UJack loMarie-Line baqalisa inkonzo yesikhathi sonke bendawonye ngo-1988. Bayenelisa ukuntshintsha bavumelane lezimo futhi bavumile ukuyatshumayela endaweni ezinengi eGuadeloupe laseFrench Guiana. Khathesi indawo lezi zikhangelwa ligatsha leFrance. Ake sixoxe labo.

Kuyini okwalenza laqalisa inkonzo yesikhathi sonke?

UMarie-Line: Ngakhulela eGuadeloupe futhi ngangijayele ukutshumayela ilanga lonke lomama, owayenguFakazi otshisekayo. Ngiyabathanda abantu yikho ngathi ngiqeda nje isikolo ngo-1985 ngaqalisa ukuphayona.

UJack: Ngikhula ngangijayele ukuba labantu abasenkonzweni yesikhathi sonke ababekuthanda ukutshumayela. Izikhathi ezinengi ngangisiba liphayona elisizayo nxa izikolo zivaliwe. Kwesinye isikhathi ngempelaviki sasigada ibhasi siyetshumayela lamaphayona ensimini yawo. Sasitshumayela ilanga lonke, ngemva kwalokho siye ekhunjini. Sasikholisa kakhulu ngalezonsuku.

Ngemva nje kokutshada loMarie-Line ngo-1988, ngazibuza, ‘Kungani singenzi okunengi enkonzweni njengoba kungelazinto ezisivimbayo?’ Ngaqalisa ukuphayona loMarie-Line. Ngathi sengiphayone okomnyaka, sangena isikolo samaphayona futhi ngemva kwalokho saba ngamaphayona aqakathekileyo. Sakukholisa kakhulu ukutshumayela endaweni ezitshiyeneyo eGuadeloupe singakacelwa ukuthi siye eFrench Guiana.

Selintshintshwe kanengi indawo elitshumayela kuzo. Kuyini okulincede ukuthi lenelise ukuvumelana lezimo?

UMarie-Line: Abazalwane beBhetheli yaseFrench Guiana babekwazi ukuthi umbhalo esiwuthandayo ngu-Isaya 6:8. Yikho nxa besifonela babeqalisa badlale lathi bathi, “Lisawukhumbula yini umbhalo eliwuthandayo?” Sasihle sikwazi ukuthi untshintsho selusiza yikho sasibaphendula sisithi, “Silapha! Thumani thina!”

Asiqathanisi indawo entsha esesikuyo lesisuke kuzo ngoba lokhu kungenza singakholisi endaweni entsha. Kanti njalo siyazama ukuthi sibe ngabangane labafowethu labodadewethu endaweni leyo.

 UJack: Ekuqaliseni abanye abangane bethu ababengahlosanga okubi bazama ukusincenga ukuthi singahambi ngenxa yokuthi babefuna sihlale siseduze kwabo. Kodwa sathi sisuka eGuadeloupe omunye umfowethu wasikhumbuza amazwi kaJesu akuMathewu 13:38 athi: “Insimu ngumhlaba.” Ngakho siyazikhumbuza ukuthi silokhu sisensimini efananayo kungelani lokuthi singaphi. Phela okuqakatheke kakhulu ngabantu lensimu.

Nxa sifika endaweni entsha siyabona ukuthi abanye bayenelisa ukuphila khona bethokoza. Yikho siyazama ukuphila njengabo. Ukudla kungatshiyana kodwa siyadla abakudlayo njalo sinathe abakunathayo ngapha sizivikela ukuze singaguli. Siyazama ukuthi sikhulume izinto ezinhle ngaloba yiphi indawo esike sahlala kuyo.

UMarie-Line: Sifunda okunengi kubafowethu labodadewethu abahlala endaweni esiyabe sikuyo. Ngikhumbula sisanda kufika eFrench Guiana. Izulu laligxoba okuzwayo yikho sasicabanga ukuthi kumele sime ukuya ekutshumayeleni lize liphele. Kodwa omunye udade wangibuza wathi, “Sesingahamba yini?” Ngamangala ngamphendula ngathi, “Njani?” Yena wathi, “Thatha i-umbrella yakho, sizahamba ngamabhayisikili.” Yikho ngafunda ukutshova ibhayisikili ngapha ngibambe i-umbrella. Aluba angikufundanga lokhu ngangingasoze ngitshumayele ngesikhathi sezulu.

Selithuthe izikhathi ezingaba ngu-15. Yiwaphi amacebo elingawanika abanye mayelana lokuthutha?

UMarie-Line: Ukuthutha akulula. Lanxa kunjalo, kuqakathekile ukuthi uthole indawo yokuhlala lapho ongaziphumulela khona nxa uvela enkonzweni.

