Jack le Marie-Line ba thomile go hlankela gotee tirelong ya nako e tletšego ka 1988. Ka ge ba kgona go fetofetoga le maemo, ba ile ba amogela dikabelo tše dintši kua Guadeloupe le French Guiana. Ga bjale modiro wa go bolela ditaba tše dibotse dinageng tše ka bobedi o hlokometšwe ke lekala la France. Anke ga bjale re boledišaneng le Jack le Marie-Line Bergame.

Ke’ng seo se ilego sa le dira gore le tsenele tirelo ya nako e tletšego?

Marie-Line: Ke goletše kua Guadeloupe, gomme ge ke be ke sa gola gantši ke be ke eya tšhemong le mma, yo e bego e le Hlatse ya Jehofa yeo e fišegago. Ka ge ke rata batho, ge ke se no fetša sekolo ke ile ka thoma go bula madibogo ka 1985.

Jack: Ge ke be ke sa le mofsa, ke be ke phela le batho bao ba lego tirelong ya nako e tletšego bao ba bego ba rata tšhemo. Ge dikolo di be di tswaletšwe ke be ke tšea bobulamadibogo bja go thuša. Gantši mafelobekeng re be re sepela ka pese re yo šoma le babulamadibogo ba bangwe tšhemong ya bona. Re be re šoma tšhemo letšatši ka moka, ke moka ge re tšhaiša re be re eya lewatleng. Re be re ipshina kudu!

Ka 1988 ka moragonyana ga go nyalana le Marie-Line, ke ile ka ipotšiša gore: ‘Ke ka baka la’ng re sa hlankele Jehofa ka mo go oketšegilego ka ge re se na maikarabelo a mantši?’ Ke ile ka thoma go bula madibogo le Marie-Line. Ka morago ga go ya sekolong sa bobulamadibogo, re ile ra kgethwa go ba babulamadibogo ba kgethegilego. Pele re ka memiwa go yo hlankela kua French Guiana, re ile ra thabela go hlankela mafelong a mmalwa kua Guadeloupe.

Ka ge dikabelo tša lena di ile tša fetoga gantši mengwageng e fetilego, ke’ng seo se ilego sa le thuša go tlwaelana le maemo a mafsa?

Marie-Line: Bana babo rena ba kua Bethele ya French Guiana ba be ba tseba gore lengwalo leo re le ratago ke Jesaya 6:8. Ge ba be ba re founela, gantši ba be ba thoma ka go dira metlae gomme ba re botšiša gore: “Na le sa gopola gore le rata lengwalo lefe?” Ge ba be ba bolela seo, re be re tseba gore re tlo hwetša kabelo e mpsha. Ke moka re be re araba ka gore: “Ke Rena ba! Romang Rena”!

Ga re bapetše dikabelo tša rena tša kgale le kabelo e mpsha yeo re tla bego re e dira ka nako yeo, ka gobane seo se tla dira gore re se ke ra thabela kabelo yeo e mpsha. Le gona, ge re fihla kabelong e  mpsha re leka ka thata gore re gwerane le bana babo rena le dikgaetšedi.

Jack: Mengwageng e fetilego, bana babo rena ba bangwe le dikgaetšedi ba be ba sa nyake re huduga ka gobane ba be ba nyaka gore re no phela re na le bona. Eupša ge re be re huduga kua Guadeloupe, ngwanabo rena yo mongwe o ile a re gopotša mantšu a Jesu ao a lego go Mateo 13:38 ao a rego: “Tšhemo ke lefase.” Ka gona ge re hwetša kabelo e mpsha, re ikgopotša gore re sa šoma tšhemo e swanago go sa šetšwe gore re hlankela kae. Sa bohlokwa kudu ke ge go na le batho le tšhemo yeo re ka e šomago!

