Ipan 1988, Jack niman Marie-Line san sekan opeuj chikauak kitekichiuiliaj Jehová. Kimixmatij ken akin nochiuiyan nomatij, niman yokinejkej miyekan tlapaleuiskej ne kampa noixmati ken Guadalupe niman Guayana Francesa. Aman Sucursal de Francia kiyekana tenojnotsalistli ipan yejuin kalpamej. Aman achijtsin imiuan titlajtlajtoskej.

¿Tleka onenkinejkej chikauak nenkitekichiuiliskej Jehová?

Marie-Line: Oninoskalti ne Guadalupe, nochipa nitenojnotsaya iuan nonan, kemantika tisetonalouayaj. Nonan melak kuelitaya tenojnotsas. Pampa melak nikuelita nikinpaleuis oksekimej, ijkuak onitlan ninomachtia escuela ipan 1985, oninochiuj precursora.

Jack: Ijkuak nitelpochtli katka, nochipa ninosentlaliaya imiuan tokniuan akin chikauak kitekichiuiliayaj Jehová niman melak nikuelitaya nitenojnotsas. Ijkuak xtomachtiayaj ipan escuela, ninochiuaya precursor auxiliar. Kemantika, itlamiyan semanas, tikajsiyaj autobús niman nochi tonajli tontenojnotsayaj imiuan precursores. Sakin, tiayaj itenpan mar. Melak techyolpaktiaya yejon.

Oninonamikti iuan Marie-Line ipan 1988. Sakin oniknemili: “Uelis más tiktekichiuiliskej Jehová. Xtlaj techtsakuilia”. Ika yejon, oninochiuj precursor, ijkon ken Marie-Line. Se xiuitl sakin ika otiajkaj ipan Tlamachtijli tlen kiselia se Precursor, opeuj titlapaleuiyaj ken precursores especiales. Miyekan otitlapaleuijkej ne Guadalupe, ompa melak otechyolpakti tiktekichiuiliskej Jehová. Sakin otechtitlankej Guayana Francesa.

Nemejuamej miyekan yonentlapaleuijtinenkej. ¿Tlenon yomechpaleui xmomatikan kampa mechtitlanij?

Marie-Line: Tokniuan akin nemij Betel de Guayana Francesa kimatstoyaj ika melak tikuelitaj tlen kijtoua Isaías 6:8. Yejua ika, ijkuak techuajnotsayaj ipan teléfono, miyekpa ijkin techkamanaluiayaj: “¿Nenkilnamikij tlen tlaxelojli melak nenkuelitaj?”. Ijkuak ijkon techijliayaj, nimantsin tikmatiyaj ika oksekan techontitlaniskiaj, kuakon, tejuamej tikijtouayaj: “¡Nikan tinemij! ¡Xtechtitlanikan!”.

 Xuelis tiyolpakis kampa mitstitlaniskej tla san tiknemilijtika ika kampa tinemiya más kualtsin katka, yejua ika, xtikuelitaj ijkon tikchiuaskej. Kampa tajsiyaj, nimantsin tokojtiliayaj tikimixmatiskej tokniuan.

Jack: Yeuejkaui, sekimej toamigos akin techtlasojtlayaj techijliayaj maka oksekan matitlapaleuitij, pampa kinekiyaj nisiuj imiuan matinemikan. San ika, ijkuak oksekan otiajkej niman otijkaujkej kalpan Guadalupe, se tokniuj otechijli tlen okijto Jesús ipan Mateo 13:38. Ompa kijtoua ika ipan nochi tlaltikpaktli uelis titokaskej. Ika yejon, ijkuak oksekan techtitlanij, tikilnamikij ika san kanon uelis titenojnotsaskej. Noneki tikintlasojtlaskej nochimej tlaltikpakchanejkej, yejon tlen más ueyi kijtosneki.

