Jack uan Marie-Line peuak sentekitij kemej precursores itech xiuit 1988. Amo ouij kinkisa momatiskej kampa kintitanij, uan miakkan tapaleuianij ompa Guadalupe uan Guayana Francesa, xolalmej kampa axkan taixyekana sucursal tein moajsi Francia. Maj tikinchiuilikan seki netajtanilmej.

¿Keyej nankiixtalijkej nanmochiuaskej precursores?

Marie-Line: Nimoskaltij ompa Guadalupe, uan nitanojnotsaya nochi tonal iuan nomomaj, akin semi kiyolpaktiaya tanojnotsas. Kemej semi nikintasojta taltikpakneminij, nimochiuak precursora satepan ke nikisak kaltamachtiloyan itech xiuit 1985.

Jack: Keman katka nitelpoch, nochipa niyetoya iniuan tokniuan akin katkaj precursores uan semi kiuelitayaj tanojnotsaskej. Nimochiuaya precursor auxiliar keman seki tonalmej amo tamachtiayaj itech kaltamachtiloyan. Kemansa, itech itamian semana, tiyayaj itech autobús uan titanojnotsayaj nochi tonal iniuan precursores. Satepan tiyayaj ueyi atenoj timoixpetanitij. Semi kualtsin katka.

Marie-Line uan nejua timonamiktijkej itech xiuit 1988. Tepitsin satepan, niknemilij: “Monekiskia okachi titanojnotsaskej. Amo teyi techtsakuilia”. Yejua ika nimochiuak precursor, kemej Marie-Line. Se xiuit satepan, tikselijkej nemachtil tein kiseliaj precursores, uan keman tamik, techtitankej kemej precursores especiales. Titapaleuijkej itech miak xolalmej tein moajsij Guadalupe kampa semi tiyolpakkej, uan satepan techtitankej Guayana Francesa.

Miakkanya namechtitaninij xitapaleuitij. ¿Toni namechpaleuiani ximomatikan?

Marie-Line: Tokniuan akin tapaleuiayaj Betel ompa Guayana Francesa kimatiaj ke texto tein okachi tikuelitaj yejua Isaías 6:8. Yejua ika, keman technotsayaj ika teléfono, miakpa kiauilijtouayaj: “¿Nankielnamikij katiyejua texto tein okachi nankiuelitaj?”. Tikmatiaj ke nejon kijtosnekia ke oksepa techtitaniskiaj okseko, yejua ika tikijtouayaj: “¡Nikan tiyetokej! ¡Xitechtitanikan!”.

 Amo tikuelitaj tiknemiliskej ox okachi kuali kampa achto tiyetoyaj, porin nejon kichiuaskia maj amo tikpatiuitakan tein tikpiaj kampa axkan tiyetokej. Uan no, timochikauaj tikinixmatiskej tokniuan kampa titapaleuijtokej.

Jack: Achto, seki tokniuan amo kinekiaj maj tiyanij okseko, yejua ika techiluiayaj maj ompa tiksentokanij. Sayoj ke keman tikiskej Guadalupe, se tokniuj takat techiluij tein kijtoj Jesús itech Mateo 13:38: “Milajtal [...] in taltikpak”. Yejua ika, keman techtitanij okseko tikelnamikij ke tiksentokaj titapaleuijtokej itech nejon “milajtal”, maski kampa yeski timoajsiskej. Tein melauj, okachi moneki maj tikinnojnotsakan akin ompa nemij.

Keman tiajsij okseko, tikitaj ke akin ompa nemij yolpakij. Yejua ika timochikauaj tinemiskej kemej yejuan. Maski xa taman takual tein ompa onkak, tikuaj tein yejuan kikuaj uan titayij tein yejuan tayij, sayoj ke timoyekpiaj uan ijkon amo tikokolispeuaskej. Timochikauaj nochipa kuali ika titajtoskej kampa titapaleuianij.

Marie-Line: Tokniuan no techmachtiaj miak taman. Nikelnamiki se taman tein panok keman yankuixtok tiajsikaj Guayana Francesa. Semi kiouia, yejua ika tiknemiliayaj ke monekiskia timochiaskej maj takisa uan satepan tiyaskej titanojnotsatiuij. Sayoj ke se tokniuj siuat nechiluij: “¿Tiyouijya?”. Uan nejua niktajtanij: “¿Keniuj?”. Nechiluij maj nikui noparagua uan maj tiyakan itech tobicicletas. Ijkon nimomachtij nikitskijtiyas noparagua keman niyaya itech nobicicleta. Komo amo niueliskia, xa amo keman nitanojnotsaskia keman kiouia.

Nanmokalpatanij kemej kaxtolpaya. ¿Toni uelis nankiniluiskej akin tapaleuitij okseko?

Marie-Line: Se mokalpatas uelis yeski ouij. Sayoj ke moneki se kipias kani se ajsis satepan ke se tanojnotsatiuj.

