Jack na Marie-Line bombi batwire omu buheereza bw’obutwire kuruga 1988. Ahabw’okurahuka kuhinduka n’embeera, babaasize kwikiriza obuheereza bw’emiringo mingi omuri Guadeloupe na French Guiana. Emyanya egi yombi hati neereebererwa ofiisi y’eitaagi eya France. Ka tubuuze Jack na Marie-Line ebibuuzo bimwe.

Niki ekyabahigire kuza omu buheereza bw’obutwire?

Maria-Line: Obu naabaire ndi omwana omuri Guadeloupe, nyowe na maawe tukaba nitukira kubuurira hamwe eizooba ryona. Ninkunda abantu, n’ahabw’ekyo ahonaaho ku naaherize kushoma omuri 1985, nkaba payoniya.

Jack: Omu bunyeeto, banywani bangye bakaba nibakunda kuheereza Yehova omu buheereza obw’obutwire. Nkaba ninkira kuba payoniya omuhwezi omu kihuumuro. Omu wiikenda, obumwe tukaba tukwata baasi kuza kubuurira na baapayoniya omu bicweka byabo. Tukaba tubuurira eizooba ryona reero bwanyima tuza aha mwaro. Ebiro ebyo bikaba nibishemeza munonga!

Bwanyima y’okutaaha omu bushwere na Marie-Line omuri 1988, nkateekateeka nti: ‘Titwine birikututeganisa, mbwenu shi ahabw’enki tutarikwongyera aha buheereza bwaitu.’ Nkegaita ahari Marie-Line naanye naaba payoniya. Bwanyima y’omwaka gumwe turugire omu ishomero rya baapayoniya, tukatooranwa kuba baapayoniya ab’omutaano. Tukaza omu buheereza bwingi oburikushemeza, omuri Guadeloupe tutakeetsirwe kuza omuri French Guiana.

Kumara emyaka obuheereza byanyu butwire nibuhinduka. Niki ekibahwereire kumanyiira embeera nsya?

Marie-Line: Ab’eishe-emwe aha Beseeli ya French Guiana bakaba nibamanya ngu nitukunda munonga Isaaya 6:8. N’ahabw’ekyo ku baabaire batweta, bakaba batugira bati: “Nimwijuka ekyahandiikirwe eki murikukunda munonga?” Obwo tukaba tumanya ngu haaza kubaho empinduka, n’ahabw’ekyo naitwe tukaba tugira tuti: “Turi aha! Mututume!”

Tukaba nitwetantara kugyeragyeranisa obuheereza bwaitu obw’enyima n’obusya, kugira ngu kitaturemesa  kusiima obu twine. Kandi nituteeraho kunywana ab’eishe-emwe omu buheereza bwaitu obusya.

Jack: Enyima, banywani baitu abamwe, bakateeraho kuturemesa kugyenda barikwenda ngu tugume haihi nabo. Kwonka ku twarugire omuri Guadeloupe, ow’eishe-emwe omwe akatwijutsya ebigambo bya Yesu ebiri omuri Matayo 13:38 ngu “omusiri n’ensi.” N’ahabw’ekyo obuheereza bwaitu ku burikuhinduka, nitweijutsya ngu tukiriyo nitukora omu musiri nigwo gumwe hoona ahu turikuba turi. Kasita, abantu n’ekicweka eki turikuba nitubuuriramu nibyo bikuru munonga!

Ku turikuhika omu kicweka kisya, nitureeba ngu haine abandi abarikutuurayo bashemereirwe. N’ahabw’ekyo, nituteeraho kutwaza nkabo. Eby’okurya nibibaasa kuba nibitaana, kwonka niturya ebi barikurya kandi nitunywa ebi barikunywa, turikwegyendereza aha bikwatiraine n’amagara gaitu. Nituteeraho kugamba kurungi ahari buri buheereza.

Marie-Line: Kandi ab’eishe-emwe b’omu kicweka ekyo nitubeegyeraho bingi. Ninyijuka ekyabaireho obu twabanza kuhika omuri French Guiana. Enjura ekaba neegwa munonga, twabanza kutegyereza ngu ehweyo tubone kuza kubuurira. Kwonka munyaanyazi-itwe akambuuza ati: “Oyeteekateekire tugyende?” Nshobeirwe, nkamubuuza nti, “Tuta shi?” Akangarukamu ati: “Kwata omutaka gwawe, reero tugyendere aha gaari zaitu.” N’ahabw’ekyo nkeega kuvuga egaari obwo nkwaitse n’omutaka. Ku ogire ngu tindeegire kukora ntyo, nkaba ntarikwija kubaasa kubuurira omu bwire bw’enjura!

Mubaasize kufuruka emirundi 15. Mwine obukoryo bw’okufuruka obu murikubaasa kugambira abandi?