UJack: Ngijayele ukupenda imiduli yaphakathi kwendlu yethu entsha. Ngezinye izikhathi nxa abazalwane abasegatsheni bekwazi ukuthi asisoze sihlale isikhathi eside bayathi kimi, “Jack, khathesi ungazihluphi ngokupenda.”

UMarie-Line uyakwazi sibili ukupakitsha. Ufaka izinto zonke emabhokisini abesewabhala ukuthi, “okwendlu yokugezela,” “okwendlu yokulala,” “okwekhitshini” njalonjalo. Yikho nxa sifika emzini wethu omutsha kuba lula ukuthi siwafake endlini eyiyo. Uyabhala lokuthi kulani ebhokisini ngalinye ukuze kungasithwalisi nzima ukuthola izinto esizifunayo.

UMarie-Line: Nxa sifika endaweni entsha akusithathi isikhathi ukuqalisa ukutshumayela ngoba sesafunda ukuhlela kuhle izinto.

 Lisihlela njani isikhathi senu ukuze ‘liyenze ngokupheleleyo inkonzo yenu’?—2 Tim. 4:5.

UMarie-Line: NgoMvulo siyaphumula njalo silungiselele imihlangano yebandla. Kusukela ngoLwesibili kusiya phambili siyabe sitshumayela.

UJack: Lanxa kukhangelelwe ukuthi sitshumayele amahola athile ngenyanga, lokhu ayisikho esikugijimisa kakhulu. Esikuqakathekisayo yikutshumayela. Siyazama ukuxoxa labantu bonke esihlangana labo siphuma endlini size siyephenduka.

UMarie-Line: Ngokwesibonelo, nxa sisiyazilibazisa ngihlala ngihamba lamaphetshana. Abanye abantu bayasilanda bacele amabhuku lanxa siyabe singabatshelanga ukuthi singoFakazi bakaJehova. Yikho siyananzelela indlela esigqoka ngayo lesiziphatha ngayo. Phela abantu bayazikhangela izinto ezinjengalezi.

UJack: Enye indlela esitshumayela ngayo yikuba lomusa kubomakhelwane bethu. Ngiyadobha amaphepha, ngilahle izibi njalo ngithanyele amahlamvu egumeni lethu. Omakhelwane bayakunanzelela lokhu yikho ngezinye izikhathi uyezwa abanye besithi, “Ngicela iBhayibhili.”

Lijayele ukuyatshumayela endaweni ezikhatshana. Zikhona yini izinto elingasoze lazikhohlwa ekuhambeni kwenu endaweni lezo?

UJack: Kunzima ukufika kwezinye indawo zeGuiana. Sijayele ukuhamba amakhilomitha angu-600 ngeviki emigwaqweni emibi. Asisoze silukhohlwe uhambo esalwenza sisiya eSt. Élie eguswini le-Amazon. Sahamba ngemota langesikepe futhi kwasithatha amahola amanengi ukuthi sifike khona. Abantu abanengi ababehlala lapho babegebha igolide. Abanye banikela ngegolide elincane bebonga amabhuku ethu. Ntambama sabatshengisa enye ividiyo yenhlanganiso. Kwabuya abantu abanengi bakuleyondawo.

UMarie-Line: UJack uke wacelwa ukuthi ayekwenza inkulumo yeSikhumbuzo eCamopi. Sahamba ngesikepe okwamahola amane eMfuleni u-Oyapock ukuze sifike endaweni leyo futhi lolo kwakuluhambo olumnandi.

UJack: Lapho amanzi ayemalutshwana khona kwakusiba lendawo eziyingozi ezazilamadwala futhi zilamanzi agijima kakhulu. Kuyachaza ukubona indlela amanzi ageleza ngayo endaweni enje. Umtshayeli wesikepe kumele abeyazi into ayenzayo. Salukholisa uhambo lolo. Lanxa kwakulaboFakazi abayisithupha kuphela kwaba labantu abangaba ngu-50 eSikhumbuzweni kugoqela lama-Amerindian.

UMarie-Line: Abasakhulayo bangazikholisa izinto ezinje nxa befuna ukwenzela uJehova okunengi. Kumele umthembe uJehova ngezikhathi ezinjalo futhi ukholo lwakho luzaqina. Sekukanengi sibona indlela uJehova asincedisa ngayo.

Selifunde indimi ezinengi. Kulula yini ukuthi lifunde indimi?

UJack: Hatshi. Ngafunda indimi lezo ukuze ngenelise ukutshumayela lokunceda abanye ebandleni. Ngaqala ngokuqhuba iSifundo SeNqabayokulinda ngesiSranantongo * ngingakaphiwa inkulumo yokubala iBhayibhili. Ngabuza omunye umfowethu ukuthi ngangiqhube njani, wathi: “Bekulalapho ebesingakuzwisisi khona kodwa wenze kuhle kakhulu.” Abantwana babengincedisa kakhulu. Babengitshela nxa ngingaphambanisa kodwa abantu abadala babezithulela. Ngafunda okunengi ebantwaneni labo.