Jack: Nochipa keman timokalpataj, niktapaluia (pintar) kali taijtikkopa. Tokniuan akin tapaleuiayaj itech sucursal kemansa kimatiaj ke xa amo tiuejkauaskiaj kampa techtitaniaj, yejua ika nechiluiayaj: “Jack, amo moneki xitatapalui axkan”.

Marie-Line kimatililijya keniuj motaejeuis. Nochi takalakia itech cajas uan kijkuilouilia seki taman kemej nejin: “Nekalauiloyan”, “Kampa tikochij” oso “Kampa titakualchiuaj”. Ijkon, keman tiajsij itech okse kali, tikmatij kani tiktaliskej cajas. Yejua  kijkuiloua tein kipia sejse caja, ijkon ueli niman tikajsij tein tiknekij.

Marie-Line: Kemej tikmatijya tein moneki tikchiuaskej keman timokalpataj, ueli niman tikisaj tanojnotsalis.

¿Keniuj nankiixtaliaj tonalmej keman nantanojnotsaj? (2 Tim. 4:5.)

Marie-Line: Tonal lunes timoseuiaj uan timomachtiaj tein tikitaskej itech nechikolmej. Okseki tonalmej itech semana tikisaj tanojnotsalis.

Jack: Maski ixyetok kanachi hora moneki titanojnotsaskej, amo yejua nejon tiktayekanaltiaj, ta tikitaj ke okachi moneki tikinpaleuiskej taltikpakneminij. Keman tikisaj tokalijtik uan hasta keman timokepaj, timochikauaj tikinnojnotsaskej nochin akin tikinitaj.

Marie-Line: Kemej neskayot, nochipa keman timoixpetanitij, nikuika seki tratados. Kemansa sekin techtajtaniaj se amaix, maski ayamo tikiniluiayaj ke tiitaixpantijkauan Jiova. Yejua ika, timochikauaj kuali timotakentiskej uan tikchiuaskej tein kuali, porin taltikpakneminij kiitaj nejon.

Jack: No tikteixmatiltiaj tein timomachtiaj keman tikinpaleuiaj akin nemij kampa ika tejuan tinemij. Nochipa nikololoua tajsol uan imaxiujyo koujmej tein xini. Akin ompa nemij kiitaj tein nikchiua uan kemansa nechiluiaj: “¿Uelis tinechonmakas se Biblia?”.

Miakpa monekini nantanojnotsatiuij kampa okachi uejka. ¿Nankielnamikij teisa tein ompa namechpanok?

Jack: Ompa Guayana Francesa, moajsij seki xolalmej kampa ouij se ajsi. Miakpa tiyajkej 600 kilómetros itech se semana kampa semi ouijkan. Okachi nikelnamiki keman tiyajkaj xolal Saint Élie, ompa Amazonia. Miak horas tiyajkej itech se carro tein ueli kalaki kampa ouijkan, uan satepan itech se piragua (se tsikitsin barco). Miakej akin ompa nemij kitemouaj oro. Kemej semi kitasojkamatkej maj tikinmakanij amaixmej, sekin techmakakej tepitsin oro porin kinekiaj tapaleuiskej. Keman tayouak, tiktalijkej se video uan miakej kiitatoj.

Marie-Line: Seki xiujmej achto, Jack kiyoleujkej maj kitemakati tanojnots ompa Camopi itech tonal keman moelnamikik imikilis Cristo. Tiyajkej naui horas itech piragua itech ueyiat Oyapock. Semi kualtsin tein tikpanokej.

Jack: Kampa at okachi ijsiujka motaloua uan onkak uejueyi tet semi tamouilil. Uan yekmelauj se kimoujkaita keman se ajsitiuj ompa. Takat akin kiuika piragua moneki kimatis keniuj kipanauis. Sayoj ke semi tikuelitakej. Maski sayoj chikuasen tokniuan moajsiaj nejon tonal, yajkaj kemej cincuenta taltikpakneminij, hasta seki maseualmej akin kayomej América.

Marie-Line: Komo telpochmej uan ichpochmej okachi kitekitiliaj Jiova, uelis kipanoskej seki taman kemej nejin tein semi teyolchikaua. Ijkuak moneki se takuaujtamatis iuan Jiova, uan nejon kichiuas maj se itakuaujtamatilis mochikaua. Miakpa tikitaj keniuj Jiova techpaleuia.

Nanuelij miak tajtolmej. ¿Amo ouij namechkisa nanueliskej se tajtol?

Jack: Kemaj ouij. Sayoj ke monekik niuelis nejon tajtolmej porin ijkon ueliskia nitanojnotsas uan nitapaleuis itech nechikol. Kemej neskayot, monekik nikpanoltis nemachtil ika amaix Tanejmachtijkej itech tajtol sranangtongo * maski ayamo nikixtajtoltijtoya Biblia itech nechikol itech nejon tajtol. Niktajtanij se tokniuj ox nechajsikamatkej, uan nechiluij: “Seki tajtolmej amo tikajsikamatkej, sayoj ke kuali tikpanoltij”. Konemej semi nechpaleuijkej, porin yejuan kemaj nechiluiayaj keman nimopolouaya, se taman tein amo kichiuayaj akin uejueykej. Konemej miak taman nechmachtijkej.

