Jack ni Marie-Line ari vamoha mmuteko wa elukuluku yoothene ovinyerya mu 1988. Awo asuweliwe ntoko achu aniikhoveleliha matorokelo, nave aheemererya orummwa woohiyanahiyana o Guadalupe ni Kiyana Fransesa. Ikulucu seiya piili, hiihaano sinathokororyiwa ni Epeteli yo Fransa. Hankooni nchekule vakhaani ni Jack and Marie-Line.

Tiheeni yooceenyenryeeni ovolowa mmuteko wa elukuluku yoothene?

Marie-Line: Miyaano kinnunwe o Guadalupe, nave vaavaa kaaryaaka mwaana, mu ikwaha sincipale kaanakhala nihiku noothene mmuteko woolaleerya ni amama. Awo yaari Namoona a Yehova amvai. Miyaano kinnaasivela achu, nyenya vaavaa kaamalinhaaka ohuserya mu 1985, kaapacerya opiyoneera.

Jack: Vaavaa kaaryaaka mmiravo, mu ikwaha sincipale kaaneeca ni anna yaawo yaari mmuteko wa elukuluku yoothene yaawo yaasiveliwa ni muteko woolaleerya. Kaanasiveliwa orumeela ntoko piyoneero ookhaviherya mu elukuluku kaakhumaaka iferiya osikola. Ikwaha ikina omakuchuwelo wa esumana, naanawela ikaaro wi nalaleerye mu ikulucu sa mapiyoneero. Naanalaleerya nihiku noothene, nave wookuchulani wa nihiku naanaya ophareya. Yaakhala elukuluku yoohakalaliha!

Evinrevo elukuluku vakhaani kimanle opaka othela ni Marie-Line mu 1988, miyaano kaapacerya wuupuwela: ‘Hiyaano nri ootaphuwa. Ntakhara heeni ohipharihela ekari yeela wi nipake sincipale mmuteko woolaleerya?’ Voocharela, miyaano tho kaahipacerya opiyoneero. Evinrevo eyaakha emoha, naahivolowa mu Esikola ya opiyoneero nave voocharela, naahiwompwa orumeela ntoko mapiyoneero avameekhaaya. Naahikhalano mirici mincipale soohakalaliha o Guadalupe, nave voocharela naahiwompwa wi narumeele o Kiyana Fransesa.

Moovira wa iyaakha mwaahikhalano matorokelo mancipale mu orummwa anyu. Tiheeni enookhaviheryaani wiikhoveleliha ni mikhalelo mivyaani?

Marie-Line: Anna o Peteli yo Kiyana Fransesa yaanasuwela wi yoorepa ahu yavamurimani ti Isaiya 6:8. Mwawiihiiha, vaavaa yaaniichanaaya mu telefone, yaapacerya oloca moochekulela: “Munnuupuwela tiivi eri yoorepa enoosivelaani?” Hiyaano naanasuwela muchaka ene: matorokelo a orummwa. Nyenya hiyaano naanaakhula: “Hiyo nri va! Munirume!”

 Echu nnasepaahu opaka ori olikanyiha. Wakhala wi ninnalikanyiha orummwa ahu muvyaani ni wakhalai, nnahaala opacerya ohivaha esisapo orummwa muvyaani. Nave tho ninnakhala ootaphuwa waasuwela phaama anna ni arokora ahu.

Jack: Yohintoko weereya wi asinthamwene akina enileela wi nihipake matorokelo. Yaahikhalano mathowa oophwanelela; hiyaachuna wi nrakamelane. Nave vaavaa naakhummaahu o Guadalupe, munna mmoha aahinuupuserya masu a Yesu mu Mateu 13:38: “Emaca ene ti elapo ya vathi.” Mwawiihiiha, vaavaa nnaakhelaahu matorokelo, ninnuupuwela wi nlelo nnalapa mu emaca emohamoha, moohipwacha mpuro taani. Echu yoochuneyaxa ori okhalano mpuro wa olaleerya ni achu a waalaleerya.