Ge re fihla kabelong e mpsha, re kgona go bona gore batho bao ba dulago moo ba kgona go phela moo ba thabile. Ka gona, re leka go phela ka tsela yeo ba phelago ka yona. Ka dinako tše dingwe dijo tša bona di fapana le tša mo re tšwago, eupša re ja seo ba se jago le go nwa seo ba se nwago. Le gona re kgonthišetša gore dijo tšeo di hlwekile e bile di ka se dire gore re babje. Re leka kamoo re ka kgonago ka gona gore re bolele gabotse ka kabelo e nngwe le e nngwe yeo re e hwetšago.

Marie-Line: E bile re thušwa ke go ithuta mo gontši go bana babo rena le dikgaetšedi ba moo re hudugetšego gona. Ke gopola selo se sengwe seo se ilego sa direga ka moragonyana ga gore re fihle French Guiana. Ka letšatši le lengwe go be go ena pula ya matlorotloro, ka gona re be re nagana gore re swanetše go emela gore pula yeo e khule pele re ka ya tšhemong. Kgaetšedi yo mongwe o ile a mpotšiša gore: “Na re ka ya tšhemong?” Ke maketše, ke ile ka mmotšiša gore: “Re tlo sepela bjang?” O ile a re: “Tšea amporela ya gago, re tlo sepela ka dipaesekela.” Ka yona nako yeo ke ile ka ithuta go namela paesekela ke swere amporela. Ge nkabe ke se ka ithuta, ke be nka se tsoge ke ile tšhemong ka sehla sa dipula.

Ka ge le ile la thotha ka makga a e ka bago a 15, na go na le ditšhišinyo tšeo le ka di neago bao ba nyakago go thothela tlhokagalong?

Marie-Line: Le ge go thotha go se bonolo, go bohlokwa gore o hwetše lefelo leo o tlago go iketla go lona ge o boa tšhemong.

Jack: Gantši ke penta maboto a ka gare ga ntlo yeo re sa tšwago go hudugela go yona. Ge bana babo rena ba lekaleng ba tseba gore re ka se dule kabelong e itšego nako e telele, ka dinako tše dingwe ba dira metlae ba re: “Jack o se ke wa itshwenya ka go penta lekgeng le!”

Marie-Line ke sekgwari sa go phutha. Ge a dutše a phutha, o tsenya dilo ka mapokising gomme a ngwala moo mapokising gore ke tša ka kamoreng efe. Ka gona ge re fihla legaeng la rena le lefsa, go ba bonolo go pakolla ka gobane re kgona go tšea mapokisi  ao gomme ra a iša ka dikamoreng tše di swanetšego. O ngwala gore go na le eng ka gare ga lepokisi le lengwe le le lengwe e le gore re kgone go hwetša seo re se nyakago kapejana.

Marie-Line: Ka ge re ithutile mokgwa wo wa go phutha, re kgona gore ge re fihla kabelong ya rena e mpsha re nape re thome ka go ya tšhemong.

Le kgona bjang go beakanya nako ya lena gore le “phethe bodiredi bja [lena] ka botlalo”?—2 Tim. 4:5.

Marie-Line: Ka Mošupologo re a khutša gomme ra lokišetša diboka. Ke moka go tloga ka Labobedi go fihla ka Sontaga re ya tšhemong.

Jack: Le ge re swanetše go fetša diiri tše itšego ka kgwedi re le tšhemong, ga re dule re naganne ka diiri tšeo. Selo sa bohlokwa go rena ke go ya tšhemong. Ge re no tšwa ka gae feela, re leka go boledišana le motho yo mongwe le yo mongwe yo re kopanago le yena.

Marie-Line: Ka mohlala, ke dula ke swere dipampišana le ge re eya pikiniking. Batho ba bangwe ba tla go rena ba re kgopela dikgatišo le ge re se ra tšwa re ba botša gore re Dihlatse tša Jehofa. Ka baka leo, re leka go apara gabotse le go itshwara gabotse ka dinako tšohle. Batho ba lemoga dilo tša go swana le tšeo.

Jack: Le gona re nea bohlatse ka go swara baagišani ba rena ka botho. Ke topa ditlakala le go di lahla, e bile ka swiela le ka ntle ga jarata. Batho ba bangwe ba lemoga se gomme ka dinako tše dingwe ba re: “Na ga le na Dibeibele?”

