Mkwasu Jack na kalongosi Marie-Line ankhala mu utumiki wa nthawi zonse kufumila mu 1988. Ndipo oziŵika cifukwa ca kuzitwala kwao na kunkhala okonzeka kucinja malo. Alondela mautumiki osiyanasiyana ku Guadeloupe na French Guiana. Madela aŵili aŵa onse oyanganiliwa na Ofesi ya Msambo ya ku France. Tiyeni tilaŵizhyane na mkwasu Jack koma soti kalongosi Marie-Line.

Kansi n’cinji cekusonkhezelani kuti muyambe utumiki wanthawi zonse?

Marie-Line: Nekulila ku Guadeloupe, nthawi ziyakine nenzokonda kulalikila na amama amene enze Mboni yacangu. Nenzokonda ngako ŵanthu cakuti penesilizhya sukulu mu 1985 neyamba upainiya.

Jack: Nikali mlumbwana, nenzokonda kunkhala na ŵanthu amene ali mu utumiki wanthawi zonse. Nenzokonda kucita upainiya woyavya ngati tavalila sukulu. Pa wikendi tenzokwela basi nakuyolalikila na apainiya ayakine m’magawo yao. Tenzolalikila siku yonse, pavuli pake tenzokuya kumbali kwa nyanja, masiku yala tenzosangalala ngako soti.

Pavuli pakuti nalungula Marie-Line mu 1988, nezikonsha kuti, ‘pofwana kuti tiliye vinyinji vocita, kansi tingalekelenji kuseŵenzesha nthawi yasu kucita utumiki?’ Nane neyamba upainiya. Pavuli pa caka cimozi petesilizhya sukulu ya apainiya, teikiwa kunkhala apainiya apadela. Tenkhala na mwai wocita mautumiki osiyanasiyana ku Guadeloupe tikaliyosengewa kuti tikatumikile ku French Guiana.

Ponkhala kuti mwelondelapo mautumiki osiyanasiyana, n’cinji cekuyavyani kuti mukwanishe kutumikila luweme kumalo yonse yacilwendo yemwetumikilako?

Marie-Line: Akwasu a ku Beteli ya ku French Guiana enzoziŵa kuti lemba yatukonda ngako ni Yesaya 6:8. Ngati atitumila foni enzokonda kutikonsha moseka kuti, “Kansi mukumbukila lemba yamukonda ngako?” Akatiuzhya teti tenzoziŵilatu kuti niye kuti tilondele utumiki uyakine. Nase tenzolaŵila kuti, “Seo tilipo titumeni!”

Tenzoyesayesa kupewa kulinganizhya utumiki watalondela na utumiki wetenze nao. Kucita izi  sembe kwetipangisha kusayamikila utumiki watalondela lombapano. Kulikonse kwaatitumizhya tenzoyesayesa kuziŵa akwasu na azilongosi.

Jack: Nthawi zakuvuli, ayasu ayakine amene enzotikonda enzofuna lini kuti tikuke na colinga cakuti tikonkhala pafupi na ove. Petefuma ku Guadeloupe, mkwasu muyakine etikumbusha mau a Yesu opezeka pa Mateyu 13:38 akuti: “Munda ni calo” tetyo ngati tacinjiwa utumiki olo tatumizhyiwa ku malo ayakine niye kuti tili m’dela imozimozi. Ŵanthu na dela niye ofunika ngako!

Ngati tafwika mu gawo iyakine tenzoona kuti ŵanthu akwamene uko enzokwanisha kunkhala mwacimwemwe. Tetyo tenzoyesesa kunkhala monga ni mweenzonkhalila ŵanthu a kudela kwamene uko. Nangu kuti vakulya vaakulya ku dela kwamene uko ni vosiyana na vetenzokulya, tenzocinja noyamba kulya nao. Tenzoyesayesa kulaŵila vinthu volimbikisha pa utumiki ulionse watalondela.

Marie-Line: Tuyesayesa kuphunzila kwa akwasu na azilongosi a kudela kwamene uko. Nukumbukila vecitika petefwika ku French Guiana. Kwenzolokwa mvula, tetyo tenzoganiza zoiyembekeza kuti isile tikaliyokuya kuyolalikila. Koma pavuli pake kalongosi enikonsha kuti, “Kansi nimwe okonzeka kuluta kuyolalikila?” Modabwa neyankha kuti, “mukuti tyani?” Eyankha kuti, “Tolani ambulela yanu, tilute na njinga.” Tetyo nephunzila mokatila ambulela uku nucova njinga. Kuti niliyophunzile sembe nenzokwanisha lini kulalikila m’nthawi ya mvula!

Mwacinjiwa utumiki nthawi zokwanila 15. Kansi mungaŵalimbikishe tyani ayakine amene acinjiwa utumiki?