Vaavaa nnaphiyaahu mu ekulucu evyaani, ninnoona wi achu mukuma yoowo anakhala oohakalala. Mwawiihiiha, ninneererya okhalaka moolikana ni yaawo. Yoolya enamukhala yoohiyana, nyenya hiyaano ninnalya yeeyo awo analyaaya ni owuurya yeeyo anawuryaaya, nyenya nikhalakano ekaasoope ni mukhalelo wa esipanti. Ilukuluku soothene ninniilipiserya oloca phaama orummwa ahu.

Marie-Line: Ninnahuserya sincipale ni anna a vanipuroni. Miyaano kinnuupuwela wi, vaavaa naaphin’yaahu o Kiyana Fransesa, naatepa orumpwa epula nihiku noothene. Naahuupuwela: ‘Niweherye epula emaale wi nipacerye olaleerya.’ Nyenya murokora mmoha aaloca: “Munoona hai? Nnapwaha?” Kaahiloca mwawaakuveya: “Ncimule ni epula ene?” Nave owo aahaakhula: “Omukuxe kwartaxuuva nave niwele ecika.” Naari nihiku nenno kihusenryaaka ompharela kwartaxuuva kiniiha keecihaka ecika mu elukuluku emohamoha. Yaahikhala phaama, woona wi nkaahaala olaleerya mu elukuluku ya epwila!

Nyuwaano moothaama ikwaha khumi nathanu. Sooleeliherya taani vooloca sa othaama munavahereryaanyu?

Marie-Line: Othaama onanwerya okhala nikacamiho. Nyenya ti woochuneya okhalano mpuro yoowo muchu oneereiye ooneke ntoko owaani amanle okhuma mmuteko woolaleerya.

Jack: Kinnasiveliwa oopintaara mpuwa wa empa ahu evyaani. Vaavaa anna Opeteli yaasuwelaaya wi hinaahaala olekela mu orummwa muvyaani, awo yaanaloca eriki: “Jack ekwaha ela honaphwanela okhala awuukhuwa vooloca sa opintaari mpa.”

Marie-Line ookhalano mavyakelo a omaka maphuta! Owo onnahela ichu soothene mukaaxani nave onnahela eneneeryo emoha ti emoha: “otumpusi,” “okwartu,” “okusinya,” ni ikina. Nave, vaavaa nnaphiyaahu mu empa evyaani, onnakhala wookhweya okuha ikaaxa soothene mmapuro oophwanelela. Ohiya  yeeyoru Marie-Line onnapaka elista ya ichu inaphwanyeya mpuwa mwa ikaaxa. Eyo ennanikhaviherya ophwanya mwawaakuveya yeeyo nnachunaahu.

Marie-Line: Woona wi noohuserya okhala ooreheryeya, ninnawerya opacerya muteko mwawaakuveya.

Munawerya hai wiirehererya wi nwerye ‘waakhwaniherya muteko anyu?’—2 Tim. 4:5.

Marie-Line: Hiyaano ninnapharihela nihiku na Noomorela Muteko wi niichuuwe nave nrehererye mithukumano. Nihiku na Nanaawiili oya ohoolo ninnakhuma mmuteko woolaleerya.

Jack: Eparipari wi nookhalano iwora sooluluwanya wi naakhwaniherye, nyenya hannakhala ooweiwa ni yeeyo. Echu eri yoochuneya mookumini mwahu ori olaleerya. Ovinyerya elukuluku nnakhumaahu owaani ophiyerya elukuluku nnakookelaahu owaani, ninneererya oloca ni achu oothene nnaphwanyaahu.

Marie-Line: Ntoko yootakiherya, ilukuluku soothene kinnakuxa ifolyeto vaavaa nnayaahu ochekula ni anna. Achu akina annarwa wa hiyo nave annaniveka soolaleeryiwa, naamwi nihaalenle wi na Anamoona a Yehova. Nuupuwelaka sa yeeyo, ninnakhalano ekaasoope ni ikuwo nnawaraahu vamoha ni meecelo ahu. Achu annavarerya ichu seiya.