Ka ge le ile la šoma gantši ditšhemo tša kgole le mo le dulago gona, na go na le maeto ao le ka se tsogego le a lebetše?

Jack: Kua Guiana, go na le ditšhemo tšeo go lego thata go fihla go tšona. Gantši re be re swanelwa ke go sepela dikhilomithara tše 600 ka beke ditseleng tša go se sepelege. Re ka se tsoge re lebetše leeto leo re ilego ra le tšea la go ya motseng wa St. Élie kua dithokgweng tša Amazon. Go ile gwa re tšea diiri tše mmalwa gore re fihle moo re diriša sekepe le dikoloi tša go kgona go sepela ditseleng tša go se sepelege. Bontši bja batho bao ba bego ba dula moo ba be ba epa gauta. Ba bangwe ba be ba re nea maswikana a manyenyane a gauta go leboga dikgatišo tšeo re ba neilego tšona. Mantšiboa re be re ba bontšha e nngwe ya dibidio tša mokgatlo. Batho ba bantši ba motseng woo ba ile ba tla.

Marie-Line: Jack o ile a kgopelwa gore a tle a nee polelo ya Segopotšo motseng wa Camopi. E le gore re fihle moo, re ile ra tšea diiri tše e ka bago tše nne re sepela ka sekepe Nokeng ya Oyapock. Re ile ra thabela leeto leo.

Jack: Noka ye e be e le kotsi, kudukudu godimo ga maswika moo meetse a bego a elela ka lebelo. Go kgahliša kudu go bona meetse ao a elela ka lebelo godimo ga maswika. Mosesiši wa sekepe o swanetše go tseba seo a se dirago gore a kgone go sesa moo. Eupša re thabetše leeto leo kudu. Le ge re be re le Dihlatse tše 6 feela, Segopotšong seo re bile ba ka bago ba 50, go akaretša le Maindia ao a dulago Amerika.

Marie-Line: Bafsa bao ba nyakago go hlankela Jehofa ka mo go oketšegilego, le bona ba ka ipshina ka tsela ye. Maemong a go swana le a o swanetše go tshepa Jehofa, gomme seo se tla tiiša tumelo ya gago. Gantši re bona tsela yeo Jehofa a re thušago ka yona.

Ka ge le ithutile maleme a mmalwa, na go bonolo gore le ithute maleme?

Jack: Aowa. Ke ile ka ithuta maleme a gore ke kgone go thuša ka phuthegong le go ruta tšhemong. Ke ile ka swanelwa ke go swara Thuto ya Morokami ka Sesranantongo * le pele nka bala mmalo wa Beibele ka leleme leo. Ke ile ka botšiša ngwanabo rena yo mongwe gore ke swere bjang thuto yeo. O ile a re: “Ka dinako tše dingwe re be re sa go kwešiše, eupša o e swere gabotse.” Bana ba be ba nthuša kudu. Ge ke be ke dira diphošo, ke be ke phošollwa ke bana, e sego batho ba bagolo. Ke ile ka ithuta dilo tše dintši go bana.

Marie-Line: Tšhemong e nngwe ke be ke swara dithuto tša Beibele ka Sefora, Sepotokisi le Sesranantongo. Kgaetšedi yo mongwe o ile a nkeletša gore ge e ba mo letšatšing ke tlo swara dithuto tša Beibele ka maleme a go fapafapana, ke thome ka tša maleme ao ke sa a tsebego gabotse gomme ke feleletše ka tša maleme ao ke a tsebago gabotse. Mathomong ke be ke sa kwešiše gore ke ka baka la eng a ile a nnea keletšo yeo.

 Ka letšatši le lengwe ke ile ka swanelwa ke go swara dithuto tša Beibele tše pedi, ya mathomo e le ka Sesranantongo gomme ya bobedi e le ka Sepotokisi. Ge ke be ke le thutong ya bobedi, kgaetšedi yoo ke bego ke sepela le yena o ile a re: “Marie-Line, ke nagana gore motho yo ga a go kwešiše!” Ke ile ka lemoga gore ke be ke bolela le mosadi wa go tšwa Brazil ka Sesranantongo go e na le gore ke bolele le yena ka Sepotokisi. Bjale ke a kwešiša gore ke ka baka la eng kgaetšedi yoo a be a ile a nnea keletšo yeo.

