Jack ni Marie-Line enaalaba vamodha mabasa a mudhidhi watene obajha yaka ya 1988. Aliwa enoniwe ninga athu enaaguvela orumedha masadduwo, teto eharumedha mabasa oothomeliwa owinjhiva elabo yo Guadalupe ni yo Guiana Francesa. Murudda ndha dhinasogoleliwa ni Beteli yo França. Kabeni nthapanye naaliwa.

Yuthukuleleni ddi ovolowa mmabasani a mudhidhi watene?

Marie-Line: Miyo gunnuwile elabo yo Guadalupe, ngali mwaana malabo owinjhiva goolaba ni amama mmalaleyelo nduwa nantero. Amama nivano Anamona a Yehova ooviheya. Miyo ginowadhivela athu, bumwahaya numala ohudhera oskola wabajha mabasa oopiyonero yaka ya 1985.

Jack: Ngali muzombwe miyo gakalesa naaddibila yaali mmabasani a mudhidhi watene, yadhiveliwa vanlubale wapara mabasa oolaleya. Gakuma feriya oskola goolaba ninga piyonero ookavihera. Omamalelo wa sumana nodhowa olaleya ni maxibombo murudda yalabesa mapiyonero ale. Nolaleya nduwa nantero​—namala nodhowa okubuwa oparaya. Ole waali mudhidhi wohagalasa!

Nutelana ni Marie-Line yaka ya 1988, miyo wubuwela: ‘Iyo nihikanna ofuru: Kiyakale yapama wilibihera mmabasani oolaleya?’ Vano miyo ni mwaraga Marie-Line wariganela mabasa oopiyonero. Yaka yoharela iyo odhowa eskola yamapiyonero, ni othomiwa ninga apiyonero avayekiwa. Nahikanna dhothomeliwa dhowinjhiva elabo yo Guadalupe, numala iyo withaniwa olaba elabo yo Guiana Francesa.

Yaka ndha dhivinre muhuthomeliwa mabasa oohiyana-hiyana. Enukaviherani ddi olemelela mowaguva mudhidhi muxa?

Marie-Line: Addibila oobeteli elabo yo Guiana Francesa yahinona wi yolebela yanidhivela yaali ya Isaías 6:8. Vano aliwa yanligarela yowabiha onteyiha ni madhu ala: “Munowubuwela yolebela ele enudhivelani?” Vano iyo nowonelamo muselu yafuniwa owoga: othomeliwa mabasa maxa. Mbwenye iyo nowaakula: “Nili vala! Nrumeni!”

Ethu nnarabelihu werana, fuwaliganiha mabasa  ninnihuna ovanene ni ale naaparihu kale, mwaha nerana yela iyo podi wambela ohavaha thima mabasa nnaaparihu ovanene. Teto nnowilibihera wanona pama addibila naarogola.

Jack: Malabo mamodha akwihu yoniloba wi nihitame. Yofuna yewa yaali nihikale wolapela naliwa. Mbwenye iyo nikumaga o Guadalupe ddibila dhaala ahinubusedha madhu a Yesu enafwanyeya va Mateus 13:38 enawoga: “Mundda elabo.” Bumwahaya nathomeliwa mabasa maxa, nnowubuwela wi nivano nnalaba mundda mmodhave, kinapwatheya mburo nrihu. Yathimaya fukanna murudda naathu owalaleya.

Nafiya murudda muxa nnowona wi athuya eri ohagalalene. Vano nnowilibihera okala ninga aliwa enakaliwa. Yojha podi ohiyana, mbwenye nnojha ele enajhiwa teto nnog’wa yele enag’wiwa, mbwenye nnowilibihera okala ooyesa. Ohiya eyo nnowilibihera wawoga nuupama mabasa nthomeliwihu.

Marie-Line: Nihudhera dhego dhowinjhiva naaddibila a murudda nathomeliwihu. Ginowubuwela sumana naafiyilihu elabo yo Guiana Francesa, nlabo noobajha okuma mmalaleyelo naaligi nlabo na muzongwe. Iyo wera: Nimujhedhihe muzongwe aremuse, namala nibajhe olaleya. Mbwenye mohilegela murogola mmodha wera: “Mbwana nimaruwe?” Miyo omukoha nutikina: “Nimuzongweya?” Oliye ogaakula: “Omuthukule sumburunya awo, nnadhowa ni jhinga.” Nlabo nenne gahihudhera weddiha jhinga wula ngahiddele sumburunya ni nlada nimodha. Ele yahigikavihera vanlubale, mwaha yerege ogirusa olaleya mudhidhi wa muzongwe!

Nyu muhutama dila 15. Dhoxagiha baani munafuninyu wavaha athu amodha wodhela otama?

