite ivintu ivingi vino tutatazile twelenganyepo. Kwaya ivintu ivingi ivisuma ivyatucitikila umu umi. Tulaya ukuli konsi kuno iuvi lyakwe Yeova lyatunena ukuya pano twataila ukuti Yeova alatwazwa lyonsi.