Ijkuak oksekan tajsij, tikimitaj ika akin ompa chanejkej nemij ika iyojlo. Ika yejon, tikyejyekouaj tinemiskej ijkon ken yejuamej. Tijkuaj tlen yejuamej kikuaj niman tikonij tlen yejuamej konij. San ika, noijki totlajpiyaj maka tikualoskej. Nochipa kuajli titlajtouaj itech kalpamej kampa yotitlapaleuijkej.

Marie-Line: Noijki miyek tiuelij intech tokniuan akin ompa chanejkej. Kuajli nikilnamiki tlen opanok ijkuak kemach otejkokej Guayana Francesa. Chikauak kiyaujtoya, kuakon otiknemilijkej ika nonekiya tikchiaskej makisa atl niman ijkon tontenojnotsaskej. San ika, se tokniuj siuatl onechijli: “¿Itiauej?”. Onimojkatlachix niman oniktlajtolti: “¿Kenon tiaskej?”. Onechijli manikajsi noparaguas niman manitlejko ipan nobicicleta. Ijkon oniuel nikistinemi ipan bicicleta chika nikajsitiuj paraguas. Tla xijkon nikchiuaskia, niknemilia ika xkeman nitenojnotsaskia nochi xopantlaj.

Nemejuamej kanaj kaxtoltipan yonemochanpatlakej. ¿Uelis nentechijliskej tlenon uelis kinpaleuis akin kinekij oksekan ontlapaleuiskej?

Marie-Line: Kemantika ouijtika ijkuak se nochanpatla. Melak kuajli tla tikpiya kanon uelis timoseuis tla yotitenojnotsato, kampa uelis timomachilis ika moyojlo.

Jack: Nochipa ijkuak tochanpatlaj, niktlapaluia tokal ken tejuamej tikuelitaj. Kemantika tokniuan akin nemij sucursal kimatiyaj ika xtiuejkauiskiaj kampa techontitlaniskiaj, ika yejon, nechijliayaj: “Jack, aman maski maka xtlapalui mokal”.

Marie-Line melak youel kenon tlatlajtlalis. Kikalakia nochi ipan cajas niman kinpepechouilia amatsitsintin kampa kijkuiloua “Baño”, “Kampa tikochij” niman “Kampa titlakualchiuaj”. Ijkon, ijkuak tajsij kampa techtitlanij, totoka tikmatij kanon  tikintlaliskej. Nosiuatsin noijki kijkuiloua tlenon kitlalia ipan cajas, ijkon totoka tiknextiaj tlen tiknekij.

Marie-Line: Pampa kuajli titlatlajtlaliaj, ueli nimantsin tipeuaj titenojnotsaj.

¿Kenon nenkichiuiliaj niman ijkon kuajli nenkichiuaskej nemotekiyo tlen mechmaka Jehová? (2 Tim. 4:5).

Marie-Line: Nochi lunes toseuiyaj niman tomachtiaj tlen tikitaskej ipan totlanechikoluan. Niman okseki tonaltin tontenojnotsaj.

Jack: Melauak ika noneki tikajxiltiskej seki horas, san ika, xsan ipan yejon titlanemiliaj. Titenojnotsaskej yejon tlen melak ueyi kijtosneki ipan tonemilis. Desde ijkuak tikisaj tochan hasta ijkuak tejkoj, tikyejyekouaj tikinnojnotsaskej nochimej akin tikinnextiaj.

Marie-Line: Ijkuak tonpaxalouaj, nochipa nikimitki seki tratados. Miyekej technisiuiyaj niman techtlajtlaniliaj amatlajkuiloltin maski nion xtikimijliaj ika tiiteixpantijkauan Jehová. Ika yejon, kuajli totlakentiaj niman tikchiuaj tlen kuajli. Nochi yejon kitaj tlaltikpakchanejkej.