Bana babo rena le dikgaetšedi bao le kilego la hlankela ditšhemong tša gabo bona ba le rata kudu. Le kgonne bjang gore le be le segwera se sebotse le bana babo rena ba?

Jack: Lengwalo la Diema 11:25 le re: “Moya o fago kudu o tla nontšhwa.” Ga re dikadike ge re swanetše go fetša nako le bana babo rena le go ba direla dilo. Tabeng ya go hlokomela Holo ya Mmušo, bana babo rena ba bangwe ba ile ba re go nna: “Tlogela bagoeledi ba e hlokomele.” Eupša ke ile ka ba araba ka gore: “Le nna ke mogoeledi. Ka baka leo, ge e ba go na le mošomo wo o swanetšego go dirwa, le nna ke nyaka go ba gona.” Le ge ka dinako tše dingwe re nyaka go ba noši, gantši ga re dumelele seo se re thibela go direla ba bangwe dilo tše dibotse.

Marie-Line: Re leka ka thata gore re bontšhe bana babo rena le dikgaetšedi gore re na le taba le bona. Ka go dira seo, re kgona go tseba ge ba nyaka motho yo a ka ba hlokomelelago bana goba go yo ba tšea sekolong. Re kgona go beakanya maemo a rena gore re kgone go ba thuša. Ka tsela ye, re kgona go ba le segwera se sebotse le bona gomme ra ba thuša ge ba hloka thušo.

Ke ditšhegofatšo dife tšeo le di hweditšego ka go hlankela moo go nago le tlhokagalo?

Jack: Ka ge re le tirelong ya nako e tletšego, re thabile kudu. Gantši re ba le nako ya go bona tlholo ya Jehofa. Le ge re lebeletšana le mathata, re ba le khutšo ya monagano ka gobane re a tseba gore batho ba Modimo ba a re thekga go sa šetšwe gore re hlankela kae.

Ge ke be ke sa le mofsa, ke ile ka golegwa kua French Guiana ka ge ke be ke sa nyake go ba lešole. Ga sa nka ka nagana gore ka letšatši le lengwe ke tla boela nageng ye ke le moromiwa gomme ka dumelelwa go ruta batho Beibele ka dikgolegong. Ruri Jehofa o re šegofaditše kudu!

Marie-Line: Ke thabišwa kudu ke go thuša batho ba bangwe. Le gona nna le monna wa ka re thabela go hlankela Jehofa tirelong ya nako e tletšego. E bile go hlankela Jehofa go tiišitše lenyalo la rena. Ka dinako tše dingwe o tla hwetša Jack a mpotšiša ge e ba re ka mema banyalani bao ba nyamilego gomme ba hloka go kgothatšwa gore ba tle ba je le rena. Ka dinako tše dingwe ge ke mo araba ke re: “Le nna ke be ke naganne bjalo!” Gantši re nagana go swana.

Jack: Ga se kgale dingaka di mpoditše gore ke na le kankere. Le ge Marie-Line a sa nyake go kwa taba ye, eupša ke mmoditše gore: “Le ge nka hwa gosasa, nka se hwe ke tšofetše kudu. Eupša ke tlo hwa ke thabile ka gobane ke tseba gore ke hlanketše Jehofa bophelo bja ka ka moka.”—Gen. 25:8.

Marie-Line: Jehofa o re neile dikabelo tšeo re bego ra sa nagane gore re tla di hwetša, a ba a re dumelela go dira dilo tšeo re bego re sa nagane gore re tla tsoga re di dirile. Re thabetše dilo tše dintši tše dibotse bophelong bja rena. Re tla ya kae le kae moo mokgatlo wa Jehofa o rego re ye gona, ka gobane re kgodišegile gore Jehofa o tla dula a na le rena.