Jack uan Marie-Line opejki kitekichiuiliaj Jehová itech xiuitl 1988. Yejuan san niman momatij kanin kintitlanij ma tlapaleuitij. Yotlapaleuijkej ompa altepetl Guadalupe uan Guayana Francesa. Betel tlen kajki Francia kita tekitl tlen ompa mochiua. Ma tiktlajtlanikan seki tlamantli tokni Jack uan Marie-Line.

¿Tleka okachi nankitekichiuiliaj Jehová?

Marie-Line okijto: Onimoskalti ompa Guadalupe uan onechpaktiaya nitetlapouis iuan nonantsin uan ye okipaktiaya kitekichiuilis Jehová. Sapanoua onechpaktiaya nitetlapouis, ik non, onimochi precursora ijkuak otlanki onimomachti escuela 1985.

Jack okijto: Nochipa onikatka iuan tokniuan tlen okachi okitekichiuiliayaj Jehová uan okinpaktiaya tetlapouiskej. Ijkuak amo oniaya escuela onimochiuaya precursor auxiliar. Ualeua itlamian semana, otiayaj itech autobús titetlapouitiuij iuan precursores. Ijkuak otitlamiayaj, otiayaj itempa atl uan otimoyolpaktiayaj.

Marie-Line uan ne otimonamiktijkej itech 1988. Satepan onimokuayejyeko: “Uelis okachi titetlapouiskej porque amitlaj techtsakuilia”. Ik non, opejki okachi niktekichiuilia Jehová ijkon ken Marie-Line. Opanok se xiuitl uan onikselito tlamachtil tlen kiseliaj precursores. Satepan otechiluijkej ma tiyetokan precursores especiales. Otechtitlankej Guadalupe uan otiyolpakej ompa otiktekichiuilitoj Jehová uan satepan otechtitlankej Guayana Francesa.

Miak xiuitl yonantlapaleuijkej itech tlatlamantli altepemej. ¿Tlen onamechpaleui ximomatikan?

Marie-Line okijto: Tokniuan tlen tlapaleuiaj Betel ompa Guayana Francesa okimatiayaj techpaktia tlen kijtoua Isaías 6:8. Ik non, ijkuak otechnotsayaj otechiluiayaj: “¿Nankilnamikij tlen kijtoua texto tlen namechpaktia?”. Ijkon otikmatiayaj oksekan techtitlaniskiaj. Tejuan otikijtouayaj: “¡Nikan tikatej! ¡Techtitlanikan!”.

 Amo keman tikijtouaj kanin otikatkaj okachi kualtsin porque non amo techpaleuia ma tiyolpakikan. Noijki san niman otimouikayaj iuan tokniuan kanin otechtitlaniayaj.

Jack okijto: Sekimej tokniuan otechiluiayaj ma tichantikan ik kanin yejuan ochantiayaj uan ijkon amo uejka tiyetoskiaj. Pero ijkuak ayakmo tiyetoskiaj ompa Guadalupe, se tokni otechilui tlen okijto Jesús itech Mateo 13:38. Ompa kijtoua: “Tetlala ye n tlaltíkpaktli”. Ik non, nochipa tikilnamiktokej non texto ijkuak oksekan techtitlanij. Tiauij kanin techtitlanij porque tikintlasojtlaj akinmej ompa chantij.

Ijkuak techtitlanij okse altepetl, tikitaj sapanoua yolpakij akinmej ompa chantij uan tejuan noijki tiyolpakij. Ualeua ompa okse tlamantli tlakuaj pero tejuan noijki ijkon titlakuaj uan tikonij tlen yejuan konij. Pero achto tikchipauaj tlen tikkuaskej uan ijkon amo timokokoskej. Nochipa tikijtouaj techpaktia kanin tikatej.

Marie-Line okijto: Techmachtiaj miak tlamantli tokniuan tlen ompa chantij. Nikilnamiki tlen otechpanok ijkuak yikin otiajsitoj Guayana Francesa. Sapanoua okiauiaya uan otimokuayejyekojkej timochiaskiaj ma moketsa kiauitl uan tiaskiaj titetlapouitiuij. Pero se tokni onechilui: “Tiauij”. Onimotlajtlachialti uan onikilui: “Pero kiaui”. Onechilui ma nikuika nosombrilla uan tiaskej ipan bicicleta. Ijkon onimomachti nias ipan bicicleta uan noijki onikkitskijtiaya nosombrilla. Tla amo ijkon nikchiuaskia, amo keman nitetlapouiskia ijkuak kiaui.