Marie-Line: Kucinjacinja malo n’kovuta. Olo n’tetyo cingankhale cofunika kupeza malo aweme opumulilako mukafuma mu utumiki.

Jack: Kuti tinkhale na malo aweme opumulilako tikafuma mu utumiki, nenzokonda kupenta m’ng’anda. Akwasu ku ofesi ya msambo, enzoganizila kuti payakine tinkhaleko lini nthawi itali ku dela kwamene uko, tetyo enzokonda kulaŵila nane moseka kuti, “mkwasu Jack usavutike nopenta m’ng’anda!”

Mkazi wangu Marie-Line ni kaswili pankhani yolonga katundu, pokuka enzolonga katundu m’mabokosi nolembapo luweme pa bokosi iliyonse mwacisanzo, “vakukhicini,” “volalapo”. Ngati  tafwika m’ng’anda tungotola tyala bokosi noiika kumalo yofunikila. Pa bokosi iliyonse enzolembapo vinthu vili m’bokosi. Enzocita teti kuti tikokwanisha kuvipeza kamangu vinthu vatufuna.

Marie-Line: Cifukwa cophunzila kulonga vinthu mwadongosolo, tenze okonzeka kucita utumiki nthawi yamene iyo.

Kansi mupanga tyani ndandanda yanu kuti mukwanilishe utumiki wanu?”​—2 Tim. 4:5.

Marie-Line: Pamande paliponse, tupumula nokonzekela misonkhano. Koma kufumila pa ciŵili tuluta mu utumiki.

Jack: Nangu kuti tenzoseŵenza maola anyinji mu utumiki mwezi ulionse, tenzoika lini maganizo ŵasu pa maola yataseŵenza. Kulalikila niye yenze nchito yofunika ngako kuli seo. Tikafuma pa ng’anda, tenzoyesayesa kulalikila ŵanthu alionse ŵatingakumane nao mpaka nthawi yokomboka.

Marie-Line: Ngati taluta kuyotandala kumalo ayakine, nenzokonda kunyamula matrakiti. Ŵanthu ayakine enzowela kuzosenga zofalisa olo kuti tiliyoŵauzhye kuti nise Mboni za Yehova. Cifukwa cakuti ŵanthu oona kavwalidwe na kacitidwe kasu ka vinthu, tenzoyesayesa kuvwala moyenela.

Jack: Tucitila umboni mwa kucitila ŵanthu ayakine vinthu viweme. Nenzoyola mapepa notaya vinyanswa. Ŵanthu ŵetenzonkhala nao pafupi enzoona venenzocita, ndipo nthawi ziyakine enzokonsha kuti, “Kansi muliko na Baibo kuti munipaseko?”

Mwenzolalikila ku madela akutali. Kansi mukumbukilako vinthu viyakine vapadela vecitika pa maulwendo ŵanu?

Jack: Madela ayakine ni ovuta kulalikila ku Guiana. Kanyinji tenzoyenda msenga wa makilomita 600 pa wiki, koma soti njila zenze ziipa. Kuluta ku St. Élie wamene ni munzi uli m’nkhalango ya Amazon ni cinthu cosaluŵika. Teyenda maola yanyinji na motoka koma soti boti kuti tikafwike kwamene uku. Ŵanthu anyinji onkhala kudela yamene iyi nchito yao ni kukumba golide. Cifukwa coyamikila zofalisa zasu, ayakine enzotipasa tumapisi twa golide monga copeleka. Siku iyakine mcingulo, teŵaonesha mavidyo ŵasu ndipo anyinji ewela kuzoonelela.

Marie-Line: Kwalombapano, mulume wangu Jack esengewa kuti akalaŵile nkhani ya Cikumbuso ku munzi woitiwa kuti Camopi. Teyenda maola 4 na boti pa m’mana wa Oyapock, ndipo zenze zolimbikisha.

Jack: Ngati manzi ni yatontho mu m’mana cunkhala covuta kutauka na boti cifukwa ingagunde ku miyala. N’cinthu cocitisha cidwi kuona manzi oyenda mofulumila. Oyendesha boti ofunika kuziŵa bwino motaukila. Ici cenze cokumana naco colimbikisha. Nangu kuti kwenze tyala Mboni 6, ŵanthu pafupifupi 50 epezeka pa Cikumbuso, kuyangizhyilapo amwenye a ku America.

Marie-Line: Acilumbwana angankhale na zokumana nazo zolimbikisha ngati ocita zinyinji potumikila Yehova. Mufunika kudalila Yehova pa vocitika voteti, ndipo cikhulupililo canu cingankhale cotang’a. Panthawi yatankhala tutumikila, taona mwamene Yehova watiyavyila.

Lomba muziŵa vilaŵilo vinyinji. Kansi cenze cipepu kuphunzila vilaŵilo vamene ivi?