UMarie-Line: Kwenye indawo ngangilezifundo zeBhayibhili ezikhuluma isiFrench, isiPortuguese lesiSranantongo. Omunye udade wangitshela ukuthi nxa ngifundisa ngiqalise ngolimi olunzima, isiPortuguese, ngicine ngengilujayeleyo. Ekuqaliseni ngangingazwisisi ukuthi kungani esitsho njalo.

Ngelinye ilanga ngangilomuntu engimfundisa ngesiSranantongo, omunye ngesiPortuguese. Sesisesifundweni sesiPortuguese, udade owayelami wathi, “Marie-Line, ngibona angani kulephutha lapha!” Ngananzelela ukuthi ngangikhuluma lowesifazana waseBrazil ngesiSranantongo kulokuthi ngikhulume laye ngesiPortuguese. Khathesi ngasengikuzwisisa ukuthi kungani udade lowana wathi  ngiqalise ngolimi olunzima ngicine ngengilujayeleyo.

Abazalwane balapho elake latshumayela khona bayalithanda kakhulu. Kuyini okwenza laba seduze labo?

UJack: IZaga 11:25 zithi: “Lowo ophanayo uzaphumelela.” Kasikudondeli ukuba lesikhathi labo lokubenzela ezinye izinto. Nxa kulungisiswa iWolu yoMbuso abanye bayake bathi kimi: “Yekela abamemezeli bakwenze lokhu.” Kodwa ngiyabaphendula ngithi: “Lami ngingummemezeli. Yikho ngiyabe ngifuna ukuba khona nxa kulomsebenzi okumele wenziwe.” Wonke umuntu uyafuna ukuthi ake abe yedwa. Lanxa kunjalo kasifuni lokhu kusivimbele ukuthi senzele abanye okuhle.

UMarie-Line: Siyazama ukutshengisa abafowethu labodadewethu ukuthi silendaba labo. Lokhu kwenza sibekwazi ukuthi kunini lapho abadinga khona umuntu ongasala ebakhangelele abantwababo kumbe ongayabathatha esikolo. Ngemva kwalokho siyantshintsha inhlelo zethu ukuze senelise ukubancedisa. Lokhu kwenza sibe ngabangane abaseduze labo ngoba siyabe sikulungele ukubasiza nxa bedinga uncedo.

Yiziphi izibusiso elizitholileyo ngokuncedisa lapho okulabamemezeli abalutshwana khona?

UJack: Ukuba senkonzweni yesikhathi sonke kusenze sathokoza empilweni. Sesibone indalo kaJehova etshiyeneyo. Lanxa besisehlelwa yibunzima, silokuthula kwengqondo ngoba siyakwazi ukuthi abantu bakaNkulunkulu bayasisekela loba ngaphi lapho esikhona.

Ngiseselijaha ngake ngabotshwa eFrench Guiana ngenxa yokwala ukungena esisotsheni. Ngangingacabangi ukuthi ngelinye ilanga ngizabuyela khona sengingumnali futhi sengisenelisa ukutshumayeza izibotshwa. UJehova uyaphana sibili nxa esibusisa.

UMarie-Line: Okungithokozisa kakhulu yikuncedisa abanye. Siyathokoza ukuba senkonzweni kaJehova. Kwenze lokuthi mina lomkami sibe ngamathe lolimi. Kwesinye isikhathi uJack uyangibuza ukuthi singanxusa yini umfowethu lomkakhe abakhathazekileyo ukuthi bazekudla lathi. Ngijayele ukumphendula ngisithi: “Lami bengicabanga khonokho!” Izikhathi ezinengi sicabanga okufananayo.

UJack: Ngisanda kubanjwa imvukuzane yabobaba (i-prostate cancer). Ngijayele ukutshela uMarie-Line amazwi la, lanxa engathandi ukuwezwa: “S’thandwa, nxa ngingafa kusasa angisoze ngife ‘sengiluphele.’ Kodwa ngizakufa ngisuthisekile ngisazi ukuthi ngisebenzise impilo yami ukukhonza uJehova, okuyikho okuqakathekileyo.”—Gen. 25:8.

UMarie-Line: UJehova usivulele iminyango ebesingakhangelelanga ukuthi angasivulela yona njalo usivumele ukuthi senze izinto esasingacabangi ukuthi singazenza. Kwenzakale izinto ezinengi ezinhle empilweni yethu. Sizahamba loba ngaphi inhlanganiso kaJehova esicela ukuthi siye khona ngoba siyathemba ukuthi uJehova uzahlala esincedisa.