Yikanaj quince veces yonankatkaj tlatlamantli altepemej. ¿Tlen nankichiuaj ijkuak nankitlatiaj tlen nankipiaj?

Marie-Line okijto: Ualeua oui tikitaj ijkuak oksekan tichantitiuij. Pero moneki tikpiaskej kanin tiajsitiuij ijkuak yotitetlapouitoj.

Jack okijto: Nochipa niktlapaluia kali ken techpaktia kanin tichantiskej. Tokniuan tlen katej Betel okimatiayaj ijkon otikchiuayaj. Ik non, ijkuak amo tiuejkauaskiaj kanin otechtitlaniayaj, otechiluiayaj: “Jack amo tiktlapaluis kali porque amo nanuejkauaskej”.

Marie-Line kimati ken kitlatis nochi tlen tikpiaj. Nochi kitlalia ijtik cajas uan ompa kijkuiloua tlen ompa kitlalia. Kijkuiloua tlen tiktekitiltiaj  kanin titlakualchiuaj, kanin tikochij uan tlen tiktekitiltiaj baño. Ijkon ijkuak tiajsitiuij kanin tichantiskej, tikmatij kanin kajki nochi uan okachi totoka tikkixtiaj tlen tikuikaj. Totoka tikajsij tlen kipiaj cajas porque nochi ompa ijkuilitok.

Marie-Line okijto: Yitikmatij ken tikololoskej tlen tikpiaj uan ijkon san niman peua titetlapouiaj.

¿Tlen namechpaleuia okachi xiktekichiuilikan Jehová? (2 Tim. 4:5).

Marie-Line okijto: Nochi lunes timoseuiaj uan timomachtiaj. Okseki tonalmej titetlapouiaj.

Jack okijto: Moneki tikajxitiskej seki horas pero non amo san techtekipachojtok. Okachi techtekipachoua titetlapouiskej. Peua titetlapouiaj ijkuak tikisaj tokalijtik uan hasta ijkuak timokopatiuij.

Marie-Line okijto: Ne nikinuika amatsitsintin ijkuak kanaj tipaxialotiuij. Ualeua sekimej techintlajtlaniliaj amatlajkuilolmej maski amo tikinmiluiaj tejuan tiiTlaixpantijkauan Jehová. Ik non, timochijchikauaj tikpiaj kuali toyelis uan kuali timotlakentiaj porque oksekimej kitaj tlen tikchiuaj.

Jack okijto: Noijki tikinpaleuiaj akinmej chantij ik kanin tichantij. Nikololoua tlajsoli uan niktlachipauia xochitl. Miakej kitaj tlen nikchiua uan nechiluiaj: “¿Uelis techmakas se Biblia?”.

Namejuan nanyauij uejka nantetlapouitiuij. ¿Nankilnamikij itlaj tlen onamechpanok?

Jack okijto: Ompa Guayana Francesa amo kuali kajki ojtli, ik non, oui okatka tla otiknekiayaj tiaskej okse altepetsintli. Ualeua se semana otinejnemiayaj kanaj 600 kilómetros porque amo kuali kajki ojtli. Nikilnamiki se tonal otiajkej Saint Élie ompa Amazonia. Otiajkej itech se carro uan satepan itech lancha tlen kitokayotiaj piragua. Ompa miakej kitemouaj oro. Miakej omotlasojkamatkej otikinmakakej amatlajkuilolmej uan okinekiayaj tlapaleuiskej, ik non, otechmakakej tepitsin oro. Tiotlak otikinmititijkej se video uan miakej okitatoj.

Marie-Line okijto: Se tonal okiluijkej Jack ma kitemakati se tlapoualistli ompa Camopi ijkuak otikilnamikej imikilis Jesús. Kanaj naui horas otiajkej itech lancha tlen kitokayotiaj piragua. Otipanokej itech aueyatl tlen itoka Oyapock uan ijkon otiajsitoj Camopi. Sapanoua otechpakti.

Jack okijto: Non aueyatl totoka yaui uan teyo. Tetlajtlachialti ken kajki aueyatl. Akin kiuika piragua moneki kimatis kanin ik yas. Otechpakti ompa otiajkej. San okatkaj chikuase tokniuan ijkuak otikilnamikej imikilis Jesús pero omonechikojkej kanaj cincuenta uan sekimej tlen kinmiluiaj amerindias.

Marie-Line okijto: Telpokamej uan ichpokamej tlen kinekij okachi kitekichiuiliskej Jehová noijki uelis kinpanos tlen kualtsin ijkon ken tejuan otechpanok. Moneki tikmatoskej Jehová techpaleuis uan ijkon okachi titlaneltokaskej. Nochipa tikitaj ken techpaleuia Jehová.