Marie-Line: Okufuruka tikworobi. Kwonka nabwo, ni kikuru kutunga omwanya gw’okuhuumuriramu waagaruka orikuruga kubuurira.

Jack: Ninkira kusiiga erangi omu nju yaitu. Ab’eishe-emwe aha ofiisi y’eitaagi, ku baabaire bamanya ngu nituza kumarayo obwire bukye, bakaba bagira bati: “Jack, oteeteganisa orikusiiga erangi aha murundi ogu!”

Marie-Line naamanya kupakira gye ebintu! Ebintu byona naabita omu bibokusi reero ahandiikaho ngu, “n’eby’ekinaabiro,” “ekishengye,” “ekiyungu,” n’ebindi. N’ahabw’ekyo ku turikuhika omu nju nsya, nikitworobera kuta ebibokusi omu  bishengye ebihikire. Naahandiika buri kimwe eki yaata omu bokusi kugira ngu turahukye kutunga ekintu twaba nitukyenda.

Marie-Line: Ahabw’okugira ngu twegire kwetebeekanisa gye, nitutandika obuheereza bwaitu ahonaaho.

Nimukoresa gye muta obwire bwanyu ‘kuhikiza kimwe obuheereza bwanyu’?​—2 Tim. 4:5.

Marie-Line: Buri Rwokubanza nituhuumura kandi tutebeekanisiza enteerane. Kuruga Orwakabiri n’okweyongyerayo nituza omu kubuurira.

Jack: N’obu turaabe twine eshaaha ezi twine kuhitsya, ekyo tikyo turikutaho omutima. Okubuurira niyo ntima y’ebi turikukora byona. Twaruga tuti omuka kuhitsya obu turikugaruka, nituteeraho kugaaniira na buri omwe.

Marie-Line: Nk’eky’okureeberaho twaza kweshemezamu, ningyenda na turakiti. Abantu abamwe nibaija batushaba ebitabo, nangwa n’obu turikuba tutakabagambiire ngu turi Abajurizi ba Yehova. Niyo nshonga ahabw’enki nitwegyendesereza oku turikujwara n’oku turikutwaza. Abantu nibareeba ebintu nk’ebi.

Jack: Kandi nituha obujurizi turikuba abataahi barungi. Ninjambuura ebipapura, nnaga ebisasiro, kandi nyeyerera n’embuga. Eki bataahi baitu nibakireeba, kandi obumwe nibabuuza bati: “Noobaasa kuba oineyo Baibuli okagimpa?”

Obumwe nimubuurira omu byaro. Mwine orugyendo rw’omutaano orumurikwijuka?

Jack: Omuri Guiana, ebicweka ebimwe bigumire kubihikamu. Obumwe tukaba tugyenda mahiro 370 omu saabiiti emwe omu nguuto mbi. Na hati nitwijuka obu twataayaaya omu kyaro kya St. Élie, omu kibira kya Amazon. Kikatutwarira obwire kubaasa kuhikayo turikukoresa emotoka erikuraba n’omu kihandagazi n’obwato bwa ingini. Abantu baingi abarikutuurayo bakaba bari abatimbi b’ezaabu. Abamwe ahabw’okusiima ebitabo byaitu, bakahayo obucweka bw’ezaabu! Omu mwabazyo, tukabooreka emwe aha vidiyo z’ekibiina. Kandi baingi bakaija kugireeba.

Marie-Line: Obwire bukye enyima, Jack akashabwa kuha orubazo rw’Ekiijutsyo omuri Camopi. Kubaasa kuhikayo, tukagyendera omu bwato bwa ingini kumara eshaaha nyingi turikuraba aha Mugyera Oyapock. Eky’okureeberaho eki kikaba nikishemeza.

Jack: Ahu amaizi gari magufu omu mugyera ogwo kandi garikwiruka munonga aha mabaare, nigabaasa kuba ag’akabi. Okuba ow’amazima nikishemeza kureeba oku amaizi ago garikwiruka aha mabaare. Omuvugi w’obwato ashemereire kuba naamanya eki arikukora. Kwonka orugyendo orwo rukaba nirushemeza. N’obu haraabe haabaire hariyo Abajurizi ba Yehova 6 bonka, abantu nka 50 bakaija aha Kiijutsyo, otwariiremu n’Abahindi abarikutuura America!

Marie-Line: Abato abarikwenda kwongyera aha buheereza bwabo nibaija kutunga ebirungi nk’ebi. Omu mbeera ezi nooba oine kwesiga Yehova, kandi okwikiriza kwawe nikweyongyera kuhama. Nitukira kureeba amaani g’omukono gwa Yehova.

Mwegire endimi nyingi. Mwine ekiconco ky’okwega endimi?