Jack: Ninnavaha tho onamoona moorweela wa okhala amwaacamani aphaama. Miyaano kinnacocela ipapeli vacheyani, kinnaviihamo ikokhola mu nipuro naya nave kinnavela makukhu amorenle vaate. Amwaacamani annakoona nave vakina vaya annakoha: “Apwanne mookhalano Piipiliya wi mukivahe?”

Nyuwaano moopaka mikwaha mincipale wi mwalaleerye mu ikulucu soorakamela. Apwanne mikina sa seiyo saari savameekhaaya wa nyuwo?

Jack: O Kiyana, ti woovila ophiyawo mu ikulucu ikina. Vakina vaya, naanamaliha esumana neecaka mastatiya oopwaha 600 mu iphiro soonanara. Ekwaha emoha, naasekurya o Saint-Élie, ekulucu ya ntakhwa no Amasonika—ti yoohicuwaleya! Wi niphiye weiwo, naaphwanela weeca iwora sincipale ni ekaaro off-road //4x4// ya trasau mu maroota oomasese ni pophoro a mutore. Achu ancipale a ekulucu yeele yaari alipa awaavya ewooro. Akina a yaawo yaasiveliwa vancipale ni soolaleeryiwa nave, ntoko yooveleela, yaanivaha ewooro vakhaani. Ohiyu, naawooniha exilema emoha ya marehereryo ahu. Nave achu ancipale yaahirwa.

Marie-Line: Hiihaanoru, Jack aahiwompwa wi aperekhe mwaha wa Mukonelo mu ekulucu yo Kamopi. Wi niphiye weiwo, naaheeca iwora xexe ni pophoro a mutore mmuhice Oiapoque. Yaari yaweereya yoohakalalihaxa.

Jack: Veeri va muhice, maahi annatepa ochimaka mwawuupa nave ennakhala yawoopiha. Kiloce wi ti yootikhiniha woona maahi oothene erwaaka mwakuru mmakupa a pophoro. Mulipa oomweeciha pophoro onaphwanela osuwela echu onapakeiye. Nyenya yaari yaweereya yavameekhaaya ni yoohakalaliha. Anamoona a Yehova yaaphin’ye va Mukonelo yaari athanu nammoha, nave yaakhalavo achu awaakhwana 50 yaaruule, ophitaanyerya indígenas.

Marie-Line: Muchu ori mmiravo nave onachuna opaka sincipale mmuteko wa Yehova, onanweryatho okhalano saweereya soohakalaliha ntoko seiha. Nyuwaano munaphwanela omuroromela Yehova mmikhalelo seiya, nave nroromelo nanyu ninnakhala noolipa. Ikwaha sincipale ninnoona ntata na Yehova nnikhaviheryaka.

Nyuwaano moohuserya ilocelo sincipale. Apwanne onakhala wookhweya wa nyuwo ohuserya?

Jack: Tahi wookhweya. Koohuserya ilocelo nthowa nawi yaari yoochuneya. Kaaphwanela weeciha yoohuserya ya Mulipeleli mu elocelo Sranantongo * naamwi kahaavahiwe makupa a waalakhanya a Piipiliya! Kaahimukoha munna mmoha waakhanle wi kaakhumelela phaama. Owo aahaakhula: “Hiniwenrye wiiwexexa masu makina, nyenya moopaka phaama.” Anamwane yaananikhaviherya vancipale. Achu awunnuwelavo hiyanleela wakhala wi nooloca masu ooheseya, nyenya anamwane yaanaloca. Koohuserya sincipale ni yaawo.

Marie-Line: Mu ekulucu emoha, kaakhalano soohuserya sa Piipiliya mu elocelo ya efransa, ekunya ni sranantongo. Murokora mmoha aahiloca moonelo awe: “Opacerye weeciha soohuserya sa ilocelo seiyo iri soovila, nave vookuchula weecihe sa ilocelo sookhweya.” Mwawaakuveya kaawerya woona mukhalelo moonelo ole waaryaaya waphaama.

Vanihikuni, kaanachuna weeciha soohuserya piili,  yoopacerya mu elocelo sranantongo nave yanaawiili mu ekunya. Vaavaa kaapacenryaaka yanaawiili, murokora yoowo aakihonle aaloca: “Marie-Line, miyaano kinuupuwela wi yookhala echu ehesen’ye.” Kaahiiwexexa echu yaahesen’ye: ohiya omuhusiha muthiyana o Prasili mu ekunya, kaaloca ni elocelo sranantongo!