Jack: Miyekej kuajli tlajtouaj itech Jehová pampa tikchiuaj tlen kuajli inpampa tovecinos. Nochipa nikololoua tlasoltsintli tlen xintok, nontlasolxinia niman noijki nikchipaua kampa tovecinos kintokaj xochimej. Miyekej kitaj yejon niman kemantika nechtlajtoltiaj: “¿Tikpiya se Biblia tlen uelis tinechmakas?”.

Miyekpa yonentlapaleuitoj kampa melak uejka. ¿Uelis nentechijliskej itlaj tlen nemopan onochiuj ipan yejon kalpamej?

Jack: Ipan Guayana Francesa, onokej seki kalpamej kampa melak ouijtika tajsis. Kemantika, ipan se semana, tiayaj kanaj 600 kilómetros (370 millas) ipan ojtin kampa melak xtlakualkan. Kuajli nikilnamiki ijkuak otitenojnotsatoj Saint Élie, ne Amazonia. Kachtopa otiajkej ipan se carro tlen san kanon ueli panoua, sakin otiajkej ipan se piragua, tlen tlachiasneki ken se lancha. Otiuejkaujkej miyek horas niman ijkon tajsiskej. Miyekej akin ompa chanejkej kitejtemouaj oro, yejon intekiyo. Yejua ika, pampa kitlasojkamatiyaj ika tikinmakayaj amatlajkuiloltin, sekimej otechmakakej oro tlen kuechtik. Ika tlayoua, otiktlalijkej se video itech ikalpan Jehová niman melak otojlantik.

Marie-Line: Ikipiya seki xiujtin, okijlikej Jack makipanoltiti ne Camopi on tlamachtijli tlen notemaka ijkuak noilnamiki imikilis Cristo. Otikchiujkej naui horas ipan piragua ipan atentli Oyapock. Melak otikuelitakej.

Jack: Ipan atentli, kipiya kampa melak koxoni atl, ijkon panoua pampa ompa xuejkatlan. Melak temojkatlachialti ijkuak ompa timonisiuijtias. Akin kiyekana yejon piragua, noneki kuajli kichiuas itekiyo. Maski ijkon topan onochiuj, melak otikuelitakej. Maski san chikuasemej iteixpantijkauan Jehová oyajkej ijkuak onoilnamik imikilis Cristo, onosentlalijkej kanaj 50 tlaltikpakchanejkej, noijki oyajkaj sekimej akin ompa chanejkej.

Marie-Line: Telpokamej akin kinekij más kitekichiuiliskej Jehová noijki uelis inpan nochiuas tlen melak temojkatlachialti. Ijkuak yakaj ijkon ipan nochiua, chikaui itlaneltokil pampa noneki tlaneltokas itech Jehová. Miyekpa yotikitakej kenon Jehová techpaleuiya.

Nemejuamej yonenuelkej miyek tlajtoltin. ¿Kanaj pampa melak nentlamachilisejkej?

Jack: Ka, xijkon. Nejua oniuel pampa nonekiya niuelis. Se tonajli, ononek nikpanoltis se tlamachtijli itech Amatl Tekakistilijketl ika tlajtojli sranangtongo, * san ika, nion xkeman nikamapouaya Biblia ika yejon tlajtojli. Sakin oniktlajtolti se tokniuj tla onechasikamatkaj, niman onechijli: “Seki xmás otikasikamatkej, san ika, kuajli otikpanolti”. Kokonej melak onechpaleuijkej, pampa yejuamej kema nechijliayaj kampa ninopopolouaya. Melak onechpaleuijkej yejon kokonej.

Marie-Line: Ipan se kalpan kampa tinemiyaj, nitemachtiaya ika francés, portugués niman sranangtongo. Se tokniuj siuatl onechijli ika kuajli yeskia tla kachtopa nitemachtiaya ika tlajtojli tlen xmás niueliya niman sakin ika tlajtojli tlen más niueltoya.  Kachtopa xnikasikamatiya tleka ijkon nechijliaya.