Jack: Ngaaha buzima. Nkeega endimi ezi ahabw’okugira ngu hakaba hariho ekyetengo. Haine obu naayebembera Omunaara gw’Omurinzi omu rurimi rwa Siranantongo * ntakahaire n’orubazo rw’okushoma Baibuli! Nkabuuza ow’eishe-emwe oku naakora. Akagarukamu ati: “Obumwe twaba tutarikwetegyereza ebigambo ebimwe, kwonka waakora gye.” Abaana bakampwera munonga. Ku naabaire nkora enshobe, abakuru bakaba bahunama, kwonka abato bakaba bampabura. Nkeega bingi kuruga aha bato.

Marie-Line: Omu kicweka ekimwe, nkaba nyineyo abeegi ba Baibuli abarikugamba Orufaransa, Orupotuguezi, na Siranantongo. Munyaanyazi-tiwe omwe akampabura ngu ntandikye n’orurimi orugumire reero mpereerukye n’orworobi. Obuhabuzi obwo bukakora.

Eizooba rimwe, nkaba nyine omwegi wa  Baibuli omuri Siranantongo nyine n’ondiijo omu Rupotuguezi. Ku naatandikire kwegyesa owa kabiri, munyaanyazi-itwe ou naabaire ndi nawe akangira ati: “Marie-Line, ninteekateeka hariho oburemeezi!” Nkaijuka ngu ndiyo ningamba n’owa Brazil omu rurimi rwa Siranantongo omu mwanya gw’Orupotuguezi!

Abu murikuheereza nibabakunda munonga. Mubaasize muta kunywana ab’ab’eishe-emwe?

Jack: Enfumu 11:25 nihagira hati: ‘Omuntu efura naija kutunga.’ Titurikweziringa kwehayo ahabw’abandi. Aha bikwatiraine n’okuboneza Ekyombeko ky’Obukama, abamwe nibangira bati: “Reka ekyo ababuurizi bakikore.” Kwonka nimbagira nti: “Ku kiraabe kiri kityo, naanye ndi omubuurizi. N’ahabw’ekyo, ku harikuba hariho omurimo gw’okukora, niinyenda mbe ndiho.” N’obu twena turaabe nitukunda kwehereera, nituguma nitweijutsya ngu titurikwenda okwehereera kwaitu kuturemese kukorera abandi ebirungi.

Marie-Line: Nituteeraho kworeka ngu nitufayo aha b’eishe-emwe. Eki nikituhwera kumanya obu barikuba nibenda ow’okutsigira abaana baabo nari ow’okubaiha aha ishomero. Reero nituhindura omu ntebeekanisa zaitu kubaasa kuhwera. Eki nikitubaasisa kugira omukago murungi n’abandi, reero tubahwera kyayetengyesa.

Mutungire migisha ki ahabw’okuheereza ahu ababuurizi barikwetengwa munonga?

Jack: Tutungire emigisha mingi omu buheereza obu. Nitukira n’okwetegyereza ebihangirwe bya Yehova bitari bimwe na bimwe. N’obu turaabe tutungiremu oburemeezi, twine obusingye bw’omu biteekateeko ahabw’okumanya ngu abaheereza ba Ruhanga nibatushagika hoona ahu turikuba turi.

Omu bunyeeto, nkakomerwa omuri French Guiana ahabw’okuteejumba omu by’obutegyeki. Nkaba ntarikuteekateeka ngu ninyija kugarukayo ndi omumiisani, kandi nyikirizibwe kutaayaayira ebihome nk’omubuurizi. Buzima, Yehova n’efura omu kuha emigisha!

Marie-Line: Okushemererwa kwangye okurikukirayo n’okwehayo ahabw’abandi. Nitwesiima ahabw’okuba omu buheereza obu. Kandi butuhweraire kuhamya obushwere bwaitu. Obumwe, Jack naambuuza yaaba twine kweta omushaija n’omukazi we abahwairemu amaani kurya nabo. Obwire obwingi ningarukamu nti: “Naanye nikwo naaba ninteekateeka!” Eki nikikira kubaho.

Jack: Juba, baancebeire baashanga nyine ekookoro y’obushaija. N’obu eki kiraabe nikiteganisa Marie-Line, ninkira kumugira nti: “Nkunzi yangye, naafa nyenkyakare, nimba ntafa nyine ‘emyaka mingi.’ Kwonka nimba naafa mmazirwe, ndikumanya ngu mbaire ninta omutima aha by’omwoyo, ekimpweraire kutunga emigisha mingi.”​—Kut. 25:8.

Marie-Line: Yehova atuhaire obuheereza obu twabaire tutarikuteekateeka ngu nitwija kuzamu. Buzima tutungire ebirungi bingi. Ahabw’okwesigira kimwe Ruhanga, ahu ekibiina kye kirikutushaba kuza, niho turaagume nituza!