Marie-Line: Otama kahi ethu yokweya, enorusa. Mbwenye yathimaya fufwanya mburo wokala, wavireliwa nduwa nantero mmalaleyelo.

Jack: Kadda nyumba yehu exa, miyo ginodhiveliwa obandihedha mba dezenyu dhithabwile oriya. Malabo mamodha addibila oobeteli yanona wi kannaalegele ni mabasa ale nthomeliwihu yowera: “Jack olenddoola kinahoweleya obandihedha siri dezenyu.”

Marie-Line ohulemela omaga dhoobo! Oliye anoweka dhego dhatedhene mukaxani, amala oleba kadda kaxa: “dhoobo dhokastubanyu”, “dhokwartu”, “dhomapiyelo” ni dhimodha. Vano nafiya nyumba exa enokweya weka kadda kaxa  vamburoni vewa. Ohiya eyo oliye anolebela dhego dhatedhene dhinafwanyeya muwari mwa kadda kaxa. Eyo enonikavihera ofwanya dhithudha mowaguva.

Marie-Line: Wiwegeredha winonikavihera ohogolowela mabasa ehu mowaguva.

Munegeredha addi mudhidhi wenyu wihina mwande “olaleya mowakwanela”?​—2 Tim. 4:5.

Marie-Line: Txiposi nlabo nehu nowithuwa ni wegeredha mutugumano. Vano obajha txipili odhowa osogolo nnokuma mmalaleyelo.

Jack: Kadda mweri nihikanna muthengo wa mawora enahoweleya wapeleka, mbwenye kannathabwa wubuwela muselu yola. Mwaha ethu yathima mwigumini mwehu fulaleya. Okumawene vaade nnosayela othapanya ni athu atene nnagumanihuna.

Marie-Line: Motajhiha, miyo ginowathukulesa mafolyetu nadhowaga opikinikini. Athu amodha enonilobesa malivuru podive nihawaddele wi nili Anamona a Yehova. Mwaha wa yeyo nnowilibihera malabo amatene owara guwo dhofwanelela ni okanna yeddelo yapama woona wi malabo owinjhiva athu enosugwa ekalelo yehu.

Jack: Teto nnovaha onamona mwaha okala amwanddamani apama. Miyo ginowaddoddelesa mapapeli enamothela vati, ginorahila lixu ni ginowaxela matakuru enamothela sere-sere ya rampa. Amwanddamani ehu enowoona dhego ndha ni enogikoha: “Kunna mwana Bibliya ogivahe?”

Nyu muhudhowa olaleya murudda dhowinjhiva dhihinalaleyiwege. Munowubuwela ethu yapadduwe muhunaddiwalinyu?

Jack: Ofiya murudda dhimodha dho Guiana enorusa. Malabo mamodha nomala sumana yantero needdaga olenddo wa 600 kilometuru, teto diladha kadhali dhapama. Nlabo nimodha nahidhowaga murudda wo Saint-Élie, kokola yo Amazônia, ole waali olenddo wohiddiwaleya! Naheeddaga mawora owinjhivene ni karo numala iyo okitamo, ogwela lanxa vano iyo ofiya. Athu owinjhiva a murudda yole yalaba mminani yatiba oru. Athu amodha yodhiveliwa vanlubale malivuru naavahihu, dhovelela dhewa yanivahedhela kase-kase dha oru. Omahiyuniwa iyo woniha vidiyu dha nikuru nehu. Athu owinjhiva yahidha woona.

Marie-Line: Movaneneve Jack ahithaniwa wi awoge mwaha wowubuwela okwa wa Yesu murudda wo Camopi. Naheeddaga mawora mannayi ni lanxa mwihinjhe wo Oiapoque, vano iyo ofiya. Ole waali olenddo wohiddiwaleya.

Jack: Vaari va mwihinjhe ole, manjheya enothabwa wumba ni enowopiha. Wawoona manjhe amatene ale edhaaga osogolo wehu ni kopolodha yaali ethu yootikiniha. Enohoweleya nameddihaya anone weddiha pama. Mbwenye waali olenddo wothabwesa oriya. Anamona a Yehova oobaddiziwa yadhilege va mutugumanoni wubuwela okwa wa Yesu yaaligi 6, mbwenye naataganyiha athu atene yaaligi 50, amodhaya yaaligi anamurala a wowule.

Marie-Line: Ole ali muzombwe onafuna wawenjhedhedha mabasa aye oomulabela Yehova, nuliyeya podi okanna dhopadduwa dhoriya ninga dhendha. Mudhidhi yoyo enohoweleya omuroromela Yehova, vano nroromelo nawo nnere okala nooliba. Malabo owinjhiva iyo nihoona nlada na Yehova nnikaviheraga.