Jack: Yai. Nephunzila vilaŵilo vamene ivi kuti nikolalikila, noyavya ayakine mumpingo. Nenzofunika kusogoza Nsanja ya Mulonda m’cilaŵilo ca Cisranantongo, * nikaliyoŵelenga Baibo. Nenzokonsha mkwasu ngati zenenzolaŵila zenzomvwika. Yove eyankha kuti, “Mau ayakine yenzovuta kuti tiyamvwe, koma mwalaŵila bwino.” Ŵana eniyavya ngako, cifukwa ngati naphonya enzoniuzhya, koma akulu-akulu enzolaŵila lini ciliconse. Nephunzila zinyinji kuli ŵana.

Marie-Line: M’gawo iyakine, nenzosogoza maphunzilo a Baibo m’Cifrench, Ciportuguese koma soti m’Cisranantongo. Pofwana kuti nenzosogoza maphunzilo anyinji, kalongosi muyakine eniuzhya kuti nikoyambila kusogoza maphunzilo m’cilaŵilo camene nenzociziŵa lini ngako, nosilizhyila na cilaŵilo canuziŵa. Pavuli pake neona phindu ya malangizo yecinipasa.

 Siku iyakine, nenzosogoza maphunzilo aŵili m’Cisranan tongo na m’Cifrench. Peneyamba kusogoza yaciŵili, kalongosi wetenze naye elaŵila kuti, “Marie-Line, naona kuti pali vuto.” Nenzolaŵila na munakazi wa ku Brazil m’cilaŵilo ca Cisranantongo m’malo mwa Ciportuguese.

Ŵanthu ŵemwenzotumikila nao enzokukondani ngako. Kansi zekwanishika tyani kuti ayakine akukondeni?

Jack: Miyambo 11:25 yufotokoza kuti: “Munthu wopasa mowolowa manja alondele mphoto.” Tenzokonda kutandala na ŵanthu noŵayavya. Pankhani yokhuza kuwamya Ng’anda ya Ufumu, ayakine eniuzhya kuti: “Lekani kuti ofalisa acite nchito iyi.” Koma nelaŵila kuti: “Nane n’ne wofalisa. Tetyo ngati pali nchito yofunika kuti icitiwe, nufunika kucilikiza.” Nangu kuti tili na vinyinji vocita, tikokumbukila kuti paliye cingatileshe kucitila ayakine ziweme.

Marie-Line: Tuyesayesa kuonesha cidwi kuli akwasu na azilongosi. Tikacita teti, tingaziŵe ngati ofuna kuŵasungilako ŵana olo kuŵatolelako ŵana ku sukulu. Tingacinje zocita zasu kuti tikopeza mipata yoŵayavya. Mwa njila iyi, tingankhale pa ushamwali na ayakine mwa kunkhala okonzeka kuŵayavya ngati ofunikila thandizo.

Kansi mwelondela madaliso otyani cifukwa cotumikila kudela kufunika anchito anyinji?

Jack: Talondela madaliso anyinji cifukwa cocita utumiki wanthawi zonse. Nthawi zonse tenzoona cilengedwe ca Yehova tetyo tenzosangalala naco. Nangu kuti tenzokumana na mavuto, tenzonkhala na mtendele wa m’maganizo poziŵa kuti tenzoyavyiwa na ŵanthu a Mulungu kulikonse kwatingankhale.

Penenze mlumbwana, nemangiwa ku French Guiana cifukwa cosaloŵelela m’ndale. Nenzoganizilako lini soti zoŵelelako monga m’mishonale, nololewa kuyamba kulalikila m’jele. Kulaŵila cendi, Yehova watidalisa.

Marie-Line: Nili na cimwemwe ngako soti cifukwa cozitwala noyavya ayakine. Nise osangalala cifukwa cotumikila Yehova. Kutumikila Yehova kwatiyavya kunkhala okatizhyana monga banja. Nthawi ziyakine alume ŵangu enzonikonsha ngati tingaitileko banja iyakine ku cakulya, yamene yenzofunika cilimbikiso casu. Nenzoyankha kuti, “pali tyala luweme, nane nenzoganizila zamene izo.” Izi niye zetenzokonda kucita.

Jack: Lombapano enipeza na matenda ya prositeti kansa. Mkazi wangu ofuna lini kumvwa kuti nulaŵila zamene izi, koma numuuzhya kuti, ‘Wokondeka, nangu ningafwe lelo, ningafwe nili na cikumbumtima ciweme koma soti okhutila cifukwa naseŵenzesha umoyo wangu potumikila Yehova.’—Gen. 25:8.

Marie-Line: Yehova etisegulila mwai wa utumiki wamene tiliyouyembekezele. Tankhala na umoyo wapindu ngako soti. Mwacidalilo tingalaŵile kuti kulikonse kwamene gulu ya Yehova ingatitume nise okonzeka kuluta.