Nyuwo munnasiveliwa ni anna a mmiloko mwaarumeelaanyuwo. Munawerya hai opaka onthamwene waphaama ni anna?

Jack: Masiposipo 11:25 oni: “A murima wooleva onarwa aacano.” Hiyaano ninnasiveliwa okhala ni anna ni opaka ichu ntakhara yaawo. Wakhala woochuneya orehererya Empa ya Omwene, akina annaloca ni miyaano: “Mwaahiyere alaleeryi muteko yoola.” Nto miyaano kinnawaakhula: “Phaameene, miyaano tho ka mulaleeryi. Wakhala wi wookhalavo muteko onaphwanela opakiwa, kinachuna okhaviherya.” Eparipari wi oothene ahu ninnachuna omaliha elukuluku nri meekhihu, nyenya ninnuupuwela omaliha elukuluku nri meekhihu ehinimaalihe oweerela saphaama akina.

Marie-Line: Hiyaano ninniilipiserya waapwacha anna. Ntoko yootakiherya, wakhala wi munna onnamuchuna muchu wi aakhapelele anaawe naari waakeriha osikola, hiyaano ninnapaka marehereryo wi niwerye omukhaviherya. Ti yeeyo enaneeriha okhaleno onthamwene woolipa ni anna: okhala ooreheryeya waakhaviherya vaavaa awo anachunaaya.

Mareeliho taani mwaakhenlaanyu orumeela weiwo oriwo othowa otokotoko?

Jack: Okumi ahu ti woohakalalihasa nthowa na muteko wa elukuluku yoothene. Naahikhalano ekari ya okhala vakhiviru va soopatusiwa ni woona ichu soohiyanahiyana seiho Yehova opatunseiye. Hiyaano noohoolela makacamiho makina, nyenya nookhalano murecele wa mmuupuweloni nthowa wi noosuwela wi, moohiphwacha weiwo nryaahuwo, nookhalano nikhaviheryo na nloko na Muluku.

Vaavaa kaaryaaka mmiravo, kaawaleliwa mukariposo o Kiyana Francesa nthowa na ohivolowela miyaha seelapo. Nkintonko wuupuwela wi nihiku nikina kaahaala okookelawo ntoko misiyonaariyo ni weemereryiwa osekurya ikariposo ntoko murummwa a malapelo. Chiryene Yehova mulipa amahala vooloca sa mareeliho yaawo onanivaheiye!

Marie-Line: Echu emoha enakivaha ohakalala wawaaca ori waakhaviherya akina. Nootepa ohakalala okhala mmuteko wa Yehova. Eyo ennaneeriha okhala awiiwanana ntoko mutheli. Ikwaha ikina Jack onnaloca: “Mutheli ammoori ori oothanana. Apwanne nnahaala waawopa wi nlye vamoha?” Nave ilukuluku sincipale miyaano kinnaakhula: “Miyaano tho kuupuwela yeeyo!” Tihiiha eneereyaaya.

Jack: Hiihaanoru, koosuwela wi kookhalano ereca ya kanser. Naamwi Marie-Line ahisiveliwaka kaalocaka sa yeela, miyaano koomuleela: “Mwaaraka, waakhanle wi kikhwe omeelo, nkaahaala okhwa kiri ‘awuuluvala.’ Nyenya kaahaala okhwa kiri aweeliwa murima, woona wi, koosuwela wi kookhala ni ekumi yoosareya ni ichu soomunepani, seiho sirino mphurelo aya.”—Map. 25:8.

Marie-Line: Yehova oohula milako seiyo nahaaweheryaahu nave owo oheeriha wi nipake ichu seiho nahintonkwaahu waanyiherya. Nookhalano ekumi yoosareya ni ichu saphaama. Hiyaano nnamuroromela moomalela Muluku, nave wakhala wi marehereryo awe aaniveka oya makupa makina, ti weiwo nnayaahuwo!