Se tonajli, nikomintaskia akin nikinmachtiaya. Kachtopa onikmachtito akin tlajtoua sranangtongo, sakin onikmachtito akin tlajtoua portugués. Ijkuak nitemachtijtoya, tokniuj siuatl akin iuan niaya onechijli: “Marie-Line, nesi xmitsasikamati”. Ijkuakon onikitak ika nikmachtijtoya yejon siuatsintli ika sranangtongo, san ika, yejua ualeuaya Brasil niman tlajtouaya portugués.

Tokniuan akin chantij kampa yonentlapaleuitoj melak mechtlasojtlaj. ¿Tlenon yonenkichiujkej niman ijkon kuajli imiuan nemouikaskej?

Jack: Proverbios 11:25 kijtoua: “Yejuan kuelita tepaleuis kiselis tlen kuajli”. Nochipa tiknektokej tikinpaleuiskej oksekimej. Ijkuak itlaj noneki noyektlalis ipan Kajli kampa tosentlaliaj, sekimej tokniuan nechijliaj: “Xkinkauili tenojnotskej makichiuakan yejon tekitl”. San ika, nejua nikinnankilia: “Nejua noijki nitenojnotsketl. Tla onka tekitl, noijki nikneki nitepaleuis”. Melauak ika tinochimej tiknekij toseuiskej, san ika, nejua iuan nosiuatsin xtijkauiliaj ika yejon matechtelti tikinpaleuiskej oksekimej.

Marie-Line: Tikyejyekouaj tikinpaleuiskej tokniuan. Ijkon tikmatij tla kinekij yakaj makintlajpiya inkoneuan noso makimanati ipan escuela. Kuakon, tikitaj kenon tikchiuiliskej niman ijkon uelis tikinpaleuiskej. Yejon kichiua melak kuajli imiuan matouikakan niman matikinpaleuikan ijkuak nonekis.

¿Kenon yomechteochiuj Jehová pampa yonentlapaleuijkej kampa xmiyekej akin tenojnotsaj?

Jack: Melak yotechyolpakti chikauak tiktekichiuiliskej Jehová. Miyekpa, yotitlapaleuijkej kampa nisiuj tikitaj tlen Jehová yokichijchiuj. Niman maski yotikixnamijkej miyek tlemach, tinemij ika toyojlo pampa tikmatstokej ika maski san kanon tinemiskej, ikalpan toTajtsin nochipa techpaleuis.

Ijkuak nitelpochtli katka, onechtsaujkaj Guayana Francesa pampa xoniknek ninochiuas soldado. Xkeman oniknemili ika nikan nitlapaleuiskia ken misionero niman nontenojnotsaskia kampa miyekej tsauktokej. Kuajli yonikitak kenon Jehová melak teteochiua.

Marie-Line: Nechyolpaktia nikinpaleuis oksekimej. Melak tikuelitaj tiktekichiuiliskej Jehová. Yejuin noijki yotechpaleui más matotlasojtlakan. Kemantika, Jack nechtlajtoltia tla uelis tiknotsaskej se tokniuj iuan isiuatsin akin najmanaj niman ijkon touan matlakuakij. Miyekpa nikijlia ika noijki yejon niknemilijtoya. San nochipa ijkon panouani.

Jack: Ikipiya seki xiujtin, tlapajtikej onechijlikej ika nikpiya cáncer de próstata. Niman maski Marie-Line xkuelita kikakis yejuin, nejua nikijliani: “Nosiuatsin, tla mostla ninomikilia, xninomikiliskia tla pampa yoniueuentsintiak. San ika, xkilnamiki ika niyolpaki pampa oniktekichiuili Jehová chika niyoltoya, niman yejon tlen melak kualtsin” (Gén. 25:8).

Marie-Line: Jehová yotechkauili miyekan matiktekichiuilikan niman matikchiuakan miyek tlemach tlen nion xtiknemiliayaj. Yejua melak yotechteochiuj. Tejuamej tiaskej san kanon techtitlanis Jehová pampa kuajli tikmatstokej ika yejua techpaleuis.