Marie-Line: Itech se xolal, nitamachtiaya ika Biblia itech tajtol francés, portugués uan sranangtongo. Se tokniuj siuat nechyolmajxitij maj achto nikmachtiani akin tajtouaya portugués, tajtol tein okachi ouij nechkisaya, uan satepan maj nikmachtiani akin tajtouaya tajtol tein amo ouij nechkisaya. Yekinika amo nikajsikamatik keyej nechiluij nejon.

 Se tonal yaya nikchiuati ome nemachtilmej, yekinika itech tajtol sranangtongo uan ojpatika itech tajtol portugués. Itech ojpatika tamachtilis, tokniuj siuat akin nouan yaya nechiluij: “Marie-Line, siuatsin amo kiajsikamati tein tikiluijtok”. Nikitak ke niknojnotstoya se siuat akin kayot Brasil itech tajtol sranangtongo, uan amo itech tajtol portugués. Ijkuak nikitak ke semi kuali tein nechyolmajxitijkaj.

Semi namechtasojtaj tokniuan kampa nantapaleuianij. ¿Toni namechpaleuiani kuali ximouikakan iniuan?

Jack: Proverbios 11:25 kijtoua: “Akin kualtakat kipias miak taman”. Amo tiknenemilijtokej ox uelis tikinpaleuiskej oksekin, ta niman tikinpaleuiaj. Keman nitapaleuia maj motachipaua itech Kali kampa tiMosentiliaj, seki tokniuan nechiluianij: “Xikaua maj kichiuakan tanojnotsanij”. Sayoj ke nejua nikinnankilia: “Nejua no nitanojnotskej. Komo moneki teisa se kichiuas, nikneki nitapaleuis”. Maski tinochin kemansa tiknekij timoseuiskej, nonamik uan nejua amo tiknekij maj nejon kichiua maj amo tikinpaleuikan oksekin.

Marie-Line: Tikuelitaj tikintajtaniskej tokniuan keniuj yetokej. Ijkon ueli tikmatij keman se tokniuj kineki maj iniuan se mokaua ikoneuan oso maj se kinkuiti kaltamachtiloyan. Ompa, tikpataj tein tikixtalijtoyaj tikchiuaskej uan ijkon uelis tikinpaleuiskej. Nejon kichiua maj kuali timouikakan iniuan uan maj ueli tikinpaleuikan keman moneki.

¿Toni tatiochiualismej nankiselianij porin nantapaleuiaj kampa monekij okachi tanojnotsanij?

Jack: Tiyeskij tiprecursores kichiua maj semi tiyolpakikan. Miakpa, kampa titapaleuianij tikitanij miak taman tein Jiova kichijchiuak tein semi kualtsin. Maski tikpanouanij ouijkayomej amo semi timotekipachouanij, porin tikmatij ke kampa yeski timoajsiskej tikpiaj ininnepaleuil tokniuan.

Keman katka nitelpoch, nechtsakkej ompa Guayana Francesa porin amo niknekik nimochiuas soldado. Amo keman niknemilij ke se tonal nimokepaskia kemej misionero uan ke ueliskia nikinnojnotsatiuj akin tsaktokej. Jiova semi techtatiochiuia.

Marie-Line: Tein okachi kichiua maj niyolpaki yejua nikinpaleuis oksekin. Semi tikuelitaj tiktekitiliskej Jiova. Nejin no techpaleuiani Jack uan nejua maj okachi kuali timouikakan. Kemansa, Jack nechtajtania ox uelis tikinyoleuaskej maj takuakij kalijtik se tokniuj takat iuan inamik uan ijkon uelis tikinyolchikauaskej. Uan miakpa, nikiluia ke no yejua niknemilijtoya. Nejin miakpa techpanoua.

Jack: Seki xiujmej achto, tapajtianij nechiluijkej ke nikpia cáncer itech nopróstata. Uan maski Marie-Line amo kiuelita kikakis nejin, nikiluiani: “Nosiuatsin, ayamo nixiuej, sayoj ke komo mosta nimomikiliskia, nikmati ke nikchiuak tein okachi kipia ipatiuj, niktekitilis Jiova uan nejon semi nechyolpaktia” (Gén. 25:8).

Marie-Line: Jiova techmakani tekimej tein amo tikchiayaj tikseliskej uan tikchiuanij miak taman tein amo keman tiknemilijkej ke tikchiuaskiaj. Tikselianij miak tatiochiualismej. Tiyaskej kampa yeski kampa techtitanis inechikol Jiova, porin senkis titakuaujtamatij ke Jiova nochipa techpaleuis.