Nyu muhudhera dhiwogelo dhowinjhiva. Eyo gari yobaliwana?

Jack: Naari. Gihihudhera dhiwogelo dhimodha mwaha yaali ethu yahoweleya. Naari gihinamwilerigi Bibliya niwogelo ya esranantongo * yohoweleya miyo weeddiha ohudhera wa Namasugwera! Numala, miyo omukoha ddibila dhaala akala gahiwoga pama. Oliye waakula: “Madhu mamodha iyo kanawoonelamo, mbwenye yahiriya.” Ahima yoonikavihera vanlubale. Apogoya kiyanaddela naviriganiha, mbwenye ahima yoonaddela. Gihihudhera vanlubale ni ahima.

Marie-Line: Murudda dhaala miyo gahikanna anamahudhera yawoga efranses, ezugu, esranantongo. Vano murogola dhaala ogixagiha, wera: Wambelege ohudhiha ni dhiwogelo dhorusa, ogomihedhege dhiwogelo dhokweya. Vasogolova  miyo wonelamo wi yoxagiha ele yaali yapama.

Nlabo nimodha, gannaga anamahudhera abili, mmodha awoga esranantongo, anabili ezugu. Mbwenye gibanjhemi nnamahudhera anabili murogola aali ni miyo wera: “Marie-Line, ginona ohuddiwala ethu.” Vano miyo wonelamo wi ohiya gimuhudhihe mbarazilera ole ni ezugu, gamuhudhiha ni esranantongo!

Mulogo dhatedhene mulambenyu addibila enowudhivelani vanlubale. Ethu baani enukaviherani wandana pama naddibila?

Jack: Provérbios 11:25 anawoga: “Muthu oovaha anere ohadda”. Iyo nnodhiveliwa vanlubale okala naaddibila ni wakavihera. Yakalawo mabasa oNyumbani Yomwene addibila amodha enowoga: “Mabasa ala baanamalaleya.” Mbwenye miyo ginowakula: “ni miyowa gili namalaleya. Akala ehikalawo mabasa enahoweleya opariwa ni miyowa ginofuna wapara.” Ebaribari wihina iyo atene nnofuna mudhidhi wokala yekihu, mbwenye sapama wubuwela wi efunelo ela, kahiyo onihiha wawerela opama athu amodha.

Marie-Line: Iyo nnowilibihera vanlubale wathuwathuwela addibila. Motajhiha, ddibila anfunaga muthu owahalana anaye obe wadhowela oskola iyo nnowerana ethu-sithu wi naakavihere. Enanithukulela okanna wandana wooliba naaddibila, fuwakavihera yahowelaga nikavihero.

Mwaha olaba winahoweleya anamalaleya, mareeliho baani mwawakelinyu?

Jack: Mabasa a mudhidhi watene enodhana ohagalala. Nahikanna oneti winlubale wowaddamela ni wonona pama dhopaddusa dha Yehova. Nofwanyiwa makathamiho, mbwenye nihikanna murenddele mwaha nihinona wi mburo-bu-mburo nrihu nihikanna nikavihero na nlogo na Mulugu.

Ngali muzombwe, gahimagiwa elabo yo Guiana Francesa mwaha wohikala epaddi yelabo. Miyo kagubuwela wi nlabo nimodha gere ohogolowela o Guiana Francesa ninga misiyonariyu ni gere okanna ofuru wolaleya mukambura. Mohanganyedha Yehova ohugireeliha vanlubale!

Marie-Line: Wakavihera athu amodha, ethu enagivaha ohagalala. Nihihagalala vanlubale mwaha wapara mabasa a Yehova. Teto enowawiwananiha matelo ehu. Malabo mamodha mamunaga Jack onowogesa: “Anamatelana ale ehikwerebeya. Nawithane, njantari vamodha”? Malabo owinjhiva miyo ginowaakulesa: “Nimiyowa gubuwela emodhave!” Vano iyo wawithana.

Jack: Ovanene vala gihikanna kanseri a prostata. Marie-Line kanadhiveliwa gaawogaga: “Mwaraga, gakwa mangwaana, ginakwa ‘owuluvalene’. Mbwenye miyo ginakwa ngajhilevo, mwaha gihilabihedha egumaaga ni dhego dhomuzimuni dhiri dhithu dhathima.”​—Gén. 25:8.

Marie-Line: Yehova ohunifugulela musiwo nahajhehihu ni ohuneenya werana dhithu nahubuwelihu. Nahikanna egumi yoreelihiwa vanlubale. Iyo nnomuroromela Mulugu ni murima wehu watene vamodha nnikuru naye, teto nikuru naye nanloba oya mburo-bu-mburo nnaya wongo.