Tikmatij onanmomachtijkej seki tlajtoli. ¿Amo nankitaj oui nanmomachtiskej?

Jack okijto: Kema. Onimomachti okseki tlajtoli porque omonekiaya. Amo keman oniktlajtoltiaya Biblia ika tlajtoli sranangtongo * ijkuak onikyekanki tlamachtil ika revista Akin Tetlapouijtok. Oniktlajtlani se tokni kox okajsikamatki tlen onikijto uan ye onechilui: “Seki tlamantli amo otikajsikamatkej pero kuali otikpanolti”. Konemej sapanoua onechpaleuijkej. Pero yejuan onechiluiayaj tlen amo kuali onikijtouaya. Miak tlamantli onechmachtijkej.

Marie-Line okijto: Ne onitlamachtiaya ika francés, portugués uan sranangtongo. Se tokni onechilui achto ma nitlamachti ika tlajtoli tlen okachi oui uan satepan ma nitlamachti ika tlen amo oui. Onechpaleui tlen onechilui.

 Se tonal omonekiaya nikmachtis ikaj ika sranangtongo uan okse ika portugués. Ijkuak opejki nitlamachtia ika portugués, tokni tlen nouan oyaya onechilui: “Marie-Line nesi siuatl amitlaj kajsikamati”. Ijkon onechilui porque siuatl onikmachtijtoka ika sranangtongo uan amo ika portugués.

Tikmatij tokniuan namechtlasojtlaj. ¿Tlen nankichiuaj uan ijkon inmiuan nanmouikaj?

Jack okijto: Proverbios 11:25 kijtoua: “Akin kitemaka tlen kipia, okachi miak tlamantli kipias”. Nochipa tikinpaleuiaj oksekimej. Ijkuak tikyektlaliaj kali kanin timonechikouaj, sekimej tokniuan nechiluiaj: “Xikinkaua oksekimej tokniuan ma tlapaleuikan”. Ne nikinmiluia: “Ne noijki uelis nitlapaleuis tla onka tekitl”. Nikmati moneki niyetos iuan nosiua pero tejuan timochijchikauaj tikinpaleuiskej oksekimej.

Marie-Line okijto: Timotlapouiaj iuan tokniuan. Ijkon tikmatij kox moneki ikaj ma kinmaluili inkoneuan noso ikaj ma kinnotsati kanin momachtiaj uan ijkon tikitaj ken tikinpaleuiskej. Non techpaleuia ma timouikakan iuan tokniuan uan tikinpaleuiaj.

¿Tlen tlateochiualistli yonankiselijkej porque nantetlapouiaj kanin okachi moneki?

Jack okijto: Sapanoua tiyolpakij okachi tiktekichiuiliaj Jehová. Otiyolpakej kanin otiktekichiuilijkej Jehová porque tikitaj ken kualtsin otlachijchi. Ualeua tikpiaj ouijkayotl pero tikatej ika yolseuilistli. Porque tikmatij tokniuan nochipa techpaleuiskej.

Ijkuak onikatka nitelpochtli onechtsakej ompa Guayana Francesa porque amo onimochi soldado. Amo keman onimokuayejyeko oksepa nimokopaskia nikintlajpaloti akinmej tsaktokej uan nikintlapouiskia tlen kijtoua iTlajtol toTajtsin Dios. Jehová sapanoua techteochiua.

Marie-Line okijto: Sapanoua niyolpaki ijkuak nikinpaleuia oksekimej. Techpaktia tiktekichiuiliskej Jehová. Nin nechpaleuia kuali ma nimouika iuan nonamik. Ualeua nonamik nechiluia kox uelis tikiluiskej se tokni uan isiua tlen moyolkokouaj ma tlakuatij tokalijtik. Ualeua nikiluia ne noijki ijkon onimokuayejyekojtoka. Miak uelta ijkon techpanoua.

Jack okijto: Yikipia seki xiuitl onechiluijkej nikpia cáncer itech nopróstata. Marie-Line amo kipaktia ma nikilui: “Notlasojtsin ok nitelpochtli pero tla niualixpoliuis, niyolpakis porque oniktekichiuili Jehová” (Gén. 25:8).

Marie-Line okijto: Jehová yotechkauili ma tiktekichiuilikan kanin amo otikchiayaj tiaskej uan yotikchijkej tlen amo keman otimokuayejyekojkej tikchiuaskej. Ye sapanoua yotechteochi. Tiaskej san kanin techtitlanis ialtepe Jehová porque tikneltokaj toTajtsin Dios nochipa techpaleuis.